“Oseas 1–6; 10–14; Joel: Kinatibuk-ang Pagpasabot,” Manwal sa Magtutudlo sa Seminary sa Daang Tugon (2026)
“Oseas 1–6; 10–14; Joel: Kinatibuk-ang Pagpasabot,” Manwal sa Magtutudlo sa Seminary sa Daang Tugon
Oseas 1–6; 10–14; Joel
Oseas 1–6; 10–14; Joel
Kinatibuk-ang Pagpasabot
Sa basahon sa Oseas, gigamit sa Ginoo ang kaminyoon ni Oseas ug Gomer ingon nga simbolo sa pagtudlo sa Israel bahin sa Iyang dili mapakyas nga gugma sa pakigsaad. Pinaagi ni propeta Joel, misaad ang Ginoo nga, “ibubo ko ang akong espiritu sa tanang katawhan” (Joel 2:28; tan-awa usab sa Joseph Smith—Kasaysayan 1:41).
Tabangi ang mga tigkat-on sa pagtinguha, pag-ila, ug paglihok sa personal nga pagpadayag. Kitang tanan nagkinahanglan og tabang sa pag-ila sa personal nga pagpadayag gikan sa Espiritu Santo. Samtang imong tinguhaon ang pagtudlo pinaagi sa Espiritu, pangita og mga paagi sa pagtabang sa mga estudyante nga mailhan ang mga paagi nga nakig-istorya kanila ang Espiritu. Aron makakat-on og dugang bahin niini, tan-awa ang “Gitabangan sa Manluluwas ang Uban sa Pagtinguha, Pag-ila, ug Paglihok sa Personal nga Pagpadayag” (Pagtudlo sumala sa Pamaagi sa Manluluwas [2022], 18). Para sa usa ka pananglitan kon unsaon nimo pagtabang sa uban nga mailhan ang Espiritu, tan-awa ang Leksiyon 148 “Sukda ang Imong Nakat-onan 9.”
Pangandam sa pagtudlo
Ang mosunod nga impormasyon mohatag nimo og mga ideya kon unsay kinahanglan nimong andamon daan para sa matag leksiyon.
Oseas
Katuyoan sa leksiyon: Aron tabangan ang mga estudyante nga masabtan ang dili mapakyas nga gugma ug kaluoy sa Ginoo para nila.
-
Pagpangandam sa estudyante: Dapita ang mga estudyante nga maghunahuna kon unsa nga mga kasinatian ang nakatabang nila nga mabati ang gugma ug kaluoy sa Ginoo
-
Handout: “Pagsabot sa Gugma ug Kaluoy sa Ginoo”
Joel
Katuyoan sa leksiyon: Aron tabangan ang mga estudyante nga madugangan ang ilang kapasidad nga makadawat og personal nga pagpadayag gikan sa Ginoo pinaagi sa Espiritu Santo.
-
Pagpangandam sa estudyante: Hatagi ang mga estudyante og pangutana nga “Unsay akong buhaton aron makadawat og dugang personal nga pagpadayag sa akong kinabuhi?” Dapita sila sa pagpamalandong sa lainlaing mga paagi nga sila makatubag. Pwede usab silang mangita og tubag sa pangutana diha sa mga kasulatan o mga pagtulun-an sa mga lider sa Simbahan o mangutana sa mga tawo nga ilang kasaligan.
-
Handout: “Pagpalambo sa Imong Kapasidad sa Pagdawat og Pagpadayag”
-
Mga aytem: Usa ka gamayng tasa, usa ka pitsel, dakong balde, mga piraso sa papel
-
Mga aytem nga ipakita: Mga instruksiyon para sa upat ka lainlaing opsiyon sa paghisgot og mga paagi nga motabang nato sa pagdawat og personal nga pagpadayag
Sukda ang Imong Nakat-onan 9
Katuyoan sa leksiyon: Aron tabangan ang mga estudyante nga pamalandongan ang gitakda nilang mga tumong ug ang paglambo nga ilang nasinati sa ilang pagtuon sa Jeremias–Joel.
-
Pagpangandam sa estudyante: Dapita ang mga estudyante sa pagtambong nga andam sa pagpakigbahin og tudling sa kasulatan nga makahuloganon para nila gikan sa ilang pagtuon sa Daang Tugon. Hangyoa sila nga maghunahuna kon sa unsang paagi nakatabang nila ang maong tudling sa pagsunod ni Jesukristo.
-
Mga aytem nga ipakita: Usa ka hulagway sa Manluluwas; mga pag-aghat aron tabangan ang mga estudyante nga sukdon ang ilang mga gituohan bahin sa ilang balaanong misyon; usa ka graphic aron tabangan ang mga estudyante nga sukdon ang ilang plano sa pagpakigbahin sa ebanghelyo sa Manluluwas