“Ko e Tokanga Taha kia Sīsū Kalaisi ʻi he Folofolá,” Ngaahi Taukei Ako Folofolá (2024)
Ko e Tokanga Taha kia Sīsū Kalaisi ʻi he Folofolá
Fakaʻuhingaʻí
Fakakaukau ke vahevahe ʻa e lea ko ʻeni ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:
Ko e taumuʻa mahuʻinga taha ʻo e folofola kotoa pē ko hono fakafonu ʻaki hotau laumālié ʻa e tui ki he ʻOtuá mo Hono ʻAlo ko Sīsū Kalaisí. (D. Todd Christofferson, “Ko e Tāpuaki ʻo e Folofolá,” Liahona, Mē 2010, 34)
Fakamahinoʻi ange ko e lahi ange ʻetau tokanga kia Sīsū Kalaisi ʻi he folofolá, ko e lahi ange ia ʻetau lava ʻo ako ʻiate Iá. ʻI heʻetau ako ʻiate Iá, ʻoku tupulaki leva ʻetau tui kiate Iá. ʻI heʻetau ako ʻa e folofolá, te tau lava ʻo tokanga taha ki Hono ngaahi huafá, ngaahi tuʻungá, mo Hono ngaahi ʻulungāngá. Te tau lava foki ʻo ʻilo ha ngaahi fakataipe mo e fakatātā ʻo e Fakamoʻuí ʻi he kakaí, ngaahi ouaú, ʻū meʻa, mo e ngaahi meʻa ʻoku hoko ʻa ia ʻoku tau akó. ʻOku akoʻi ʻe he folofolá ko e “ngaahi meʻa kotoa pē ʻa ia kuo ʻomai ʻe he ʻOtuá … ko e fakataipe ia kiate [Ia]” (2 Nīfai 11:4) mo “fakamoʻoniʻi [Ia]” (Mōsese 6:63).
Fakakaukau ke ʻoange ha tatau ʻo e laʻipepa tufa ko ʻení ki he tokotaha ako takitaha. Fakamahinoʻi ange ʻe ala tokoni hono ʻeke ʻa e ngaahi fehuʻi ʻi he laʻipepa tufá he lolotonga ʻetau ako ʻa e folofolá, ke tau ʻilo lelei ange ai ʻa Sīsū Kalaisi. Te mou lava ʻo lau fakataha mo e kalasí ʻa e ngaahi fehuʻí.
Ko e Tokanga Taha kia Sīsū Kalaisi ʻi he Folofolá
Ngaahi Huafá mo e Tuʻungá: ʻOku ʻuhinga nai ʻa e huafa pe tuʻunga ko ʻení ki he hā? (Kumi ʻi he ʻū meʻangāue ako folofolá hangē ko e futinoutí, Bible Dictionary, pe ngaahi maʻuʻanga tokoni kehe ʻi he ChurchofJesusChrist.org.) Ko e hā e meʻa ʻoku akoʻi mai ʻe he huafa pe tuʻunga ko ʻení fekauʻaki mo ʻeku fiemaʻu ha vā fetuʻutaki mo Sīsū Kalaisí?
Ngaahi Fakataipé: Ko e hā e meʻa ʻoku akoʻi mai ʻe he tokotaha, ouau, meʻa, pe meʻa naʻe hoko ko ʻení fekauʻaki mo Sīsū Kalaisi, ko ʻEne moʻuí, mo Hono misioná?
Natulá mo e ʻUlungāngá: Ko e hā ha meʻa te u lava ʻo ako fekauʻaki mo e natula mo e ngaahi ʻulungaanga ʻo Sīsū Kalaisí mei he potufolofola ko ʻení? ʻE tokoniʻi fēfē au ʻe he potufolofola ko ʻení ke u falala kakato ange ki he Fakamoʻuí mo ʻEne ngaahi talaʻofá?
Fakatātaaʻi
Fakaʻaongaʻi ʻa e ngaahi sīpinga ko ʻení pe ko haʻo sīpinga pē ʻaʻau ke fakatātaaʻi ʻaki e taukei ko ʻení.
|
Meʻa ke kumí |
Sīpinga ʻo e folofolá |
Ko e hā ha meʻa te u lava ʻo ako fekauʻaki mo Sīsū Kalaisi pea mo ʻeku vā fetuʻutaki mo Iá? |
|---|---|---|
Meʻa ke kumí Ngaahi huafá mo e tuʻungá | Sīpinga ʻo e folofolá Tupuʻanga (2 Nīfai 2:14; ʻĪsaia 40:28; Sione 1:3) | Ko e hā ha meʻa te u lava ʻo ako fekauʻaki mo Sīsū Kalaisi pea mo ʻeku vā fetuʻutaki mo Iá? ʻI he hoko ʻa Sīsū Kalaisi ko e Tupuʻangá, ʻokú Ne lava ai ʻo tokoniʻi au ke u fakatupu ha faʻahinga meʻa fakaʻofoʻofa mo mahuʻinga ʻi heʻeku moʻuí. |
Meʻa ke kumí Ngaahi Fakataipé | Sīpinga ʻo e folofolá Ngata ʻi he fuʻu poú (Nōmipa 21:6–9; Sione 3:14–15; Hilamani 8:14–15) | Ko e hā ha meʻa te u lava ʻo ako fekauʻaki mo Sīsū Kalaisi pea mo ʻeku vā fetuʻutaki mo Iá? Pea hangē ko hono fakamoʻui ʻo e huhu kona ʻe he ngatá ʻa e kakai ʻIsileli naʻe sio ki he ngata palasá, ko kinautolu ʻoku sio kia Sīsū Kalaisí, ʻe fakamoʻui kinautolu mei heʻenau angahalá. |
Meʻa ke kumí Natulá mo e ʻulungāngá | Sīpinga ʻo e folofolá “ʻE Tamai, ke fai pē ʻa ho finangaló, pea ke ʻoʻou ʻa e lāngilangí ʻo taʻengata” (Mōsese 4:2; vakai foki, Luke 22:41–44; 3 Nīfai 11:11). | Ko e hā ha meʻa te u lava ʻo ako fekauʻaki mo Sīsū Kalaisi pea mo ʻeku vā fetuʻutaki mo Iá? ʻOku loto-fakatōkilalo mo angavaivai ʻa Sīsū Kalaisí ki he finangalo ʻo e Tamai Hēvaní. ʻOkú Ne ʻoange taʻe-siokita maʻu pē ʻa e nāunaú mo e lāngilangí ki he Tamaí. |
Fakaangaanga
Fakaafeʻi ʻa e kau akó ke nau ako ha potufolofola mei he lau folofola ʻo e uike ní ʻoku ʻi ai ha huafa, tuʻunga, pe fakataipe ʻo e Fakamoʻuí pe ʻokú ne fakahaaʻi ha ngaahi tafaʻaki ʻo Hono natulá pe ʻulungāngá. Fakaafeʻi ke nau fakalaulauloto ki he ngaahi fehuʻi ʻi heʻenau laʻipepa tufá lolotonga ʻenau akó. Ka hili ha taimi feʻunga, pea fakaafeʻi ʻa e kau akó ke nau vahevahe ʻa e meʻa naʻa nau maʻú pea mo e meʻa kuo nau ako fekauʻaki mo Sīsū Kalaisi pea mo honau vā fetuʻutaki mo Iá.
Ngaahi potufolofola lahi ange ke ako mo fakalaulauloto ki ai:
-
Ngaahi Huafá mo e Tuʻungá: ʻĪsaia 9:5; Sione 10:11; Mōsaia 3:8; Tokāteline mo e Ngaahi Fuakava 45:3–5; Mōsese 7:53
-
Ngaahi Fakataipé: Sione 6:32–38, 51–58; 1 Nīfai 8:10–12; 11:21–22; Tokāteline mo e Ngaahi Fuakava 29:1–2; Mōsese 5:5–8
-
Natulá mo e ʻUlungāngá: Sēnesi 39:20–23; Sione 13:1, 4–5; Mōsaia 24:13–15; Tokāteline mo e Ngaahi Fuakava 18:10–13
Fakaafe pea Toe Vakaiʻi
Poupouʻi ʻa e kau akó ke nau fakaʻaongaʻi ʻa e taukei ko ʻeni ʻo e tokanga taha kia Sīsū Kalaisi ʻi he folofolá ʻi heʻenau fakahoko ʻenau ako fakatāutahá ʻi he toenga ʻo e semesitaá. Fakaafeʻi ke nau ōmai mateuteu ki he kalasi hono hokó, ke vahevahe ʻa e meʻa naʻa nau ako fekauʻaki mo Sīsū Kalaisí pea mo honau vā fetuʻutaki mo Iá, mei heʻenau ako fakataautaha ʻa e folofolá. Manatuʻi ke toe vakaiʻi, pea tuku ha taimi ʻi hoʻomou kalasi hokó ke vahevahe ai ʻe he kau akó ʻa e meʻa naʻa nau ʻiló. Te ke lava foki ʻo fehuʻi ange pe naʻe tākiekina fēfē ʻe he fakaangaanga ʻo e taukei ko ʻení ʻenau ako folofolá.