“Pagsangkap sa Atong Kaugalingong ug Pag-atiman Niadtong Nanginahanglan: Pagtabang sa Uban sama sa Buhaton sa Manluluwas,” Manwal sa Magtutudlo sa Seminary sa Daang Tugon (2026)
“Pagsangkap sa Atong Kaugalingong ug Pag-atiman Niadtong Nanginahanglan: Pagtabang sa Uban sama sa Buhaton sa Manluluwas,” Manwal sa Magtutudlo sa Seminary sa Daang Tugon
Pag-ugmad sa Pagbarog pinaagi sa Kinaugalingong Paningkamot: Leksiyon 180
Pagsangkap sa Atong Kaugalingon ug Pag-atiman Niadtong Nanginahanglan
Pagtabang sa Uban sama sa Buhaton sa Manluluwas
Makahunahuna ba kamo og usa ka tawo nga inyong kaila nga maayong ehemplo sa pagbarog pinaagi sa kinaugalingong paningkamot? Uban sa pagdasig sa Ginoo, si Jose sa Ehipto maoy maayo kaayong ehemplo niadtong nakahimo sa pagbarog pinaagi sa kinaugalingong paningkamot ug mitabang niadtong nanginahanglan, sama sa Manluluwas. Kini nga leksiyon makatabang sa mga estudyante nga mailhan ang mga paagi nga maka-ugmad og pagbarog pinaagi sa kinaugalingong paningkamot makapahimo nila sa pagtabang sa uban sama sa buhaton ni Jesukristo.
Pagpangandam sa estudyante: Dapita ang mga estudyante nga paminawon o basahon ang mga pulong sa himno nga “Ang Subo nga Magpapanaw” (Mga Himno, num. 20). Pwedeng mangita og paagi ang mga estudyante nga atong maatiman ang uban sama sa buhaton ni Jesus.
Posibleng mga Kalihokan sa Pagkat-on
Espirituwal nga mga oxygen mask
Ikonsiderar ang pagsugod sa klase pinaagi sa pagtabang sa mga estudyante sa paghisgot kon sa unsang paagi ang pagsangkap sa atong mga panginahanglan makapahimo nato nga mas makatabang sa uban. Usa ka paagi nga mahimo nimo kini mao ang pagpakita sa hulagway sa mga oxygen mask sa eroplano, nga lakip niini nga leksiyon, ug ang mosunod nga pamahayag.
Si Elder Neil L. Andersen sa Korum sa Napulog Duha ka Apostoles mitudlo:
Pipila ka semana ang milabay misakay ko og eroplano padulong sa South America. Ang flight attendant mipatan-aw namo og safety video. “Pwedeng dili mahitabo,” gipasidan-an mi, “apan kon ang cabin pressure mausab, ang mga panel ibabaw sa inyong lingkuranan moabli, mogawas ang mga oxygen mask. Kon mahitabo kini, kab-uta ug biraha ang mask padulong ninyo. Ibutang ang mask sa inyong ilong ug ba-ba. Ibutang ang mainat-inat nga higut diha sa inyong ulo ug i-adjust ang mask kon gikinahanglan.” Dayon kining pasidaan: “Siguradoha nga na-adjust ang inyong mask sa dili pa motabang sa uban.” (“Joseph Smith,” o Liahona, Nob. 2014, 30)
-
Nganong importante nga ibutang una nimo ang imong oxygen mask sa dili pa ka motabang sa uban?
-
Unsa ang pipila ka paagi nga magamit kini sa atong espirituwal ug temporal nga mga paningkamot sa pagsunod sa Langitnong Amahan ug kang Jesukristo?
Usa ka paagi nga magamit kini mao ang atong mga paningkamot aron maugmad ang pagbarog pinaagi sa kinaugalingong paningkamot para makatabang kita sa uban.
Makatabang usab tingali nga pahinumdoman ang mga estudyante nga gitambagan kita sa mga lider sa Simbahan nga palig-onon ang atong “kaugalingong pagpalambo sa pagbarog pinaagi sa kinaugalingong paningkamot pinaagi sa pagkugi sa pagtrabaho ug uban sa tabang sa Ginoo. Ang pagbarog pinaagi sa kinaugalingong paningkamot mao ang abilidad … sa pagsangkap sa espirituwal ug temporal nga mga kinahanglanon sa kinabuhi alang sa kaugalingon ug sa pamilya” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 22.0, Librarya sa Ebanghelyo).
Jose sa Ehipto
Natun-an na tingali sa mga estudyante ang istorya ni Jose sa Ehipto sa Leksiyon 35: “Genesis 42–45” o sa Leksiyon 178: “Pagpakitag Hugot nga Pagtuo diha kang Jesukristo sa Pag-ugmad sa Pagbarog pinaagi sa Kinaugalingong Paningkamot.” Pwedeng gamiton ang mosunod nga parapo aron pahinumdoman ang mga estudyante sa dagan sa istorya. Ingon nga alternatibo, pwede nimong dapiton ang usa ka estudyante nga iasoy ang istorya ni Jose sa Ehipto nga naa sa Genesis 42–45.
Si Jose sa Ehipto maoy usa ka pananglitan sa usa ka tawo nga mibarog pinaagi sa kinaugalingong paningkamot ug, ingon nga resulta, giandam sa Ginoo aron makatabang sa uban. Panahon sa gutom, mipanaw ang mga magulang nga lalaki ni Jose ngadto sa Ehipto aron mangitag lugas. Daghang natigom nga lugas ang Ehipto kay gitultolan sa Dios si Jose nga mangandam daan para sa gutom. Pag-abot sa mga igsoon ni Jose, nga nagtinguhag pisikal nga tabang, gipaila ni Jose ang iyang kaugalingon ingon nga ilang igsoon.
Basaha ang Genesis 45:4–11; 47:11–12, nga pangitaon kon giunsa pagpanalangin ni Jose ang iyang pamilya.
-
Unsay imong nakitang mga koneksiyon niini nga istorya ug sa ehemplo sa oxygen mask?
-
Unsang bahina sa asoy ni Jose ang nagpahinumdom nimo sa Manluluwas?
Tabangi ang mga estudyante nga mailhan ang kamatuoran nga sama niini: Samtang makabarog kita pinaagi sa kinaugalingong paningkamot uban sa tabang sa Dios, mas makatabang kita sa uban. Aron tabangan ang mga estudyante nga makakitag dugang mga ehemplo niini nga kamatuoran, pwede nimong bahinon sa duha ka grupo ang klase ug isangon sa matag grupo ang mosunod nga mga pakisayran sa kasulatan.
Basaha ang mosunod nga mga pakisayran sa kasulatan, nga pangitaon ang mga ehemplo kon sa unsang paagi gitudlo sa Manluluwas ug ni Hari Benjamin kini nga kamatuoran.
Lucas 22:31–32
-
Unsa nga mga ehemplo niini nga kamatuoran ang imong makita niini nga mga bersikulo?
Ang mosunod nga pagsukod sa kaugalingon makatabang tingali sa mga estudyante sa pagkonektar sa ilang mga paningkamot nga maugmad ang pagbarog pinaagi sa kinaugalingong paningkamot ug pagtabang sa uban ngadto sa ilang personal nga mga kahimtang.
Bisag nakasinati si Jose og mga kalisdanan didto sa Ehipto, giandam siya sa Ginoo sa pagpanalangin sa uban ingon nga resulta (tan-awa ang Genesis 45:5–8). Sa susama, pwede kang andamon sa Ginoo sa pagpanalangin ug pagtabang sa uban ingon nga resulta sa imong mga kasinatian. Samtang naghunahuna ka sa imong kinabuhi, pamalandongi ang mosunod nga mga pangutana:
-
Unsay imong nasinati karon nga nagtabang nimo aron mas makabarog pinaagi sa kinaugalingong paningkamot diha sa lainlaing bahin sa imong kinabuhi? (Pwede kini nga espirituwal, pinansyal, intelektuwal, pisikal, o emosyonal nga mga bahin.)
-
Sa unsang paagi gamiton sa Ginoo kini nga mga kasinatian aron tabangan ka sa pagpanalangin sa uban sa umaabot?
Samtang magpadayon ka sa pagtuon karon, bantayi ang mga pag-aghat gikan sa Espiritu Santo nga makatabang nimo nga mas makabarog pinaagi sa kinaugalingong paningkamot aron makatabang sa uban sama sa buhaton sa Manluluwas.
Pag-ugmad sa pagbarog pinaagi sa kinaugalingong paningkamot
Ang mosunod nga kalihokan makatabang sa mga estudyante nga mailhan kon sa unsang paagi makatabang sa uban sa ilang paningkamot nga maugmad ang pagbarog pinaagi sa kinaugalingong paningkamot. Ikonsiderar ang pag-organisar sa mga estudyante ngadto sa lima ka grupo ug pagsangon sa matag grupo og usa ka bahin sa pagbarog pinaagi sa kinaugalingong paningkamot. Sa mas gagmayng klase, pwede nimong sangonan ang mga estudyante sa matag usa sa mga bahin.
Anam-anama og pakita sa pisara ang usa ka hulagway nga sama sa mosunod ug ipakigbahin ang mga instruksiyon sa ubos.
-
Sa usa ka panid sa imong journal sa pagtuon, pagdrowing og duha ka oxygen mask.
-
Butangi og label ang ibabaw sa unang oxygen mask sa usa sa mosunod nga bahin sa pagbarog pinaagi sa kinaugalingong paningkamot:
- Kahibalo sa ebanghelyo
- Pinansiyal nga mga panginahanglan
- Edukasyon ug panarbaho
- Pisikal nga mga panginahanglan
- Emosyonal ug sosyal nga panginahanglan
-
Paghunahuna og mga butang nga pwedeng himoon sa usa ka tin-edyer aron maugmad ang pagbarog pinaagi sa kinaugalingong paningkamot diha sa mga bahin nga imong gipili. Isulat kining mga butanga sa unang oxygen mask.
Pananglitan, pwedeng hisgotan sa mga estudyante ang mga butang nga sama sa pagtuon sa mga kasulatan nga ako ra (kahibalo sa ebanghelyo), pagtuon para sa akong test sa math (edukasyon), o pagsunod sa plano sa pag-ehersisyo (pisikal).
-
Butangi og label ang ikaduhang oxygen mask og “Pagtabang sa Uban.” Pagpilig duha o tulo sa mga ideya nga gisulat diha sa unang oxygen mask. Para sa kada ideya nga imong pilion, pagsulat og pihong paagi nga magamit sa usa ka tin-edyer ang maong kasinatian aron tabangan ang uban nga maugmad ang pagbarog pinaagi sa kinaugalingong paningkamot. Isulat kining piho nga mga butang diha sa ikaduhang oxygen mask.
Isulat tingali sa mga estudyante ang mga butang nga sama sa paggamit sa akong kasinatian sa pagtuon sa kasulatan aron tabangan ang akong manghod nga makakat-on kon unsaon pagtuon sa mga kasulatan (espirituwal), pagtudlo og mga konsepto sa math sa akong mga classmate (edukasyon), o pagdapit sa akong mga higala nga mag-ehersisyo uban nako (pisikal).
Human mahatagig igong panahon ang mga estudyante sa pagkompleto sa kalihokan, dapita sila nga ipakigbahin ang ilang nasulat diha sa ilang mga oxygen mask. Mahimo kini nila pinaagi sa pagpakigbahin sa ilang nakat-onan uban sa mga estudyante nga nagpunting sa managlahing bahin sa pagbarog pinaagi sa kinaugalingong paningkamot. Ingon nga kabahin sa pagpakigbahin, pwede nimong dapiton ang usa ka estudyante sa pagbasa sa Mga Panultihon 28:27, nga pangitaon ang saad para niadtong mohatag sa uban. (Timan-i: ang pulong nga kabos magamit sa tanang bahin sa pagbarog pinaagi sa kinaugalingong paningkamot, dili lang sa pinansyal.)
-
Sa unsang paagi ang imong mga paningkamot nga makabarog pinaagi sa kinaugalingong paningkamot nakatabang sa uban? Sa unsang paagi kana nakabang nimo nga mobati nga mas duol sa Langitnong Amahan ug ni Jesukristo?
-
Samtang mopakigbahin ang mga estudyante, tabangi nga makaila sila nga dili kinahanglang perpekto sila nga makabarog pinaagi sa kinaugalingong paningkamot diha sa bisan unsang bahin aron makatabang sa uban.
Pagtabang sa uban sama sa buhaton sa Manluluwas
Ang mosunod nga kalihokan gituyo sa paghatag og panahon sa mga estudyante nga hunahunaon kon sa unsang paagi ang ilang mga paningkamot sa pag-ugmad sa pagbarog pinaagi sa kinaugalingong paningkamot makapahimo nila sa pagtabang sa uban.
Isulat ang mosunod nga dili kompletong mga pamahayag diha sa imong journal sa pagtuon:
-
Giugmad nako ang pagbarog pinaagi sa kinaugalingong paningkamot pinaagi sa …
-
Ang pipila ka paagi aron makatabang ko sa uban nining bahina maoy …
Tinguhaa ang tabang sa Espiritu Santo aron makompleto ang duha ka pamahayag.
Dapita ang mga estudyante nga mainampoong ikonsiderar kon unsay ilang himoon. Apil tingali niini ang pag-ila sa usa ka piho nga tawo nga gusto nilang tabangan ug kon unsaon nila pagtabang.
Ikonsiderar ang pagdapit sa mga estudyante nga ipakigbahin ang ilang gisulat. Ingon nga follow-up nga pangutana, pwede nimong pangutan-on ang mga estudyante sa mosunod:
-
Sa unsang paagi ang pag-atiman sa uban motabang nimo nga mas mahisama sa Manluluwas?
Taposa ang leksiyon pinaagi sa pagpakigbahin sa imong pamatuod kon sa unsang paagi ang pag-ugmad sa pagbarog pinaagi sa kinaugalingong paningkamot nakapahimo kanimo sa pagtabang sa uban. Dapita ang mga estudyante sa paglihok uyon sa mga pag-aghat nga ila tingaling nadawat aron tabangan ang uban sama sa buhaton ni Jesukristo.