« ហាបាគុក ៖ រង់ចាំចម្លើយចំពោះសំណួរដ៏ស្មោះរបស់យើង » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ហាបាគុក ៖ រង់ចាំចម្លើយចំពោះសំណួរដ៏ស្មោះរបស់យើង » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
មីកា, ណាហ៊ុម, ហាបាគុក, សេផានា ៖ មេរៀនទី ១៥៣
ហាបាគុក
រង់ចាំចម្លើយចំពោះសំណួរដ៏ស្មោះរបស់យើង
នៅពេលដែលព្យាការី ហាបាគុក មានសំណួរពីអំពើទុច្ចរិតនៅជុំវិញលោក លោកបានស្វះស្វែង ហើយរង់ចាំចម្លើយពីព្រះអម្ចាស់ ។ ដូចហាបាគុកដែរ យើងអាចងាកទៅរកព្រះអម្ចាស់ជាមួយសំណួររបស់យើង ។ មេរៀននេះអាចជួយសិស្សយល់ពីរបៀបរក្សាជំនឿរបស់ពួកគេទៅលើព្រះយេស៊ូវគ្រីស្ទ នៅពេលដែលពួកគេមានសំណួរដែលហាក់ដូចជាគ្មានចម្លើយ ។
សកម្មភាពរៀនសូត្រដែលអាចមាន
ការមានសំណួរគឺជារឿងធម្មតា
កាន់ក្រឡមួយដែលមានសញ្ញាសួរក្នុងដៃម្ខាង ហើយក្រឡមួយទៀតមានស្លាករូបព្រះគ្រីស្ទនៅដៃម្ខាងទៀត ។ សូមពន្យល់ថា ក្រឡមួយតំណាងឲ្យសំណួរ ឬកង្វល់ដែលយើងអាចមាន ហើយក្រឡមួយទៀតតំណាងឲ្យសេចក្តីជំនឿរបស់យើងលើព្រះអម្ចាស់ និងដំណឹងល្អរបស់ទ្រង់ ។
សូមអញ្ជើញសិស្សឲ្យគិតអំពីសំណួរខាងក្រោមនេះ មុនពេលអានសេចក្ដីថ្លែងការណ៍របស់ប្រធាន អុជដូហ្វ ។
-
តើវាអាចទៅរួចទេក្នុងការមានការពិបាកជាមួយនឹងសំណួរពិបាកៗ ហើយមានជំនឿទៅលើព្រះយេស៊ូវគ្រីស្ទ និងសាសនាចក្រដែលបានស្ដារឡើងវិញរបស់ទ្រង់ក្នុងពេលទន្ទឹមគ្នានេះ ?
ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយបានបង្រៀន ៖
ការសួរគឺជាដើមកំណើតនៃទីបន្ទាល់ ។ អ្នកខ្លះអាចមានអារម្មណ៍អៀនខ្មាស ឬថាមិនស័ក្ដិសម ដោយសារពួកគេបានរកសំណួរដែលទាក់ទងទៅនឹងដំណឹងល្អ ប៉ុន្ដែពួកគេមិនចាំបាច់មានអារម្មណ៍បែបនោះទេ ។ ការសួរសំណួរ មិនមែនជាសញ្ញានៃភាពទន់ខ្សោយនោះទេ វាគឺជាប្រផ្នូលមួយនៃការរីកចម្រើន ។
ព្រះបានបញ្ជាយើងឲ្យស្វែងរកចម្លើយចំពោះសំណួររបស់យើង ហើយសួរតែអ្វីដែលយើងស្វែងរក ‹ ដោយចិត្តស្មោះសរ គឺដោយស្មោះអស់ពីចិត្ត ដោយមានសេចក្ដីជំនឿជឿដល់ព្រះគ្រីស្ទ › [ មរ៉ូណៃ ១០:៤ ] ។ នៅពេលយើងធ្វើដូច្នោះ សេចក្ដីពិតនៃការណ៍ទាំងអស់អាចត្រូវបានបង្ហាញដល់យើង « ដោយព្រះចេស្ដានៃព្រះវិញ្ញាណបរិសុទ្ធ » [ មរ៉ូណៃ ១០:៥ ] ។
ចូរកុំខ្លាចសួរសំណួរឡើយ ។ ចូរឆ្ងល់ ប៉ុន្ដែកុំសង្ស័យឡើយ ! សូមកាន់ខ្ជាប់ទៅនឹងសេចក្ដីជំនឿ និងពន្លឺដែលអ្នកបានទទួលរួចហើយនោះជានិច្ច ។ ( « The Reflection in the Water » [ កម្មវិធីជួបជុំប្រព័ន្ធអប់រំសាសនាចក្រសម្រាប់យុវមជ្ឈិមវ័យ នៅថ្ងៃទី១ ខែវិច្ឆិកា ឆ្នាំ២០០៩ ] នៅលើគេហទំព័រ broadcasts.ChurchofJesusChrist.org )
-
អ្នកគិតថា ហេតុអ្វីបានជាយុវវ័យត្រូវយល់ពីអ្វីដែលប្រធាន អុជដូហ្វ បានបង្រៀន ?
សំណួរពិបាកៗ
ព្រះអម្ចាស់បានហៅហាបាគុកឲ្យធ្វើជាព្យាការីដល់នគរយូដា មុនពេលពួកបាប៊ីឡូនឡោមព័ទ្ធក្រុងយេរូសាឡិម ។ ដូចជាព្យាការីដទៃទៀតដែរ ហាបាគុកមានសំណួរ និងស្វះស្វែងរកការយល់ដឹងពីព្រះអម្ចាស់ ( សូមមើល យេរេមា ១២:១; គោលលទ្ធិ និងសេចក្ដីសញ្ញា ១២១:១–៦ ) ។
សូមអាន ហាបាគុក ១:២–៤ ដោយរកមើលសំណួរដែលហាបាគុកបានជួបការពិបាក ។ នៅក្នុងសៀវភៅកំណត់ហេតុការសិក្សារបស់អ្នក សូមពិពណ៌នាអំពីរបៀបដែលនរណាម្នាក់សព្វថ្ងៃនេះអាចបង្ហាញសំណួរ ឬកង្វល់ស្រដៀងគ្នានេះ ។
សូមអញ្ជើញសិស្សឲ្យចែកចាយនូវអ្វីដែលពួកគេបានសរសេរ ។ ពួកគេអាចចែកចាយរឿងដូចតទៅនេះ ៖
-
ព្រះអម្ចាស់អើយ តើទ្រង់ឮទូលបង្គំទេ ? ( ខទី ២ )
-
ហេតុអ្វីបានជាមានអំពើហិង្សា និងអំពើបាបជាច្រើននៅជុំវិញទូលបង្គំ ? ( ខទី ៣ )
-
ហេតុអ្វីបានជាមនុស្សអាក្រក់រួចខ្លួនពីអំពើអាក្រក់ច្រើនម្ល៉េះ ? ( ខទី ៤ )
សូមចែកក្រដាសតូចមួយសន្លឹកទៅឲ្យសិស្សសរសេរចម្លើយរបស់ពួកគេចំពោះការបំផុសគំនិតខាងក្រោម ។
ដូចជាហាបាគុកដែរ យើងក៏ប្រហែលជាមានសំណួរផងដែរ ។ សរសេរសំណួរពិបាកដែលអ្នកប្រហែលជាមាន ដែលអ្នកមានអារម្មណ៍ថាមិនទាន់មានចម្លើយនៅឡើយ ។
សិស្សអាចដាក់អ្វីដែលពួកគេសរសេរក្នុងក្រឡតំណាងឲ្យសំណួររបស់យើង ។
លើកក្រឡដែលមានសំណួរឡើង ហើយដាក់ក្រឡតំណាងឲ្យជំនឿរបស់យើងទៅលើព្រះយេស៊ូវគ្រីស្ទចុះ ។ សូមពន្យល់ថា នៅពេលយើងមានសំណួរ យើងអាចនឹងត្រូវបានល្បួងឲ្យទុកចោលនូវជំនឿរបស់យើងទៅលើព្រះយេស៊ូវគ្រីស្ទ ដោយសារយើងមិនមានចម្លើយ ។
-
តើអ្វីទៅជាគ្រោះថ្នាក់នៃការទុកចោលសេចក្តីជំនឿ និងទំនាក់ទំនងរបស់យើងជាមួយនឹងព្រះអម្ចាស់ នៅពេលយើងមានសំណួរ ?
កាន់ក្រឡទាំងពីរនៅក្នុងដៃរបស់អ្នក ហើយពន្យល់ថា យើងមិនចាំបាច់ទុកចោលជំនឿរបស់យើងទៅលើព្រះយេស៊ូវគ្រីស្ទ ដោយសារសំណួរទាំងនោះនោះទេ ។ យើងអាចបន្តឆ្ពោះទៅមុខដោយការទុកចិត្តលើព្រះអម្ចាស់ នៅពេលយើងស្វែងរកចម្លើយ ។
នៅពេលអ្នកសិក្សាហាបាគុក សូមយកចិត្តទុកដាក់ចំពោះចំណាប់អារម្មណ៍ពីព្រះវិញ្ញាណបរិសុទ្ធ ដែលអាចជួយអ្នកបន្តឆ្ពោះទៅមុខដោយសេចក្ដីជំនឿលើព្រះអម្ចាស់ នៅពេលអ្នករង់ចាំចម្លើយ ។
ការមើលមកឯព្រះ
គ្រប់មេរៀនដែលនៅសេសសល់ អ្នកអាចពិចារណាជាទៀងទាត់អំពីការអញ្ជើញសិស្សឲ្យបន្ថែមវត្ថុទៅក្នុងក្រឡនៃសេចក្ដីជំនឿ ។ ប្រសិនបើអ្នកធ្វើដូច្នេះ សូមឲ្យក្រដាសតូចៗជាច្រើនទៅសិស្សដើម្បីសរសេរអ្វីដែលពួកគេរៀនពីហាបាគុក ឬមិត្តរួមថ្នាក់អំពីមូលហេតុ ឬរបៀបទុកចិត្តលើព្រះអម្ចាស់ ។
ជាការឆ្លើយតបនឹងសំណួររបស់ហាបាគុកអំពីអំពើទុច្ចរិតនៅក្នុងសង្គមរបស់លោក ព្រះអម្ចាស់បានមានបន្ទូលថា ទ្រង់នឹង « តាំងសាសន៍ខាល់ដេឡើង » ( ពួកបាប៊ីឡូន ) ដើម្បីដាក់ទោសកូនចៅនៃអ៊ីស្រាអែល ( សូមមើល ហាបាគុក ១:៦ ) ។ ហាបាគុកឆ្ងល់ថា ហេតុអ្វីបានជាព្រះអម្ចាស់នឹងអនុញ្ញាតឲ្យពួកបាប៊ីឡូនដ៏ទុច្ចរិតវាយយកដែនដីប្រជារាស្រ្តរបស់ទ្រង់ ( សូមមើល ហាបាគុក ១:១២–១៧ ) ។
សូមអាន ហាបាគុក ២:១–៤ ដោយរកមើលអ្វីដែលហាបាគុកបានជ្រើសរើសធ្វើ នៅពេលលោកពុះពារជាមួយនឹងសំណួររបស់លោក និងរបៀបដែលព្រះអម្ចាស់បានឆ្លើយតប ។
-
តើអ្នកបានរកឃើញអ្វីខ្លះ ?
អ្នកអាចសួរសំណួរតាមដានដូចជា « តើអ្នកគិតថាវាមានលក្ខណៈយ៉ាងណាដើម្បី ‹ មើលទៅ ដើម្បីឲ្យដឹងជា[ ព្រះ ]នឹងមានព្រះបន្ទូលមកដូចម្តេច › ? ( សូមមើល ហាបាគុក ២:១ ) » ឬ « តើការ ‹ រស់នៅដោយសារសេចក្តីជំនឿ[ របស់យើង ]មានលក្ខណៈដូចម្ដេច › ? ( សូមមើល ហាបាគុក ២:៤ ) » ។
អ្នកអាចអញ្ជើញសិស្សឲ្យបន្ថែមអ្វីដែលពួកគេកំពុងរៀនទៅក្នុងក្រឡនៃសេចក្ដីជំនឿ ។
សូមពន្យល់ថា ព្រះអម្ចាស់បានមានបន្ទូលប្រាប់ហាបាគុកថា នៅទីបំផុត ពួកបាប៊ីឡូននឹងត្រូវទទួលទោសដោយសារអំពើទុច្ចរិតរបស់ពួកគេ ( សូមមើល ហាបាគុក ២:៥–២០ ) ។
សូមអាន ហាបាគុក ៣:១៧–១៩ ដោយរកមើលរបៀបដែលហាបាគុកបានជ្រើសរើសដើម្បីរស់នៅដោយសេចក្ដីជំនឿរបស់លោកលើព្រះអម្ចាស់ ។
ប្រសិនបើសិស្សត្រូវការជំនួយដើម្បីយល់អំពី ហាបាគុក ៣:១៧–១៨ អ្នកអាចពន្យល់ថានៅក្នុង ខទី ១៧ ហាបាគុកបានពិពណ៌នាអំពីលទ្ធផលដែលមិនគួរឲ្យចង់បានជាច្រើន ( រុក្ខជាតិមិនផ្តល់ផ្លែ វាលស្រែមិនផ្តល់ផលដំណាំជាដើម ) ។ នៅក្នុង ខទី ១៨ លោកបាននិយាយថាលោកនឹង « រីករាយដោយសារព្រះយេហូវ៉ា » ដោយមិនគិតពីលទ្ធផលនោះឡើយ ។
អ្នកក៏អាចពន្យល់បានដែរថា « ជើងឈ្លូស » នៅក្នុង ហាបាគុក ៣:១៩ សំដៅលើជើងឈ្លូស ដែលអាចឲ្យសត្វឈ្លូសឡើងលើដីដែលពិបាក ។ រូបភាពនេះបង្ហាញថា ព្រះអម្ចាស់នឹងប្រទានឲ្យយើងនូវសមត្ថភាពដើម្បីឡើងភ្នំដែលពិបាកឡើងរបស់យើង ។
-
តើឥរិយាបថ និងទង្វើរបស់ហាបាគុកបង្ហាញជំនឿរបស់លោកលើព្រះយ៉ាងដូចម្ដេច ?
សូមជួយសិស្សមើលឃើញពីគំរូរបស់ហាបាគុកដែល យើងអាចជ្រើសរើសដើម្បីរក្សាភាពស្មោះត្រង់ចំពោះព្រះអម្ចាស់ ខណៈដែលកំពុងរង់ចាំចម្លើយចំពោះសំណួរដ៏ស្មោះរបស់យើង ។
-
តើអ្នកដឹងអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទដែលជួយអ្នកទុកចិត្តទ្រង់ទាំងទ្វេ ខណៈកំពុងរង់ចាំចម្លើយ ?
នៅពេលសិស្សចែកចាយអ្វីដែលពួកគេដឹង អ្នកអាចនឹងសួរសំណួរតាមដានដូចជា « តើអ្នកបានដឹងអំពីព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ? »
អ្នកអាចអញ្ជើញសិស្សឲ្យបន្ថែមអ្វីដែលពួកគេកំពុងរៀនពីហាបាគុក ឬមិត្តរួមថ្នាក់របស់ពួកគេទៅក្នុងក្រឡនៃសេចក្ដីជំនឿ ។
របៀបបន្តឆ្ពោះទៅមុខ
សូមជួយសិស្សគិតអំពីរបៀបដើម្បីបន្តឆ្ពោះទៅមុខដោយសេចក្ដីជំនឿលើព្រះ ទោះជាពួកគេអាចមានសំណួរក៏ដោយ ។ ដើម្បីធ្វើដូច្នេះ សិស្សអាចមើល « His Grace: Choosing to Believe in God » ( ៤:០៧ ) ដោយរកមើលអ្វីដែលអ័ដាមបានធ្វើ ដើម្បីរក្សាភាពស្មោះត្រង់ចំពោះព្រះ ទោះបីជាមានសំណួរ និងកង្វល់ដ៏លំបាកក៏ដោយ ។
សិស្សក៏អាចអានផងដែរនូវ នីហ្វៃទី១ ១០:១៧–២២; ១១:១ ឬ ម៉ូសាយ ២៤:៩–១៧ ឬស្វែងយល់ពីផ្នែកមួយនៅក្នុង « Seeking Answers to Questions » នៅក្នុងTopics and Questions ( បណ្ណាល័យដំណឹងល្អ ) ។
-
តើអ្នករៀនអ្វីខ្លះដែលអាចជួយដល់យុវជនម្នាក់ដើម្បីជ្រើសរើសរក្សាភាពស្មោះត្រង់ចំពោះព្រះ នៅពេលពួកគេរង់ចាំចម្លើយ ?
សិស្សអាចចែកចាយបទពិសោធន៍អំពីពេលដែលពួកគេ ឬនរណាម្នាក់ដែលពួកគេស្គាល់បានជ្រើសរើសទុកចិត្តលើព្រះដោយស្មោះត្រង់ ខណៈពេលកំពុងរង់ចាំចម្លើយ ។ អ្នកក៏អាចចែកចាយបទពិសោធន៍ផ្ទាល់ខ្លួនរបស់អ្នក ឬថ្លែងទីបន្ទាល់អំពីមូលហេតុដែលអ្នកទុកចិត្តលើព្រះវរបិតាសួគ៌ និងព្រះយេស៊ូវគ្រីស្ទ ។
សូមលើកទឹកចិត្តសិស្សឲ្យសរសេរអ្វីដែលពួកគេបានរៀនថ្ងៃនេះ ដែលនឹងជួយពួកគេទុកចិត្តលើព្រះអម្ចាស់ នៅពេលពួកគេរង់ចាំចម្លើយ ។ សិស្សអាចបន្ថែមគំនិតទាំងនេះទៅក្នុងក្រឡនៃសេចក្តីជំនឿ ។
ប្រសិនបើមានពេលគ្រប់គ្រាន់ អ្នកអាចអានក្រដាសមួយចំនួនពីក្រឡនៃសេចក្តីជំនឿ ។ នៅពេលអ្នកអាន អ្នកអាចសុំសិស្សឲ្យចែកចាយគំនិត ឬចំណាប់អារម្មណ៍បន្ថែមដែលកើតមានចំពោះពួកគេ ។
ពិចារណារក្សាទុកក្រឡទាំងនេះដើម្បីយោងនៅក្នុងមេរៀននាពេលអនាគត ។ ឧទាហរណ៍ អ្នកអាចនឹងប្រើអ្វីដែលសិស្សបានបន្ថែមទៅក្នុងក្រឡនៃសេចក្ដីជំនឿ ដើម្បីលើកកម្ពស់មេរៀនអនុវត្តចំណេះចំណានខាងគោលលទ្ធិ ។