Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Salmo 23: “Ang Ginoo Mao ang Akong Magbalantay”

“Salmo 23: ‘Ang Ginoo Mao ang Akong Magbalantay,’” Manwal sa Magtutudlo sa Seminary sa Daang Tugon (2026)

“Salmo 23: ‘Ang Ginoo Mao ang Akong Magbalantay,’” Manwal sa Magtutudlo sa Seminary sa Daang Tugon

Mga Salmo 1–2; 8; 19–33; 40; 46: Leksiyon 102

Salmo 23

“Ang Ginoo Mao ang Akong Magbalantay”

A lamb drinking water from the cupped hands of Jesus Christ.

Ang paghunong kadiyot aron handurawon ang mga paghulagway ug pagtandi sa mga tudling sa kasulatan nagdala og katahom ug gahom sa mga pulong nga atong gibasa. Sa Salmo 23, gihulagway ni Hari David ang iyang relasyon kang Jesukristo pinaagi sa serye sa mga imahe nga nagpakita sa gugma ug pagpakabana sa Manluluwas. Kini nga leksiyon makatabang sa mga estudyante nga mabati ang malumo, mahigugmaong kinaiya ni Kristo pinaagi sa paghanduraw sa mga imahe sa kasulatan.

Pagpangandam sa estudyante: Dapita ang mga estudyante sa pagpamalandong kon sa unsang paagi ang mga butang nga ilang makita kada adlaw magpahinumdom nila sa Manluluwas. Pananglitan, “Ang ulan nagpahinumdom nako sa Manluluwas kay …”. Dayon dapita sila sa pagbasa sa Salmo 23 ug pilia ang imong paboritong pagtandi nga gihimo ni David sa Manluluwas o kon unsa ang gibuhat sa Manluluwas kanato.

Posibleng mga Kalihokan sa Pagkat-on

Paghanduraw sa imahe sa kasulatan

Aron matabangan ang mga estudyante nga magpraktis sa pagkat-on gikan sa paghanduraw sa kasulatan, ikonsiderar ang pagsugod sa klase pinaagi sa pagpakita og mga hulagway sa usa ka tawo nga nagbangotan ug usa ka tawo nga nagsayaw. Dayon, pangutan-a ang mga estudyante kon unsa ngag mga hunahunaan o mga pagbati ang moabot dihang ilang hunahunaon ang bahin sa pagbangotan. Ipakigbahin tingali sa mga estudyante ang mga butang nga sama sa mga luha, pagkamatay sa minahal, kasakit, o kaguol. Ibalik ang samang pangutana para sa nagsayaw.

Basaha ang Salmo 30:11, nga pangitaon kon giunsa paggamit ni David ang mga hulagway sa pagbangotan ug pagsayaw aron ihulagway ang gahom ni Jesukristo ug sa Iyang Pag-ula.

Sa unsang paagi kini nga mga hulagway motabang nimo sa pagsabot kon unsay gitudlo ni David bahin kang Jesukristo dihang siya miingon, “Giilisan mo’g sayaw sa kalipay ang akong kaguol”?

Ipasabot sa mga estudyante nga ang paggamit niini nga mga litrato aron mas masabtan ang bersikulo 11 maoy usa ka ehemplo sa kahanas sa pagtuon nga paghanduraw. Ikonsiderar ang pagdapit sa usa ka estudyante nga basahon ang mosunod nga paghulagway aron tun-an kini nga kahanas.

Ang paghanduraw maoy usa ka kahanas sa pagtuon nga moporma og mental nga hulagway base sa mga detalye sa paghulagway diha sa mga kasulatan. Mahanduraw nato nga morag tua ta sa mga panghitabo nga gihulagway sa mga kasulatan. Pwede tang mohunong kadiyot ug handurawon ang hugpong sa mga pulong nga sama sa “Giilisan mo’g sayaw sa kalipay ang akong kaguol” (Salmo 30:11). Ang sunod nga lakang mao ang pagpamalandong kon unsay atong makat-onan gikan niini nga mga imahe. Ang paghimo sa ingon mahimong magdapit sa Espiritu Santo dihang maghinayhinay kita ug tinguhaon ang pagsabot uban sa atong hunahuna ug kasingkasing.

Pamalandonga ang mosunod nga mga pangutana.

Unsa ka sagad kang maghinayhinay aron handurawon ang imong gitun-an diha sa mga kasulatan?
Sa imong hunahuna, sa unsang paagi ang paghanduraw sa imong mabasa motabang nimo nga mas mailhan ang Manluluwas?

Hatagi og pagtagad ang mga pag-aghat sa Espiritu Santo aron tabangan kang mokat-on bahin kang Jesukristo samtang imong handurawon ang mga paghulagway diha sa Salmo 23 karon.

“Ang Ginoo Mao ang Akong Magbalantay”

Kini nga seksiyon sa leksiyon mohatag og higayon sa mga estudyante nga dungan nga magpraktis sa paghanduraw ingon nga usa ka klase sa dili pa sulayan nga sila ra.

Basaha ang Salmo 23:1 ug markahi ang mga litrato nga gigamit sa paghulagway kang Jesukristo.

Aron tabangan ang mga estudyante nga makakat-on og dugang bahin sa Manluluwas, pwede nimo silang dapiton nga handurawon Siya ingon nga atong Magbalantay samtang ilang basahon ang Ezequiel 34:11–16 o Juan 10:11–15, o samtang kantahon sa klase ang “Gimahal sa Magbalantay” (Mga Himno, num. 134). Pwede usab nilang i-cross reference o i-link ang maong mga tudling sa Salmo 23:1.

Paggahin og panahon sa paghanduraw sa usa ka magbalantay nga nag-atiman o nanalipod sa iyang mga karnero.

Dayon isulat ang usa ka pamahayag bahin kang Jesukristo nga imong nakat-onan gikan sa paghanduraw Niya ingon nga imong Magbalantay.

Ikonsiderar ang pagpakita diha sa pisara og hulagway ni Jesukristo ingon nga nagpakita isip magbalantay sama nianang naa sa sinugdanan niini nga leksiyon. Dapita ang pipila ka estudyante sa pagsulat sa ilang mga pamahayag sa kamatuoran mahitungod Kaniya diha sa pisara palibot sa hulagway. Ipakigbahin tingali sa mga estudyante ang mga pamahayag nga sama sa: Nagpakabana ang Ginoo sa akong mga panginahanglan.

Sa unsang paagi si Jesukristo nahimong magbalantay sa imong kinabuhi o sa kinabuhi niadtong anaa sa imong palibot?

Pagkaila kang Jesukristo

Ikonsiderar ang paghatag og higayon sa mga estudyante nga mas mailhan ang Manluluwas pinaagi sa pagpraktis sa paghanduraw nga sila ra o uban ang gamayng mga grupo. Ang mosunod nga kalihokan usa ka paagi aron mabuhat kini. Sa dili pa magsugod ang mga estudyante, hatagi ang matag estudyante og blangko nga papel. Pwede usab kang mohatag og dikolor nga mga lapis o marker nga magamit sa mga estudyante sa pagdrowing og mga hulagway.

Tun-i ang Salmo 23:2–6. Dayon pagpili og usa ka bersikulo nga mipatigbabaw nimo nga maoy imong tutokan sa nahibiling bahin niini nga kalihokan.
Handurawa ang paghulagway nga gigamit ni Hari David diha sa imong bersikulo aron ihulagway ang usa ka kinaiya ni Jesukristo o ang usa ka butang nga Iyang gihimo para nato. Idrowing ang imong gihanduraw o pangita og digital nga hulagway nga magpakita kon unsay naa sa imong hunahuna.
Pagsulat og bisag usa ka pamahayag sa kamatuoran diha sa imong papel bahin sa Manluluwas nga imong nakat-onan gikan sa paghanduraw sa paghulagway ni David.
Himoang personal ang imong nakat-onan pinaagi sa pagpamalandong (o pagpakighisgot sa imong grupo) kon nganong importante kini para nimo o kon sa unsang paagi kini makapalig-on sa imong relasyon uban sa Langitnong Amahan ug kang Jesukristo.

Samtang gihimo ni sa mga estudyante, ikonsiderar ang paglibot-libot sa lawak klasehan aron makakat-on gikan nila ug tabangan kadtong kinahanglan tingaling tabangan. Kon naglisod og handuraw sa hulagway ang mga estudyante, pwede kang mangutana og sama sa “Unsa may imong bation kon naa ka daplin sa tin-aw nga katubigan?” o “Para nimo, unsa kahay girepresentahan sa Iyang bunal ug sungkod?” Agi og dugang, ang pagdayeg sa mga drowing o panabot sa mga estudyante maayo tingali kaayong paagi sa pagdasig nila ug pagpalig-on sa imong relasyon ngadto kanila.

Isulat tingali sa mga estudyante ang mga pamahayag sa kamatuoran bahin sa Manluluwas nga sama sa: Ipahiuli sa Ginoo ang gikapoy ug nasakitan nga mga kalag (bersikulo 3) o Amumahan kita sa Ginoo, bisan sa lisod nga mga panahon (bersikulo 5).

Human makompleto sa mga estudyante ang kalihokan, dapita sila sa pagpakigbahin sa ilang nakat-onan bahin kang Jesukristo. Aron mahimo kini, pwede nilang ipakita ang ilang mga hulagway sa tibuok lawak klasehan, ipakigbahin ang ilang nakat-onan ngadto sa ubang mga estudyante o mga grupo, o idugang sa pisara ang ilang nakat-onan. Human makapakigbahin ang mga estudyante, ikonsiderar ang pagpangutana og sama sa mosunod.

Aduna ba moy nahibaloan bahin kang Jesukristo nga wala unta ninyo mahibaloi kon wala pa mo mihinayhinay aron handurawon ang paghulagway diha sa Salmo 23? Kon oo, unsa?
Hain niini nga mga hulagway ang labing nakatabang ninyo nga makita ang malumo ug mahigugmaong kinaiya ni Jesukristo? Ngano man?

Pwede nimo kining taposon pinaagi sa pagdapit sa mga estudyante nga gamiton ang paghanduraw samtang magtuon sa kasulatan aron padayong mas mailhan ang Manluluwas. Ikonsiderar ang pagpakigbahin sa imong pamatuod sa mga kamatuoran bahin sa gitudlo ni Jesukristo diha sa Salmo 23.

Dugang nga mga Kapanguhaan

Unsay gitudlo kanako sa paglantaw kang Jesukristo ingon nga magbalantay, bahin sa unsaon pagserbisyo ang uban (Salmo 23:1)?

Si Presidente Russell M. Nelson mitudlo:

Ang Maayong Magbalantay mahigugmaong nag-atiman sa tanang karnero sa Iyang panon, ug kita mao ang Iyang tinuod nga mga gitugyanan nga magbalantay sa karnero. Ang atong pribilehiyo mao ang pagdala sa Iyang gugma ug pagdugang sa atong kaugalingong gugma ngadto sa mga higala ug mga silingan—magpakaon, mag-atiman, ug mag-amuma kanila—sama sa gustong ipabuhat sa Manluluwas kanato. (“Shepherds, Lambs, and Home Teachers,” Ensign, Ago. 1994, 19)

Si Elder Gerrit W. Gong sa Korum sa Napulog Duha ka Apostoles mipasabot:

15:19

Mga kaigsoonan, gitawag kita sa atong Maayong Magbalantay gamit ang Iyang tingog ug ang Iyang ngalan. Siya mangita, mopundok, ug moadto sa Iyang katawhan. Pinaagi sa Iyang buhi nga propeta ug sa matag usa kanato, Iyang gidapit ang tanan nga makakaplag og kalinaw, katuyoan, pagkaayo, ug kalipay diha sa kahingpitan sa Iyang gipahiuli nga ebanghelyo ug sa Iyang dalan sa pakigsaad. Pinaagi sa ehemplo, Siya nagtudlo sa mga magbalantay sa mga karnero sa Israel sa pagpangalagad diha sa Iyang gugma. (“Maayong Magbalantay, Kordero sa Dios,” Liahona, Mayo 2019, 100)

Unsa kaha ang ipasabot sa Manluluwas sa pagpahiuli sa akong kalag (Salmo 23:3)?

Si Sister Cristina B. Franco, kanhing ikaduhang magtatambag sa Kinatibuk-ang Kapangulohan sa Primary, miingon:

9:36

[S]amtang kita moduol ngadto ni Jesukristo pinaagi sa paggamit sa atong hugot nga pagtuo diha Kaniya, maghinulsol, ug maghimo ug maghupot sa atong mga pakigsaad, ang atong pagkanaguba—bisan unsa ang nakaingon niini—mamaayo. Kini nga proseso, nga nagdapit sa makaayo nga gahum sa Manluluwas nganhi sa atong mga kinabuhi, dili lamang nagpahiuli kanato ngadto sa unsa kita kaniadto apan naghimo kanato nga mas maayo pa kay sa kita sukad nahimo. Nahibalo ako nga pinaagi sa Pag-ula sa Manluluwas, kitang tanan matarung, mahimong hingpit, ug matuman ang atong katuyoan. (“Ang Makaayo nga Gahum ni Jesukristo,” Liahona, Nob. 2020, 61)

Unsay atong makat-onan gikan paggamit sa magbalantay og sungkod ug bunal (Salmo 23:4)?

Si Presidente Jeffrey R. Holland sa Korum sa Napulog Duha ka Apostoles mitudlo:

Sa karaang mga adlaw ang mao lamang nga mga instrumento nga gidala sa usa ka magbalantay mao ang bunal ug sungkod. Ang bunal mubo, dako, murag hapak sa bola nga hinagiban gigamit sa pagpanalipod sa kaugalingon o panon gikan sa mga samokan. Kini gituyo nga mahimo—ug sa pagpasabot—og kalig-on ug gahom diha sa kamot sa usa ka kusgan nga magbalantay kinsa nakahibalo unsaon sa paggamit niini. …

Ang sungkod mas taas, mas gaan nga piraso, kasagaran may kaw-it (o piko) sa tumoy gamiton sa pagtabang og usa ka nabiyaan nga karnero. Kini, labaw kay sa bunal, kaabin sa sining [art] ug tinukod-tukod nga istorya kabahin sa magbalantay ug sa iyang mabinantayon nga pag-amuma. … Ang tanan mahitungod sa sungkod nagpasabot og kaluwasan ug pag-amuma. Kini mao ang mahinungdanon kaayo nga intrumento sa kasulatan sa pagluwas ug pagtubos.

Sa kinabuhi kita nagkinahanglan og panalipod ug kita nagkinahanglan og pagluwas. Sa usa ka paagi o sa lain, kita huyang. Kini usa ba ka makahulga nga mga pagsumbatay o naandan nga paglatagaw, kita napanalanginan ug napanalipdan pinaagi sa mabinantayon nga pag-amuma sa Dios. Ang imong bunal ug ang imong sungkod kini naghupay kanako. (For Times of Trouble: Spiritual Solace from the Psalms [2012], 217–18)

Dugang nga mga Kalihokan sa Pagkat-on

Laing paagi sa pagsugod

Kon para nimo mas makakonektar ang imong mga estudyante pinaagi sa paghanduraw sa lainlain nga mga hulagway kay sa nagbangotan ug nagsayaw nga gikan sa Salmo 30:11, pwede nimong himoon ang samang kalihokan gamit ang laing mga tudling sa kasulatan ug mga hulagway sa Manluluwas. Pagpili og hulagway nga para nimo mas makakonekta ang mga estudyante. Aniay pila ka ideya gikan sa mga bersikulo sa Mga Salmo:

“Ang Ginoo mao ang akong kahayag” (Salmo 27:1)
“Ikaw ang tagoanan ko” (Salmo 32:7)
“Siya lamang ang akong bato” (Salmo 62:2)
“Ang Ginoo mao ang among adlaw ug taming” (Salmo 84:11)

Pagtuon sa mga kasulatan nga naghunahuna sa laing tawo

Imbes gamiton ang paghanduraw, pwede nimong dapiton ang mga estudyante nga tun-an ang Salmo 23:1–6 samtang hunahunaon ang ilang kaila nga adunay kalisdanang giatubang sa ilang kinabuhi. Human magtuon, pwedeng ipakigbahin sa mga estudyante ang usa ka butang nga ilang nakat-onan bahin sa Manluluwas pinaagi sa pagsulat og makapadasig nga teksto o mubo nga sulat para sa maong tawo.

Isip nga alternatibo, pwede nimong hatagan ang mga estudyante og tulo o upat ka senaryo, sama sa usa ka tawo nga mibati nga wala sila gimahal sa Dios o nahadlok sa pagkawalay kasegurohan sa ilang umaabot. Dapita ang mga estudyante nga tun-an ang Salmo 23:1–6 nga gihunahuna ang tawo nga diha sa senaryo. Pwedeng ipakigbahin sa mga estudyante sa usag usa ang mga butang nga ilang ikatabang sa tawo diha sa senaryo.

Paggamit sa musika

Aron dapiton ang Espiritu pinaagi sa sagradong musika, ikonsiderar ang pagdapit sa mga estudyante nga basahon ang mga liriko sa himno nga “Ang Dios ang Akong Magbalantay.” Pwede ninyong hisgotan kon sa unsang paagi makatabang nila ang himno nga mas masabtan ang Salmo 23:1–6. Dayon, ikonsiderar ang pagpakita niini nga paghan-ay sa “Ang Dios ang Akong Magbalantay” (4:54) gikan sa Music Festival sa Simbahan niadtong 2021. Pagkahuman, hatagig higayon ang mga estudyante nga ipakigbahin ang ilang mga gibati ug mga pamatuod sa Manluluwas.

4:54