“Miqueas: ‘Unsa ba ang Gikinahanglan sa [Ginoo] Kanimo?,’” Manwal sa Magtutudlo sa Seminary sa Daang Tugon (2026)
“Miqueas: ‘Unsa ba ang Gikinahanglan sa [Ginoo] Kanimo?,’” Manwal sa Magtutudlo sa Seminary sa Daang Tugon
Miqueas; Nahum; Habacuc; Sofonias: Leksiyon 152
Miqueas
“Unsa ba ang Gikinahanglan sa [Ginoo] Kanimo?”
Daghan nato ang naghunahuna kon ang atong sinsero nga mga paningkamot nakapalipay ba gyod sa Langitnong Amahan ug kang Jesukristo. Naghunahuna si propetang Miqueas kon unsay iyang mahimo aron mapalipay ang Ginoo. Gitudloan si Miqueas sa “pagbuhat sa kaangayan, sa pagpakita sa makanunayong gugma, ug sa pagkinabuhi diha sa mapaubsanong pakig-uban” Kaniya (Miqueas 6:8). Kini nga leksiyon makatabang sa mga estudyante nga makahimo og plano sa pagbuhat sa kaangayan, pagpakita sa makanunayong gugma, ug pagkinabuhi sa mapaubsanong pakig-uban sa Langitnong Amahan ug ni Jesukristo.
Pagpangandam sa estudyante: Dapita ang mga estudyante nga maghunahuna og pipila ka sakop sa pamilya o higala, dayon maghunahuna og pihong mga butang nga ilang mahimo aron mapalipay ang kada usa sa maong mga tawo. Pwede nilang matikdan kon sa unsang paagi managlahi ang ilang himoon para sa matag tawo.
Posibleng mga Kalihokan sa Pagkat-on
Paglipay sa lainlaing tawo
Sa dili pa ang klase, pwede nimong isulat sa pisara ang mosunod nga dili kompletong pangutana.
Ikonsiderar ang pagsugod sa klase pinaagi sa pagdapit sa mga estudyante nga kadaghan tubagon ang pangutana, nga ibutang sa blangko ang lainlaing tawo (mama, papa, magtutudlo, bishop, higala) sa matag higayon nga tubagon kini. Pwedeng makigbahin ang mga estudyante ingon nga managpares o sa gagmayng grupo. Dayon dapita ang pipila ka boluntaryo nga mopakigbahin diha sa klase.
Kon gikinahanglan og usa ka ehemplo, pwede nimong ipakigbahin ang pipila sa imong mga tubag gamit ang lainlaing tawo sa imong kinabuhi.
-
Kon gusto nimong malipay ang imong ______________, unsay imong himoon?
-
Nganong managlahi ang atong himoon depende kon kinsay gusto natong lipayon?
Human ipakigbahin sa mga estudyante ang pipila ka tubag sa nag-unang mga pangutana, isulat diha sa blangkong bahin sa pisara ang Langitnong Amahan ug si Jesukristo.
Pamalandonga unsa ang imong gibati nga makapalipay sa Langitnong Amahan ug ni Jesukristo. Hunahunaa ang mga butang nga gihimo nimo karon nga makapalipay tingali Nila ug ang mga butang nga pwede pa nimong himoon. Sa kataposan sa leksiyon, dapiton ka nga maghimog plano nga sundon ang mga impresyon nga imong nadawat.
Unsay atong mahimo aron mapalipay ang Ginoo?
Samtang nagsulti ngadto sa katawhan sa Israel ug Juda, gipanagna ni Miqueas ang ilang dangatan tungod sa ilang pagkadaotan. Gihangyo ni Miqueas ang Israel ang hinumdoman ang dagkong panalangin nga ilang nadawat gikan sa Ginoo ug gidapit sila nga maghinulsol ug modangop ngadto Kaniya (tan-awa ang Miqueas 2–5).
Basaha ang Miqueas 6:4, nga pangitaon ang pipila sa mga paagi nga gipaktia sa Ginoo ang Iyang gugma sa Israel.
Dayon basaha ang Miqueas 7:7–8, 18–20, nga pangitaon ang giingon ni Miqueas nga himoon sa Ginoo para sa katawhan nga Iyang gipakigsaaran.
-
Unsay inyong nadiskobrehan?
-
Giunsa paghimo sa Langitnong Amahan ug ni Jesukristo kining mga butanga para ninyo?
Pwede nimong dapiton ang mga estudyante nga tubagon ang nag-unang pangutana diha sa ilang journal sa pagtuon ug dayon ipakigbahin sa usa ka pares o sa klase ang ilang gisulat.
Human mopakigbahin ang mga estudyante, pwede nimong ipasabot nga dihang ilhon nato ang dagkong mga butang nga gihimo sa Ginoo para nato, natural lang nga maghunahuna nga kon unsaon nato Siya pag-alagad ug paglipay. Ipasabot nga nakigbisog si propeta Miqueas kon unsay atong mahimo aron mapalipay ang Ginoo.
Ang ipabasa ug ang pangutana sa ubos modapit sa mga estudyante nga ilhon ang kamatuoran gikan sa mensahe ni Miqueas. Ang pagtabang sa mga estudyante nga ilhon ang mga kamatuoran gikan sa tudling sa kasulatan motabang aron mahimong mas makahuluganon ang ilang pagtuon sa kasulatan. Ang makahuloganong pagtuon sa kasulatan maoy importanteng elemento aron makapalambo og hugot nga pagtuo ug pagkakabig ngadto ni Jesukristo. (Alang sa dugang nga pagbansay sa pagsuknag mga pangutana nga motabang sa mga estudyante nga mailhan ug masulti ang makapakabig nga mga kamatuoran, tan-awa ang “Tutoki ang mga kamatuoran nga modala ngadto sa pagkakabig ug paglig-on sa hugot nga pagtuo diha ni Jesukristo” diha sa Pagpalambo sa mga Kahanas sa Magtutudlo.)
Usahay naay sayop nga mga ideya ang mga tawo bahin sa kon unsay ilang himoon aron mapalipay ang Ginoo. Gitabangan ta ni propeta Miqueas nga mas masabtan ang gugma sa Ginoo.
Sa Miqueas 6:6–7, migamit ang propeta og pwersadong mga ehemplo aron ipakita nga walay bahandi sa kalibotan ang makapalipay sa Ginoo.
Basaha ang Miqueas 6:8, nga pangitaon kon unsay atong mahimo aron mapalipay ang Ginoo.
-
Unsaon nimo pag-summarize ang imong nakat-onan bahin sa paglipay sa Ginoo?
Gamiton tingali sa mga estudyante ang kaugalingon nilang mga pulong sa pagpahayag sa kamatuoran nga malipay ang Ginoo dihang maningkamot ta sa pagbuhat sa kaangayan, sa pagpakita sa makanunayong gugma,ug sa pagkinabuhi diha sa mapaubsanong pakig-uban Kaniya.
Unsay gipangayo sa Ginoo?
Sa kataposan sa leksiyon, imong dapiton ang mga estudyante sa paghimo og plano nga pauswagon ang ilang mga paningkamot sa paglipay sa Langitnong Amahan ug ni Jesukristo sa mga paagi nga gihisgotan sa bersikulo 8.
Aron maandam ang mga estudyante sa paghimo niini nga plano, ikonsiderar ang paggamit sa handout nga “Unsay Gipangayo sa Ginoo?”
Human matun-i sa mga estudyante ang usa o kapin pang seksiyon sa handout uban ang usa ka grupo, pwede nimo silang dapiton sa paghimo og tsart nga naay tulo ka kolum diha sa pisara nga naay label nga Pagbuhat sa Kaangayan, Pagpakita sa Makanunayong Gugma, ug Mapaubsanong Pakig-uban. Human matun-i ang handout, pwedeng isulat sa mga estudyante diha sa gagmayng piraso sa papel kon sa unsang mga paagi mapalipay sa usa ka tin-edyer ang Ginoo ug ipapilit kini sa pisara ilawom sa haom nga kolum. Sa kataposan sa kalihokan, pwedeng basahon sa mga estudyante ang tanang papel. Makatabang tingali ni nila nga pilion ang usa ka butang nga nainteres sila sa paghimo.
Pagpakita og pasalamat ngadto sa Ginoo
Human marebyo sa mga estudyante ang mga sugyot sa ilang mga kaklase, ipakita ang mosunod nga mga instruksiyon ug pag-aghat.
Karon nadasig tingali sa Espiritu Santo ang imong hunahuna o pagbati bahin sa usa ka butang nga makatabang tingali nimo sa pagbuhat sa kaangayan, sa pagpakita sa makanunayong gugma, ug sa pagkinabuhi diha sa mapaubsanong pakig-uban sa Ginoo. Paghimog plano nga molihok uyon sa imong nakat-onan ug gibati pinaagi sa pagkompleto sa mosunod nga mga pag-aghat diha sa imong journal sa pagtuon.
-
Aron mas mapalipay ang Langitnong Amahan ug si Jesukristo, gusto kong magpunting sa hugpong sa mga pulong nga “” gikan sa Miqueas 6:8.
-
Ang usa o duha ka pihong butang nga gusto nakong himoon mao ang: .
Pwede nimong ipasalig sa mga estudyante nga malipay pag-ayo ang Langitnong Amahan sa atong kinasingkasing nga mga paningkamot nga lipayon Siya. Kini nga mga paningkamot motabang aron mas mahisama ta ni Jesukristo kada adlaw. Pwede nimong ipakigbahin ang imong pamatuod nga samtang padayon tang naningkamot nga mas mouswag, padakoon sa Manluluwas ang atong kinasingkasing nga mga paningkamot.