Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Job 1–3; 12–13: “Bisan Pa Niini Ako Mosalig Kaniya”

“Job 1–3; 12–13: ‘Bisan Pa Niini [Ako Mosalig Kaniya],’” Manwal sa Magtutudlo sa Seminary sa Daang Tugon (2026)

“Job 1–3; 12–13: ‘Bisan Pa Niini [Ako Mosalig Kaniya],’” Manwal sa Magtutudlo sa Seminary sa Daang Tugon

Job 1–3; 12–14; 19; 21–24; 38–40; 42: Leksiyon 97

Job 1–3; 12–13

“Bisan Pa Niini Ako Mosalig Kaniya”

The Old Testament prophet Job depicted kneeling on the ground looking up to the light of the Lord. His friends are in the background of the painting. Job has one hand stretched toward the light. (Job 42:1-8)

Naglisod ka ba sa pagpabiling matinud-anon sa Dios atol sa panahon sa kalisdanan? Si Job maoy usa ka tawong matinud-anon kinsa gipanalanginan pag-ayo ang kinabuhi. Sa wala damha, nawala kang Job ang iyang kabtangan, mga anak, ug maayong panglawas. Pero, wala mawad-i sa hugot nga pagtuo si Job kang Jesukristo. Kini nga leksiyon makatabang sa mga estudyante nga mobati og dakong tinguha sa pagsalig sa Langitnong Amahan ug kang Jesukristo panahon sa mga pagsulay.

Pagpangandam sa estudyante: Dapita ang mga estudyante sa pagpamalandong kon giunsa nila pagtubag ang ilang mga pagsulay. Hangyoa silang mosulod sa klase nga andam sa paghisgot sa ilang mga kasinatian.

Posibleng mga Kalihokan sa Pagkat-on

Sa dili pa sugdan ang leksiyon karong adlawa, makatabang ang pagsulti sa mga estudyante nga ang pipila sa mosunod nga mga basahon (Job–Awit ni Solomon) nailhan ingon nga mga basahon sa balak o kaalam sa literatura. Gisulat kini nga mga basahon sa balaknon nga paagi ug wala ni gidisenyo aron moasoy og kasaysayan. Sama sa ubang kasulatan, kini nga mga basahon makagiya nato paingon kang Jesukristo ug motabang nato sa pagsunod Kaniya. (Timan-i: Gihulagway ni Joseph Smith ang Awit ni Solomon ingon nga “dili dinasig nga mga sinulat” [Joseph Smith Translation, note on Song of Solomon].)

Unsaon nato pagtubag ang mga pagsulay

Ikonsiderar ang pagsugod sa klase pinaagi sa pagsulat sa pisara og “Tawo A” ug “Tawo B.” Dapita ang mga estudyante nga maghimog senaryo para sa matag tawo, ang usa naghulagway molungtad og dugay nga pagsulay ug ang usa ka dili magdugay nga pagsulay. Makatabang tingali ang mosunod nga pangutana.

Sukad bata pa si Tawo A, nag-antos na sila sa …
Migrabe karon ang kahimtang ni Tawo B. Nagsugod ni dihang …

Human mahimo sa mga estudyante ang duha ka senaryo, dapita sila sa paghisgot sa mosunod nga mga pangutana para sa “Tawo A” ug “Tawo B.” Pwede nila kining himoon uban ang ilang pares o gagmayng grupo.

Unsa kahay mahitabo kon dili maayo ang pagtubag niining tawhana sa pagsulay?
Unsa kahay mahitabo kon maayo ang pagsanong niining tawhana sa pagsulay?
Unsa kahay mahitabo kon mosalig sa Langitnong Amahan kining tawhana ingon nga tubag sa pagsulay?

Human maghisgot ang mga estudyante sulod sa igong panahon, tabangi silang hunahunaon kon giunsa nila sa ilang kaugalingon pagtubag ang ilang mga pagsulay. Ang mosunod maoy usa ka paagi nga mahimo nimo kini.

Sa sukod nga 1–5 (diin ang 1 dili gayod tinuod kanimo ug 5 tinuod kaayo kanimo), pamalandongi kon unsa ka tinuod ang mosunod nga mga pamahayag alang kanimo:

Maayo nakong gitubag ang mga pagsulay.
Nakaangkon kog kusog gikan sa Langitnong Amahan ug kang Jesukristo panahon sa pagsulay.

Magmaandam sa pagbati o pagkat-on og mga butang bahin sa Langitnong Amahan ug ni Jesukristo nga makatabang nimo sa pag-atubang sa imong mga pagsulay uban ang mas dakong pagsalig Kanila.

Kinabuhi ni Job

Basaha ang Job 1:1–3, nga pangitaon kon unsay imong nakat-onan bahin kang Job. (Timan-i: ang pulong hingpit gihubad og “tibuok, kompleto, naay integridad.”)

Unsay imong nakaplagan?

Pwede nimong isulat ang tubag sa mga estudyante diha sa pisara. Sa dili pa ipadayon ang istorya ni Job, ikonsiderar ang pagbasa o pag-summarize sa mosunod.

Importanteng masabtan nga tinuod nga tawo si Job (tan-awa sa Doktrina ug mga Pakigsaad 121:10), pero giasoy ang kinabuhi ni Job pinaagi og mga elemento sa balak. Pananglitan, sa pagsugod sa istorya ni Job, ang Ginoo ug si Satanas gihulagway nga kaduha nag-istorya. Dili ni akto nga panag-istorya tali sa Ginoo ug ni Satanas pero gipakita niini ang papel ni Satanas ingon nga atong kaaway. Mahimong balaknon kini nga paagi sa pag-andam sa magbabasa sa kon unsay mosunod sa kinabuhi ni Job—ang iyang mga kalisdanan, mga tentasyon, ug pagkawala sa iyang kalibotanong mga kabtangan.

Aron tabangan ang mga estudyante nga masabtan ang unang panag-istorya, pwede kang mohangyo og tulo ka boluntaryo nga maoy mobasa. Ang usa ka boluntaryo maoy mobasa sa mga pulong sa tigsaysay, lain ang mobasa sa mga pulong sa Ginoo, ug ang ikatulo sa mga pulong ni Satanas. Hangyoa ang mga estudyante sa pagbasa sa mga pulong nga dili kini ipaagi sa drama. Ikonsiderar ang pagpakita sa mosunod nga mga pangutana aron mapamalandongan kini sa mga estudyante samtang naminaw sila.

Basaha ang Job 1:6–12, nga pangitaon ang mga tubag sa mosunod nga mga pangutana:

Unsay pangangkon ni Satanas bahin sa pagkamatarong ni Job?
Unsay gusto ni Satanas nga mahitabo kang Job?

Tugoti ang mga estudyante sa pagpakigbahin sa ilang mga tubag. Kon gikinahanglan, tabangi ang mga estudyante nga masabtan nga gipangangkon ni Satanas nga matarong lang si Job kay gipanalanginan siya sa Ginoo. Gusto ni Satanas nga kuhaon ang tanang panalangin kang Job aron mapamatud-an ang maong pangangkon.

Ehemplo ni Job

Para sa sunod bahin sa istorya ni Job, pwede kang maghimog tsart nga sama sa mosunod diha sa pisara. Dayon, pwede nimong parespareson o bahinon sa gagmayng mga grupo ang mga estudyante aron sa pagkompleto sa tsart. Hangyoa ang mga grupo sa paghisgot sa nagsunod nga mga pangutana. Makatabang tingali ang paglakawlakaw aron tabangan ug dasigon ang mga estudyante. (Timan-i: Ang mga hubag mao ang masakit nga samad sa panit. Si Job “migisi” sa iyang sinina ug mikiskis sa iyang ulo isip simbolo sa iyang pagbangotan)

Unsay giantos ni Job?	Giunsa ni Job pagtubag?
Unsay giantos ni Job? Basaha sa Job 1:13–19; 2:7.	Giunsa ni Job pagtubag? Basaha sa Job 1:20–22; 2:9–10; 13:15; 23:10.

Unsay mipatigbabaw kanimo bahin sa pagtubag ni Job?
Unsa kahay nasabtan ni Job bahin sa Dios nga mao man kadto ang iyang tubag?

Tingali ipasabot sa mga estudyante nga si Job miila nga ang iyang mga panalangin naggikan sa Dios (tan-awa sa Job 1:21), nga ang iyang mga pagsulay maoy bahin sa plano sa Dios (tan-awa sa Job 2:10), ug nasayod nga ang Dios nakaila kaniya ug nga makaayo kaniya ang iyang mga pagsulay (tan-awa sa Job 23:10).

Human makompleto sa mga estudyante ang kalihokan, tabangi silang mailhan ang kamatuoran pinaagi sa pagsukna og pangutana nga sama sa mosunod.
Unsay atong makat-onan gikan sa ehemplo ni Job nga makatabang nato panahon sa mga pagsulay?

Apil sa uban pang mga tubag, mailhan tingali sa mga estudyante ang sama sa: makapili kita sa pagsalig sa Dios panahon sa atong mga pagsulay.

Ikonsiderar ang pagdapit sa mga estudyante nga pangitaon ug markahan kon asa nila makita kini nga kamatuoran diha sa Job 13:15.

Mga ehemplo diha sa kasulatan

Paghunahuna og mga paagi nga imong matabangan ang mga estudyante nga mas modako ang ilang pagsalig sa Langitnong Amahan panahon sa ilang mga pagsulay. Ang usa ka paagi mao ang pagpangita sa mga estudyante og mga kasulatan diin gipasabot sa mga tawo ang ilang mga rason sa pagsalig sa Dios panahon sa pagsulay. Pwedeng himoon sa mga estudyante ang mosunod nga kalihokan.

Pangitag ehemplo diha sa mga kasulatan diin gipili sa usa ka tawo nga mosalig sa Dios panahon sa ilang mga pagsulay.
Markahi ang mga pulong o hugpong sa mga pulong nga nagpasabot kon nganong misalig sa Dios kining tawhana.
Pangandam sa pagpasabot kon sa unsang paagi nakatabang o makatabang nimo ang mga konsepto nga imong gimarkahan aron mosalig sa Dios.

Panapos

Pwede nimong taposon ang klase pinaagi sa pagdapit sa mga estudyante nga sulatan o padad-an og text ang ilang kaugalingon aron tubagon ang mosunod nga pangutana. Kon magsulat silag mubo nga sulat, dapita sila sa pagpilo niini ug pagbutang niini sa ilang bulsa o sa ubang lugar diin makita nila sa kataposang bahin sa adlaw. Pwede kang magpatukar og mananoy nga instrumental nga musika samtang magsulat ang mga estudyante.

Unsay imong gibati karon nga nakatabang nimo nga mopili sa pagsalig sa Langitnong Amahan ug kang Jesukristo panahon sa mga pagsulay?

Dugang nga mga Kapanguhaan

Sa unsang paagi makatabang nato ang Manluluwas panahon sa mga pagsulay?

Si Elder Dale G. Renlund sa Korum sa Napulog Duha ka Apostoles misulat:

Si Jesukristo ganahan mopahiuli sa unsay dili nato mapahiuli, moalim sa mga samad nga dili nato maalim, moayo sa unsay dili gayod maayo, ug moganti sa bisan unsa nga dili makiangayon nga inyong gilahutay. Sa pagkatinuod, kon tugotan nato Siya, Iyang ipahinungod ang atong pag-antos alang sa atong kaayohan ug ibalaan kanato ang atong hilabihan nga kalisod. Siya dili lamang mohupay kanato ug mopahiuli sa unsay nawala (tan-awa sa Job 42:10, 12–13), apan gamiton Niya ang atong mga pagsulay alang sa atong kaayohan.

Ang Manluluwas adunay gahom nga himoong husto ang tanan ug nagtinguha sa pagbuhat sa ingon. Ganahan Siya nga permanenteng moayo bisan sa nasagmuyo nga mga kasingkasing (tan-awa sa Salmo 147:3). Ang kataposan nga leksiyon sa basahon ni Job mao nga ang matag usa kanato makapili sa pagpuyo sa atong kinabuhi nga mosalig sa Dios ug sa Iyang plano, bisan unsa pay mahitabo. (“Salig sa Dios ug Ipatigbabaw Siya Labaw sa Tanan,” Liahona, Ago. 2022, 7)

Sa unsang paagi mahimong panalangin ang mga pagsulay?

Si Elder Isaac K. Morrison sa Seventy miingon:

10:53

Kita makakaplag og daghang sugilanon sa kasulatan bahin sa banggiitan ug halangdon nga mga lider, sama nila ni Jeremias, Job, Joseph Smith, ug Nephi, kinsa wala makalingkawas gikan sa mga pakigbisog ug mga hagit sa mortalidad. Sila mga mortal kinsa nakakat-on sa pagsunod sa Ginoo bisan diha sa lisod nga mga kahimtang. …

Namalandong sa akong kaugalingong mga kasinatian, ako nakaamgo nga akong nakat-onan ang pipila sa labing maayo nako nga mga leksiyon atol sa labing lisod nga mga panahon sa akong kinabuhi, mga panahon diin ako nakasinati og mga butang nga wala pa nako masinati. Ang mga kalisdanan nga akong gisagubang isip usa ka batan-on, samtang nagkat-on bahin sa Simbahan pinaagi sa seminary, isip usa ka bag-ong kinabig, ug isip usa ka full-time nga misyonaryo ug sa mga hagit nga akong giatubang sa akong edukasyon, sa akong paningkamot sa pagtuman sa akong mga calling, ug sa pag-atiman og usa ka pamilya ang nag-andam nako alang sa umaabot. Kon ako mas malipayon nga motubag sa lisod nga mga kahimtang uban sa hugot nga pagtuo diha sa Ginoo, ako mas molambo sa akong pagkadisipulo.

Ang lisod nga mga butang sa atong kinabuhi dili ikatingala nga moabot sa higayon nga kita nakasulod sa higpit ug pig-ot nga dalan. Si Jesukristo nakakat-on sa “pagkamasinugtanon pinaagi sa Iyang mga pag-antos.” Kon kita mosunod Kaniya, labi na diha sa atong lisod nga mga panahon, kita molambo nga mas mahimong sama Kaniya. (“Makabuhat Kita og Lisod nga mga Butang pinaagi Kaniya,” Liahona, Nob. 2022, 115-116)

Sa unsang paagi makatabang nato ang Manluluwas nga malahutay ang atong mga problema?

Si Elder John A. McCune sa Seventy miingon:

9:10

Isip mga sumusunod ni Kristo, dili kita luwas sa mga hagit ug mga pagsulay sa atong kinabuhi. Kita sa kasagaran pabuhaton og lisud nga mga butang nga, kon sulayan sa pagbuhat nga mag-inusara, mahimong bug-at ra kaayo ug tingali imposible. Samtang atong dawaton ang pagdapit sa Manluluwas nga “duol ngari kanako” [Mateo 11:28], Siya mohatag sa suporta, kahupayan, ug kalinaw nga gikinahanglan. … Bisan sa atong pinakabug-at nga mga pagsulay, atong mabati ang mainiton nga paghangop sa Iyang gugma samtang kita mosalig Kaniya ug modawat sa Iyang kabubut-on. Kita makasinati sa hingpit nga kalipay nga giandam alang sa Iyang matinud-anon nga mga disipulo, kay si “Kristo mao ang hingpit nga kalipay.” [Russell M. Nelson, “Hingpit nga Kalipay ug Espirituhanon nga Pagsugakod,” Liahona,, Nob. 2016, 82]. (“Duol ngadto kang Kristo—Magpakabuhi isip mga Santos sa Ulahing mga Adlaw,” Liahona, Mayo 2020, 36)

Dugang nga mga Kalihokan sa Pagkat-on

Kaguol ug kasakit

Makabenepisyo tingali ang mga estudyante gikan sa panaghisgot bahin sa pagsagubang sa kaguol ug kasakit. Kon mao, dapita sila sa pagbasa sa Job 3:23–25, nga pangitaon kon unsay gibati ni Job human mawala niya ang iyang pamilya, kabtangan, ug kahimsog sa panglawas. Makatabang tingali sa mga estudyante ang mosunod nga mga pangutana sa pagdayeg sa mga ekspresyon ni Job:

Unsaon nimo paghulagway ang gibati ni Job bahin sa iyang mga pagsulay?
Unsa tingali ang kalainan tali sa pagbati og grabeng kaguol ug pagbati og kawalay paglaom?
Unsaon nato pagdapit ang Langitnong Amahan ug si Jesukristo nga tabangan kitang makaya ang maong mga pagbati?

Paghupay niadtong nanginahanglan og paghupay

Makatabang tingali sa mga estudyante ang pagpamalandong sa mga higala ni Job nga mihupay niya. Bisag ilang gipasanginlan si Job nga nakasala, miadto una ang iyang mga higala aron maguol uban ni Job og hupayon siya. Pwedeng basahon sa mga estudyante ang Job 2:11–13, nga pangitaon kon unsay ganahan nila bahin sa mga higala ni Job. Pwedeng i-cross reference sa mga estudyante kini nga mga bersikulo sa Mosiah 18:8–10, nga pangitaon ang may kalabotan nga tambag nga gihatag sa Basahon ni Mormon.

Kanus-a ka napanalanginan tungod sa paningkamot sa usa ka tawo nga hupayon o magbangutan uban nimo?

Ikonsiderar ang pagdapit sa mga estudyante nga maghunahuna og usa ka tawo nga tingali nagkinahanglan sa ilang atensyon. Ipasulat nila ang ngalan niining tawhana. Dayon pwedeng isulat sa mga estudyante ang ilang mahimo aron tabangan o hupayon kining tawhana.

Mga leksiyon nga nakat-onan ni Job pinaagi sa iyang pag-antos

Tabangi ang mga estudyante nga masabtan nga panahon sa pag-antos ni Job, gipasabot sa iyang mga higala nga gisilotan siya sa Dios tungod sa iyang sala. Samtang nag-antos si Job niini nga akusasyon ug sa iyang kaugalingon nga hunahuna, iyang gipahayag nga nahibaloan niya ang bahin sa Dios.

Basaha ang Job 12:9–13, 16; 13:15–16 ug markahi kon unsay gibati ug nakat-onan ni Job bahin sa Dios.

Unsay imong gimarkahan? Nganong importante na?
Unsaon nimo pag-summarize ang pagbati ni Job niining puntoha?

Pagbuntog sa mga babag

Human mapangita sa mga estudyante ang mga kasulatan diin misalig ang mga tawo sa Ginoo, pwede nimong tan-awon ang “Crossing the Finish Line: A Story of Overcoming Obstacles” (11:53). Dapita ang mga estudyante sa pagpangita kon unsay nahibaloan ni Dallin nga nakatabang niya sa pagsalig kang Jesukristo panahon sa iyang mga pagsulay.

11:52