Oseas

Usa ka tuig nang managhigala si Camille ug Hannah. Nianang panahona, nahimo silang suod ug gisuportahan nila ang usag usa sa lisod nga mga kahimtang. Gisulti ni Hannah ang pipila sa iyang mga kalisdanan. Misaad si Camille nga dili ni niya isulti ngadto sa uban. Pero, pipila ka adlaw ang milabay, nahibaloan ni Hannah nga gisultian ni Camille ang pipila sa ilang mga higala bahin sa mga kalisdanan ni Hannah.

• Kon ikaw si Hannah, unsa tingali ang imong mahunahunaan ug bation?

• Ngano kahang lisod pasayloon si Camille?

Ang basahon ni Oseas nagtudlo bahin sa relasyon sa kaminyoon. Diha sa mga kasulatan, sagad gamiton sa Ginoo ang kaminyoon isip usa ka simbolo sa atong pakigsaad nga relasyon ngadto Kaniya. Si Presidente Russell M. Nelson mitudlo nga ang atong mga pakigsaad naghimo og “relasyon sa pakigsaad diin [kita ug ang Ginoo] gibugkos nga magmaunongon ug magmatinud-anon sa usag usa” (“Ang Walay Kataposan nga Pakigsaad,” Liahona, Okt. 2022, 6).

Usahay, ang mga anak sa Dios dili matinud-anon sa Ginoo ug nahisalaag sa ilang mga pakigsaad ngadto Kaniya. Samtang imong tun-an ang basahon ni Oseas karon, pangitaa kon unsay gibati sa Ginoo ug mga tubag sa Iyang mga katawhan sa pakigsaad bisan kon sila nahisalaag gikan Kaniya.

Si Oseas usa ka propeta sa Amihanang Gingharian sa Israel, nga nanagna sa samang panahon ni Isaias. Gisugo sa Ginoo si Oseas nga minyoan si Gomer, bisan pa nga siya maluibon ug usa ka mananapaw ug tigbaligya og dungog. Si Oseas ug Gomer adunay tulo ka anak (tan-awa sa Oseas 1:2–8).

Basaha ang Oseas 2:5, nga pangitaon kon unsay giingon ni Oseas nga gihimo ni Gomer. “Ang ilang inahan” nagtumong kang Gomer.

• Sa unsang paagi ang mga aksyon ni Gomer nagrepresentar sa katawhan sa Israel?

  Pwede nimong ipasabot nga ang pagkadili matinud-anon ni Gomer sa iyang pakigsaad sa kaminyoon kang Oseas nagrepresentar sa espirituhanong pagkadili matinud-anon sa Israel sa ilang relasyon sa pakigsaad ngadto sa Dios. Kon makatabang, pwedeng basahon sa mga estudyante ang 2 Mga Hari 17:14–16, nga pangitaon kon sa unsang paagi wala gituman sa Israel ang ilang mga pakigsaad ngadto sa Ginoo.

  Aron tabangan ang mga studyante nga makonektar ang mga kasulatan ngadto sa ilang kaugalingon, pwede kang mangutana og sama sa mosunod. Ilista ang mga tubag sa mga estudyante diha sa pisara ilawom sa Girepresentahan ni Gomer ang Israel.

• Sa unsang paagi ang mga tawo sa atong panahon usahay mahisalaag gikan sa Ginoo ug sa ilang mga pakigsaad ngadto Kaniya?

Pamalandongi ang mga paagi diin matental tingali ka nga dili tumanon ang imong mga pakigsaad o mga paagi nga tingali nahisalaag ka sa imong mga pakigsaad ngadto sa Ginoo.

• Sa unsang paagi ang imong nakat-onan bahin sa Ginoo makatabang sa kabatan-onan nga nawad-an og kadasig o naulaw kay mipalayo sila gikan sa Ginoo?

  Sa dili pa mangutana og sunod nga pangutana, maalamon tingali ang pagtambag sa mga estudyante nga dili ipakigbahin ang bisan unsa nga personal ra kaayo, sama sa kanhing mga sala. Mahimo ka usab nga mopakigbahin og usa ka kasinatian gikan sa imong kaugalingong kinabuhi.

• Sa unsang mga paagi nga imong nakita nga ang Ginoo mipakita sa Iyang gugma ug kaluoy diha sa imong kinabuhi o sa kinabuhi sa imong kaila?

Pagpili og usa sa mosunod.

• Pagsulat og mensahe. Hunahunaa ang usa ka tawo (pwedeng ang imong kaugalingon) nga mibati tingali nga sila nahisalaag kaayo gikan sa Ginoo aron mapasaylo. Paghimo og makapadasig nga sulat para sa maong tawo ug ipakigbahin ang imong nakat-onan bahin sa Langitnong Amahan ug ni Jesukristo nga para nimo makatabang kanila.

• Pagsulat og deskripsiyon. Unsaon nimo paghulagway ang kinaiya sa Langitnong Amahan ug ni Jesukristo base sa imong nakat-onan o gibati karon?