« អេសាយ ២៥ ៖ ការរង់ចាំព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« អេសាយ ២៥ ៖ ការរង់ចាំព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសាយ ១៣–១៤; ២២; ២៤–៣០; ៣៥ ៖ មេរៀនទី ១១៧
អេសាយ ២៥
ការរង់ចាំព្រះអម្ចាស់
តើអ្នកឆ្លើយតបយ៉ាងណា នៅពេលវាហាក់ដូចជាការអធិស្ឋានដ៏ស្មោះសររបស់អ្នកគ្មានចម្លើយនោះ ? នៅក្នុងព្រះគម្ពីរទាំងមូល ព្រះអម្ចាស់ និងពួកព្យាការីរបស់ទ្រង់បានបញ្ជាក់ពីតម្រូវការរបស់យើងដើម្បីរង់ចាំព្រះអម្ចាស់ ( សូមមើល អេសាយ ២៥:៩ ) ដោយអត់ធ្មត់ស្វែងរកពរជ័យ និងចម្លើយ ។ មេរៀននេះអាចជួយសិស្សឲ្យយល់ពីសារៈសំខាន់នៃការរង់ចាំព្រះអម្ចាស់ ។
ការរៀបចំសិស្ស ៖ សូមអញ្ជើញសិស្សឲ្យជញ្ជឹងគិតអំពីគ្រាមួយដែលពួកគេ ឬនរណាម្នាក់ដែលពួកគេស្គាល់ត្រូវរង់ចាំដោយអត់ធ្មត់សម្រាប់ចម្លើយ ឬពរជ័យពីព្រះវរបិតាសួគ៌ ។ ពួកគេអាចរៀបចំខ្លួនដើម្បីចែកចាយអ្វីដែលធ្វើឲ្យបទពិសោធន៍នៃការរង់ចាំងាយស្រួល ឬពិបាកសម្រាប់ពួកគេ ។
សកម្មភាពរៀនសូត្រដែលអាចមាន
អភិវឌ្ឍការអត់ធ្មត់ដោយការអនុវត្ត
ដើម្បីជួយសិស្សឲ្យយល់ថាតើវាលំបាកយ៉ាងណាក្នុងការរង់ចាំអ្វីមួយដោយអត់ធ្មត់ សូមពិចារណាបង្ហាញស្ករម៉ាស់មេឡូ ឬរូបភាពរបស់កុមារដែលកំពុងសម្លឹងមើលម៉ាស់មេឡូ ពេលដែលអាន ឬសង្ខេបកថាខណ្ឌខាងក្រោមនេះ ។ ជម្រើសមួយផ្សេងទៀត អ្នកអាចប្រើវីដេអូ « Continue in Patience » មកពីគេហទំព័រ ChurchofJesusChrist.org ចាប់ពីនាទីទី ០:០០–១:០៨ ដើម្បីឲ្យសិស្សគិតអំពីតម្រូវការដើម្បីរង់ចាំដោយអត់ធ្មត់ ។ វីដេអូប្រធាន ឌៀថើរ អេស្វ អុជដូហ្វ ដែលនៅពេលនោះនៅក្នុងគណៈប្រធានទីមួយ បានណែនាំពីការពិសោធន៍ស្ករម៉ាស់មេឡូដូចគ្នា ។
ដើម្បីសាកល្បងសមត្ថភាពរបស់កុមារក្នុងការរង់ចាំដោយអត់ធ្មត់ អ្នកស្រាវជ្រាវបានដាក់ស្ករម៉ាស់មេឡូដ៏ធំមួយនៅចំពោះមុខក្មេងអាយុបួនឆ្នាំជាច្រើន ។ កុមារត្រូវបានប្រាប់ថា ពួកគេអាចបរិភោគស្ករម៉ាស់មេឡូភ្លាមៗ ។ ទោះជាយ៉ាងណាក៏ដោយ ប្រសិនបើពួកគេអាចរង់ចាំ ១៥ នាទីពួកគេនឹងទទួលបានស្ករម៉ាស់មេឡូ ២ ។ មានតែកុមារ ៣០ ភាគរយប៉ុណ្ណោះដែលអាចរង់ចាំបាន ។
-
តើអ្នកគិតថាអ្វីដែលអាចធ្វើឲ្យមានភាពខុសគ្នារវាងកុមារដែលអាចរង់ចាំ និងអ្នកដែលមិនអាចរង់ចាំ ?
-
តើនៅពេលណាដែលអ្នកមានការលំបាកក្នុងការរង់ចាំអ្វីមួយ ? តើអ្វីបានធ្វើឲ្យវាមានការលំបាកសម្រាប់អ្នក ?
ជួនកាល ព្រះវរបិតាសួគ៌អាចនឹងបង្គាប់ឲ្យយើងរង់ចាំចម្លើយ ឬពរជ័យដែលចង់បាន ។ ពេលខ្លះ ទ្រង់អាចមិនប្រទានចម្លើយ ឬពរជ័យដែលចង់បានតាមរបៀប ឬតាមពេលដែលយើងចង់បាននោះទេ ។
-
តើគំរូអ្វីខ្លះនៃពរជ័យ ឬចម្លើយមកពីព្រះអម្ចាស់ ដែលយើងអាចនឹងត្រូវរង់ចាំដោយអត់ធ្មត់ ?
សិស្សអាចលើកឡើងអំពីការរង់ចាំការបញ្ជាក់ថាព្រះគម្ពីរមរមនពិត ដោយស្វែងរកពរជ័យនៃការព្យាបាលសម្រាប់មនុស្សជាទីស្រឡាញ់ដែលឈឺ ឬទូលអង្វរព្រះវរបិតាសួគ៌សម្រាប់ចម្លើយចំពោះសំណួររបស់ពួកគេពីដំណឹងល្អ ។
ដើម្បីជួយសិស្សរកឃើញពីរបៀបដែលមេរៀននេះអនុវត្តចំពោះតម្រូវការបុគ្គលរបស់ពួកគេ សូមផ្តល់ឱកាសឲ្យពួកគេពិចារណាពីសំណួរស្វ័យវាយតម្លៃខាងក្រោមនេះ ។
-
តើពរជ័យ ឬចម្លើយអ្វីខ្លះមកពីព្រះវរបិតាសួគ៌ ដែលបច្ចុប្បន្ននេះអ្នកកំពុងរង់ចាំទទួល ? តើទ្រង់អាចបង្គាប់ឲ្យអ្នករង់ចាំអ្វីនៅពេលអនាគត ?
-
តើអ្វីធ្វើឲ្យការរង់ចាំអ្វីមួយពីព្រះវរបិតាសួគ៌ ងាយស្រួល ឬពិបាកសម្រាប់អ្នក ?
នៅពេលអ្នកសិក្សាថ្ងៃនេះ សូមស្វែងរកជំនួយពីព្រះវិញ្ញាណបរិសុទ្ធ ដើម្បីបង្កើនការយល់ដឹងរបស់អ្នកអំពីសារៈសំខាន់នៃការរង់ចាំតាមព្រះឆន្ទៈ និងពេលវេលារបស់ព្រះវរបិតាសួគ៌ និងព្រះយេស៊ូវគ្រីស្ទ ។ អ្នកអាចយាងអញ្ជើញព្រះវរបិតាសួគ៌ដោយអធិស្ឋានដើម្បីពង្រឹងសមត្ថភាពរបស់អ្នកដើម្បីរង់ចាំដោយអត់ធ្មត់ ។
ដោយអត់ធ្មត់រង់ចាំព្រះអម្ចាស់
វាប្រហែលជាមានប្រយោជន៍ក្នុងការចែកចាយជាមួយសិស្សថា ព្រះអម្ចាស់បានបញ្ជូនព្យាការីអេសាយទៅប្រជាជាតិយូដាក្នុងអំឡុងពេលច្របូកច្របល់នៃភាពមិនប្រាកដប្រជាខាងនយោបាយ និងសង្គម ។ អេសាយ ២៥ រំឭកដល់វង្សអ៊ីស្រាអែលអំពីពរជ័យដ៏អស្ចារ្យដែលពួកគេមាន ហើយនឹងទទួលបានពីព្រះអម្ចាស់ ។
សូមអាន អេសាយ ២៥:១–៤, ៦–៩ ដោយរកមើលអ្វីដែលព្រះអម្ចាស់បានធ្វើរួចហើយសម្រាប់អ៊ីស្រាអែល និងអ្វីដែលទ្រង់នឹងធ្វើសម្រាប់ពួកគេនាពេលអនាគត ។
-
តើពរជ័យអ្វីដែលលេចធ្លោសម្រាប់អ្នក ?
-
យោងតាម ខទី ៩ តើព្រះអម្ចាស់បង្គាប់ឲ្យយើងធ្វើអ្វីខ្លះ ដើម្បីទទួលបានពរជ័យរបស់ទ្រង់ ?
សូមជួយសិស្សឲ្យស្វែងរកសេចក្តីពិត ដូចជា ប្រសិនបើយើងរង់ចាំសម្រាប់ព្រះអម្ចាស់ នោះយើងនឹងត្រេកអរ និងរីករាយនៅក្នុងសេចក្តីសង្រ្គោះរបស់ទ្រង់ ។ អ្នកអាចសរសេរឃ្លា « ការរង់ចាំព្រះអម្ចាស់ » នៅលើក្ដារខៀន ។
សូមអញ្ជើញសិស្សឲ្យស្រមៃមើលពីមិត្តភក្តិម្នាក់បានសុំពួកគេឲ្យពន្យល់ពីអត្ថន័យនៃឃ្លានេះ ។ សូមជួយសិស្សបង្កើតការពន្យល់សម្រាប់ឃ្លានេះ ។ ប្រសិនបើសិស្សត្រូវការជំនួយបន្ថែមដើម្បីយល់ពីអត្ថន័យនៃការរង់ចាំព្រះអម្ចាស់ អ្នកអាចចែកចាយសេចក្តីថ្លែងការណ៍ខាងក្រោមនេះ ។
អែលឌើរ រ៉ូបឺត ឌី ហែល ( ឆ្នាំ១៩៣២–២០១៧ ) ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
នៅក្នុងព្រះគម្ពីរពាក្យ រង់ចាំ មានន័យថា សង្ឃឹម ចូលរួម និងទុកចិត្ត ។ ដើម្បីសង្ឃឹម ហើយទុកចិត្តលើព្រះអម្ចាស់តម្រូវឲ្យមានសេចក្ដីជំនឿ សេចក្ដីអត់ធន់ ចិត្តរាបសា ភាពស្លូតបូត សេចក្ដីអត់ធ្មត់ គោរពបទបញ្ញត្តិ និងការកាន់ខ្ជាប់ដរាបដល់ចុងបំផុត ។ ( « Waiting Upon the Lord: Thy Will Be Done » Liahona ខែវិច្ឆិកា ឆ្នាំ២០១១ ទំព័រ ៧១ )
-
តើមានអ្វីខ្លះដែលអ្នកនឹងបន្ថែមដើម្បីជួយនរណាម្នាក់ឲ្យយល់ពីអត្ថន័យនៃការរង់ចាំព្រះអម្ចាស់ ?
-
ហេតុអ្វីអ្នកគិតថាវាមានសារៈសំខាន់ដើម្បីរង់ចាំព្រះអម្ចាស់ដែលយើងរៀនត្រូវរង់ចាំទ្រង់ ? តើការណ៍នោះជួយយើងប្រែក្លាយកាន់តែដូចជាទ្រង់ដោយរបៀបណា ?
សិស្សអាចទទួលបានប្រយោជន៍ពីការមើលឃើញគំរូនៃព្រះយេស៊ូវគ្រីស្ទកំពុងរង់ចាំព្រះវរបិតាសួគ៌ ។ អ្នកអាចចែកចាយគំរូផ្សេងទៀតមកពីសារលិខិតរបស់អែលឌើរ ហេលស៍ « Waiting Upon the Lord: Thy Will Be Done » ( ចាប់ពីនាទីទី ០:៥៩–២:៥៧ ) ។
ពរជ័យដ៏អស្ចារ្យបានសន្យាចំពោះអ្នកដែលរង់ចាំព្រះអម្ចាស់
ដើម្បីជួយសិស្សមើលឃើញពរជ័យផ្សេងទៀតដែលព្រះអម្ចាស់បានសន្យាចំពោះអ្នកដែលរង់ចាំទ្រង់ នោះអ្នកអាចប្រើសកម្មភាពជំនាញសិក្សាព្រះគម្ពីរខាងក្រោម ។ សកម្មភាពនេះជួយសិស្សឲ្យអនុវត្តការភ្ជាប់ ឬសេចក្តីយោងខគម្ពីរ ដើម្បីជួយបង្កើនការយល់ដឹងរបស់ពួកគេអំពីគោលការណ៍នេះ ។
សូមជ្រើសរើសខគម្ពីរមួយ ឬច្រើនដូចខាងក្រោមដើម្បីសិក្សា ៖ ទំនុកដំកើង ២៧:១៤; អេសាយ ៤០:៣១; គោលលទ្ធិ និងសេចក្តីសញ្ញា ១៣៣:៤៥ ។ សូមរកមើលពរជ័យបន្ថែមដែលព្រះអម្ចាស់បានសន្យាចំពោះអ្នកដែលរង់ចាំទ្រង់ ។
-
តើពរជ័យនៃការរង់ចាំព្រះអម្ចាស់មានលក្ខណៈដូចម្តេចនៅសព្វថ្ងៃនេះ ?
សិស្សអាចចែកចាយពរជ័យដូចជា សេចក្តីសុខសាន្ត អំណរ ឬកម្លាំង ខណៈពេលពួកគេកំពុងរង់ចាំព្រះអម្ចាស់ ។
ជាឧទាហរណ៍នៃពរជ័យដែលបានមកបន្ទាប់ពីការរង់ចាំព្រះអម្ចាស់ អ្នកអាចបង្ហាញរឿងរបស់ប្រធាន អុជដូហ្វ ក្នុងវីដេអូ « Continue in Patience » មកពីគេហទំព័រ ChurchofJesusChrist.org នាទីទី ១:០៧–២:៤១ ។ សូមអញ្ជើញសិស្សឲ្យរកមើលអ្វីដែលប្រធាន អុជដូហ្វ ដែលកាលនោះនៅក្នុងគណៈប្រធានទីមួយបានធ្វើដើម្បីធ្វើសកម្មភាពដោយសេចក្តីជំនឿ នៅពេលលោករង់ចាំពរជ័យដែលបានសន្យាពីការធ្វើតាមពាក្យសម្តីនៃប្រាជ្ញាវាងវៃ ។
2:42បន្ទាប់ពីអ្នកបង្ហាញសំណួរខាងក្រោមនេះ អ្នកអាចនឹងចែកចាយបទពិសោធន៍ខ្លីមួយដែលអ្នកមាន ខណៈសិស្សគិតអំពីរបៀបដែលពួកគេនឹងឆ្លើយតប ។
-
តើនៅពេលណាអ្នកធ្លាប់មានបទពិសោធន៍នៃការរង់ចាំចម្លើយ ឬពរជ័យ ?
-
តើអ្នកបានធ្វើអ្វីខ្លះ ដែលបានជួយអ្នករង់ចាំព្រះអម្ចាស់ ?
យើងត្រូវរង់ចាំព្រះអម្ចាស់យ៉ាងសកម្ម
ការផ្តល់ឱកាសសម្រាប់សិស្សដើម្បីចែកចាយនូវអ្វីដែលពួកគេបានសិក្សា អាចធ្វើឲ្យវាកាន់តែងាយស្រួលសម្រាប់ពួកគេក្នុងការដឹងពីការរៀនសូត្រ និងការរីកចម្រើនរបស់ពួកគេ ។ របៀបមួយដើម្បីធ្វើការណ៍នេះនឹងជាសកម្មភាពខាងក្រោម ។ ប្រសិនបើមានប្រយោជន៍ សូមអញ្ជើញសិស្សឲ្យគិតពីព័ត៌មានលម្អិតបន្ថែម ដើម្បីបន្ថែមលើសាច់រឿង ដើម្បីធ្វើឲ្យវាទាក់ទងនឹងពួកគេ ។
ស្រមៃថាអ្នកត្រូវបានគេសុំឲ្យផ្តល់ដំបូន្មានដល់នរណាម្នាក់ដែលកំពុងពុះពារ ខណៈពេលដែលកំពុងរង់ចាំពរជ័យ ឬចម្លើយចំពោះការអធិស្ឋានរបស់ពួកគេ ។ នៅក្នុងសៀវភៅកំណត់ហេតុការសិក្សារបស់អ្នក ៖
-
សូមរាយបញ្ជីអ្វីមួយដែលអ្នកបានរៀននៅថ្ងៃនេះ ដែលជួយអ្នកឲ្យយល់អំពីសារៈសំខាន់នៃការរង់ចាំព្រះអម្ចាស់ ។ អ្នកអាចចែកចាយអ្វីមួយដែលអ្នកដឹងអំពីព្រះអម្ចាស់ដែលបានជួយអ្នក ។
-
សរសេរវគ្គបទគម្ពីរមកពី អេសាយ ២៥ ឬបទគម្ពីរផ្សេងទៀតដែលអាចមានប្រយោជន៍សម្រាប់នរណាម្នាក់ដែលកំពុងរង់ចាំព្រះអម្ចាស់យ៉ាងសកម្ម ។
-
សរសេរអ្វីមួយដែលអ្នកមានអារម្មណ៍ថានឹងមានប្រយោជន៍សម្រាប់នរណាម្នាក់ដើម្បីធ្វើ ខណៈដែលពួកគេកំពុងរង់ចាំចម្លើយ និងពរជ័យរបស់ព្រះអម្ចាស់ ។ អ្នកអាចរួមបញ្ចូលបទពិសោធន៍មួយ នៅពេលអ្នក ឬនរណាម្នាក់ដែលអ្នកស្គាល់បានដកពិសោធន៍នូវពរជ័យរបស់ព្រះអម្ចាស់ ។
សូមពិចារណាអំពីការបញ្ចប់ថ្នាក់ដោយការចែកចាយពីរបៀបដែលអ្នកបានដឹងថាអ្នកអាចទុកចិត្តលើព្រះអម្ចាស់ នៅពេលអ្នករង់ចាំទ្រង់ ។