Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Nehemaia: “ʻOku Ou Fai ʻa e Ngāue ʻOku Lahi, ko ia ʻOku ʻIkai Te u Faʻa ʻAlu Hifo”

“Nehemaia: ‘ʻOku Ou Fai ʻa e Ngāue ʻOku Lahi, ko ia ʻOku ʻIkai Te u Faʻa ʻAlu Hifo,’” Fuakava Motuʻá – Tohi Lēsoni ʻa e Faiako Seminelí (2026)

“Nehemaia: ‘ʻOku Ou Fai ʻa e Ngāue ʻOku Lahi, ko ia ʻOku ʻIkai Te u Faʻa ʻAlu Hifo,’” Fuakava Motuʻá – Tohi Lēsoni ʻa e Faiako Seminelí

ʻĒsela 1; 3–7; Nehemaia 2; 4–6; 8: Lēsoni 93

Nehemaia

“ʻOku Ou Fai ʻa e Ngāue ʻOku Lahi, ko ia ʻOku ʻIkai Te u Faʻa ʻAlu Hifo”

Nehemiah (Old Testament) inspecting the deteriorating walls of Jerusalem.

Naʻe ueʻi fakalaumālie ʻe he ʻOtuá ʻa Nehemaia ke maluʻi hono kakaí ʻaki hono toe langa e ngaahi ʻā takatakai ʻi Selusalemá. Naʻe pau ke ikunaʻi ʻe he kakai ʻo Nehemaiá ʻa e ngaahi fakamanamana mo e fakahohaʻa hokohokó ke fakahoko ʻa e ngāué ni. Kuo foaki mai foki kiate kitautolu ha ngāue mahuʻinga mei he ʻOtuá, pea te tau ala fehangahangai foki mo ha ngaahi faingataʻa ʻi hono fakahoko iá. ʻOku fakataumuʻa ʻa e lēsoni ko ʻení ke poupouʻi e kau akó ke nau tokanga taha ki he ngāue kuo tuku ange ʻe he Tamai Hēvaní ke nau faí.

Teuteu ʻa e tokotaha akó: Fakaafeʻi e kau akó ke nau omi ki he kalasí mo ha lisi ʻo e meʻa ʻe tolu ʻoku nau ongoʻi ʻoku finangalo ʻa e Tamai Hēvaní ke nau tokanga taha ki aí: ko e meʻa ʻe taha ki he uiké ni, taha ki he ngaahi taʻu siʻi ka hoko maí, pea taha ki ʻamui ange ʻi he moʻuí. Te ke lava ʻo fokotuʻu ange ki he kau ako kuo ʻosi maʻu honau tāpuaki fakapēteliaké ke nau toe lau ia kimuʻa pea toki faʻu ʻenau lisí.

Ngaahi ʻEkitivitī Ako ʻOku Ala Fakahokó

Fakahohaʻa

ʻI he ngaahi taʻu kuo hilí, ʻi he teuteu ʻa e kau pailaté ke fakatūʻuta ha vakapuná, naʻe ʻikai lava ha kiʻi maama ʻi he loki fakaʻulí ʻo ulo. Naʻe fuʻu tokanga ʻaupito ʻa e kau kauvaká ki he kiʻi foʻi ʻuhilá ʻo ʻikai ke nau fakatokangaʻi naʻe hifo ʻa e vakapuná ʻo tō ʻi ha anovai. Naʻe pā e vakapuná ʻo mate ai ha kakai ʻe toko 100 tupu.

Naʻe akoʻi ai ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, ha lēsoni mahuʻinga mei he meʻa fakamamahi ko ʻení:

Naʻe fakaʻofoʻofa ʻaupito pē ʻa e tafaʻaki fakamīsini ia ʻo e vaká. Naʻe ngāue lelei ʻa e meʻa kotoa pē—tukukehe pē ha meʻa ʻe taha: ko ha foʻi ʻuhila ʻe taha naʻe pā. Naʻe hanga ʻe he kiʻi foʻi ʻuhila ko iá—ʻa ia ʻoku sēniti nai ʻe 20 hono mahuʻingá—ʻo kamataʻi ha ngaahi meʻa lalahi ne iku ke mole fakamamahi ai ha moʻui ʻa ha kakai ʻe toko 100 tupu.

Ko hono moʻoní, naʻe ʻikai ko e foʻi ʻuhilá naʻá ne fakatupu ʻa e fakatuʻutāmakí; naʻe hoko ia he naʻe tukutaha e tokanga ʻa e kau ngāué ia ʻi ha meʻa naʻe ʻikai fuʻu mahuʻinga he taimi ko iá, kae ngalo ʻiate kinautolu ʻa e meʻa mahuʻinga tahá.

ʻOku ʻikai ko e kau pailaté pē ʻoku nau faʻa fakahehema ke tukutaha ʻenau tokangá ʻi he ngaahi meʻa ʻoku ʻikai mahuʻingá. ʻOku tau ʻi ha tuʻunga fakatuʻutāmaki kotoa pē. (“We Are Doing a Great Work and Cannot Come Down,” Liahona, May 2009, 59)

Fakaafeʻi e kau akó ke vahevahe ʻenau fakakaukau ki he founga ʻe lava ke fakaʻaongaʻi ai e pōpoaki ʻa Palesiteni ʻUkitofá kiate kitautolu ko e kau ākonga ʻa Sīsū Kalaisí.

Hili iá pea te ke lava ʻo fakaʻaliʻali ʻa e fakamatala ko ʻení pea kole ki he kau akó ke nau lau fakalongolongo ia. Poupouʻi kinautolu ke kole ki he Tamai Hēvaní ke tataki kinautolu ʻo fakafou ʻi he Laumālié ke mahino kiate kinautolu e founga ʻoku kaunga fakataautaha ai ʻa e pōpoakí ni kiate kinautolú. ʻE lava ke nau lekooti ʻenau ngaahi fakakaukaú ʻi heʻenau tohinoa akó.

Naʻe hoko atu ʻa Palesiteni ʻUkitofa ʻo pehē:

Ki‘i tuʻu siʻi hifo angé ʻo vakavakaiʻi e feituʻu ʻoku ʻi ai hoʻo fakakaukaú mo ho lotó. ‘Okú ke tokanga taha nai ki he ngaahi meʻa ʻoku mahuʻinga tahá? Mahalo ʻe maʻu ha ʻilo ki ai mei he founga ʻoku fakaʻaongaʻi ki ai ho taimi fakalaulaulotó. Ko e fē nai e feituʻu ʻoku tuku ki ai hoʻo fakakaukaú he taimi kuo fakakakato ai e ngaahi fiemaʻú he taimi totonú? ʻOku tukutaha nai hoʻomou fakakaukaú mo e lotó ʻi he ngaahi meʻa muna mo laulaunoa ʻoku fuonounoú, pe ko e ngaahi meʻa ʻoku mahuʻinga tahá? (“We Are Doing a Great Work and Cannot Come Down,” Liahona, May 2009, 60)

Ngāue ʻa Nehemaiá

Fakamatalaʻi ange ki he kau akó naʻe ʻi ai ha tangata ʻIsileli, ko ha tamaioʻeiki ʻa ʻAtisekisi, ko e tuʻi ʻo Peasiá. Naʻe foki ha kau ʻIsileli tokolahi ki Selusalema ʻi he ngaahi taʻu kimuʻá ke toe langa ʻa e temipalé. Naʻe ʻilo ʻe Nehemaia naʻa nau ʻi ha tuʻunga fakatuʻutāmaki ke ʻohofi kinautolu koeʻuhí naʻe holofa ki lalo ʻa e ʻā mo e ngaahi matapā maluʻi ʻo Selusalemá.

Fakakaukau ke fakaafeʻi e kau akó ke fakakakato e ʻekitivitī ko ʻení ʻi ha fanga kiʻi kulupu iiki. Poupouʻi e ngaahi kulupú ke ʻoua naʻa nau fakavavevave ʻi he ngaahi sitepú, kae fakaʻaongaʻi lelei honau taimí pea ako mei he aʻusia ʻa Nehemaiá. Ke tokoni ki he ngaahi kulupú ke nau nofo maʻu ʻi he taimi-tēpile tatau, mahalo te ke fie fakaʻaliʻali tahataha pē ʻa e sitepu ʻo e fakahinohinó. ʻOange ha taimi feʻunga ki he ngaahi kulupú ke fakakakato ʻa e sitepu ko iá kimuʻa pea toki fakaʻaliʻali ʻa e sitepu hokó.

Lau ʻa e Nehemaia 1:1–4; 2:1–6, 11–12, 17–18. Kumi pea aleaʻi ha fakamoʻoni naʻe ueʻi fakalaumālie ʻe he ʻOtuá ʻa e holi ʻa Nehemaia ke toe langa ʻa e ngaahi ʻā ʻo Selusalemá.
Hiki ʻi ha laʻipepa ha meʻa ʻe tolu kuo kole ʻe he ʻOtuá ki he toʻu tupu ʻo e Siasí ke nau tokanga taha ki ai ʻo fakafou ʻi Heʻene kau palōfitá. Ko e founga ʻe taha ke fai ai ʻení ko hano toe vakaiʻi nounou e ngaahi lea mei he konifelenisi lahi fakamuimuitahá.

Hili iá, fakafetongi pepa mo ha kulupu ʻe taha pea aleaʻi mo hoʻo kulupú ʻa e meʻa ne nau tohí. (Fakatokangaʻi ange: Tauhi e pepa ʻa e kulupu ʻe tahá. ʻI he sitepu fā ʻo e ʻekitivitī ko ʻení, te ke tānaki ha ngaahi meʻa ki ai.)
Lau ʻa e Nehemaia 2:19; 4:1, 7–8, ʻo kumi e founga naʻe tali ʻaki ʻe he ngaahi fili ʻo e kau Siú ʻa e ngāue naʻe tuku ʻe he ʻOtuá kiate kinautolú. Aleaʻi ha ngaahi founga ʻoku fakaʻaongaʻi ai ʻe Sētane ʻa e ngaahi founga tatau ʻi he ʻahó ni ke ʻoua naʻa tau tokanga taha ki he meʻa ʻoku kole mai ʻe he ʻOtuá ke tau faí.
ʻI he tafaʻaki ʻo e ngaahi meʻa takitaha ʻe tolu ʻoku hiki ʻi he laʻipepa ʻa e kulupu ʻe tahá, hiki ha fakahohaʻa pe faingataʻa te ne lava ʻo fakafeʻātungia ʻa e tokanga ʻa ha taha taʻu hongofulu tupu ki he ngāue kuo foaki ange ʻe he ʻOtuá kiate kinautolu ʻo fakafou ʻi Heʻene kau palōfitá.
Lau ʻa e Nehemaia 4:9, 14–20 pea aleaʻi e meʻa ʻokú ke ako mei he kakai ʻo Nehemaiá fekauʻaki mo hono ikunaʻi e ngaahi meʻa ʻoku nau tohoakiʻi e tokangá mo e ngaahi faingataʻa ʻi hono fakahoko e ngāue ʻoku tuku mai ʻe he Tamai Hēvaní kiate kitautolú.
Fakafoki ʻa e laʻipepá ki he kulupu totonú. Lau pea aleaʻi e ngaahi meʻa ʻokú ne tohoakiʻi ʻetau tokangá mo e ngaahi faingataʻa naʻe tānaki atu ʻe he kulupu ʻe tahá ki hoʻo laʻipepá. Aleaʻi ha ngaahi fakakaukau ki he founga ʻe lava ke ikunaʻi ai kinautolu ʻe ha taha pea tokanga taha ki he ngāue kuo tuku ʻe he ʻOtuá ki he toʻu tupú ʻo fakafou ʻi Heʻene kau palōfitá.
Fakamatalaʻi fakanounou ʻi ha sētesi ʻe taha ʻa e meʻa naʻá ke ako pe ongoʻi fekauʻaki mo hono fakahoko e ngāue kuo tuku mai ʻe he Tamai Hēvaní kiate kitautolú. Tohi e moʻoni ko ʻení ʻi he palakipoé.

Hili ʻa e ʻekitivitií, poupouʻi e niʻihi ʻe loto-leleí ke nau vahevahe ʻa e meʻa ne nau ako pe ongoʻí mo e kalasí. Te ke lava ʻo fakaafeʻi e kau akó ke nau fakamahinoʻi ha foʻi moʻoni ʻi he palakipoé naʻe hiki ʻe ha kulupu ʻe taha pea vahevahe ʻa e meʻa ne nau ako mei aí. ʻI hono vahevahe ʻe he kau akó ʻa e ngaahi moʻoní, tokoni ke nau tokanga taha kia Sīsū Kalaisi ʻaki hono ʻeke ha ngaahi fehuʻi hangē ko e, “Ko e hā ha ngaahi akonaki pe sīpinga mei he moʻui ʻa e Fakamoʻuí ʻoku tokoni ke mahino lelei ange kiate kitautolu e foʻi moʻoni ko ʻení?”

ʻOku kau ʻi he ngaahi sīpinga ʻo e ngaahi moʻoni ʻe ala tohi ʻe he kau akó ʻa e:

Te tau lava ʻo maʻu ha maluʻi mo ha mālohi mei he ʻOtuá ke fakahoko ʻEne ngāué, ʻi he lotú. (Nehemaia 1:4; 4:9)

ʻE tokoniʻi ʻe he ʻOtuá ʻEne kau tamaioʻeikí ke ikunaʻi ʻa e fakafepaki ke fai ʻEne ngāué. (Nehemaia 4:20)

ʻE tokoniʻi fēfē koe ʻe he meʻa naʻá ke ako ʻi he ʻekitivitī ko ʻení ke ke tokanga taha pē ki he ngāue kuo tuku atu ʻe he ʻOtuá ke ke faí?

Fakaʻaongaʻi fakatāutahá

Fakamatalaʻi ange ki he kau akó naʻe lamasi fakataautaha ʻa Nehemaia ʻe hono ngaahi filí. Naʻa nau feinga ʻi ha ngaahi founga lahi ke taʻofi ia mei hono fakahoko e ngāue ʻa e ʻOtuá ki hono toe langa e ngaahi ʻā ʻo Selusalemá. Ko e founga ʻe taha ko e feinga ke fakataueleʻi ia mei he koló ki ha feituʻu ʻe faingofua ange ai haʻanau fakalaveaʻi ia.

Fakaafeʻi ʻa e kau akó ke nau fakakakato fakalongolongo ʻeni. Mahalo te ke fie ʻoange ha taimi lahi kiate kinautolu pea poupouʻi ke nau fakakaukau ki he founga naʻe mei fekauʻi ai kinautolu ʻe he ʻOtuá ke nau fakakakato ʻa e ngaahi fakamatalá.

Lau ʻa e Nehemaia 6:1–4, 15–16 pea fakalaulauloto ki he meʻa ʻokú ke ako mei he tali ʻa Nehemaia ki he feinga ʻa hono ngaahi filí ke ʻave ia mei he ngāue ʻa e ʻOtuá. (Mahalo te ke fie fakaʻilongaʻi mo fakalaulauloto ki he ʻuhinga ʻo e veesi 3 ʻi hoʻo moʻuí.)

Fakakakato ʻa e ngaahi fakamatala ko ʻení ʻo makatuʻunga ʻi hoʻo moʻuí. Lekooti ho ngaahi fakakaukaú ʻi hoʻo tohinoa akó pe ʻi he tafaʻaki hoʻo folofolá ʻo ofi ki he veesi 3.

ʻOku ou tui ʻoku finangalo ʻa e Tamai Hēvaní ke u tokanga taha ki he .

ʻOku kau ʻi he ngaahi fakahohaʻa pe ngaahi faingataʻa ʻe lava ke u fehangahangai mo iá ʻa e .

Ko e ngaahi founga ʻe niʻihi te u lava ai ʻo tokanga taha ki he ngāue ʻa e Tamai Hēvaní ko e .

Ngaahi Maʻuʻanga Tokoni Kehé

Ko e hā ha ngaahi founga ʻe ala tohoakiʻi ai e tokangá, naʻa mo e kakai leleí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

16:37

ʻOku lahi nai ha ngaahi meʻa fakaʻofoʻofa mo fakafiefia ke fai pe lahi ha ngaahi faingataʻa ʻoku nau ʻohifo koe ʻo faingataʻa ai ke tukutaha e tokangá ʻi he meʻa ʻoku mahuʻingá? ʻI he taimi ʻoku lahi mai ai e ngaahi meʻa ʻo e māmaní, ʻoku faʻa hoko leva e ngaahi meʻa halá ia ko e meʻa mahuʻinga tahá. Pea ʻoku faingofua leva ke ngalo ʻa e tefitoʻi taumuʻa ʻo e moʻuí. ʻOku maʻu ʻe Sētane ha meʻangāue mālohi ke fakaʻaongaʻi ki he kakai leleí. Ko e tohoakiʻi e tokangá. Te ne ʻai ke fakafonu ʻe he kakai leleí ʻenau moʻuí ʻaki e “ngaahi meʻa leleí” koeʻuhí ke ʻoua naʻa ʻi ai ha feituʻu ki he ngaahi meʻa mahuʻingá. Kuo maʻu nai koe ʻi he tauhele ko iá kae ʻikai ke ke ʻilo ki ai? (“First Things First,” Ensign, Mē 2001, 7)

ʻE lava fēfē ke tau fakaʻaongaʻi e sīpinga ʻa Nehemaiá ki heʻetau moʻuí?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

Fakakaukau angé ki he mālohi fakafoʻituitui … ʻoku tau maʻu … kapau te tau tali tatau ki he fakatauele kotoa pē ʻoku fai mai ke ne tohoakiʻi ʻetau tokangá pe tukuhifo ʻetau tuʻunga mahuʻingá—ʻa e tuʻunga mahuʻinga ʻo e ʻOtuá, ʻaki ʻetau pehē ange, “‘Oku ou fai ʻa e ngāue ʻoku lahi, ko ia ʻoku ʻikai te u faʻa ʻalu hifo.”

… ʻOku fekumi [ʻa e ʻEikí] ke ngāue ʻaki ha kakai loto-vilitaki ke nau ngāue ki hono langa hake e puleʻanga ʻo e ʻOtuá—ha niʻihi, ko e taimi ko ia te nau fehangahangai ai mo e fakafepakí pea mo e ʻahiʻahí, te nau pehē loto pē, “‘Oku ou fai ʻa e ngāue ʻoku lahi, ko ia ʻoku ʻikai te u faʻa ʻalu hifo.”

Ko e taimi ʻoku nau fehangahangai ai mo e ʻahiʻahí pea mo e faingataʻá, ʻoku nau tali ʻo pehē, “‘Oku ou fai ʻa e ngāue ʻoku lahi, ko ia ʻoku ʻikai te u faʻa ʻalu hifo.”

Ko e taimi ʻoku nau fepaki ai mo e manukí mo e fakaangá, ʻoku nau tali ʻo pehē, “‘Oku ou fai ʻa e ngāue ʻoku lahi, ko ia ʻoku ʻikai te u faʻa ʻalu hifo.”

‘Oku fekumi ʻetau Tamai Hēvaní kiate kinautolu ʻoku fakafisi ke hanga ʻe he fanga kiʻi meʻa laulaunoá ʻo fakafeʻātungiaʻi ʻenau tulifua ki he taʻengatá. ʻOkú Ne fekumi ki ha kakai ʻoku ʻikai ke nau tuku ke hanga ʻe he faingofua pe ngaahi tauhele ʻa e filí ʻo tohoakiʻi ʻenau tokangá mei he ngāue kuó Ne tuku kiate kinautolu ke fakahokó. ʻOkú Ne fekumi kiate kinautolu ʻoku fenāpasi ʻenau ngāué mo ʻenau leá—ʻa e niʻihi ʻoku nau lea loto fakapapau ʻaki, “ʻOku ou fai ʻa e ngāue ʻoku lahi, ko ia ʻoku ʻikai te u faʻa ʻalu hifo.” …

ʻOku ou lotua neongo ʻa e ngaahi ʻahiʻahí, he ʻikai ʻaupito ke tau teitei tuku hifo ʻa hotau tuʻunga ʻulungāngá; neongo ʻa e fakafilí, pe ko e fē feituʻu te nau haʻu mei aí, ka he ʻikai ngalo ʻiate kitautolu e ngaahi meʻa ʻoku mahuʻinga tahá; pea ngāue fakataha, ʻi he loto-toʻa ke fataki e fuka ʻa e ʻEiki ko Sīsū Kalaisí.

‘Oku ou fakatauange te tau … hiki hake hotau ʻulú ʻo lea ʻaki ʻi he leʻo taʻeufi ki he māmaní ʻo pehē, “Oku tau fai ha ngāue lahi, pea ʻoku ʻikai ke tau faʻa ʻalu hifo.” (“We Are Doing a Great Work and Cannot Come Down,” Liahona, Mē 2009, 59)

Ngaahi ʻEkitivitī Fakalahi ki he Akó

Vakai fakalūkufua ki he tohi ʻa Nehemaiá

Kimuʻa pea kamata ʻe he kau akó ʻa e ʻekitivitī fakakulupu ʻi he konga ʻo e lēsoní ko e “Ngāue ʻa Nehemaiá,”, ʻe ala tokoni ki he kau akó ke nau sio ki ha vakai fakalūkufua nounou ʻo e talanoá. ʻE lava ke fakaʻaongaʻi ha taha ʻo e ongo vitiō ko ʻení ki he meʻá ni.

“We Are Doing a Great Work and Cannot Come Down” mei he taimi 8:36 ki he 11:54. Ko e vakai fakalūkufua ʻa Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, kia Nehemaiá.

18:37

“Nehemaia” (1:38) ʻi he Ngaahi Talanoa ʻo e Fuakava Motuʻá maʻá e Fānaú.

1:38

Ko e ngaahi tuʻunga moʻui ʻo e ʻOtuá

ʻE ala tokoni ki he kau akó ke nau vakai ki he founga ʻoku fakaʻaongaʻi ai e sīpinga ʻa Nehemaiá ki ha ngaahi fekau mo ha ngaahi tuʻunga moʻui pau kuo ueʻi fakalaumālie ʻe he ʻOtuá ʻa e kau taki ʻo e Siasí ke ʻomi kiate kitautolu. Te ke lava ʻo kole ki he kau akó ke nau lisi ha niʻihi ʻo e ngaahi fekau mo e ngaahi tuʻunga moʻui kuo tuku mai ʻe he ʻOtuá kiate kitautolu. Kole leva ki he kau akó ke vahevahe ha ngaahi founga kehekehe ʻe lava ke ʻahiʻahiʻi ai kitautolu ke holoki māmālie ʻa e ngaahi tuʻunga moʻui ko iá. Fakaafeʻi e kau akó ke fakaʻaongaʻi e tali ʻa Nehemaia ki he ʻahiʻahi ʻa Sanipalate mo Kesemí (vakai, Nehemaia 6:3–4) ki ha ngaahi tūkunga fakaonopooni ʻe ʻahiʻahiʻi ai kinautolu ke nau “ʻalu hifo” mei he ngaahi fekau mo e tuʻunga moʻui ʻa e ʻOtuá.

Te ke lava foki ʻo fakaafeʻi e kau akó ke nau fakafehoanaki e tuʻu taʻeueʻia ʻa Nehemaia ʻi heʻene fakafisi ke ʻalu hifó ki he fakamatala ʻa Lehonitai ʻi he ʻAlamā 47:1–18. Naʻe matuʻaki fakafepakiʻi mālohi foki ʻe Lehonitai e ngaahi fakaʻaiʻai ʻa ʻAmalekaia ke ne ʻalu hifo mei he malú ʻi he ngaahi fuofua taimí. Ka naʻe ʻikai ke ne hangē ko Nehemaiá, he naʻe faifai pē pea tukulolo ʻa Lehonitai ki he ʻahiʻahí ʻo ne ʻalu hifo pea iku ʻo fakapoongi ai ia.

Nehemaia 6:3. “ʻOku ou fai ʻa e ngāue lahi, ko ia ʻoku ʻikai te u faʻa ʻalu hifo”

Hili hono lau ʻe he kau akó ʻa e Nehemaia 6:1–4, 15–16, kae kimuʻa pea nau fakakakato ʻa e ngaahi fakamatala ʻi he konga “Fakaʻaongaʻi fakataautaha” ʻo e lēsoní, fakakaukau ke fakaʻaliʻali e fakamatala ʻa Palesiteni ʻUkitofa mei he konga “Ngaahi Maʻuʻanga Tokoni Kehé”. ʻE lava ke ʻoange heni ki he kau akó ha ngaahi fakakaukau ki he founga ʻe lava ke fakaʻaongaʻi ai e sīpinga mo e ngaahi lea ʻa Nehemaiá ki heʻenau moʻuí.