« លោកុប្បត្តិ ៦–៨—‹ នោះណូអេ … តាមគ្រប់ទាំងសេចក្តីដែលព្រះយេហូវ៉ាបានបង្គាប់មក › » សៀវភៅសិក្សាព្រះគម្ពីរសញ្ញាចាស់សម្រាប់សិស្សថ្នាក់សិក្ខាសាលា ( ឆ្នាំ២០២៦ )
លោកុប្បត្តិ ៦–១១; ម៉ូសេ ៨ ៖ មេរៀនទី ២០
លោកុប្បត្តិ ៦–៨
« នោះណូអេ … តាមគ្រប់ទាំងសេចក្តីដែលព្រះយេហូវ៉ាបានបង្គាប់មក »
សូមមើល « ការសិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ព្រះបានបង្គាប់យើងដោយក្តីស្រឡាញ់ឲ្យគោរពតាមបទបញ្ញត្តិរបស់ទ្រង់ ។ បទបញ្ញត្តិខ្លះអាចពិបាកយល់ ប៉ុន្តែវាសម្រាប់ជាប្រយោជន៍ដល់យើងជានិច្ច ។ គ្រួសាររបស់ណូអេត្រូវបានសង្គ្រោះឲ្យរួចផុតពីទឹកជំនន់ ដោយសារពួកគេបានគោរពប្រតិបត្តិតាមព្រះបញ្ញត្តិរបស់ព្រះឲ្យសង់ទូកធំមួយ ។ មេរៀននេះអាចជួយអ្នកឲ្យបង្កើនបំណងប្រាថ្នារបស់អ្នកក្នុងការគោរពប្រតិបត្តិតាមព្រះបញ្ញត្តិរបស់ព្រះ ។
សិក្សាព្រះគម្ពីរ
តើពាក្យដំបូងអ្វីដែលអ្នកគិតដល់ នៅពេលអ្នកឮពាក្យ ព្រះបញ្ញត្តិ ? មនុស្សមួយចំនួនយល់ច្រឡំពីគោលបំណងនៃព្រះបញ្ញត្តិរបស់ព្រះ ។ នៅពេលអ្នកអាន ឬស្តាប់សម្រង់សម្ដីខាងក្រោមនេះ សូមកំណត់ពីគោលបំណងរបស់ព្រះក្នុងការប្រទានព្រះបញ្ញត្តិ ។
ព្រះបញ្ញត្តិ និងសេចក្ដីសញ្ញាដែលទ្រង់ផ្ដល់ឲ្យបងប្អូន ពុំមែនធ្វើសាកល្បងដើម្បីគ្រប់គ្រងបងប្អូននោះទេ ។ វាគឺជាអំណោយទានមួយដើម្បីលើកស្ទួយបងប្អូនឆ្ពោះទៅកាន់អំណោយទានរបស់ព្រះ ហើយត្រឡប់ទៅផ្ទះវិញ ដើម្បីជួបព្រះវរបិតាសួគ៌ និងព្រះអម្ចាស់ដែលស្រឡាញ់បងប្អូន ។ ( ហែនរី ប៊ី អាវរិង « កេរតំណែលនៃការលើកទឹកចិត្ត » លីអាហូណា ខែវិច្ឆិកា ឆ្នាំ២០២២ ទំព័រ១០០ )
ផែនការរបស់ព្រះរួមមាននូវការណែនាំសម្រាប់យើងដែលមាននៅក្នុងព្រះគម្ពីរ យើងហៅការណែនាំនោះថាជាបទបញ្ញត្តិ ។ បទបញ្ញត្តិទាំងនេះពុំមែនជាអ្វីដែលហួសសម័យ ហើយក៏ពុំមែនជាការប្រមូលផ្តុំតាមទំនើងចិត្តនៃការរំលោភលើច្បាប់ក្នុងគោលបំណង ដើម្បីគ្រាន់តែបំពាក់បំប៉នយើងឲ្យគោរពប្រតិបត្តិនោះទេ ។ បទបញ្ញត្តិទាំងនេះផ្សារភ្ជាប់ទៅនឹងការអភិវឌ្ឍបុគ្គលិកលក្ខណៈរបស់យើងស្តីពីភាពជាព្រះ ការត្រឡប់ទៅកាន់ព្រះវរបិតាសួគ៌យើងវិញ និងការទទួលអំណរដ៏យូរអង្វែង ។ ( ឌែល ជី រិនឡាន់ « Choose You This Day » Liahona ខែវិច្ឆិកា ឆ្នាំ២០១៨ ទំព័រ១០៥ )
ដំណើររឿងរបស់ណូអេក៏បង្រៀនអំពីគុណតម្លៃនៃព្រះបញ្ញត្តិផងដែរ ។
សូមអាន ម៉ូសេ ៨:១៧, ២០, ២២, ២៨–២៩ ។ សូមគូសសម្គាល់អ្វីដែលអ្នកបានរៀនអំពីស្ថានភាពរបស់ប្រជាជននៅជំនាន់របស់ណូអេ ។
ឥឡូវនេះសូមអាន លោកុប្បត្តិ ៦:១៤–២២; ៧:១–១២ ។ នៅពេលអ្នកអាន សូមគូសសម្គាល់អ្វីដែលព្រះអម្ចាស់បានបញ្ជាឲ្យណូអេធ្វើ ដើម្បីការពារអ្នកគោរពប្រតិបត្តិតាម ។
បន្ទាប់ពីអានចប់ហើយ សូមសរសេរកំណត់ចំណាំមួយនៅជាប់នឹង លោកុប្បត្តិ ៧:១២ ហើយឆ្លើយនឹងសំណួរខាងក្រោមនេះ ៖
-
តើដំណើររឿងរបស់ណូអេបង្រៀនអ្នកអ្វីខ្លះ អំពីគុណតម្លៃនៃព្រះបញ្ញត្តិរបស់ព្រះ ?
សូមពិនិត្យជម្រើសសិក្សាខាងក្រោមនេះឡើងវិញ ។ សូមបំពេញជម្រើសមួយ ឬច្រើន ។
ជម្រើស ក
ហេតុអ្វីជាញឹកញាប់យើងមានអារម្មណ៍ថាពិបាកកាន់តាមព្រះបញ្ញតិ្ត ?
ពេលខ្លះ វាអាចពិបាកក្នុងការយល់ថា ហេតុអ្វីបានជាព្រះអម្ចាស់ប្រទានព្រះបញ្ញត្តិមួយចំនួនឲ្យយើង ។
ប្រធាន ស្ពែនស៊ើរ ដបុលយូ ឃឹមបឹល ( ឆ្នាំ១៨៩៥–១៩៨៥ ) បានចែកចាយនូវហេតុផលមួយចំនួនដែលណូអេ និងគ្រួសារលោកត្រូវការសេចក្ដីជំនឿលើព្រះគ្រីស្ទ ដើម្បីបំពេញតាមព្រះបញ្ញត្តិក្នុងការសង់ទូកធំ ។
មកទល់ពេលនេះ មិនទាន់មានភស្តុតាងបញ្ជាក់ពីភ្លៀងធ្លាក់ និងទឹកជំនន់នោះទេ ។ ប្រជាជនរបស់ [ ណូអេ ] បានចំអក ហើយហៅលោកថា ជាមនុស្សល្ងង់ខ្លៅ ។ គ្មាននរណាស្ដាប់ការផ្សាយដំណឹងល្អរបស់លោកទេ ។ ការព្រមានរបស់លោកត្រូវបានគេចាត់ទុកថាជារឿងមិនសមហេតុផល ។ គ្មានព្រឹត្តិការណ៍ណាមួយពីមុនមកបានបង្ហាញថា ធ្លាប់មានទឹកជន់លិចដ៏ខ្លាំងមួយ [ ឬទឹកជំនន់ ]អាចពន្លិចផែនដីបាននោះទេ ។ ឱនោះជារឿងឆ្កួតលីលាដែលសាងសង់ទូកធំនៅលើដីស្ងួតដែលព្រះអាទិត្យកំពុងជះរស្មី រីឯជីវិតនានាកំពុងរីកលូតលាស់ជាធម្មតានោះ ! ( Teachings of Presidents of the Church: Spencer W. Kimball [ ឆ្នាំ២០០៦ ] ទំព័រ ១៤០–១៤១ )
តើព្រះបញ្ញត្តិមួយចំនួនរបស់ព្រះអម្ចាស់ដែលមនុស្សមិនអើពើ ឬសើចចំអកនៅសព្វថ្ងៃនេះមានអ្វីខ្លះ ? ហេតុអ្វីអ្នកគិតថា ណូអេ និងគ្រួសាររបស់លោកបានស្ម័គ្រចិត្តធ្វើតាមព្រះអម្ចាស់ ទោះជាមានហេតុការណ៍យ៉ាងណាក៏ដោយនោះ ?
ប្រធាន ថូម៉ាស អេស ម៉នសុន ( ឆ្នាំ១៩២៧–២០១៨ ) បានចែកចាយមេរៀនដ៏អស្ចារ្យបំផុតមួយដែលយើងអាចរៀនសូត្របាន ៖
ណូអេមានសេចក្ដីជំនឿដ៏មុតមាំដើម្បីធ្វើតាមបទបញ្ញត្តិរបស់ព្រះ ។ សូមឲ្យយើងធ្វើដូចគ្នានេះដែរ ។ សូមឲ្យយើងចងចាំថា ព្រះប្រាជ្ញារបស់ព្រះជាញឹកញាប់លេចឡើងហាក់ដូចជាភាពឆ្កួតលីលាដល់មនុស្ស ប៉ុន្តែមេរៀនដ៏អស្ចារ្យបំផុតដែលយើងអាចរៀននៅក្នុងជីវិតរមែងស្លាប់គឺថា នៅពេលព្រះមានព្រះបន្ទូល ហើយយើងគោរពប្រតិបត្តិតាម យើងនឹងធ្វើអ្វីដែលត្រូវជានិច្ច ។ ( « Models to Follow »Liahona ខែវិច្ឆិកា ឆ្នាំ២០០២ ទំព័រ៦១ )
តើព្រះអម្ចាស់បានប្រទានព្រះបញ្ញតិ្តអ្វីខ្លះ ដែលអ្នកបានទទួលពរជ័យដោយសារការគោរពប្រតិបត្តិតាម ?
សូមគិតអំពីព្រះបញ្ញត្តិពីរ ដែលអ្នកអាចគោរពប្រតិបត្តិតាមកាន់តែស្មោះត្រង់ជាងមុន ។ ឥឡូវនេះ សូមស្វែងរកនៅក្នុងព្រះគម្ពីរ និងប្រសាសន៍របស់ព្យាការីសម័យទំនើបនៅក្នុងសន្និសីទទូទៅ រកមើលការណែនាំអំពីរបៀបដែលអ្នកអាចរស់នៅតាមព្រះបញ្ញត្តិទាំងនោះបានកាន់តែប្រសើរឡើង ។ ឧទាហរណ៍ អ្នកអាចស្វែងរកការណែនាំអំពី ការដឹងគុណ ឬ ព្រហ្មចារីភាព ។
ជម្រើស ខ
តើការកាន់តាមព្រះបញ្ញត្តិរបស់ព្រះអម្ចាស់អាចការពារខ្ញុំពីអំពើបាបបានយ៉ាងដូចម្ដេច ?
ពរជ័យមួយដែលតែងតែមកពីការកាន់តាមព្រះបញ្ញត្តិទាំងឡាយ គឺការកាន់តែខិតជិតព្រះយេស៊ូវគ្រីស្ទ ។ លើសពីនេះទៀត ព្រះអម្ចាស់ក៏អាចប្រទានព្រះបញ្ញត្តិឲ្យយើង ដើម្បីរក្សាយើងឲ្យមានសុវត្ថិភាពពីគ្រោះថ្នាក់ផងដែរ ។
ទាំងណូអេ និងបងប្រុសរបស់យ៉ារេឌទទួលបានពរជ័យ តាមរយៈការធ្វើតាមព្រះបញ្ញត្តិរបស់ព្រះអម្ចាស់ នៅពេលពួកលោកបានសាងសង់ទូក ។ សូមអានឃ្លាខាងក្រោមនេះអំពីណូអេ និងបងប្រុសរបស់យ៉ារេឌ ។ នៅពេលអ្នកអាន សូមរកមើលភាពស្រដៀងគ្នានៅក្នុងព្រះបញ្ញត្តិដែលព្រះអម្ចាស់បានប្រទានឲ្យព្យាការីមួយរូបៗ ។
អ្នកអាចដាក់តំណភ្ជាប់វគ្គបទគម្ពីរទាំងនេះបាន ។
-
ណូអេ——លោកុប្បត្តិ ៦:១៤ ( កំណត់ចំណាំ ៖ ពរជ័រគឺជាសារធាតុដូចជាជ័រដែលប្រើសម្រាប់ការពារការជ្រាបទឹក ) ។
-
បងប្រុសរបស់យ៉ារេឌ—អេធើរ ២:១៦–១៧
សូមធ្វើការកត់ចំណាំមួយនៅក្បែរ លោកុប្បត្តិ ៦:១៤ ហើយពន្យល់ពីរបៀបដែលការធ្វើតាមព្រះបញ្ញត្តិរបស់ព្រះអម្ចាស់បានរក្សាណូអេឲ្យមានសុវត្ថិភាព ។
-
តើមានវិធីអ្វីខ្លះដែលយើងអាច « ពរជ័រ [ ជីវិតរបស់យើង ] ទាំងខាងក្នុងខាងក្រៅ » ខាងវិញ្ញាណ ដើម្បីការពារអំពើបាបមិនឲ្យចូលពន្លិចយើងបាន ?
សូមពិចារណាដាក់តំណភ្ជាប់កំណាព្យខាងក្រោមនេះដោយប្រធាន ប៊យដ៍ ខេ ផាកកឺ ( ឆ្នាំ១៩២៤–២០១៥ ) ទៅនឹង លោកុប្បត្តិ ៦:១៤ ។
ទឹកទាំងអស់នៅលើពិភពលោក
ទោះវាខំយ៉ាងណា
ក៏មិនអាចពន្លិចនាវាតូចបំផុតបានឡើយ
លុះត្រាតែវា [ ចូល ] ទៅខាងក្នុង ។
ហើយសេចក្ដីអាក្រក់ទាំងអស់ក្នុងលោក
អំពើបាបដ៏ខ្មៅងងឹតបំផុត
មិនអាចធ្វើឲ្យអ្នកឈឺចាប់បានឡើយ សូម្បីតែបន្តិច
លុះត្រាតែអ្នកអនុញ្ញាតឲ្យវាចូល ។
( អ្នកនិពន្ធមិនស្គាល់ឈ្មោះ ។ បានដកស្រង់ដោយ ប៊យដ៍ ឃេ ផាកកឺ « The Spirit of Revelation » Ensign ខែវិច្ឆិកា ឆ្នាំ១៩៩៩ ទំព័រ២៤ )
តើព្រះអម្ចាស់បានប្រទានព្រះបញ្ញត្តិណាខ្លះឲ្យអ្នក ដែលអាចជួយការពារអ្នកឲ្យមានសុវត្ថិភាពពីអំពើបាប ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យបង្កើនបំណងប្រាថ្នារបស់អ្នកក្នុងការគោរពប្រតិបត្តិតាមព្រះបញ្ញត្តិរបស់ព្រះ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ព្រះបញ្ញត្តិមួយ ឬពីរ និងពរជ័យនានាដែលអ្នកបានទទួល តាមរយៈការកាន់តាមព្រះបញ្ញត្តិទាំងនេះ ។
-
របៀបដែលការកាន់តាមព្រះបញ្ញត្តិទាំងនេះនៅក្នុងជីវិតរបស់អ្នក គឺដូចជាណូអេពរជ័រទៅនឹងទូកកុំឲ្យទឹកជ្រាបចូលដែរ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?