“Isaias 53: “Gipas-an [ni Jesukristo] ang atong kasakitan, ug gipas-an niya ang atong mga kasub-anan,’” Manwal sa Magtutudlo sa Seminary sa Daang Tugon (2026)
“Isaias 53: “Gipas-an [ni Jesukristo] ang atong kasakitan, ug gipas-an niya ang atong mga kasub-anan,’” Manwal sa Magtutudlo sa Seminary sa Daang Tugon
Isaias 50–57: Leksiyon 124
Isaias 53
“Gipas-an [ni Jesukristo] ang atong kasakitan, ug gipas-an niya ang atong mga kasub-anan”
Ang atong mga kalisod sa mortalidad mahimong maoy hinungdan nga kita makahunahuna kon aduna bay nakasabot sa atong nasinati ug aduna bay makatabang kanato. Pinaagi sa Iyang maulaong sakripisyo, nabati ni Jesukristo ang tanan nga mahimo natong masinati sa mortalidad. Tungod sa Iyang Pag-ula, si Jesukristo makatabang kanato sa atong pag-antos. Kini nga leksiyon makatabang sa mga estudyante nga mapasalamaton sa gibuhat sa Manluluwas alang kanila pinaagi sa Iyang Pag-ula.
Pagpangandam sa estudyante: Dapita ang mga estudyante sa pagpaningkamot sa pagsag-ulo sa pakisayran sa doktrinal nga kahanas Isaias 53:3–5 ug sa mahinungdanong hugpong sa mga pulong sa kasulatan nga “[Si Jesukristo] usa ka tawo sa mga kasub-anan, ug nakasinati sa pag-antus”
Posibleng mga Kalihokan sa Pagkat-on
Mga kasinatian sa kinabuhi
Aron matabangan ang mga estudyante nga mahunahuna ang gisinati ni Jesukristo alang kanila isip bahin sa Iyang Pag-ula, ikonsiderar ang pagsulat og, “Walay usa nga nasayod kon unsa kini. Walay usa nga nakasabot,” diha sa pisara.
-
Unsa kaha nga mga kasinatian sa mga tawo nga mahimong hinungdan nga sila makahunahuna niini nga paagi?
Ikonsiderar ang pagsulat sa mga tubag sa mga estudyante diha sa pisara. Hatagi og oras ang pipila ka estudyante sa pagpakigbahin.
Dayon, ipakita ang mosunod nga prompt ug mga pangutana.
Pamalandongi ang imong mga tubag sa mosunod nga mga pangutana:
-
Unsa ang akong mga kasinatian o tingali mao kini ang hinungdan nga mobati ako niini nga paagi?
-
Unsay akong buhaton kon mobati ako niini? Ngano man?
Dasiga ang mga estudyante sa pagdapit sa Espiritu Santo ngadto sa ilang pagtuon samtang sila magkat-on mahitungod sa nasinati sa Manluluwas ug sa unsang paagi Siya makatabang nila.
Ang Pag-ula sa Manluluwas
Pinaagi sa Iyang Pag-ula, si Jesukristo hingpit nga nasayod ug nakasabot sa atong mga kasinatian. Sa Isaias 53, si propeta Isaias nagtudlo mahitungod sa maulaong sakripisyo ni Jesukristo.
Ang Isaias 53:3–5 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.
Ang mga estudyante makadawat og paghupay ug mapalawom ang ilang relasyon uban sa Langitnong Amahan ug ni Jesukristo pinaagi sa personal nga pagtuon sa Isaias 53. Ang mosunod nga kalihokan mao ang usa ka paagi nga mapatun-an nimo sa mga estudyante ang Isaias 53.
Basaha ang Isaias 53:1–12 ug Alma 7:11–13, nga mangita sa:
-
Unsa ang nasinati sa Manluluwas isip kabahin sa Iyang Pag-ula, ug
-
Unsa ang mabuhat sa Manluluwas alang kanako tungod sa Iyang Pag-ula.
Mahimo kang magbuhat og duha ka kolum sa blangko nga pahina sa imong journal sa pagtuon aron sa pagsulat unsay imong nakaplagan.
|
Unsa ang gisinati sa Manluluwas |
Unsay mabuhat sa Manluluwas alang kanako |
Pipila ka pulong ug hugpong sa mga pulong sa Isaias 53 mahimong lisod sabton sa mga estudyante. Kon mao, mahimo nimong ipakita ang kaubang handout nga nag-ulohan “Pagsabot sa Isaias 53” o ihatag kini sa mga estudyante nga ilang kadungawan samtang sila magtuon. Alternatibong paagi, pwede nimong dapiton ang mga estudyante sa paggamit sa mga footnote o diksiyonaryo sa pagklaro sa dili pamilyar nga mga pulong o hugpong sa mga pulong.
Samtang magtuon ang mga estudyante sa Alma 7:12, mahimong makatabang tingali alang kanila ang pagkabalo nga ang pagtabang mahimong maghulagway sa unsang paagi nagpakabana kanato ang Manluluwas. “Ang pagtabang nagpasabot nga ‘modagan ngadto’” (Jeffrey R. Holland, “He Hath Filled the Hungry with Good Things,” Ensign, Nov. 1997, 66).
Human sa paghatag sa mga estudyante og igong oras sa pagtuon, igrupo sila ngadto sa gagmay nga mga grupo. Dapita sila paghisgot ug sa pag-summarize sa ilang nakat-onan sa ilang pagtuon. Pipila ka grupo ang mahimong mopakigbahin sa ilang mga summary diha sa klase. Mahimong mailhan sa mga estudyante ang mga kamatuoran nga sama sa:
-
Isip kabahin sa Iyang Pag-ula, si Jesukristo midala diha sa Iyang kaugalingon sa atong mga kasubo, mga kasakit, mga balatian, mga sakit, mga pag-antos, ug mga kasub-anan, ug nag-antos sa atong mga sala.
-
Pinaagi ni Jesukristo ug sa Iyang Pag-ula, kita mahimong mapasaylo ug maayo.
Ang Pag-ula sa Manluluwas alang kanako
Basaha pag-usab ang Isaias 53:3–6 sa hilom sa imong kaugalingon, apan niini nga higayon, pulihi sa imong ngalan ang ako, o akong alang sa mga pulong nga ato, kita, ug kanato.
-
Unsay inyong nakat-onan o unsay inyong nabantayan nga wala ninyo nabantayan sauna pinaagi sa paghimong personal niini nga mga bersikulo?
Kon makabenepisyo ang mga estudyante gikan sa dugang nga pagtuon mahitungod sa unsang paagi ang Manluluwas personal nga nakasinati sa atong mga pag-antos isip kabahin sa Iyang Pag-ula, pwede usab nimong patun-an sa mga estudyante ang mosunod nga pamahayag gikan ni Elder Bednar. Ikonsiderar ang pagpakita sa pamahayag ni Elder Bednar ug dapita ang mga estudyante sa pagpangita sa mga pulong o hugpong sa mga pulong diha sa pamahayag nga makatabang nila nga makasabot sa Manluluwas ug sa Iyang Pag-ula.
Si Elder David A. Bednar sa Korum sa Napulog Duha ka Apostoles mitudlo mahitungod kon unsa ka personal ang sakripisyo sa Manluluwas:
Walay pisikal nga sakit, walay espirituwal nga samad, walay kasakit sa kalag o kaguol, walay balatian o kahuyang nga kamo o ako sukad nakasugat niini nga mortalidad nga wala masinati og una sa Manluluwas. Diha sa higayon sa kahuyang mahimong mosinggit kita, “Walay nahibalo sama sa unsa kini. Walay usa nga nakasabot.” Apan ang Anak sa Dios hingpit nga nakahibalo ug nakasabot, kay Iyang nabati ug napas-an ang atong indibidwal nga mga alantoson. Ug tungod sa Iyang walay kataposan ug mahangtorong sakripisyo (tan-awa sa Alma 34:14), Siya adunay hingpit nga pagsabot ug makalugway ngari kanato sa Iyang bukton sa kalooy. Siya makakab-ot, makahikap, makaabag, makaayo, ug makalig-on kanato nga mahimong mas labaw kay sa atong mismo nga mahimo ug makatabang kanato sa pagbuhat niana nga kita dili gayod makahimo nga nagsalig lamang diha sa atong kaugalingong gahom. (“Makadaug sa Ilang mga Alantuson,” Liahona, Mayo 2014, 90)
-
Unsay imong masulti sa usa ka tawo kinsa mobati nga walay nakasabot unsay ilang giantos? Sulayi paggamit ang mga pulong o hugpong sa mga pulong gikan sa Isaias 53, Alma 7:11–13, ug ang pamahayag gikan ni Elder Bednar.
Pagpamalandong sa Pag-ula sa Manluluwas
Ang mosunod nga mga pangutana makatabang sa mga estudyante nga mamalandong sa ilang pagpasalamat alang sa Pag-ula sa Manluluwas. Tabangi ang mga estudyante sa pagtubag sa mga pangutana pinaagi sa paghatag nila og pipila ka minuto sa pagpamalandong o pagsulat sa ilang mga tubag.
Ang paghatag sa mga estudyante og oras sa pagpamalandong makatabang nila sa paghunahuna sa ilang relasyon uban ni Jesukristo. Ikonsiderar ang pagtugtog og mahilom, sagradong musika samtang ang mga estudyante mamalandong o magsulat sa ilang mga hunahuna.
Gamit ang inyong nakat-onan karon mahitungod sa Manluluwas ug sa Iyang Pag-ula, unsaon ninyo pagtubag ang mosunod nga mga pangutana:
-
Ngano nga si Jesukristo ang labing maayong tawo nga kapa-ingnan kon kamo nagsinati sa kaguol, kasub-anan, o kasakit?
-
Sa unsang paagi kamo o ang inyong kaila mibati sa paghupay sa Manluluwas samtang nagsinati sa kaguol, kasub-anan, o kasakit?
Dapita ang mga estudyante sa pagpakigbahin kon unsay ilang gipamalandongan. Samtang sila mopakigbahin sa mga kasinatian, mahimong sensitibo ug madasigon.
Ang pagkadungog sa kasinatian sa uban makaandam sa mga estudyante sa pagpakigbahin sa ilang kaugalingon. Ikonsiderar ang pagpakigbahin og usa ka personal nga kasinatian o pagpasalida sa “He Will Give You Help” (4:43), nga anaa sa ChurchofJesusChrist.org. Ang bidyo nagpakita giunsa sa batan-ong lalaki pagkakita og tabang sa pagbuntog sa kaguol pinaagi ni Jesukristo ug sa Iyang Pag-ula.
Pasalamati ang mga estudyante sa pagpakigbahin sa ilang mga hunahuna ug mga pagbati. Pwede usab ninyong ipakigbahin ang inyong mga hunahuna ug mga pagbati mahitungod sa Pag-ula ni Jesukristo.
Pagsag-ulo
Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanong hugpong sa mga pulong sa kasulatan atol niini nga leksiyon ug dayon pagrebyo niini sa umaabot nga mga leksiyon. Ang mahinungdanong hugpong sa mga pulong sa kasulatan alang sa Isaias 53:3–5 mao ang “Sa pagkamatuod gipas-an [ni Jesukristo] ang atong kasakitan, ug gipas-an niya ang atong mga kasub-anan.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”