Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Salmo 24: “Kinsay Makatungas sa Bungtod sa Ginoo?”

“Salmo 24: ‘Kinsay Makatungas sa Bungtod sa Ginoo,’” Manwal sa Magtutudlo sa Seminary sa Daang Tugon (2026)

“Salmo 24: ‘Kinsay Makatungas sa Bungtod sa Ginoo,’” Manwal sa Magtutudlo sa Seminary sa Daang Tugon

Mga Salmo 1–2; 8; 19–33; 40; 46: Leksiyon 103

Salmo 24

“Kinsay Makatungas sa Bungtod sa Ginoo?”

Ang mga templo maoy balaang mga dapit nga hinlo ug putli. Motabang kini nato nga mahanduraw kon unsay bation diha sa presensiya sa Ginoo. Sa Salmo 24, gidapit kita ni Hari David nga maningkamot nga mahimong limpyo sa espirituhanong paagi ug putli aron makasulod kita sa templo sa Ginoo ug sa Iyang presensiya sa umaabot. Kini nga leksiyon makatabang sa mga estudyante sa pagpangandam nga takos silang mosulod sa templo ug sa kataposan mopuyo sa presensiya sa Langitnong Amahan ug kang Jesukristo.

Pagpangandam sa estudyante: Dapita ang mga estudyante nga rebyohon ang mga pangutana sa rekomend sa templo, nga maghunahuna bahin sa kaugalingon nilang espirituhanong pagpangandam sa pagtambong sa templo. Kini nga mga pangutana makita sa apendiks sa Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022].

Posibleng mga Kalihokan sa Pagkat-on

Hugaw o limpyo?

Aron maandam ang mga estudyante sa pagtuon sa Salmo 24, ikonsiderar ang pagpakita og hulagway sa nagkalapok nga tin-edyer.

Pwede pod kang magdala og lapok sulod sa panaksan ug dapita ang pipila sa estudyante nga ituslob ang ilang kamot niini. Dayon ipahiangay ang mga pangutana sa ubos pinaagi sa pagpangutana sa mga estudyante kon unsay ilang gibati.

Kanus-a ang kataposang higayon nga nagkalapok o nagkahugaw ka? Unsay inyong gibati?

Ikonsiderr ang pagpakita og hulagway sa sulod sa templo.

Kon wala pa makasulod og templo ang imong mga estudyante, ikonsiderar ang pagpahiuyon sa mosunod nga pangutana aron mahibaloan kon sa ilang hunahuna unsa kahay ilang bation sulod sa templo.

Belem Brazil Temple interiors. An interior image of the temple featuring the Celestial Room. There are chairs and a chandelier hanging.

Unsay imong bation kon mosulod ka sa templo?

Ikonsiderar ang pagpakita sa hulagway sa usa ka nagkalapok nga tin-edyer uban sa hulagway sa templo.
Unsay imong bation kon nagkalapok ka sulod sa templo? Ngano man?
Unsang espiritwal nga mga leksiyon ang atong makat-onan gikan niini?

Pamalandongi kon unsay imong bation kon nagtindog ka sa presensiya sa Langitnong Amahan ug ni Jesukristo samtang espirituhanong nagkalapok o nagkahugaw. Dayon pamalandongi kon unsay imong bation samtang nagtindog sa ilang presensiya human mahimong walay lama pinaagi sa Pag-ula ni Jesukristo.

Sa imong journal sa pagtuon, tubaga ang mosunod nga mga pangutana:

Unsa ka importante para nimo nga mahimong takos sa templo? Ngano man?
Unsa ka importante para nimo nga mopuyo sa umaabot uban sa Langitnong Amahan ug ni Jesukristo? Ngano man?

Tinguhaa ang giya sa Espiritu Santo aron matabangan ka sa pagkahibalo kon unsay gusto sa Ginoo nga himoon nimo aron takos kang mosimba Niya diha sa templo ug mosulod sa presensiya sa Langitnong Amahan sa umaabot.

“Bungtod sa Ginoo”

Para sugdan ang pagtuon sa Salmo 24, ikonsiderar ang pagdrowing og simpleng hulagway sa bungtod diha sa pisara. Pwede pod magdrowing og parehas niini diha sa ilang mga journal. Basaha o i-summarize ang parapo sa ubos.

2026 Old Testament Seminary Teacher Materials

Sa Salmo 24, gigamit ni Hari David ang hulagway sa bungtod. Ang pipila ka tudling sa kasulatan naggamit og mga bukid o bungtod ingon nga mga simbolo sa templo (tan-awa sa Isaias 2:2–3). Posible nga gipasabot ni David ang templo, o ang presensiya sa Dios, o kining duha.

Pwede nimong iapil sa tumoy sa imong gidrowing nga bungtod ang simpleng drowing sa templo ug ang mga pulong nga Langitnong Amahan ug si Jesukristo. Pwede kang magdrowing og stick figure sa tiilan sa bungtod nga nagrepresentar kanato.

Basaha ang Salmo 24:3–6, nga pangitaon kon unsay angay natong himoon aron maandam sa pagsulod sa templo ug sa pagbalik sa presensiya sa Ginoo sa umaabot.

Ang Salmo 24:3–4 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra nila kining makita.

Human mabasa sa mga estudyante ang mga bersikulo, naa tingali aduna silay mga pangutana bahin sa pipila ka pulong o hugpong sa mga pulong. Dapita ang mga estudyante nga ipangutana ang bisan unsa nilang mga pangutana o ang kadaghanan samtang ilang gibasa kini nga tudling. Kon makatabang, ipasabot nga ang “kakawang” nagpasabot nga garbo o arogante. Ang hugpong sa mga pulong nga “dili manumpag bakak” pwedeng magpasabot sa pagkamatinuoron sa kaugalingon, sa uban, ug sa Dios.

Ikonsiderar ang pagsulat sa mga tubag sa mga estudyante sa mosunod nga pangutana diha sa pisara subay sa daplin sa bungtod. Ang imong drawing parehas og dagway sa hulagway sa ubos.

Unsay imong nakat-onan gikan niini nga mga bersikulo bahin sa pagpangandam sa pagsulod sa templo ug pagbalik ngadto sa presensiya sa Ginoo sa umaabot?

Samtang ipakigbahin sa mga estudyante ang ilang nakaplagan sa mga bersikulo 3–6, tabangi sila sa pag-ila sa mosunod nga kamatuoran: Kinahanglan natong andamon ang atong kaugalingon sa espirituwal sa pagsimba sa Ginoo diha sa Iyang templo ug sa pagpuyo diha sa Iyang presensiya.

Sa imong hunahuna, nganong kinahanglang andam kita sa espirituwal nga paagi aron mosulod sa mga templo sa Ginoo ug sa ngadtongadto sa Iyang presensiya?
Sa unsang paagi ang mga gikinahanglan sa Ginoo nga mahimong andam sa espirituwal nga paagi mahimong ebidensiya sa Iyang gugma para nato?

Pagpangandam sa espirituwal nga paagi

Ikonsiderar ang pagpakita sa mosunod nga mga instruksiyon ug sa pagdapit sa mga estudyante nga indibidwal kining kompletohon diha sa ilang journal sa pagtuon o uban ang usa ka kauban.

Pagpilig usa sa mosunod nga hugpong sa mga pulong gikan sa Salmo 24:4 nga gusto nimong mas tun-an pa.

limpyo nga mga kamot
putli nga kasingkasing
wala magbayaw sa iyang kalag ngadto sa kakawang (pagkamapainubsanon)
dili manumpa og bakak (matinuoron)

Pangita og mga kasulatan o pamahayag sa mga lider sa Simbahan nga makatabang nimo nga mas masabtan ang hugpong sa mga pulong. Dayon tubaga ang mosunod nga mga pangutana:

Sa imong hunahuna, nganong importante kini nga aspeto sa pagpangandam sa pagsimba diha sa templo ug sa pagpuyo uban sa Langitnong Amahan ug ni Jesukristo sa umaabot?
Unsa ang pihong mga paagi nga mapaningkamotan sa usa ka tin-edyer nga Santos sa Ulahing mga Adlaw nianang maong aspeto sa pagpangandam?
Unsay gusto nimong ipakigbahin mahitungod sa Manluluwas ngadto sa usa ka higala nga naglisod sa maong aspeto sa pagpangandam?

Kon nagkinahanglan og tabang ang mga estudyante, pwede kang mosugyot og mga tudling sa kasulatan nga sama sa mosunod:

limpyo nga mga kamot (Doktrina ug mga Pakigsaad 88:86)
putli nga kasingkasing (Mosiah 5:2)
wala magbayaw sa iyang kalag ngadto sa kakawang (Doktrina ug mga Pakigsaad 112:10)
dili manumpa og bakak (Alma 27:27)

Pwede nimo silang tultolan sa Topical Guide, Giya ngadto sa mga Kasulatan, o sa Librarya sa Ebanghelyo.

Pwede usab nimong ihatag ang kinutlo ni Elder Bednar gikan sa Dugang nga mga Kapanguhaan niini nga leksiyon.

Dapita ang mga estudyante sa pagpakigbahin sa ilang nakat-onan ngadto sa ubang estudyante o kauban nga nagtuon sa laing hugpong sa mga pulong. Dayon pwede nimong hangyoon ang pipila ka estudyante nga ipakigbahin kini sa klase.

Ang akong personal nga pagpangandam

Pamalandong kon kumosta na ang kaugalingon nimong pagpangandam. Pamalandongi kon unsay makapalipay sa Langitnong Amahan ug ang mga pwede pa nimong pauswagon.

Tubaga ang mosunod nga mga pangutana diha sa imong journal sa pagtuon.

Unsa tingali ang gusto sa Langitnong Amahan nga ipabuhat nimo aron maandam ang imong kaugalingon para sa templo ug sa pagpuyo uban Niya sa umaabot?
Sa unsang paagi ka makasalig sa Manluluwas alang sa tabang?

Ikonsiderar ang pagpakigbahin sa imong pamatuod sa mga kamatuoran nga gitun-an sa mga estudyante. Pasaligi ang mga estudyante sa abilidad sa Manluluwas sa paglimpyo ug pagtabang nila. Pwede nimong ipakigbahin ang mosunod nga pamahayag ingon nga panapos sa leksiyon.

Si Presidente Henry B. Eyring sa Unang Kapangulohan mipakigbahin sa mosunod:

Akong panghinaut alang kaninyo ug alang sa tanan ninyong pinalangga nga pamilya nga kamo mopalambo sa tinguha ug determinasyon nga mahimong takos sa pag-adto ngadto sa balay sa Ginoo kutob sa itugot sa inyong mga sirkumstansiya.

Siya gusto nga mohangop kaninyo didto. (“Gusto Ko nga Makita ang Templo,” Liahona, Mayo 2021, 31)

Pagsag-ulo

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanong hugpong sa mga pulong sa kasulatan alang sa Salmo 24:3–4 mao ang “Kinsa ba ang motindog sa iyang balaan nga dapit? Siya nga adunay limpyo nga mga kamot, ug may usa ka putli nga kasingkasing.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsay ipasabot sa pagbaton og “limpyo nga mga kamot ug putli nga kasingkasing” (Salmo 24:4)?

Si David A. Bednar sa Kurom sa Napulog Duha ka Apostoles mipatin-aw:

14:33

Tugoti ako sa pagsugyot nga ang mga kamot malimpyohan pinaagi sa proseso sa pagsalikway sa kinaiyanhong pagkatawo ug pinaagi sa pagbuntog sa sala ug sa dautan nga mga impluwensiya sa atong mga kinabuhi pinaagi sa Pag-ula sa Manluluwas. Ang mga kasingkasing maputli inig ka dawat nato sa Iyang makapalig-ong gahom sa pagbuhat og maayo ug pagkahimong mas maayo. Ang tanan natong mapuslanong mga tinguha ug maayong mga buhat, tinuod sila mahinungdanon, dili makahimo og limpyo nga mga kamot ug putli nga kasingkasing. Ang Pag-ula ni Jesukristo maoy naghatag og makalimpyo ug makatubos nga gahom nga makatabang kanato sa pagbuntog sa sala ug makaputli ug makapalig-ong gahom nga motabang kanato nga mahimong mas maayo kaysa atong mahimo nga magsalig lamang sa atong kaugalingon nga kusog. Ang walay kinutoban nga Pag-ula alang sa makasasala ug sa santos sa matag usa kanato. (“Limpyo nga mga Kamot ug Putli nga Kasingkasing,” Liahona, Nob. 2007, 82)

Unsang mga panalangin ang akong madawat kon takos ko sa pagtambong sa templo?

Si Presidente Henry B. Eyring sa Unang Kapangulohan mitudlo:

16:22

Kon ako o ikaw kinahanglang moadto sa templo nga kulang ang kaputli, dili nato makita, pinaagi sa gahom sa Espiritu Santo, ang espiritwal nga pagtulon-an bahin sa Manluluwas nga atong mahimong madawat sa templo.

Kon kita takos nga makadawat sa maong pagtulon-an, adunay molambo pinaagi sa atong kasinatian sa templo nga paglaom, hingpit nga kalipay, ug positibo nga panglantaw sa tibuok natong kinabuhi. Kana nga paglaom, hingpit nga kalipay ug positibo nga panglantaw anaa lamang pinaagi sa pagdawat sa mga ordinansa nga ipahigayon sa balaan nga mga templo. Diha kana sa templo nato madawat ang kasigurohan sa mahigugmaong mga koneksyon sa pamilya nga magpadayon human sa kamatayon ug molungtad sa kahangturan. (“Gusto Ko nga Makita ang Templo,” Liahona, Mayo 2021, 30)

Unsa kaha kon gamay ra ang akong paglaom nga mahimong angayan kay balikbalik nakong mahimo ang mao ra nga sala?

Si Brother Bradley R. Wilcox sa Kinatibuk-ang Kapangulohan sa Young Men miingon:

10:52

Si Elder Dieter F. Uchtdorf miingon: “Ang Dios wala magkinahanglan sa mga tawo nga walay tatsa. Siya nangita niadtong kinsa mohalad sa ilang ‘kasingkasing ug sa usa ka andam nga hunahuna’ [Doktrina ug mga Pakigsaad 64:34], ug Siya mohimo nila nga ‘hingpit diha ni Kristo’ [Moroni 10:32–33].” … Ang Iyang grasya dili lang usa ka premyo alang sa mga takos. Kini mao ang “balaang panabang” nga Iyang gihatag nga motabang kanato nga mahimong takos. Dili lang kini usa ka ganti alang sa mga matarong. Kini mao ang “gasa sa kalig-on” nga Iyang gihatag nga motabang kanato nga mahimong matarong. Dili lamang kita naglakaw padulong sa Dios ug ni Kristo. Kita naglakaw uban Kanila. (“Ang Pagkatakos Dili ang Pagkawalay Tatsa,” Liahona, Nob. 2021, 67)

Dugang nga mga Kalihokan sa Pagkat-on

Laing paagi sa pagsugod

Alang sa alternatibong paagi sa pagsugod sa leksiyon, ikonsiderar ang pagpakigbahin sa mosunod nga duha ka senaryo.

Gilisodlisod ni Sam ang iyang kaugalingon. Para niya kinahanglang hingpit siya aron makasulod sa templo o mahimong dawaton sa Langitnong Amahan ug ni Jesukristo.
Para kang Joshua dili ra importante nga mahimong takos sa templo o mangandam aron mahimamat ang Dios. Gibati niya kay gimahal siya sa Dios, dawaton Niya siya bisan unsa pay iyang gibuhat, maghinulsol man siya o dili.

Pwedeng mamili og usa ka senaryo ang mga estudyante. Samtang tun-an nila ang Salmo 24, pwede silang mangitag mga kamatuoran ug tambag nga pwede nilang ipakigbahin sa batan-ong lalaki sa senaryo nga ilang gipili.

Mga pangutana sa rekomend sa templo

Aron tabangan ang mga estudyante nga mamalandong sa kaugalingon nilang espirituwal nga pagpangandam, ipakigbahin kini nga parapo bahin sa mga pangutana sa rekomend sa templo gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022]:

Usa sa paagi sa pagsukod sa inyong pag-uswag diha sa dalan sa pakigsaad mao ang pagpamalandong sa mga pangutana sa ubos. Kini ang mga pangutana nga ipangutana kaninyo kon kamo interbyohon aron makadawat og usa ka rekomend sa templo, apan ayaw pagpaabot alang sa usa ka interbyo. Buhata ang inyong kaugalingong espirituhanong pagsusi. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 36)

Dayon, pwede nimong dapiton ang mga estudyante nga susihon ang kaugalingon nilang espirituwal nga kahimtang pinaagi sa pagrebyo sa mga pangutana sa rekomend sa templo nga naa sa “Mga pangutana sa rekomend sa templo alang sa mga batan-on.”

Paglaom nga naa ni Kristo (Salmo 24:7–10)

Kon makabenepisyo ang imong mga estudyante gikan sa panaghisgot bahin sa paglaom, pwede nimong tun-an ang Salmo 24:7–10 diha sa Hubad sa Biblia ni Joseph Smith. Pwedeng ilista una sa mga estudyante ang makapaluya nga mga aspeto sa kalibotan karon, sama sa nagkagrabe nga kagubot o pagkabungkag sa pamilya. Dayon ipasabot nga ang HJS Salmo 24:7–10 makahatag og paglaom sa kataposang mga adlaw.

Dapita ang mga estudyante nga basahon ang HJS Salmo 24:7–10, nga pangitaon kon kapila nila makita ang hugpong sa mga pulong nga ihangad ang inyong mga ulo. Hangyoa sila nga ipakigbahin kon unsay kahulogan niini nga hugpong sa mga pulong para nila.

Dayon dapita ang mga estudyante nga basahon ang HJS Salmo 24:7–10 pag-usab, nga pangitaon ang mga rason kon nganong makabaton kitag paglaom niining kataposang mga adlaw.

Sa unsang paagi kini nga hugpong sa mga pulong motabang nimo sa “paghangad sa imong ulo” (HJS Salmo 24:7–10) uban ang paglaom, bisan pa sa mga problema karon?