Seminary
Esdras: Pagpangandam sa Pagtambong sa Balay sa Ginoo

“Esdras: Pagpangandam sa Pagtambong sa Balay sa Ginoo,” Manwal sa Magtutudlo sa Seminary sa Daang Tugon (2026)

“Esdras: Pagpangandam sa Pagtambong sa Balay sa Ginoo,” Manwal sa Magtutudlo sa Seminary sa Daang Tugon

Esdras 1; 3–7; Nehemias 2; 4–6; 8: Leksiyon 92

Esdras

Pagpangandam sa Pagtambong sa Balay sa Ginoo

Meridian Idaho Temple-Sunrise

Ang lebel sa atong pagpangandam para sa importanteng mga panghitabo sa atong kinabuhi dakog epekto sa atong kasinatian. Daghang Israelinhon ang nakasinati og dakong hingpit nga kalipay human sa pila ka tuig nga pisikal ug espirituwal nga pagpangandam sa pagtukod pag-usab ug pagsimba diha sa templo sa Dios. Gipanalanginan usab kita og mga kahigayonan sa atong Langitnong Amahan ug Manluluwas nga masinati ang hingpit nga kalipay pinaagi sa pagsimba diha sa balay sa Ginoo. Ang atong mga paningkamot sa pagpangandam alang sa maong panalangin makaapektar sa atong kasinatian. Kini nga leksiyon makatabang sa mga estudyante nga mobati og dakong tinguha sa pagpangandam aron simbahon ang Ginoo diha sa Iyang balaang templo.

Pagpangandam sa estudyante: Dapita ang mga estudyante nga ilista ang mubo og tagal ug taas og tagal nga mga butang nga ilang mabuhat aron makapangandam sa pagsimba sa Ginoo diha sa templo. Dayon, pwede nilang ikonsiderar kon sa unsang paagi ang ilang pagpangandam makaapektar sa ilang kasinatian sa templo.

Posibleng mga Kalihokan sa Pagkat-on

Mahinamon nga moadto sa templo

Pwede nimong sugdan ang klase pinaagi sa pagdapit sa mga estudyante nga isulat sa pisara ang pipila ka panghitabo sa umaabot nga sila naghinamhinam nga makasinati. Ang mga ehemplo naglakip sa gradwasyon, kasal, ug mga karera. Ang mga estudyante pweden dayon nga mopili og usa ka panghitabo diha sa pisara ug ipakigbahin sa usa ka pares ang usa o duha ka butang nga himoon sa usa ka tawo aron mangandam sa maong panghitabo.

Ikonsiderar ang pagpakita sa mosunod nga imahe sa templo sa Salt Lake dihang andam na kining ipahinungod sa mga tuig 1890.

Dedication of the Salt Lake Temple.

Basaha ang mosunod nga pamahayag gikan ni Presidente Wilford Woodruff (1807–98), nga pangitaon ang usa ka butang nga iyang gipangandaman ug mahinamon sulod sa daghang tuig.

[Sa pagpahinungod sa templo sa Salt Lake], si Presidente Wilford Woodruff dayon mibarog aron mamulong sa mga Santos. “Ako nagpaabut niining adlaw sulod sa miaging singkwenta ka tuig sa akong kinabuhi,” siya miingon. (Mga Santos: Ang Istorya sa Simbahan ni Jesukristo sa Ulahing mga Adlaw, vol. 2, Bulahang Kalinaw, 1846–1893 [2020], 823)

  • Unsay nahibaloan nimo bahin sa mga templo nga mao tingali ang nakapahinam ni Wilford Woodruff nga mahuman ang templo sa Salt Lake?

    Kon wala maghisgot ang mga estudyante sa Dios sa ilang tubag sa nag-unang pangutana, pwede nimo silang tabangan nga makita ang maong koneksyon pinaagi sa pagpangutana sama sa, “Unsay inyong nakitang koneksyon sa pagtambong sa templo ug sa atong relasyon sa Langitnong Amahan ug kang Jesukristo?”

    Dapita ang mga estudyante nga isulat ang ilang mga nahunahunaan bahin sa mosunod nga mga pangutana diha sa ilang journal sa pagtuon. Pwede nimong ipatin-aw nga ang paggahin og panahon sa pagpamalandong sa atong mga pagbati ug mga kasinatian sa kasamtangan makatabang aron makapangandam kita sa pagkat-on gikan sa Espiritu Santo.

  • Unsay akong mga pagbati samtang nangandam ko sa pagtambong sa templo sa umaabot?

  • Unsay akong gihimo aron sa pag-andam sa akong kaugalingon sa pagsimba sa Ginoo diha sa Iyang balay?

Hingpit nga kalipay sa pagserbisyo sa templo

Sa mga 605 BC, gisakop sa mga Taga-Babelonia ang Jerusalem ug gidala ang binihag nga mga Judeo ngadto sa Babelonia. Niadtong 587 BC, ilang giguba ang templo, ug mas daghan pang binihag ang gidala. Mga 50 ka tuig ang milabay, gisakop sa Persia ang Babelonia ilawom sa pagdumala ni Hari Ciro.

Kon nahinundom ang mga estudyante bahin sa gipahibalo nga templo diha sa ilang lugar, pwede nimo silang pahinumdoman sa kasinatian samtang ilang basahon ang mosunod nga mga bersikulo. O pwede nimong hangyoon ang mga estudyante nga handurawon ang ilang pagbati kon naay ipahibalo nga templo diha sa ilang lugar.

Basaha ang Esdras 1:1–3, nga pangitaon kon unsay gidasig sa Dios nga himoon ni Hari Ciro.

  • Sa imong hunahuna unsa kahay mga gihunahuna ug mga pagbati sa mga Judeo? Ngano man?

Wala madugay, mga 50,000 ka Judeo ang mibalik sa Jerusalem aron tukoron pag-usab ang templo ilawom sa pagdumala ni Zerubabel (tan-awa ang Esdras 2:1–2, 64–65). Ingon nga katumanan sa panagna (tan-awa sa Isaias 44:28; Jeremias 29:10), natukod pag-usab ang templo mga 70 ka tuig human kini gilumpag.

Basaha ang Esdras 6:15–16, 22 ug markahi ang gibati sa mga Judeo dihang napahinungod na gyod ang templo human sa daghang tuig nga paghago ug espiritwal nga pagpangandam.

Samtang padayong tun-an sa mga estudyante ang asoy ni Esdras, dapita sila nga bantayan ang mga ebidensiya niini nga kamatuoran: Samtang mangandam kita sa pagsimba sa Ginoo diha sa templo, panalanginan kita Niya og hingpit nga kalipay Pwede nimong isulat kini nga kamatuoran diha sa pisara.

Tabangi ang mga estudyante nga masabtan ang epekto niini nga kamatuoran diha sa kinabuhi sa usa ka tin-edyer. Usa ka paagi sa paghimo niini mao ang pagdapit sa klase nga mubong ihulagway ang duha ka tin-edyer: ang usa igo lang motambong sa templo ug ang lain mangandam sa pagsimba sa Ginoo diha sa templo.

Sa dila pa ipangutana ang mosunod, pwede nimong dapiton ang mga estudyante pagpamalandong sa ilang mga kasinatian sa pagpangandam, o pagtambong, sa templo.

  • Sa unsang paagi magdala og hingpit nga kalipay ang pagsimba sa Ginoo diha sa templo?

Aron hatagan ang mga estudyante og ehemplo kon sa unsang paagi magdala og hingpit nga kalipay ang pagsimba sa Ginoo diha sa templo, ikonsiderar ang pagtan-aw sa kasinatian ni Elder Kevin R. Duncan sa Seventy diha sa “Hearts, Love, and the Temple,” nga anaa sa byui.edu/devotionals gikan sa time code 21:46 hangtod 24:05.

Human sa bidyo, pwede nimong dapiton ang mga estudyante nga ipakigbahin kon sa unsang paagi malig-on ang atong relasyon sa Langitnong Amahan ug kang Jesukristo pinaagi sa pagsimba diha sa templo.

Pagpangandam sa pagtambong sa templo

Ang mosunod nga pamahayag motabang sa mga estudyante sa pagkonektar sa ilang nakat-onan gikan sa pagtukod sa mga Judeo sa templo sa Jerusalem ngadto sa kaugalingon nilang pagpangandam aron mosimba diha sa templo. Pwedeng isulat o ikonektar sa mga estudyante ang pamahayag diha sa ilang mga kasulatan, tupad sa Esdras 6:15–16.

Si Presidente Russell M. Nelson mitudlo:

Official portrait of President Russell M. Nelson taken January 2018

Sa ubang paagi, mas sayon ang pagtukod og templo kay sa pag-ugmad og katawhan nga andam alang sa templo. (“Panapos nga Pakigpulong,” Liahona, Nob. 2019, 122–23)

Dapita ang mga estudyante sa pagpakigbahin sa mga rason kon nganong mas sayon ang pagtukod og templo kay sa pagpangandam sa pagsimba sa Ginoo diha sa templo.

Makakat-on kita bahin sa pagpangadam sa pagsimba sa Ginoo diha sa templo pinaagi sa pagtuon sa kasinatian sa mga Judeo sa pagtukod pag-usab sa templo sa Jerusalem.

icon sa seminaryAng kauban sa handout makatabang aron mapangita ang mas dakong kalabotan sa basahon sa Esdras diha sa ilang mga kinabuhi pinaagi sa pagtandi sa mga paningkamot sa mga Judeo nga tukoron ang templo ngadto sa atong mga pagpangandam sa pagsimba sa Ginoo diha sa Iyang mga templo.

Pwedeng kompletohon sa mga estudyante ang handout uban sa gagmay nga mga grupo. Aron mahimo kini, pwedeng kompletohon sa kada sakop sa grupo ang usa o duha ka seksiyon sa handout. Dayon pwede nilang ipakigbahin ang ilang nakat-onan ngadto sa ilang grupo.

Ang laing paagi, mahimo nimong tungaon ang handout ngadto sa mga seksiyon ug ibutang kini sa tibuok lawak klasehan. Pwedeng liboton sa grupo sa mga estudyante ang lawak klasehan ug kompletohon ang kada seksiyon sa handout, nga tubagon ang mga pangutana diha sa ilang journal sa pagtuon.

Human makompleto sa mga estudyante ang handout, seguroa nga naa silay panahon nga hisgotan ang mga punto nga mipatigbabaw kanila.

Ikonsiderar ang pagpakita sa mosunod nga mga pangutana. Paghimo og tulo ka kolum diha sa pisara nga nag-ulohan og “1,” “2,” ug “3.” Dapita ang mga estudyante nga isulat ang ilang ngalan sa kolum ilawom sa numero sa pangutana nga gusto nilang tubagon. Pagdapit og mga boluntaryo gikan sa kada kolum nga mopakigbahin sa ilang tubag ngadto sa klase.

  1. Para nimo sa unsang paagi ang pagpangandam sa pagtambong sa balay sa Ginoo motabang nato nga mobati og hingpit nga kalipay samtang nagtambong kita sa templo?

  2. Sa unsang paagi ka gipanalanginan sa Ginooog hingpit nga kalipay samtang mitambong ka sa templo?

  3. Unsay imong nahibaloan bahin sa Langitnong Amahan ug kang Jesukristo nga modasig nimo sa pagpangandam sa pagtambong sa Ilang balaang balay?

Ikonsiderar ang pagpakigbahin sa imong pagsaksi sa hingpit nga kalipay nga atong madawat gikan sa Ginoo dihang atong andamon ang atong kaugalingon sa pagsimba Niya diha sa templo.