Pasiuna

Ang imong termino sa pagkabilanggo dili kinahanglan nga mao ang kasinatian nga motino sa tibuok nga dagan sa imong kinabuhi. Ang imong pagkatawo isip usa ka anak sa Dios walay kataposan, bisan pa sa pagkabilanggo. Ang pagpadayon inubanan sa hugot nga pagtuo ug pagsalig ni Jesukristo makatabang kanimo nga makakab-ot sa unsay Iyang gusto nga ikaw mahimo sa umaabot. Motabang Siya kanimo nga magpuyo og malipayon ug makahuloganon nga kinabuhi.

Ang kinabuhi atol ug human sa pagkabilanggo mahimong malisod. Ang pagpangita og trabaho ug kapuy-an, paglig-on sa mga relasyon, ug daghan pang mga aspeto sa inadlaw nga pagpakabuhi tingali mahimong komplikado sa adunay kriminal rekord. Bisan pa niining mga kalisdanan, wala ka mag-inusara. Pinaagi sa pagsunod sa mga pagtulun-an ni Kristo, mapalambo nimo ang imong kaugalingon ug makabiya sa mahuyang nimo nga mga panahon, dili maayong mga pagpili, ug malisod nga mga kasinatian sa nangagi. Ang Dios dili gayod mobiya kanimo. Ang Iyang gugma, mga panalangin, ug pagsalig diha kanimo mahimong mga tinubdan sa inadlaw nga kalig-on atol sa bisan unsa nga hagit (tan-awa sa Mateo 11:28–29).

Agig dugang sa Dios Amahan ug ni Jesukristo, ang imong pamilya, mga higala, ug ang Simbahan mahimong mga tinubdan sa tabang. Daghan usab ang maayong mga tawo nga adunay organisadong kumonidad ug kapanguhaan sa ahensiya nga nakatutok sa imong tinag-as nga kalamposan. Hinuon, hinumdomi nga kanunayng anaa ra kanimo ang paghimo og maayong mga pagpili nga makatabang nimo nga mouswag.

Ania ang pipila ka mga kinaiya nga makatabang nimo nga makigpares sa Manluluwas aron mausab ug molambo:

• Ipaduol ang imong kaugalingon ngadto sa Dios pinaagi sa pag-ampo, pagtuon sa kasulatan, ug pagpamalandong. Kining yano nga mga buhat modasig nimo sa paghimo og maayong mga pagpili ug motabang nimo aron makasabot ug mosalig ni Jesukristo isip imong Manluluwas ug higala.

• Paghimo og koneksiyon ngadto sa Simbahan. Kontaka ang imong mga lider sa Simbahan sama sa bishop, presidente sa branch, presidente sa korum sa mga elder (alang sa kalalakin-an), o presidente sa Relief Society (alang sa kababayen-an). Ipakigbahin nila ang imong kahimtang, lakip na ang imong pagkakabig ug ang imong mga paglaom sa umaabot. Kini nga mga lider makatabang nimo sa pagpalig-on sa imong kinabuhi ug sa pag-apil sa Simbahan.

• Padayona ang pagtuman sa tanang legal nga mga obligasyon, mga pagdili, ug mga sangpotanan. Ayaw pag-apil sa mga bisan unsa nga mga buhat nga makasupak sa mga kasabotan sa imong paggawas, parole, o probisyon o makapabalik sa pagkabilanggo. Pahibaloa kanunay ang tigdumalang mga awtoridad mahitungod sa imong kalamboan, mga panginahanglan, ug mga tinguha.

• Likayi ang mga higala, mga lugar, o mga estelo sa kinabuhi nga mosangpot sa pagkabilanggo og balik. Pangita og mga higala nga mosuporta nimo samtang magtinguha ka sa paghimo og positibo nga mga kausaban sa imong kinabuhi. Pangita og trabaho ug kapuy-an diha sa dapit sa imong komunidad nga motugot nimo nga motuman sa imong mga tumong sa paglambo ug motuman sa imong legal nga mga gipatuman. Gamita kini nga panahon sa imong kinabuhi sa pagtino sa imong kaugmaon. Pangayo og tambag gikan sa imong mga lider sa Simbahan mahitungod sa mga lokasyon sa pagpuyo ug sa luwas nga sosyal nga mga palibot.

Hinumdomi—gihigugma ka sa Dios, ug modasig Siya kanimo, mohatag kanimo og kusog sa pagtrabaho, ug mogiya kanimo ngadto kanila kinsa nga makatabang (tan-awa sa 1 Nephi 17:3).

5:30