“Sakaria 10–14: O Le A O’o Mai le Aso o le Ali’i”, Tusi Lesona a le Faia’oga Seminare o le Feagaiga Tuai (2026)
“Sakaria 10–14: O Le A O’o Mai le Aso o le Ali’i”, Tusi Lesona a le Faia’oga Seminare o le Feagaiga Tuai
Hakai 1–2; Sakaria 1–4; 10–14: Lesona 157
Sakaria 10–14
O Le A O’o Mai le Aso o le Ali’i
E auala mai i Ana perofeta, e fa’aali mai ai e le Ali’i mea e fa’atatau i tulaga o le a tutupu i le lumana’i ina ia tatou iloa ma vaai taula’i atu iai ma le mautinoa.Na vavalo Sakaria e faapea o le Fa’aola o le a toe afio mai ma puipui ona tagata mai nu’u o le a omai fa’atasi e si’itaua ia i latou.E fesoasoani lenei lesona i tagata a’oga e maua ai le lagona mautinoa o le a fa’atasi le Fa’aola ma i latou i le taimi o mea e tutupu a’o lata lona toe Afio Mai Fa’alua.
Sauniuniga a le tagata a’oga: Vala’aulia tagata a’oga e faitau le “Afio Mai Fa’alua o Iesu Keriso” o loo i le Autu ma Fesili (Potutusi a le Talalelei).Uunaia i latou e o mai saunia i le vasega e fa’asoa mai mea sa latou a’oa’oina po’o ni a latou fesili fo’i.
Gaoioiga e Ono Mafai Ona Aoaoina Ai
Fa’atalitali ai i le Afio Mai Faalua o le Fa’aola
Mafaufau e amata le vasega e ala i le fesili atu i tagata a’oga e mafaufau i ni mea tetele latou te iloa e ono tutupu i le lumana’i, e pei o se tafaoga, auauna atu i se misiona, pe fa’aipoipo fo’i. Vala’aulia i latou e fa’asoa mai o latou lagona e uiga i nei mea na tutupu.
Ona fa’aali lea o se ata o le Afio Mai Fa’alua o le Fa’aola.Vala’aulia tagata a’oga e lisi ni upu i luga o le laupapa e ono fa’ailoa mai ai lagona o tagata ta’ito’atasi e fa’atatau i lenei mea o le a tupu.E mafai ona aofia i le lisi upu e pei o le fiafia, sauni, mautinoa, filemu, fefe, lē mautonu, popole, po o le lē mautinoa.
Ina ia iloilo pe fa’apefea o latou lagona i le Afio Mai Fa’alua o le Fa’aola, e mafai e tagata aoga ona faia mea nei.
I lau api tala’aga mo su’esu’ega, tali fesili nei:
-
O le fea o upu e fa’amatalaina ai ou lagona e uiga i le Afio Mai Fa’alua o le Fa’aola?
-
O le a se mea e faatosina ai ou lagona e fa’atatau i lenei faamoemoega?
Tusi i lalo soo sau fesili o iai e fa’atatau i le Afio Mai Fa’alua o le Fa’aola.
A’o e su’esu’e i mea e tutupu e fa’atatau i le Afio Mai Fa’alua, fa’alogo mo musumusuga a le Agaga Paia ina ia e iloa ai pe fa’apefea ona e mautinoa o le a fa’atasi mai le Fa’aola iā te oe i le taimi o nei mea e tutupu.
Atonu e te vala’aulia nisi o tagata a’oga e fa’asoa mai mea na latou tusia.Uunaia le vasega e vaavaai mo tali ia latou fesili a’o latou su’esu’eina le Sakaria.
Manatua: E lē mana’omia ona e taliina uma fesili taitasi e fa’atatau i le Afio Mai Fa’alua o le Fa’aola. A manana’o tagata a’oga e a’oa’o atili, e mafai ona latou su’esu’eina isi mea aogā fa’aopoopo e pei o le “Afio Mai Fa’alua o Iesu Keriso” i totonu o le Autū ma Fesili (Potutusi o le Talalelei).
Na valo’ia e Sakaria le Afio Mai Fa’alua o le Fa’aola.
Ina ia fesoasoani i tagata a’oga ia malamalama i valo’aga a Sakaria e fa’atatau i le Afio Mai Fa’alua o le Fa’aola, e mafai ona faitau pe aotele le parakalafa lenei.E mafai fo’i ona faitau e tagata a’oga ulutala o mata’upu o le Sakaria 10; 12–14.
Na valo’ia mai e Sakaria e fa’apea, o aso e gata ai, o se taua tele, ua ta’ua o le taua o Amaketo (taga’i i le Fa’aaliga 16:16), o le a faia e lata ane i Ierusalema.E o ane nu’u uma o le lalolagi e fa’asagatau iā Ierusalema (taga’i i le Sakaria 12:2–3).O se vaega o le taua o le a si’omia ai Ierusalema ma ’a’ai e ’autau (taga’i i le Sakaria 14:2).O le a faaali mai le Fa’aola i luga o le Mauga o Olive (taga’i i le Sakaria 14:4).
Ina ia fesoasoani i tagata a’oga e malamalama atili e fa’atatau i le auala e fesoasoani ai le Fa’aola i ona tagata i taimi e tutupu ai nei mea, mafaufau e fa’aaoga le pepa e tufa atu “O le ā Se Mea o le a Faia e le Fa’aola Mo …” E mafai ona outou faitau fuaiupu o se vasega atoa ma vala’aulia tagata a’oga e tusi ni upu po’o fasifuaitau i lalo ane o fesili, e fa’amatala ai po’o a ni mea na folafola mai le Fa’aola e faia mo ē fa’atuatua.
I se isi faiga, e mafai ona e fa’atulagaina le vasega i ni vaega se tolu ma tuuina atu se fesili i vaega ta’itasi e su’esu’e ma fa’asoa ai ma le vasega.
A iai ni fesili a le vasega e fa’atatau i le mea o le a tupu i tagata amioleaga pe a toe Afio Mai Fa’alua le Fa’aola, ona vala’aulia lea o i latou e faitau le Sakaria 14:12–13, 17–19.E fa’amatala mai e fuaiupu nei ia tulaga o tagata e latou te filifili e lē mulimuli iā Iesu Keriso.
A uma ona fa’atumu e tagata a’oga le pepa e tufa atu, vala’aulia i latou e fai fesili e faatatau i mea na latou su’esu’eina.A e lē mautinoa se tali, fa’ailoa atu iā i latou e te lē iloa.Vala’aulia i latou e sa’ili mo se tali.E mafai fo’i ona e sa’ili se tali faatasi ma i latou i totonu po’o fafo atu fo’i o le vasega.
E mafai ona fesoasoani le fesili lenei i tagata a’oga e fa’ailoa upumoni mai i a’oa’oga a Sakaria.
-
O a ni mea e a’oa’o mai e nei fuaitau ia te oe e fa’atatau iā Iesu Keriso?
I le avea ai o se vaega o le fa’atalatalanoaga, vala’aulia tagata a’oga e aotele mai ni mea na latou a’oa’oina e fa’atatau i le Fa’aola i se fa’amatalaga faigofie o le mea moni.E mafai ona fa’asoa mai e tagata a’oga ni tali eseese, e aofia ai le O le a toe afio mai Iesu Keriso i aso e gata ai ma fa’apotopoto, lavea’i, ma puipui Ona tagata.
E o’o mai le mana pe a iloa e tagata a’oga o upumoni o lo’o latou a’oa’oina mai i tusitusiga pa’ia o fa’amaoniga ia o le alofa, mana, ma le alofa mutimutivale o le Tamā Fa’alelagi ma Iesu Keriso i o latou olaga. O lenei iloa e mafai ona fesoasoani i tagata a’oga e lagona ai se mafutaga vāvālalata iā te i La’ua.
E mafai ona fesoasoani fesili nei i tagata a’oga e ausia ai lenei malamalamaaga:
(Mo a’oa’oga fa’aopoopo i le faia o fesili e feso’ota’i ai le alofa, mana, ma le alofa mutimutivale o le Alii i upumoni o lo’o a’oa’oina i tusitusiga pa’ia, taga’i i le “Fesoasoani i tagata a’oa’o ia iloa le alofa, mana, ma le alofa mutimutivale o le Alii i o latou olaga” i totonu o le Tomai mo le Atia’eina o Faia’oga.)
-
E fa’apefea e le iloaina o lenei upumoni e fa’atatau iā Iesu Keriso ona fesoasoani iā i tatou e feagai ai ma lona Afio Mai Fa’alua ma le mautinoa?
-
O a ni auala e fa’apotopoina ai, fa’asaoina, ma puipuia ai e Iesu Keriso ona tagata i aso nei?
O tali i le fesili na muamua atu e aofia ai: le fa’apotopotoina e Iesu Keriso e ala i le vala’aulia uma o tagata e omai iā te Ia, mulimuli i Lana talalelei, ma maua fa’amanuiaga o le malumalu.E na te Ia fa’asaoina e ala i le ofoina atu o le meaalofa o Lana Togiola ma sauniga o le talalelei.E na te puipuia e ala i le fa’ailoa mai o Lona finagalo e auala mai i perofeta ma tusitusiga pa’ia.
Fa’aali atu mea ua e iloa
O le gaoioiga o lo’o soso’o mai e mafai ona fesoasoani i tagata a’oga e fa’aali ai lo latou mautinoa o mea na folafola mai e le Fa’aola o le a Ia faia mo Ona tagata i le taimi o le a Ia toe afio mai ai. E mafai e tagata a’oga ona galulue ta’ito’atasi po’o i ni vaega fo’i.Vala’aulia i latou e fa’aaoga fuaiupu mai i tusituisga pa’ia o lo’o i le pepa tufa e faamae’a ai le gaioiga lenei.
Ina ia saunia tagata a’oga e tusi ni a latou lava upu [o pese], e mafai ona e fa’aali iai le vitio “Come, O Thou King of Kings” (3:43) i le ChurchofJesusChrist.org.
Faitau upu o le viiga “Come, O Thou King of Kings” (Hymns, no. 59).Ona tusi lea o se fuaiupu fa’aopoopo i le viiga.Fa’aaofia iai ma a’oa’oga a Sakaria e fa’atatau i mea na folafola mai e le Fa’aola e faia mo Ona tagata i le taimi o Lona Afio Mai Fa’alua, ma le auala e fesoasoani ai nei folafolaga i lou loto mautinoa o le a fa’atasi mai le Fa’aola ma Ona tagata i aso amulī.
Vala’aulia tagata a’oga e fa’asoa ni upu [o le pese] sa latou tusia.
Atonu e te mafaufau e usu le viiga fa’atasi ma le vasega, e aofia ai se tasi pe sili atu fo’i o fuaiupu na tusia e tagata a’oga.
Ina ia fa’ai’u, e mafai ona e fa’asoa atu sau molimau e fa’atatau i le Fa’aola ma le auala na Ia fesoasoani ai iā te oe e tulimatai ai ma le mautinoa i Lona Afio Mai Fa’alua.