“Habacuc: Paghulat sa mga Tubag sa Atong Sinserong mga Pangutana,” Manwal sa Magtutudlo sa Seminary sa Daang Tugon (2026)
“Habacuc: Paghulat sa mga Tubag sa Atong Sinserong mga Pangutana,” Manwal sa Magtutudlo sa Seminary sa Daang Tugon
Miqueas; Nahum; Habacuc; Sofonias: Leksiyon 153
Habacuc
Paghulat sa mga Tubag sa Atong Sinserong mga Pangutana
Dihang si propeta Habacuc naay mga pangutana bahin sa pagkadaotan sa iyang palibot, nangita ug naghulat siya sa mga tubag gikan sa Ginoo. Sama kang Habacuc, pwede natong idangop sa Ginoo ang atong mga pangutana. Kini nga leksiyon makatabang sa mga estudyante nga masabtan kon unsaon pagmentinar sa ilang hugot nga pagtuo kang Jesukristo dihang naa silay mga pangutana nga morag wala matubag.
Pagpangandam sa estudyante: Dapita ang mga estudyante sa pagpangutana sa usa ka higala o sakop sa pamilya kon nakigbisog ba silay lisod nga pangutana nga morag wala matubag. Kon anaa, pwedeng pangutan-on sa estudyante kon unsay gihimo sa maong tawo aron makapabiling matinud-anon sa Ginoo samtang naghulat sa mga tubag.
Posibleng mga Kalihokan sa Pagkat-on
Natural lang nga adunay pangutana
Guniti sa usa ka kamot ang garapon nga naay label nga question mark ug sa pikas kamot ang garapon nga adunay label nga hulagway ni Kristo. Ipasabot nga ang usa ka garapon nagrepresentar sa atong mga pangutana o gikabalak-an ug ang laing garapon nagrepresentar sa atong hugot nga pagtuo sa Ginoo ug sa Iyang ebanghelyo.
Dapita ang mga estudyante nga maghunahuna sa mosunod nga pangutana sa dili pa basahon ang pahayag gikan kang Presidente Uchtdorf.
-
Posible bang makigbisog sa lisod nga mga pangutana ug sa samang higayon magbaton og hugot nga pagtuo kang Jesukristo ug sa Iyang napahiuli nga Simbahan?
Si Presidente Dieter F. Uchtdorf, nga kaniadto sa Unang Kapangulohan, mitudlo:
Ang pagpangutana mao ang sinugdanan sa pagpamatuod. Ang uban tingali mobati og kaulaw o nga dili takos tungod kay aduna silay seryoso nga mga pangutana mahitungod sa ebanghelyo, apan dili sila kinahanglan nga mobati sa ingon. Ang pagpangutana dili timailhan sa kahuyang; kini ang mag-una sa paglambo.
Ang Dios nagsugo kanato nga magtinguha sa mga tubag sa atong mga pangutana ug naghangyo lamang nga magtinguha kita nga “kinasingkasing, uban sa tinuod nga katuyoan, nga may hugot nga pagtuo kang Kristo” [Moroni 10:4]. Kon mobuhat kita niini, ang kamatuoran sa tanang butang mapakita ngari kanato “pinaagi sa gahom sa Espiritu Santo” [Moroni 10:5].
Ayaw kahadlok; pangutana. Magkuryoso, apan ayaw pagduhaduha! Kanunay nga maghupot og maayo sa hugot nga pagtuo ug sa kahayag nga inyo nang nadawat. (“The Reflection in the Water” [Church Educational System fireside alang sa mga young adult, Nob. 1, 2009], broadcasts.ChurchofJesusChrist.org)
-
Sa imong hunahuna, nganong importante nga masabtan sa kabatan-onan ang gitudlo ni Presidente Uchtdorf?
Lisod nga mga pangutana
Gitawag sa Ginoo si Habacuc nga mahimong propeta sa gingharian sa Juda sa wala pa gibihag sa Babilonya ang Jerusalem. Sama sa ubang propeta, naay mga pangutana si Habacuc ug nagtinguha siyag mga pagsabot gikan sa Ginoo (tan-awa ang Jeremias 12:1; Doktrina ug mga Pakigsaad 121:1–6).
Basaha ang Habacuc 1:2–4, nga pangitaon ang mga pangutana nga gikalibgan ni Habacuc. Sa imong journal sa pagtuon, ihulagway sa unsang paagi ang usa ka tawo karon tingali adunay sama nga mga pangutana o mga kabalaka.
Dapita ang mga estudyante sa pagpakigbahin sa unsay ilang gisulat. Ipakigbahin tingali nila ang mga butang nga sama sa mosunod:
-
Ginoo, gipaminaw ba ko nimo? (bersikulo 2)
-
Nganong naay grabeng kasamok ug pagpakasala sa akong palibot? (bersikulo 3)
-
Nganong dili masilotan ang mga tawong grabe ang kadaotan? (bersikulo 4)
Hatagi ang matag estudyante og gamayng piraso sa papel nga kasulatan sa ilang mga tubag sa mosunod nga pag-aghat.
Sama kang Habacuc, naa pod tingali tay mga pangutana. Isulat ang pangutana nga nalisdan tingali ka nga para nimo wala pa natubag.
Pwedeng ibutang sa mga estudyante ang ilang gisulat sa garapon nga nagrepresentar sa atong mga pangutana.
Guniti ang garapon sa mga pangutana ug ibutang ang garapon nga nagrepresentar sa atong hugot nga pagtuo kang Jesukristo. Ipasabot nga dihang kita adunayy mga pangutana, matental tingali ta nga balewalaon ang atong hugot nga pagtuo kang Jesukristo tungod kay wala ta mahibalo sa mga tubag.
-
Unsay kapeligro ang pagbalewala sa atong hugot nga pagtuo ug relasyon sa Ginoo dihang kita adunay mga pangutana?
Guniti ang duha ka garapon ug ipasabot nga dili nato kinahanglang balewalaon ang atong hugot nga pagtuo kang Jesukristo tungod sa mga pangutana. Pwede kitang padayon uban sa pagsalig sa Ginoo samtang nangita sa mga tubag.
Samtang imong tun-an ang Habacuc, matikdi ang mga impresyon gikan sa Espiritu Santo nga motabang tingali nimo nga padayong magbaton og hugot nga pagtuo sa Ginoo samtang nagpaabot ka sa mga tubag.
Pagdangop sa Dios
Sa nahibiling bahin sa leksiyon, pwede nimong ikonsiderar ang regular nga pagdapit sa mga estudyante nga dugangan ang mga butang sa garapon sa pagtuo. Kon himoon nimo kini, hatagig pipila ka gagmayng piraso sa papel ang mga estudyante aron ilang masulat ang ilang nakat-onan gikan ni Habacuc o sa ilang mga classmate bahin sa kon ngano o sa unsang paagi mosalig sa Ginoo.
Ingon nga tubag sa mga pangutana ni Habacuc bahin sa pagkadaotan sa iyang katilingban, miingon ang Ginoo nga Iyang “bangonon ang mga Caldeahanon” (taga-Babilonia) aron silotan ang mga anak ni Israel (tan-awa ang Habacuc 1:6). Nahibulong si Habacuc kon nganong tugotan sa Ginoo ang daotang mga taga-Babilonia nga pildihon ang iyang katawhan (tan-awa ang Habacuc 1:12–17).
Basaha ang Habacuc 2:1–4, nga pangitaon kon unsay gipili nga buhaton ni Habacuc bisan og naglibog siya sa iyang mga pangutana ug sa tubag sa Ginoo.
-
Unsay imong nakaplagan?
Pwede tingali kang magsukna og follow-up nga mga pangutana sama sa “Unsa kahay ipasabot sa ‘pagtan-aw kong unsa ang [igasulti sa Dios] kanako’? (tan-awa ang Habacuc 2:1)” o “Unsa kaha ang ‘mabuhi kay matinumanon man [ta]’? (tan-awa ang Habacuc 2:4).”
Pwede nimong dapiton ang mga estudyante nga idugang sa garapon sa hugot nga pagtuo ang ilang nakat-onan.
Ipasabot nga gisultihan sa Ginoo si Habacuc nga sa ngadtongadto silotan ang mga taga-Babilonia sa ilang pagkadaotan (tan-awa ang Habacuc 2:5–20).
Basaha ang Habacuc 3:17–19, nga pangitaon kon sa unsang paagi si Habacuc mipili nga magkinabuhi nga uyon sa iyang hugot nga pagtuo sa Ginoo.
Kon nagkinahanglan og tabang ang mga estudyante aron masabtan ang Habacuc 3:17–18, pwede nimong ipasabot nga sa bersikulo 17, gihulagway ni Habacuc ang pipila ka dili maayong sangpotanan (dili mamunga ang mga tanom, walay abot ang kaumahan, ug uban pa). Sa bersikulo 18, siya miingon nga siya “magmaya gihapon [sa] Ginoo” bisag unsa pay sangpotanan.
Pwede nimong ipasabot nga ang “tiil sa lagsaw” sa Habacuc 3:19 nagtumong sa tiil sa lagsaw [deer], nga maoy hinungdan kon nganong makakatkat ang lagsaw sa lisod nga mga dalan. Kini nga hulagway nagsugyot nga hatagan kita sa Ginoo og katakos nga katkaton ang atong simbolikanhon nga mga bukid.
-
Sa unsang paagi ang mga kinaiya ug mga aksiyon ni Habacuc nagpakita sa iyang hugot nga pagtuo sa Dios?
Tabangi ang mga estudyante nga makita gikan sa ehemplo ni Habacuc nga makapili kita nga magpabiling matinud-anon sa Ginoo samtang naghulat sa tubag sa atong sinserong mga pangutana.
-
Unsay imong nahibaloan bahin sa Langitnong Amahan ug kang Jesukristo nga makatabang nimo sa pagsalig Kanila samtang naghulat sa mga tubag?
Samtang ipakigbahin sa mga estudyante ang ilang nahibaloan, pwede tingali kang magsuknag follow-up nga mga pangutana sama sa “Giunsa na nimo pagkahibalo bahin sa Langitnong Amahan ug kang Jesukristo?”
Pwede nimong dapiton ang mga estudyante nga idugang sa garapon sa hugot nga pagtuo ang ilang nakat-onan gikan kang Habacuc o sa ilang mga classmate.
Unsaon sa pagpadayon
Tabangi ang mga estudyante nga maghunahuna kon sa unsang paagi sila makapadayon uban ang hugot nga pagtuo sa Dios bisag naa silay mga pangutana. Aron mahimo kini, pwedeng tan-awon sa mga estudyante ang “Iyang Kaluoy: Pagpili nga Motuo sa Dios” (4:07), nga pangitaon kon unsay gihimo ni Adam aron magpabiling matinud-anaon sa Dios bisan pa lisod nga mga pangutana ug mga kabalaka.
Pwede usab basahon sa mga estudyante ang 1 Nephi 10:17–22; 11:1 o Mosiah 24:9–17, o susihon ang usa sa mga seksiyon sa “Pagpangita og mga Tubag sa imong mga Pangutana.” sa Mga Hilisgotan ug mga Pangutana (Librarya sa Ebanghelyo).
-
Unsay imong nakat-onan nga makatabang sa usa ka batan-on nga mopili sa pagpabiling matinud-anon sa Dios samtang naghulat sila sa mga tubag?
Pwedeng ipakigbahin sa mga estudyante ang mga kasinatian dihang sila o ang ilang kaila mipili nga matinud-anong mosalig sa Dios samtang naghulat sa mga tubag. Pwede usab nimong ipakigbahin ang kaugalingon nimong mga kasinatian o pamatud-an kon nganong misalig ka sa Langitnong Amahan ug kang Jesukristo.
Dasiga ang mga estudyante nga isulat ang ilang nakat-onan karon nga motabang nila nga mosalig sa Ginoo samtang naghulat sila sa mga tubag. Pwedeng idugang sa mga estudyante kini nga mga ideya diha sa garapon sa hugot nga pagtuo.
Kon naa pay oras, pwede nimong basahon ang pipila sa mga papel gikan sa garapon sa hugot nga pagtuo. Samtang imo kining basahon, pwede nimong hangyoon ang mga estudyante nga makigbahin og dugang mga hunahuna o impresyon nga ilang nahunahunaan.
Ikonsiderar ang pagtago niini nga mga garapon aron makuhaan og ideya sa sunod nga mga leksiyon. Pananglitan, pwede nimong gamiton ang gidugang sa mga estudyante diha sa garapon sa hugot nga pagtuo aron pauswagon ang leksiyon sa pagbansay sa doktrinal nga kahanas.