Նեեմիա

Կարող եք սկսել դասը՝ օգնելով ուսանողներին ճանաչել այն բաները, որոնք կարող են իրենց ուշադրությունը շեղել Աստծո աշխատանքից: Դա անելու համար կարող եք ցուցադրել «Doing What Matters Most» (1:42) տեսանյութը, որը հասանելի է ChurchofJesusChrist.org։ Կամ կարող եք կիսվել հետևյալ պարբերությունում պարունակվող տեղեկություններով և ցուցադրել Առաջին նախագահության նախկին անդամ նախագահ Դիտեր Ֆ. Ուխդորֆի ստորև բերված խոսքերը։

1:42

Տարիներ առաջ, երբ օդաչուները պատրաստվում էին ինքնաթիռով վայրէջք կատարել, օդաչուների խցիկում մի փոքրիկ լամպ չվառվեց։ Անձնակազմն այնքան էր կենտրոնացել այդ լամպի վրա, որ չէր նկատել, որ ինքնաթիռն իջնում է դեպի ճահիճ: Ինքնաթիռը կործանվեց, ավելի քան 100 մարդ զոհվեց։

Առաջին նախագահության նախկին անդամ նախագահ Դիտեր Ֆ. Ուխդորֆն ուսուցանել է մի կարևոր դաս, որը կարող ենք քաղել այս ողբերգությունից․

Օդանավը տեխնիկապես սարքին վիճակում էր: Ամեն ինչ աշխատում էր ինչպես հարկն է, բացի մի բանից. լույսի լամպերից մեկը վառվել էր: Այդ փոքրիկ լամպը՝ մոտ 20 ցենտ արժողությամբ, սկիզբ դրեց այն բոլոր իրադարձություններին, որոնք, ի վերջո, հանգեցրին ավելի քան 100 մարդկային զոհերի:

Իհարկե, վատ աշխատող լույսի լամպը չէր վթարի պատճառը: Վթարը տեղի ունեցավ, որովհետև անձնակազմը կենտրոնացավ մի բանի վրա, ինչն այդ պահին թվում էր կարևոր, սակայն կորցրեց տեսադաշտից այն, ինչն առավել կարևոր էր:

Այդ միտումը՝ կենտրոնանալ աննշան բանի վրա ավելի կարևորի հաշվին, բնորոշ է ոչ միայն օդաչուներին, այլև՝ բոլորին: Մենք բոլորս այդ վտանգի առաջ ենք: («We Are Doing a Great Work and Cannot Come Down», Լիահոնա, մայիս 2009, 59)

Նախագահ Ուխդորֆը շարունակում է.

Մի պահ դադար առեք և մտածեք, թե որտեղ են ձեր սիրտն ու մտքերը: Արդյո՞ք դուք կենտրոնանում եք ամենակարևոր բաների վրա: Այն, թե ինչպես եք անցկացնում ձեր ազատ ժամանակը, կարող է արժեքավոր հուշում լինել: Ո՞ւր են գնում ձեր մտքերը, երբ վերջնաժամկետների ճնշումը վերանում է: Արդյո՞ք ձեր մտքերը և սիրտը կենտրոնացած են կարճատև անցողիկ բաների վրա, որոնք նշանակություն ունեն միայն այդ պահին, թե՞ այն բաների վրա, որոնք առավել կարևոր են: («We Are Doing a Great Work and Cannot Come Down», Լիահոնա, մայիս 2009, 60)

1. Կարդացեք Նեեմիա 1․1–4, 2․1–6, 11–12, 17–18 հատվածները։ Փնտրեք և քննարկեք ապացույցներ, որ Երուսաղեմի պարիսպները վերակառուցելու Նեեմիայի ցանկությունը Աստծուց էր ոգեշնչված։

2. Դատարկ թղթի վրա գրեք երեք բան, որոնց վրա Աստված պատվիրել է Վերջին Օրերի պատանի Սրբերին կենտրոնանալ՝ Իր մարգարեների միջոցով: Դա անելու եղանակներից մեկը վերջին գերագույն համաժողովի ելույթների համառոտ վերանայումն է:

   Այնուհետև փոխանակեք թղթերը մեկ այլ խմբի հետ և ձեր խմբի հետ քննարկեք, թե ինչ են գրել մյուս խմբի անդամները: (Նշում․ Պահպանեք մյուս խմբի թուղթը: Այս վարժության չորրորդ քայլում դուք պետք է ավելացնեք ձեր մտքերը այդ թղթում գրվածին։)

3. Կարդացեք Նեեմիա 2․19, 4․1, 7–8 հատվածները՝ փնտրելով, թե հրեաների թշնամիներն ինչպես արձագանքեցին այն աշխատանքին, որ Աստված տվել էր հրեաներին։ Քննարկեք, թե ինչպես է Սատանան այսօր օգտագործում նման մարտավարություններ, որպեսզի մեր ուշադրությունը շեղվի այն ամենից, ինչ Աստված պատվիրում է մեզ անել:

4. Մյուս խմբի թղթի վրա գրված երեք կետերից յուրաքանչյուրի կողքին գրեք մի շեղող հանգամանք կամ խնդիր, որը կարող է դժվարացնել դեռահասի կենտրոնացումն այն աշխատանքի վրա, որը Աստված տվել է նրան՝ Իր մարգարեների միջոցով:

5. Կարդացեք Նեեմիա 4․9, 14–20 հատվածները և քննարկեք, թե ինչ եք սովորում Նեեմիայի ժողովրդից՝ շեղող հանգամանքները և դժվարությունները հաղթահարելու վերաբերյալ՝ Երկնային Հոր կողմից մեզ տրված աշխատանքը իրականացնելիս:

6. Թուղթը վերադարձրեք սկզբնական խմբին: Կարդացեք և քննարկեք այն շեղող հանգամանքները և դժվարությունները, որոնք մյուս խումբն ավելացրել է ձեր թղթում: Քննարկեք գաղափարներ, թե ինչպես կարող է մարդը հաղթահարել դրանք և մնալ կենտրոնացած այն աշխատանքի վրա, որն Աստված տվել է դեռահասներին՝ Իր մարգարեների միջոցով:

7. Մեկ նախադասությամբ ամփոփեք այն, ինչ սովորեցիք կամ զգացիք Երկնային Հոր կողմից մեզ տրված աշխատանքը կատարելու վերաբերյալ: Այդ ճշմարտությունը գրեք գրատախտակին։

• Այս վարժության ընթացքում ձեր սովորածն ինչպե՞ս կարող է օգնել ձեզ կենտրոնացած մնալ Աստծո կողմից ձեզ տրված աշխատանքի վրա։

«The Soul’s Sincere Desire» (3:28) տեսանյութը, որը հասանելի է ChurchofJesusChrist.org կայքում, կօգնի ուսանողներին տեսնել և քննարկել, թե ինչպես նույնիսկ լավ բաները կարող են շեղել ուշադրությունը Աստծո կողմից մեզ տրված ավելի կարևոր աշխատանքից:

3:29

Կարդացեք Նեեմիա 6․1–4, 15–16 հատվածները և խորհեք, թե ինչ եք սովորում Նեեմիայի պատասխանից իր թշնամիների փորձերին՝ շեղելու իրեն Աստծո աշխատանքից: (Կարող եք նշել և խորհել, թե ինչ կարող է նշանակել հատված 3-ը ձեր կյանքում։)

Ավարտեք հետևյալ արտահայտությունները՝ հիմնվելով ձեր կյանքի վրա։ Գրեք ձեր մտքերը ձեր ուսումնական օրագրում կամ ձեր սուրբ գրությունների լուսանցքում՝ հատված 3-ի կողքին:

Ես կարծում եմ, որ Երկնային Հայրը կցանկանար, որ ես կենտրոնանամ վրա։

Հնարավոր շեղող հանգամանքները կամ դժվարությունները, որոնց ես կարող եմ բախվել, հետևյալն են․ ։

Եղանակները, որոնցով ես կարող եմ կենտրոնացած մնալ Երկնային Հոր աշխատանքի վրա, հետևյալն են․ ։