Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Amos 3; 7: Ipadayag sa Ginoo ang Kamatuoran pinaagi sa Iyang mga Propeta

“Amos 3; 7: Ipadayag sa Ginoo ang Kamatuoran pinaagi sa Iyang mga Propeta,” Manwal sa Magtutudlo sa Seminary sa Daang Tugon (2026)

“Amos 3; 7: Ipadayag sa Ginoo ang Kamatuoran pinaagi sa Iyang mga Propeta,” Manwal sa Magtutudlo sa Seminary sa Daang Tugon

Amos; Abdias; Jonas: Leksiyon 149

Amos 3; 7

Ipadayag sa Ginoo ang Kamatuoran pinaagi sa Iyang mga Propeta

Sa kalibotan diin daghan kaayo og makapakombinsir nga mga panglantaw, lisod usahay ilhon kon hain niini ang angayng saligan. Maayo na lang kay gipadayag sa atong mahigugmaong Langitnong Amahan ug sa Manluluwas, si Jesukristo, ang Ilang mga plano alang kanato pinaagi sa Ilang buhi nga mga propeta. Kini nga leksiyon makatabang sa mga estudyante nga masabtan nga ipadayag sa Langitnong Amahan ug ni Jesukristo ang tambag ug kamatuoran pinaagi sa Ilang mga propeta.

Posibleng mga Kalihokan sa Pagkat-on

Mga tubag sa tambag sa propeta

Ang mosunod nga kalihokan gidisenyo sa pagtabang sa mga estudyante nga pamalandongon ang ilang kinaiya ngadto sa mga propeta. Makatabang tingali ang pagsulat diha sa pisara sa mosunod nga tulo ka tubag sa social media.

Isip alternatibo sa mosunod nga kalihokan, pwede nimong dapiton ang mga estudyante sa paghunahuna nga ang mga tubag nga gipakigbahin sa ilang mga higala human maminaw sa pakigpulong sa propeta diha sa kinatibuk-ang komperensiya o sa debosyonal sa kabatan-onan. Dayon pwede nimong laktawan ang kauban nga pangutana.

Hunahunaa nga nakita nimo ang mosunod isip mga tubag diha sa usa ka post sa social media:

“Wala siyay katungod nga maghisgot bahin niini. Wala siya kasabot.”

“Wala siya kasabot kon unsa gyod ang nahitabo.”

“Sa kadaghan nakong himoon, wala nako makita kon unsaon nako sa paggamit niini nga tambag sa akong nagkapuliki kaayo nga kinabuhi.”

Kinsa kahay gitumong niini nga mga tubag?

Pwede kang magpakita og hulagway sa buhing propeta ug dapita ang mga estudyante sa paghunahuna nga kining mga komentaryoha maoy mga tubag sa unsay giingon sa propeta. Pwedeng ipakigbahin sa mga estudyante kon nganong ingon niini ang kinaiya sa usa ka tawo.

Ikonsiderar ang pagpakita sa mosunod nga mga pangutana aron tabangan ang mga estudyante nga masukod ang ilang mga pagbati bahin sa pagsunod sa tambag sa propeta.

Paggahin og panahon sa pagpamalandong sa imong panglantaw sa propeta sa Ginoo diri sa yuta karon. Pwede nimong ikonsiderar ang imong mga tubag sa mosunod nga mga pangutana:

Unsa ang akong gibati bahin sa tambag sa propeta? Mag-usab-usab ba ang akong pagbati depende sa tambag nga iyang ihatag?
Unsa kaha ang akong mahatag nga mga rason sa pagsunod sa tambag sa propeta? Naa ba koy mga kalisdanan sa pagsunod sa tambag sa propeta?

Samtang atong tun-an ang basahon ni Amos karon, makatabang nimo ang Espiritu Santo nga makakat-on og dugang bahin sa kaimportante sa mga pulong sa Dios nga gihatag kanato pinaagi sa Iyang mga propeta. Pwede nimong isulat ang imong mga panabot o mga pangutana samtang nagtuon ka karon.

Ipadayag sa Ginoo ang Iyang mga plano pinaagi sa Iyang mga propeta

Sa panahon sa propetikanhong pagpangalagad ni Amos ngadto sa amihanang bahin sa gingharian sa Israel, daghan sa katawhan sa pakigsaad sa Dios ang mibiya Kaniya ug sa Iyang mga propeta ug misunod sa daotang pagkinabuhi sa silingang mga nasod (tan-awa sa Amos 2:6–12). Gipili sa Ginoo si Amos aron awhagon silang maghinulsol. Si Amos nanagna sa pagkalaglag ug pagkabihag ni Hari Jeroboam II ug sa Iyang katawhan (tan-awa sa Amos 7:8–9; 11, 17).

Basaha ang Amos 7:10–15, nga pangitaon kon giunsa pagtubag ni Amasias, ang pari ni Hari Jeroboam II, sa propetikanhong tambag ni Amos.

Unsay inyong nakaplagan?
Ngano sa imong hunahuna nga ang mga tawo naghunahuna nga sila dili “[maka]dala sa tanang mga pulong ni [Amos]” (Amos 7:10) ug gusto nga managna siya sa laing lugar (tan-awa sa Amos 7:12)?
Sa imong hunahuna, nganong ang mga propeta sa Dios padayong nanudlo bisan og pipila ka tawo nga nakakita kanila nga dili ilado, wala makasabot, o wala kinahanglana?

Kon dili kini hisgotan sa mga estudyante, pwede kang mangutana kon unsay gibuhat ni Amos sa wala pa siya gitawag aron mahimong propeta (tan-awa sa Amos 7:14) ug kon unsay gihimo sa Ginoo diha sa bersikulo 15 aron tawagon si Amos nga mahimong propeta. Ipasabot nga, sama ni Joseph Smith ug sa uban pa, ang Ginoo wala magkinahanglan sa Iyang mga propeta nga maghupot og taas nga posisyon o mga kalamposan sa dili pa Niya tawagon sila nga mahimong mga propeta. Kon nagkinahanglan og tabang ang mga estudyante sa pagtubag niini nga pangutana, pwede nimong ipakigbahin ang pahayag gikan ni Presidente Nelson diha sa “Dugang nga mga Kapanguhaan” niini nga leksiyon diha sa Librarya sa Ebanghelyo.

Sa nag-unang mga kapitulo, gipadayag sa Ginoo ang gamhanang kamatuoran bahin sa Iyang kaugalingon ug sa Iyang mga propeta pinaagi ni Amos.

Ang Amos 3:7 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra nila kining makita.

Basaha ang Amos 3:7–8, nga pangitaon kon unsa kanunay ang buhaton sa Ginoo pinaagi sa Iyang mga propeta.

Makatabang tingali sa mga estudyante ang pagkahibalo nga ang ubang termino para sa sekreto naglakip sa tambag o plano.

Unsay atong makat-onan bahin sa Ginoo gikan niini nga mga bersikulo?

Mogamit tingali og lainlaing mga pulong ang mga estudyante aron ilhon nga ipadayag sa Ginoo ang Iyang mga plano pinaagi sa Iyang mga propeta. Ingon nga pananglitan niini nga kamatuoran, pwede nimong ipakigbahin nga sa wala pa malaglag ang Juda ug Israel tungod sa pagkadaotan sa mga tawo, gipadayag sa Ginoo ang mahitabo kon dili maghinulsol ang mga tawo (tan-awa sa Amos 2:4–6, 8:11–12).

Samtang magpadayon ang leksiyon, pangita og mga paagi aron mahatagan og pagtagad nga ang Ginoo nahigugma kanato ug gusto nga mogiya kanato.
Unsay gitudlo niini nga kamatuoran kanimo kon nganong importante nga maminaw ka sa propeta bisan unsa pa ang tubag sa uban ngadto sa iyang mga pulong?

Pagsunod sa mga propeta sa Ginoo

Ang mosunod nga kalihokan maoy usa ka paagi nga tabangan ang mga estudyante nga palawman ang ilang pagsabot nga ipadayag sa Langitnong Amahan ug ni Jesukristo ang kamatuoran pinaagi sa Ilang mga propeta. Ikonsiderar ang pag-organisar sa mga estudyante sa gagmayng mga grupo ug ipakita sa tagsa-tagsa ang mga lakang sa kalihokan.

Hinumdomi ang mga komento sa social media sa sinugdanan sa leksiyon ug pagpili og usa. Ang mosunod nga kalihokan makatabang nimo sa pagpangandam aron makasulat og tubag.

Basaha pag-usab ang Amos 3:7 ug pamalandonga kon sa unsang paagi kini makatabang sa tawo nga mikomentaryo og ingon niadto. Basaha pod ang mosunod nga mga tudling sa doktrinal nga kahanas, nga pangitaon kon sa unsang paagi kini makatabang. (Ikonsiderar ang pag-link o pag-cross reference niini nga mga kasulatan ngadto sa Amos 3:7.)
- Ezequiel 3:16–17
- Doktrina ug mga Pakigsaad 1:37–38
- Doktrina ug mga Pakigsaad 21:4–6
Pag-apil og dili moubos sa duha ka panalangin nga imong madawat kon maminaw ka sa propeta sa Dios. Makakita ka og mga pananglitan diha sa mga kasulatan, mga istorya nga gikan sa kasaysayan sa Simbahan, o sa mga pagtulun-an sa mga propeta karon. Sulayi ang pagpakigbahin og usa ka pananglitan diin nakahimo og positibong kausaban sa imong kinabuhi ang mga pulong sa propeta.

Pwede nimong ipakigbahin ang pipila sa mosunod nga mga pananglitan ngadto sa mga estudyante, kon gikinahanglan:

Pinaagi sa Iyang propeta nga si Noe, gipasidan-an sa Ginoo ang mga tawo nga kon dili sila maghinulsol, malaglag sila pinaagi sa baha (tan-awa sa Moises 8:22–30; Genesis 7:17–24).
Gitagna ni propeta Isaias ang bahin sa unsa ang masinati sa Manluluwas pinaagi sa Iyang Pag-ula (tan-awa sa Isaias 53:3–5).
Ang simbahan nga nakasentro sa panimalay ug gisuportahan sa Simbahan “miandam kanato … sa wala pa ang bisan unsa nga timailhan sa pandemya, [nga] naghimo kanato sa paglahutay sa mga hagit nga nangabot” (Gary E. Stevenson, “Gipangga sa Ginoo,” Liahona, Nob. 2020, 103).

Ang akong tubag

Gamit ang imong nakat-onan ug gibati karon, pagsulat og makatabang nga tubag sa usa sa negatibong mga komentaryo sa sinugdanan sa leksiyon. Seguroa nga mag-apil og dili moubos sa usa ka kasulatan ug usa ka pananglitan, nga pwedeng personal nga kasinatian.

Dapita ang pipila ka andam nga estudyante sa pagpakigbahin sa ilang mga tubag. Ikonsiderar ang pagpakigbahin sa gitudlo kanimo sa Espiritu Santo bahin sa gugma ug giya sa Dios pinaagi sa Iyang mga propeta.

Pagsag-ulo

Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanong hugpong sa mga pulong sa kasulatan atol niini nga leksiyon ug rebyohon kini sa umaabot nga mga leksiyon. Ang mahinungdanong hugpong sa mga pulong sa kasulatan para sa Amos 3:7 mao nga “Ang Ginoong Dios. … iyang tinago ipadayag Niya sa Iyang mga alagad ang mga propeta.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Nganong padayong gitudlo sa mga propeta sa Dios ang kamatuoran bisan og pipila sa mga tawo nakakita kanila nga dili ilado, wala makasabot, o wala kinahanglana?

Si Presidente Russell M. Nelson mipasabot:

Usahay kami isip mga lider sa Simbahan gisaway tungod sa hugot nga paghupot sa mga balaod sa Dios, pagpanalipod sa doktrina sa Manluluwas, ug pagsalikway sa katilingbanong mga pagpamugos sa atong panahon. Apan ang among sugo isip giordinahan nga apostoles mao ang “pagpanlakaw ngadto sa tibuok kalibotan sa pagsangyaw sa [Iyang] ebanghelyo ngadto sa matag linalang.” Kana nagpasabot nga kami gimandoan sa pagtudlo sa kamatuoran.

Sa pagbuhat sa ingon, usahay kami gipasanginlan sa pagkadili maamumahon samtang kami nagtudlo sa mga panginahanglanon sa Amahan alang sa kahimayaan didto sa celestial nga gingharian. Apan dili ba kini mas labaw pa nga dili maamumahon alang kanamo sa dili pagsulti sa kamatuoran—sa dili pagtudlo sa unsay gipadayag sa Dios?

Kini eksakto tungod kay kami gusto sa labing maayo alang sa tanang mga anak sa Dios nga among gisangyaw ang Iyang kamatuoran. Mahimong dili kami mosulti kanunay sa mga tawo kon unsay ilang gusto nga paminawon. Ang mga propeta panagsa ra nga mailado. Apan kami sa kanunay nagtudlo sa kamatuoran! (“The Love and Laws of God,” [Brigham Young University devotional, Sept. 17, 2019], 3, speeches.byu.edu)

Nganong makaluwas ang pagsunod sa tambag sa mga propeta sa Ginoo?

Si Elder Allen D. Haynie sa Seventy mipasabot:

11:22

Ang pagkahibalo pinaagi sa pagpadayag nga adunay buhing propeta sa kalibotan makausab sa tanan. Makapawala kini sa gana sa tawo nga makiglalis pa kon kanus-a mamulong ang propeta isip usa ka propeta o kon makataronganon ba nga ang usa ka tawo magpili kon hain sa mga tambag sa propeta ang iyang dawaton o supakon. Ang maong pinadayag nga kahibalo modapit sa tawo aron mosalig sa tambag sa usa ka buhing propeta, bisan kon wala kita makasabot niini sa hingpit. Hinuon, ang hingpit ug mahigugmaong Amahan sa Langit nagpili sa sundanan sa pagpadayag sa kamatuoran ngadto sa Iyang mga anak pinaagi sa usa ka propeta, ang tawo kinsa wala gayod magtinguha sa maong sagradong tawag ug kinsa wala magkinahanglan sa atong tabang aron makamatngon sa iyang kaugalingong mga kakulangan. Ang propeta mao ang usa ka tawo nga personal nga giandam sa Dios, gitawag, gikorehian, gidasig, gibadlong, gibalaan, ug gipaluyohan. Mao kana nga dili gayod kita mabutang sa espirituwal nga risgo diha sa pagsunod sa propetikanhon nga tambag. (“Buhing Propeta alang sa Ulahing mga Adlaw,” Liahona, Mayo 2023, 25)

Unsa ang matudlo kanato sa propetikanhong giya bahin sa Dios?

Si Elder Dieter F. Uchtdorf sa Korum sa Napulog Duha ka Apostoles mitudlo:

Gisultihan kita sa mga kasulatan nga ang unang butang nga gihimo sa Dios human sa paglalang sa lalaki ug babaye mao ang pagpakig-istorya kanila. May importante Siyang impormasyon ug bililhong mga instruksyon nga ihatag kanila. Ang Iyang tuyo dili aron mabudlay o mabalaka sila apan sa paggiya kanila ngadto sa kalipay ug mahangturong himaya.

Ug kadto sinugdanan lamang. Sukad niadtong adlawa, padayon ang Ginoo sa pagpakigsulti sa Iyang mga anak. Napreserbar ang Iyang mga pulong, nga gibahandi, ug gitun-an sa iyang mga disipulo sa tanang henerasyon. Gitahod kini niadtong nagtinguha nga masayod sa kabubut-on sa Dios, ug nagsaksi kini sa kamatuoran nga “ang Ginoong Dios dili magbuhat sa bisan unsa, gawas kon ang iyang tinago ipadayag niya sa iyang mga alagad ang mga manalagna” (Amos 3:7).

Mao na kini ang sundanan sukad pa sa sinugdanan sa panahon, ug ang sundanan nagpadayon karon. Dili lang kini usa ka maanindot nga sugilanon sa Biblia; estabilisado kini nga pamaagi sa Dios sa pagsulti sa importanteng mga mensahe ngadto sa Iyang mga anak. …

Usa kini sa labing mahimayaon, makadasig, ug malaomong mga mensahe sa Pagpahiuli—wala magpakahilum ang Dios! Gihigugma Niya ang Iyang mga anak. Wala kita Niya pasagdi nga maglatagaw ra sa kangitngit. (“Ang Pulong sa Dios Ngadto sa Iyang mga Anak,” Liahona, Mar. 2018, 4)

Dugang nga mga Kalihokan sa Pagkat-on

Pagsunod sa propeta sa Dios dihang nag-atubang sa dili pagsinabtanay o kalibog

Ang pipila ka estudyante tingali maglisod o dili mouyon sa tambag sa propeta. Aron tabangan ang mga estudyante nga makakat-on kon unsay ilang mahimo niini nga mga sitwasyon, pwede ninyong tan-awon ang “Face to Face with Elder and Sister Rasband” gikan sa time code 18:26 hangtod 21:34.

84:14

Human matan-aw sa mga estudyante ang bidyo, pwede ninyong hisgotan ang mga pangutana nga parehas sa mosunod:

Sa unsang paagi kita napanalanginan karon nga makaangkon og mas kanunay nga akses sa giya sa Dios pinaagi sa Iyang mga propeta?
Sa imong hunahuna, unsa kahay ipasabot sa pagpaminaw sa usa ka propeta uban ang “pagpailob ug pagtuo”?
Unsang pipila ka butang ang atong mahimo sa pagsunod sa buhing mga propeta sa Dios?

Ang kaalam sa Dios

Usa ka paagi sa pagtabang sa mga estudyante nga madugangan ang ilang pagsalig sa tambag sa propeta mao ang pagtabang nila nga mas masabtan ang kinaiya sa Dios. Pwede nimong himoon ang mosunod isip kabahin sa pagtabang sa mga estudyante nga mailhan ang kinutlo nga kamatuoran diha sa Amos 3:7.

Dapita ang mga estudyante nga basahon ang mosunod nga mga tudling sa kasulatan ug ang pahayag ni Elder Dieter F. Uchtdorf sa Korum sa Napulong Duha ka Apostoles:

Si Elder Dieter F. Uchtdorf mitudlo:

Adunay usa ka tinubdan sa kamatuoran nga kompleto, tukma, ug kasaligan. Kana nga tinubdan mao ang atong walay kinutuban sa kaalam ug nahibalo sa tanan nga Langitnong Amahan. Nasayod Siya sa kamatuoran kon unsa kini kaniadto, unsa kini karon, ug unsa kini sa umaabut (tan-awa sa Doktrina ug mga Pakigsaad 93:24). “Siya nakasabot sa tanan nga mga butang, … ug Siya labaw sa tanan nga mga butang, … ug ang tanan nga mga butang gihimo pinaagi Kaniya, ug gikan Kaniya” (Doktrina ug mga Pakigsaad 88:41).

Ang atong mahigugmaong Langitnong Amahan nagtanyag sa Iyang kamatuoran ngari kanato, Iyang mortal nga mga anak. (“Our Search for Truth,” New Era, Ago. 2020, 5)

Dayon, pwedeng hisgotan sa mga estudyante kon sa unsang paagi ang pagkasabot nga ang Dios nahibalo sa tanan motabang nila nga mosalig sa Iyang mga propeta.