“Pagbansay 10 sa Doktrinal nga Kahanas: Gamita ang mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary sa Daang Tugon (2026)
“Pagbansay 10 sa Doktrinal nga Kahanas: Gamita ang mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary sa Daang Tugon
Miqueas; Nahum; Habacuc; Sofonias: Leksiyon 154
Pagbansay 10 sa Doktrinal nga Kahanas
Gamit og mga Baroganan sa Pag-angkon og Espirituhanong Kahibalo
Ang doktrinal nga kahanas makatabang sa mga estudyante sa pagtukod sa ilang kinabuhi diha sa pundasyon ni Jesukristo ug sa Iyang ebanghelyo. Kini nga leksiyon makatabang sa mga estudyante sa pagpakigbahin og mga tudling sa doktrinal nga kahanas nga makahuloganon sa ilang kinabuhi ug motabang nila nga makakat-on ug gamiton ang balaang mga baroganan sa pag-angkon og espirituhanong kahibalo.
Pagpangandam sa estudyante: Dapita ang mga estudyante nga rebyohon ang mga tudling sa doktrinal nga kahanas sa Daang Tugon nga ilang nakat-onan. Dasiga silang mosulod sa klase nga andam sa pagpakigbahin og usa nga nakapalalom sa ilang pamatuod, pagsabot sa ebanghelyo, o relasyon uban sa Langitnong Amahan ug ni Jesukristo. Makita ang listahan niini nga mga tudling diha sa kataposan sa Mahinungdanon nga Dokumento sa Doktrinal nga Kahanas (2022).
Posibleng mga Kalihokan sa Pagkat-on
Pagrebyo sa doktrinal nga kahanas: Ipakigbahin
Aron andamon ang mga estudyante sa pagpakigbahin og daghang tudling sa doktrinal nga kahanas nga nakaimpluwensiya nila niining tuiga, ikonsiderar ang pagdapit sa mga estudyante nga tubagon kadiyot ang mosunod nga pangutana uban ang usa partner para sa matag nakalista nga mga sitwasyon.
Unsa ang imong paboritong pagkaon sa matag mosunod nga situwasyon?
-
Sayo sa buntag
-
Sa tungang gabii nga timo-timo
-
Sa imong birthday
-
Sa init nga kahaponon
-
Sa bugnaw nga gabii
Sama nga mausab ang imong gustong kaonon depende sa kahimtang, mausab pod tingali ang imong paboritong kasulatan depende sa panginahanglan ug sitwasyon.
Ikonsiderar ang pagdapit sa mga estudyante sa pagpamalandong sa ilang mga tubag sa mosunod nga pangutana para sa matag situwasyon nga gihisgotan sa ubos. Pwede kang mohunong kadiyot human mapakigbahin ang kada situwasyon aron marebyo sa mga estudyante ang listahan sa mga tudling sa doktrinal nga kahanas sa Daang Tugon sa kataposan sa Mahinungdanon nga Dokumento sa Doktrinal nga Kahanas (2023). Dayon dapita ang mga estudyante nga ipakigbahin ngadto sa ilang partner o sa gamayng grupo ang tudling nga ilang napili.
Seguroa nga magbilin og igong oras sa klase para sa seksiyon nga “Pagkat-on ug paggamit sa mga baroganan sa pag-angkon og espirituhanong kahibalo”.
Unsa ang imong paboritong tudling sa doktrinal nga kahanas sa Daang Tugon para sa matag usa sa mosunod? Ngano man?
-
Pagkat-on bahin kang Jesukristo ug sa Iyang misyon
-
Pagpatin-aw kon nganong nanginahanglan tag mga propeta
-
Pagsabot sa plano sa kaluwasan
Pagkat-on ug paggamit sa mga baroganan sa pag-angkon og espirituhanong kahibalo
Para sa mosunod nga kalihokan, makatabang tingali kon grupohon og tinagtulo ang mga estudyante, diin ang matag sakop sa grupo magpunting sa managlahing baroganan sa pag-angkon og espirituhanong kahibalo. Hatagig panahon ang mga estudyante nga rebyohon kadiyot ang mga parapo sa Mahinungdanon nga Dokumento sa Doktrinal nga Kahanas nga haom sa ilang baroganan. (Ang mga ideya sa mga kalihokan sa pagrebyo anaa sa “Mga Kalihokan sa Pagrebyo sa Doktrinal nga Kahanas” sa apendise niini nga manwal.)
Dihang mahuman na og rebyo ang mga estudyante, hatagi og usa ka pirasong papel ang matag grupo. Dapita sila nga gamiton ang tulo ka lakang sa ubos aron magsulat og realistikong senaryo diin importante ang paggamit sa mga baroganan sa pag-angkon og espirituhanong kahibalo. Kon nagkinahanglag dugang giya ang mga grupo, pwede nimo silang tudloan nga maghimog mga senaryo base sa usa ka tin-edyer nga adunay mga pangutana o gikabalak-an bahin sa usa sa mosunod nga mga hilisgutan:
-
Kon tinuod ba ang Basahon ni Mormon
-
Ang panginahanglan para sa gipahiuli nga Simbahan ni Jesukristo sa yuta
-
Kasamtangang tambag gikan sa propeta
Kon makatabang, adunay gisugyot nga mga senaryo diha sa seksiyong “Dugang nga mga Kalihokan sa Pagkat-on” niini nga leksiyon nga naa sa ChurchofJesusChrist.org.
Gamita ang mosunod nga mga lakang sa paghimo ug paghisgot og realistikong senaryo diin magamit sa usa ka tin-edyer ang mga baroganan sa pag-angkon og espirituhanong kahibalo aron matubag ang mga pangutana o mga gikabalak-an.
-
Isulat ang ngalan ug edad sa maong tawo ug ang realistikong hagit sa hugot nga pagtuo nga ilang giatubang.
-
Paglista og usa o duha ka pangutana o gikabalak-an ingon nga resulta sa ilang hagit.
-
Hisgoti ang mosunod nga pangutana uban sa imong grupo, pero ayaw isulat sa inyong papel ang inyong mga tubag. Seguroa nga adunay kahigayonan ang matag sakop sa grupo nga ipakigbahin ang ilang mga panghunahuna.
-
Sa unsang paagi makatabang ang matag baroganan sa pag-angkon og espirituhanong kahibalo diha sa situwasyon niinig tawhana?
Hatagig igong panahon ang mga grupo nga hisgotan ang nag-unang pangutana. Pwede kang molibot sa classroom ug moapil kadiyot sa lainlaing mga grupo aron mahibalo kon unsay ilang gipakigbahin sa usag usa.
Kon para nimo makatabang ang paghatag sa mga grupo og mas pihong mga pangutana nga hisgotan, pwede nimong ihatag ang pipila o tanan sa mosunod.
-
Unsay imong nahibaloan bahin sa Langitnong Amahan ug sa Iyang plano para sa Iyang mga anak nga makatabang niining tawhana nga makabaton og mahangtorong panglantaw?
-
Sa unsang paagi ang ilang mga pagpili niini nga sitwasyon makaapektar sa ilang mahangtorong realasyon sa Langitnong Amahan ug kang Jesukristo?
-
Unsang mga kasulatan o mga pahayag gikan sa mga lider sa Simbahan ang imong irekomendar nga ilang tun-an?
Kon anaa pay oras, dihang mahuman nag pakigbahin ang mga grupo, dapita silang magbayloay og mga senaryo sa ubang grupo ug hisgotan ang (mga) pangutana gamit ang senaryo sa laing grupo.
Personal nga paggamit
Kini ang kataposang leksiyon sa pagbansay sa doktrinal nga kahanas sa tuig sa Daang Tugon. Makatabang tingali, ang pagkahibalo niana aron pamalandongan ug isulat sa mga estudyante diha sa ilang mga journal sa pagtuon ang bahin sa usa ka sitwason sa ilang kaugalingong kinabuhi diin magamit nila ang mga baroganan sa pag-angkon og espirituhanong kahibalo. Pwede kang mopakigbahin og mubong ehemplo gikan sa imong kinabuhi diin napanalanginan ka tungod sa mga baroganan sa pag-angkon og espirituhanong kahibalo.
Pwede nimong taposon ang klase pinaagi sa pagdapit sa mga estudyante nga kompletohon ang usa o kapin pa sa mosunod nga mga pag-aghat bahin sa sitwasyon nga ilang gisulat sa ilang mga journal sa pagtuon. Dasiga sila nga tinguhaon ang mga impresyon gikan sa Espiritu Santo nga makatabang nila sa paggamit niini nga mga baroganan diha sa ilang mga kinabuhi.
-
Ang usa ka paagi nga makalihok ko uban ang hugot nga pagtuo kang Jesukristo mao ang …
-
Ang mga kamatuoran nga akong mahinumdoman bahin sa Langitnong Amahan, kang Jesukristo, ug sa Ilang plano nga makatabang nako mao ang …
-
Ang mga kapanguhaan nga akong kadangpan nga makapalig-on sa akong hugot nga pagtuo sa Manluluwas ug sa Iyang mga pagtulun-an mao ang …
Dasiga ang mga estudyante nga tuyoon sa paggamit kini nga mga baroganan diha sa ilang kinabuhi ug molihok uyon sa mga impresyon nga ilang nadawat.