“Salmo 51: ‘Hinloan Mo Ako Gikan sa Akong Sala,’” Manwal sa Magtutudlo sa Seminary sa Daang Tugon (2026)
“Salmo 51: ‘Hinloan Mo Ako Gikan sa Akong Sala,’” Manwal sa Magtutudlo sa Seminary sa Daang Tugon
Mga Salmo 49–51; 61–66; 69–72; 77–78; 85–86: Leksiyon 104
Salmo 51
“Hinloan Mo Ako Gikan sa Akong Sala”
Si David misulat og salmo nga nagpahayag sa iyang tinguha nga mapasaylo sa mga sala nga iyang nahimo. Gipakita niya ang iyang tinguha nga kinasingkasing nga maghinulsol. Kini nga leksiyon makatabang sa mga estudyante nga masabtan nga kon maghinulsolsol sila, malimpyohan sila sa Manluluwas.
Pagpangandam sa estudyante: Dapita ang mga estudyante nga handurawon nga naa sila sa mosunod nga sitwasyon: Handurawa nga gipakigbahin sa imong higala nga kinahanglan siyang maghinulsol pero wala siya mahibalo kon unsaon. Unsay gusto nimong masabtan niya bahin sa paghinulsol ug sa tahas sa Manluluwas sa pagbuntog sa sala?
Posibleng mga Kalihokan sa Pagkat-on
Paghinulsol
Ang mosunod nga kalihokan mohatag sa mga estudyante og kahigayonan sa pagpamalandong sa kasamtangan nilang pagsabot sa paghinulsol. Pwede nimong ipakita ang mga instruksiyon.
Handurawa ang mosunod nga pangutana sa gitago nga ngalan sa batan-on nga giapil sa edisyon sa magasin nga Alang sa Kalig-on sa mga Kabatan-onan karong bulana:
“Bag-o lang kong nakahimog seryosong mga sala nga gimahayan gayod nako. Dili ko segurado kon unsaon paghinulsol. Sa tinuod lang, naghunahuna pa gani ko kon mapasaylo pa ba ko. Pwede mangayog tabang?”
Sa imong journal sa pagtuon, base sa imong nahibaloan bahin sa paghinulsol, irekord ang imong gibati nga angayng mahibaloan ug masabtan niining tawhana nga makatabang niya.
Samtang basahon sa mga estudyante ang pangutana gikan sa gitago nga ngalan sa batan-on ug irekord ang ilang mga tubag, tingali aduna silay dugang mga pangutana nga gihunahuna. Pwede nimo silang dapiton nga isulat ang bisan unsang pangutana nga anaa sila bahin sa paghinulsol. Tabangi silang mahibalo nga panahon sa leksiyon naa silay higayon nga mas tun-an pa ang bahin sa paghinulsol. Pamatud-i nga ang Espiritu makahatag og tubag sa ilang mga pangutana bahin sa paghinulsol samtang mainampoon nilang pangitaon ang mga tubag pinaagi sa pagtuon sulod ug gawas sa klase.
Kinasingkasing nga paghinulsol
Pangutan-a ang mga estudyante kon unsay ilang nahibaloan bahin ni Hari David. Pwede nimo silang hangyoon nga mopakigbahin og pipila sa dagkong butang nga iyang nahimo apil ang mga pipila sa mga sala nga iyang nahimo. Ipakigbahin ang bisan hain sa mosunod nga konteksto ngadto sa mga estudyante nga dili nila mahisgotan diha sa ilang summary.
Si David “sad-an sa dagko nga mga sala, apan … nakahimo sa pagbuhat og matinud-anon nga pagbasol. Busa siya nakakaplag og kapasayloan, gawas sa pagpatay ni Uria” (Giya ngadto sa mga Kasulatan, “David”, tan-awa usab sa Doktrina ug mga Pakigsaad 42:18). Sa Salmo 51, girekord ni David ang usa ka salmo para sa Dios diin gipahayag niya ang iyang pagbasol human siya makasala uban ni Batseba (tan-awa sa 2 Samuel 11–12). Ang mapainubsanon ug kinasingkasing nga tinguha ni David nga mapahiuli ngadto sa grasya ug pagdawat sa Dios nagpakita sa kinaiya sa usa ka tawo kinsa nagtinguha og tinuod nga paghinulsol.
Pwede unang tun-an sa mga estudyante ang Salmo 51 sa ilang kaugalingon dihang mangita sila sa ilang nakat-onan bahin sa paghinulsol; dayon pwede nimo silang hatagan og paagi aron makapakigbahin sa ilang nakaplagan ug nakat-onan. Ania ang pipila sa mga instruksiyon nga pwede nimong ipakita aron sundon sa mga estudyante. Pwede nimong ipahiuyon ang bisan hain niini nga mga instruksiyon aron mas mapahaom sa mga panginahanglan ug mga abilidad sa imong mga estudyante.
Tun-i ang Salmo 51:1–19 sa imong kaugalingon dihang imong pangitaon ang imong nakat-onan sa salmo ni David bahin sa (1) Dios, o sa (2) paghinulsol. Markahi ang imong makit-an.
Ilha ang tulo ka hugpong sa mga pulong nga imong gimarkahan ug buhata ang usa sa mosunod:
-
Pagsulat og pamahayag sa kamatuoran nga gitudlo sa hugpong sa mga pulong bahin sa Dios o paghinulsol.
-
Pangita og cross-reference nga nagkompirmar o nagpalawom sa imong pagsabot sa kon unsay kahulogan sa hugpong sa mga pulong.
-
Pangitag kinutlo gikan sa lider sa Simbahan nga makatabang sa pagsabot.
-
Pagsulat og pangutana bahin sa hugpong sa mga pulong.
Usa ka paagi nga matabangan nimo ang mga estudyante nga maandam sa pagpakigbahin mao ang paglista og 1-19 diha sa pisara. Dapita ang mga estudyante nga isulat ang ilang ngalan tupad sa mga numero sa bersikulo nga naay hugpong sa mga pulong nga gusto nilang ipakigbahin ang cross reference, kinutlo, o pangutana. Kon mahuman na sila, pwede nimong dapiton ang mga estudyante nga mopakigbahin. Samtang mopakigbahin sila, pwede nimong ilista sa pisara ang pamahayag sa kamatuoran.
Sa ubos ang pipila ka sulod nga gusto nimong ipakigbahin ingon nga kabahin sa panaghisgot. Ang mga kasulatan ug pamahayag giorganisar pinaagi sa grupo sa mga bersikulo ug gipabaga pagsulat nga mga kamatuoran. Tinguhaa ang pagsunod sa mga pag-aghat sa Espiritu nga imo tingaling madawat bahin sa kon unsay angayng ipakigbahin o kon unsay ipangutana.
Salmo 51:1–2, 7, 9: Naay gahom ang Dios sa paglimpyo nako sa akong sala.
Isaias 1:18
Si Presidente Jeffrey R. Holland sa Korum sa Napulog Duha ka Apostoles mipamatuod:
[B]isan pila pa ka mga sayop nga inyong nahimo … o unsa ka kalayo sa panimalay ug pamilya ug sa Dios, mopamatuod ko nga wala pa kamo malayo sa balaanong gugma. Imposible nga ang mahangtorong kahayag sa Pag-ula ni Kristo dili moabut kaninyo. (“Mga Mamumuo sa Ubasan,” Liahona, Mayo 2012, 33)
Salmo 51:3–4: Ang pag-ila sa atong mga sala diha sa atubangan sa Dios gikinahanglan alang sa paghinulsol.
Doktrina ug mga Pakigsaad 58:42–43
Ang Kinatibuk-ang Tamdanan nga Basahon mipatin-aw:
Ang paghinulsol nagkinahanglan nga ang mga sala ikompisal ngadto sa Langitnong Amahan. …
Kon ang mga miyembro sa Simbahan makahimo og seryoso nga mga sala, ang ilang paghinulsol maglakip usab og pagkompisal ngadto sa ilang bishop o sa presidente sa stake. Dayon siya makahimo sa paggamit sa mga yawe sa ebanghelyo sa paghinulsol alang kanila (tan-awa ang Doktrina ug mga Pakigsaad 13:1; 84:26–27; 107:18, 20). Kini makatabang nila nga mamaayo ug mobalik ngadto sa dalan sa ebanghelyo pinaagi sa gahom sa Pag-ula sa Manluluwas.
… Ang boluntaryo nga pagkompisal nagpakita nga ang usa ka tawo nagtinguha nga maghinulsol. (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 32.4.1, Librarya sa Ebanghelyo)
Salmo 51:10–12: Samtang maghinulsol kita, matabangan kita sa Dios nga magbag-o, mobatig kalipay, ug makauban ang Espiritu Santo kanato.
Si Presidente Russell M. Nelson mitudlo:
Kon kita mopili nga maghinulsol, kita mopili nga mag-usab! Atong gitugotan ang Manluluwas nga mousab kanato ngadto sa labing maayo nga bersiyon sa atong mga kaugalingon. Kita mopili nga molambo sa espirituhanon nga paagi ug makadawat sa hingpit nga kalipay—ang hingpit nga kalipay sa katubsanan diha Kaniya. Kon kita mopili nga maghinulsol, kita mopili nga mas mahisama ni Jesukristo! (“Kita Makabuhat og Mas Maayo pa ug Mahimong mas Maayo,” Liahona, Mayo 2019, 67)
Salmo 51:16–17: Kinahanglan nga ako adunay masulub-on ug mahinulsolon nga kasingkasing ug matinud-anong maghinulsol atubangan sa Dios.
Si Elder Neil L. Andersen sa Korum sa Napulog Duha ka Apostoles mipasabot:
Ang pagbaton og masulub-on nga kasingkasing mao ang pagkamapainubsanon, mahinulsolon, ug malumo , mahinamon nga modawat sa kabubut-on sa Dios. Ang mahinulsolon nga espiritu ibutang ang iyang kaugalingong interes sa mga kamot sa Dios, nga nagatuo sa Iyang kabubut-on, dili ang atoa, ang motabang nato nga mahimong usa ka tawo nga kita mamahimo. (Ang Balaanong Gasa sa Pagpasaylo [2019], 153)
Ipasabot ang paghinulsol
Aron tabangan ang mga estudyante nga ipakita ang ilang pagsabot sa sinsero nga paghinulsol ug ang tahas sa Manluluwas diha niini, dapita sila nga rebyohon ang ilang nakat-onan sa klase karon.
Hinumdomi ang imong gisulat sa sinugdanan sa klase bahin sa pangutana diha sa magasin nga Alang sa Kalig-on sa mga Kabatan-onan. Gamit ang imong nakat-onan karon bahin sa sinsero nga paghinulsol, pagdugang og duha o tulo ka kapahayag sa imong unang tubag.
Ikonsiderar ang pagdapit sa pipila ka estudyante nga andam mopakigbahin kon unsaon nila pagtubag sa pangutana. Dasiga ang mga estudyante nga ipakigbahin ang ilang mensahe sa usa ka higala o sakop sa pamilya nga para nila mapanalanginan kon madungog kini.
Ikonsiderar ang pagtapos sa klase pinaagi sa pagdapit sa mga estudyante nga modangop sa Manluluwas pinaagi sa paghinulsol ug pagpamatuod sa Iyang gahom nga molimpyo kanato samtang maghinulsol kita.