Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

2 Fakamatala Meʻa Hokohoko 17–20: Ko Hono Kumi ʻo e Ngaahi Tefitoʻi Moʻoní ʻi he Folofolá

“2 Fakamatala Meʻa Hokohoko 17–20: Ko Hono Kumi ʻo e Ngaahi Tefitoʻi Moʻoní ʻi he Folofolá,” Fuakava Motuʻá – Tohi Lēsoni ʻa e Faiako Seminelí (2026)

“2 Fakamatala Meʻa Hokohoko 17–20: Ko Hono Kumi ʻo e Ngaahi Tefitoʻi Moʻoní ʻi he Folofolá,” Fuakava Motuʻá – Tohi Lēsoni ʻa e Faiako Seminelí

2 Fakamatala Meʻa Hokohoko 14–20; 26; 30: Lēsoni 91

2 Fakamatala Meʻa Hokohoko 17–20

Ko Hono Kumi ʻo e Ngaahi Tefitoʻi Moʻoní ʻi he Folofolá

ʻOkú ke fifili nai pe ko e hā ha meʻa te ke lava ʻo fai ke ke ofi ange ai kia Sīsū Kalaisí? Naʻe hoko ʻa e tuʻi ko Sihosafaté ʻi he Fuakava Motuʻá ko ha sīpinga maʻongoʻonga ʻo hono fai ʻo e meʻa pē ko iá. Naʻe mavahe hono kakaí mei he ʻOtuá pea naʻa nau kau ʻi he lotu tamapuá. Naʻe fili ʻa Sihosafate ke muimui kia Sihova mo tokoniʻi hono kakaí ke nau fai ʻa e meʻa tatau. ʻE lava ke tokoni ʻa e lēsoni ko ʻení ke ʻiloʻi ʻe he kau akó ʻa e ngaahi tefitoʻi moʻoni ʻo e ongoongoleleí mei he folofolá.

Teuteu ʻa e tokotaha akó: ʻE lava ke ke fakaafeʻi e kau akó ke fakakaukau ki he meʻa ʻoku nau ako ʻi heʻenau ako folofola fakatāutahá mo fakafāmilí. Te nau lava ʻo omi mateuteu ki he kalasí ke vahevahe ha tefitoʻi moʻoni naʻa nau maʻu mo e founga ʻoku tokoni ai kiate kinautolú.

Ngaahi ʻEkitivitī Ako ʻOku Ala Fakahokó

Ngaahi fakamaʻunga ʻoku malú

Fakaʻaliʻali e fakatātā ko ʻeni ʻo ha taha ʻoku kaka moʻunga.

Kapau te ke kaka ʻi ha lilifa, ko e hā e meʻangāue te ke fiemaʻú?
Ko e hā ʻoku mahuʻinga ai e meʻangāue ko ʻení?
Kapau te tau fakafehoanaki ʻetau moʻuí ki he kaka ʻi ha lilifá, ko e hā ha meʻa kuo foaki atu ʻe he ʻEikí ke tokoniʻi koe ke malu ho lavameʻá?

Mahalo ʻe vahevahe ʻe he kau akó ha ngaahi tali kehekehe. ʻI heʻenau fai iá, fakamālō ange ʻi heʻenau ngaahi talí, pea fehuʻi ange pe ko e hā e ʻuhinga ka tokoni ai e ngaahi meʻa ko ʻení. Ko e tali ko ʻení ko e tefito ia ʻo e lēsoni ko ʻení.

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE lava ke ta fakapapauʻi ʻeta aʻusia ha ngaahi taumuʻa mahuʻinga ʻi he moʻuí ʻaki e mahino mo e muimui maʻu pē ki he ngaahi tefitoʻi moʻoni totonu ʻoku makatuʻunga ʻi he moʻoni kuo fakahā maí.

Ko e ngaahi tefitoʻi moʻoní ko ha fakamaʻunga ia ʻoku malu. ʻOku nau hangē ko e ngaahi fakamaʻunga ukamea ʻoku fakaʻaongaʻi ʻe ha taha kaka moʻunga ke lavaʻi e ngaahi lilifa ne mei faingataʻá. Te nau tokoniʻi koe ke ke maʻu ha loto-falala ʻi he ngaahi tūkunga foʻou mo ʻikai angamahení. Te nau ʻoatu ha maluʻi ʻi he ngaahi matangi faingataʻa ʻo e moʻuí. (“The Power of Correct Principles,” Ensign, May 1993, 32)

Ko e taha ʻo e ngaahi founga kuo foaki mai ai ʻe he Tamai Hēvaní ʻi he ʻofa ʻa e ngaahi tefitoʻi moʻoni ʻoku moʻoní, ʻoku fakafou ia ʻi he folofolá. ʻI heʻetau ako ʻa e folofolá, ʻoku tau feinga ke ʻiloʻi ʻa e ngaahi tefitoʻi moʻoni pe ngaahi fakamatala ko ʻeni ʻo e moʻoní ʻa ia ʻe lava ʻo tokoni kiate kitautolu ʻi heʻetau moʻuí.

ʻE ala tokoni ke fakakaukau ʻa e kau akó ki honau tuʻunga malava lolotonga ke ʻiloʻi ʻa e ngaahi tefitoʻi moʻoni ʻi he folofolá. Ko ha founga ʻeni ʻe taha ke fakahoko ai ʻeni.

Tuku ha kiʻi taimi ke ke fakalaulauloto ai ki he ongo fehuʻi ko ʻení:

Ko e hā e lahi ʻeku loto-falala ki hoku tuʻunga malava ke ʻiloʻi ʻa e ngaahi tefitoʻi moʻoní?
ʻOku mahino fēfē kiate au ʻa e founga ʻe lava ke tokoniʻi ai au ʻe he ngaahi tefitoʻi moʻoní ʻi heʻeku moʻuí?

ʻI hoʻo ako e lēsoni ko ʻeni ki he moʻui ʻa Sihosafaté, fekumi ki he tokoni ʻa e Laumālie Māʻoniʻoní ke ʻiloʻi ʻa e ngaahi tefitoʻi moʻoni totonu ʻe lava ʻo tokoni atu kiate koé.

Ngaahi tefitoʻi moʻoni mei he moʻui ʻa Sihosafaté

Hili e pekia e tamai ʻa Sihosafaté, naʻá ne hoko leva ko e tuʻi ʻo Siutá. Naʻe fakatou hē atu ʻa ʻIsileli mo Siuta mei he ʻEiki ko Sīsū Kalaisí. Naʻa nau lotu ki ha ngaahi ʻotua loi.

Lau ʻa e 2 Fakamatala Meʻa Hokohoko 17:3–4; 19:4, pea sio pe ko e hā e meʻa ʻokú ke ako fekauʻaki mo Sihosafaté. (Fakatokangaʻi ange: ʻOku ʻuhinga ʻa Pealí ki he ngaahi ʻotua loí.)

Ko e hā ha meʻa ‘okú ke mālieʻia ai fekauʻaki mo Sihosafaté?

ʻI he taimi naʻe pule ai ʻa Sihosafaté, naʻe hē hono kakaí mei he moʻoní. Naʻe fai ʻe Sehosafate ha ngaahi ngāue lahi ʻi hono puleʻangá kotoa ke tokoniʻi hono kakaí ke nau muimui kia Sihova (Sīsū Kalaisi). Lolotonga e taimi ko ʻení, naʻe haʻu e ngaahi fili ʻo Sihosafaté ke tau mo hono kakaí. ʻOku fakatātaaʻi ʻe he meʻa naʻe hoko ʻi he ngaahi tūkunga ko ʻení ha ngaahi tefitoʻi moʻoni kehekehe.

Fakakaukau ke fakamatalaʻi ʻa e taukei fakaako ko ʻení ke ʻiloʻi ʻa e ngaahi tefitoʻi moʻoní.

Ko e founga ʻe taha ke ʻiloʻi ai ha tefitoʻi moʻoni ko e fekumi ki he founga ʻoku fekauʻaki ai ha meʻa ʻe ua. Hangē ko ʻení: koeʻuhí ko A, ʻoku hoko leva ʻa E. Pe, koeʻuhí ʻoku fai ʻe ha taha ʻa e A, ʻoku talaʻofa pe foaki ʻe he ʻEikí ʻa E.

Lau e ngaahi veesi ko ʻení mo e kalasí ke ʻoange ki he kau akó ha faingamālie ke akoako fakaʻaongaʻi ʻa e taukeí.

Lau ʻa e 2 Fakamatala Meʻa Hokohoko 17:6 mo e 19:3, ʻo kumi e ngaahi tefitoʻi moʻoni ʻi he moʻui ʻa Sihosafaté. (Fakatokangaʻi ange: ko e ngaahi feituʻu māʻolungá mo e ngaahi vao tapú ko ha ngaahi feituʻu ia ke moihū ai ki he ngaahi ʻotua loí.)

ʻE lava ke kau ʻi he ngaahi tefitoʻi moʻoni ʻe ala ʻiloʻi ʻe he kau akó ʻa e:

ʻI he tokanga taha ʻetau moʻuí ki he ʻOtuá, te tau lava lelei ange ʻo toʻo ʻa e koví mei heʻetau moʻuí (vakai, 2 Fakamatala Meʻa Hokohoko 17:6).
ʻI heʻetau toʻo ʻa e koví mei heʻetau moʻuí, ʻoku tau mateuteu ange ai ke fekumi ki he ʻOtuá (vakai, 2 Fakamatala Meʻa Hokohoko 19:3).

Ko e hā e ʻuhinga ʻoku ʻaonga ai ʻa e ngaahi tefitoʻi moʻoni ko ʻení?

Hili hono ʻiloʻi mo e kalasí ha ngaahi tefitoʻi moʻoni mei he ngaahi veesi kimuʻá, fakaafeʻi e kau akó ke nau akoako feinga ke ʻiloʻi ha ngaahi tefitoʻi moʻoni ʻi ha fanga kiʻi kulupu iiki pe ʻiate kinautolu pē. ʻAi ke nau fakaʻaongaʻi e ngaahi veesi ko ʻení.

Lau ʻa e 2 Fakamatala Meʻa Hokohoko 20:1–9, 14–17, 20–22, ʻo kumi ha toe ngaahi tefitoʻi moʻoni kehe.

ʻE lava ke kau ʻi he ngaahi tefitoʻi moʻoni ʻe ala ʻiloʻi ʻe he kau akó ʻa e:

ʻI heʻetau ʻaukai mo lotua ha fakahaofí, ʻe ʻiate kitautolu ʻa e ʻEikí ʻi hotau ngaahi faingataʻaʻiá (vakai, 2 Fakamatala Meʻa Hokohoko 20:1–4, 14–17).
ʻI heʻetau fekumi ki he ʻEikí ʻi Hono temipalé, te Ne fanongo mo tokoniʻi kitautolu (vakai, 2 Fakamatala Meʻa Hokohoko 20:9).
ʻI heʻetau tui ki he ʻEikí mo ʻEne kau palōfitá, te tau tuʻumālie (vakai, 2 Fakamatala Meʻa Hokohoko 20:20).
ʻI heʻetau hū ki he ʻEikí ʻo fakafou ʻi he mūsiká, te Ne tāpuakiʻi kitautolu (vakai, 2 Fakamatala Meʻa Hokohoko 20:21–22).

Kapau ʻoku faingataʻa ke ʻiloʻi ʻe he kau akó ʻa e ngaahi tefitoʻi moʻoní, fakakaukau ke hiki ha niʻihi pe kotoa ʻo e ngaahi tefitoʻi moʻoní ʻi ʻolunga ʻi he palakipoé. Fakaafeʻi e kau akó ke feinga ke ʻiloʻi pe ko e fē ʻi he ngaahi veesi ne nau akó ʻokú ne akoʻi ʻa e tefitoʻi moʻoni takitaha.

Ko e mahino ʻa e ngaahi tefitoʻi moʻoní

ʻI he ʻekitivitī ko ʻení, ʻe lava ke fakaʻaongaʻi ʻe he kau akó ha taha ʻo e ngaahi tefitoʻi moʻoni ʻi ʻolungá, pe te nau lava ʻo fakaʻaongaʻi ha tefitoʻi moʻoni naʻa nau toki ako kimuí ni ʻi heʻenau ako fakatāutahá pe fakafāmilí.

Fili ha tefitoʻi moʻoni ʻokú ke fie ako lahi ange ki ai. Teuteu ha lea miniti ʻe ua ʻi he foʻi moʻoni ko ʻení ʻa ia ʻoku kau ai ʻa e ngaahi meʻá ni:

Ko ha veesi pe ngaahi veesi naʻá ke lau ʻi he 2 Fakamatala Meʻa Hokohokó fekauʻaki mo e tefitoʻi moʻoni ko ʻení, pea mo e ʻuhinga naʻá ke fili ai iá
Ngaahi potufolofola kehe pe ngaahi lea ʻa e kau palōfitá ʻe tokoni ke mahino kiate koe ʻa e tefitoʻi moʻoni ko ʻení
Ko ha taimi naʻe fakafōtunga ai ʻe he Fakamoʻuí pe ko ha taha kehe ʻi he folofolá pe hisitōlia ʻo e Siasí ʻa e tefitoʻi moʻoni ko ʻení
Ngaahi founga ʻokú ke ongoʻi ai ʻe lava ke tokoniʻi pe maluʻi kitautolu ʻe he tefitoʻi moʻoni ko ʻeni mei he ʻEikí
Ko ha aʻusia ʻi he taimi naʻá ke ngāue ai pe ko ha taha ʻokú ke ʻilo, ʻo fakatatau mo e tefitoʻi moʻoni ko ʻení, pea mo ha faʻahinga tāpuaki pē mei he ʻEikí naʻe maʻu mei ai

ʻE lava ke vahevahe ʻe he kau akó ʻenau ngaahi leá mo hanau hoa pe ʻi ha fanga kiʻi kulupu iiki. Pe ko hoʻo fakaafeʻi ha niʻihi ʻo e kau akó naʻa nau ako ha ngaahi tefitoʻi moʻoni kehekehe, ke vahevahe ʻenau leá mo e kalasí. ʻI he vahaʻa ʻo e lea ʻa e tokotaha ako takitaha, te ke lava ʻo fakaafeʻi e kalasí ke vahevahe ha faʻahinga fakamatala pe fehuʻi ʻoku nau maʻu fekauʻaki mo e tefitoʻi moʻoni naʻe vahevahe ʻe he tokotaha akó.

Fakapapauʻi ke ʻoange ha taimi feʻunga ki he kau akó ke nau teuteu mo vahevahe ʻenau lea miniti ʻe uá.
Mei he meʻa naʻá ke ako he ʻaho ní, ko e hā e ʻuhinga ʻoku ʻaonga ai ke feinga ke kumi e ngaahi tefitoʻi moʻoni kuo foaki mai ʻe he ʻEikí ʻi he folofolá?
Te ke fakaʻaongaʻi fēfē nai ʻa e meʻa naʻá ke ako he ʻaho ní ʻi ho fāmilí mo e ako fakatāutahá?

Ngaahi Maʻuʻanga Tokoni Kehé

Ko e hā ʻa e tefitoʻi moʻoni?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻá ne fakamatalaʻi mahino, ko e tefitoʻi moʻoni ʻo e ongoongoleleí ko ha fakahinohino fakatokāteline ia ki hono ngāue totonu ʻaki ʻo e tauʻatāina ke filí. ʻOku tupu e ngaahi tefitoʻi moʻoní mei ha ngaahi moʻoni loloto ange ʻo e ongoongoleleí pea ʻokú ne ʻomi ha fakahinohino mo ha ngaahi tuʻunga moʻui pau ʻi heʻetau vivili atu ki muʻa ʻi he hala ʻo e fuakavá. (“Ko e Ngaahi Tefitoʻi Moʻoni ʻo ʻEku Ongoongoleleí,” Liahona, Mē 2021, 123)

Naʻe fakamatala ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e ngaahi tefitoʻi moʻoní ko ha moʻoni ʻoku fakataumuʻa ke fakaʻaongaʻi ʻi ha ngaahi tūkunga kehekehe. ʻOku hanga ʻe he tefitoʻi moʻoni ʻoku moʻoní ʻo fakamahinoʻi ʻa e ngaahi fili ʻoku tau faí, ʻo aʻu pē ki he ngaahi tūkunga fakapuputuʻu mo faingataʻa tahá. ʻOku mahuʻinga ke tau feinga mālohi ke fokotuʻutuʻu fakalelei ʻa e moʻoni ʻoku tau tānakí ke hoko ia ko ha ngaahi fakamatala faingofua ʻo e tefitoʻi moʻoní. (“Acquiring Spiritual Knowledge,” Ensign, Nōvema 1993, 86)

Ko e hā e ʻuhinga ʻoku tau kumi mo moʻui ai ʻo fakatatau mo e ngaahi tefitoʻi moʻoní?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku fakamālohia ʻe hono ako, mahino mo moʻui ʻaki e ngaahi tefitoʻi moʻoni ʻo e ongoongoleleí ʻa ʻetau tui ki he Fakamoʻuí, fakaloloto ange ʻetau moʻui līʻoa kiate Iá, mo fakaafea ha ngaahi tāpuaki mo ha ngaahi meʻafoaki fakalaumālie lahi ki heʻetau moʻuí. ʻE lava foki ke tokoniʻi kitautolu ʻe he ngaahi tefitoʻi moʻoni ʻo e angamāʻoniʻoní ke tau vakai ʻo ope atu ʻi hotau ngaahi fiemālieʻangá mo e ngaahi fiemaʻu fakatāutahá ʻaki hono ʻomi ha fakakaukau mahuʻinga ʻo e moʻoni taʻengatá ʻi heʻetau foua e ngaahi tuʻunga, ngaahi pole, ngaahi fili mo e ngaahi aʻusia kehekehe ʻo e moʻui fakamatelié. (“Ko e Ngaahi Tefitoʻi Moʻoni ʻo ʻEku Ongoongoleleí,” Liahona, Mē 2021, 123–24)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Kole ki he kau akó ke vahevahe ʻa e founga te nau ala faʻufaʻu mo fakahoko ai ha fononga lavameʻa ʻi he tahí. Ko e hā e meʻa ʻe fiemaʻu ke nau ʻiló?

Vahevahe ʻa e meʻá ni meia ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá:

Kuo ʻaonga maʻu pē ki he tangatá ʻa e talangofua ki he ngaahi tefitoʻi moʻoni totonú. Naʻe kolosi ʻa e kau Polinisia taʻemanavaheé ʻi ha vaka fakatuʻutāmaki ʻi he vahanoá ʻi ha maile ʻe lauiafe hono mamaʻó. Naʻe ʻikai hokonoa pē ʻa e ngāue ko iá ka ʻi he talangofua ki he ngaahi tefitoʻi moʻoni totonu ʻo e faifolau fakasilesitialé. Naʻa nau teuteu fakalelei pea ʻikai ke nau moʻulaloa ki he ngaahi ʻahiʻahi ke mavahe mei honau halá pe fakatoloi ʻenau fonongá. ʻI he founga tatau pē, ʻe lava ke ta fakapapauʻi ʻeta aʻusia ha ngaahi taumuʻa mahuʻinga ʻi he moʻuí ʻaki e mahino mo e muimui maʻu pē ki he ngaahi tefitoʻi moʻoni totonu ʻoku makatuʻunga ʻi he moʻoni kuo fakahā maí. (“The Power of Correct Principles,” Ensign, May 1993, 32)

Ko e toenga ʻo e talanoá

Kapau ʻokú ke ongoʻi ʻe ʻaonga ki he kau akó haʻanau ako lahi ange fekauʻaki mo e talanoa ʻo Sihosafaté mo hono kakaí, fakakaukau ke fakamatalaʻi fakanounou pe lau ʻa e palakalafi ko ʻení:

Naʻe ʻalu ʻa Sihosafate mo e kakai ʻo Siutá ke tau mo e kakai ʻo ʻĀmoní, Moapé, mo e Moʻunga Seiá, naʻe ui foki ko e fonua ko ʻĪtomí (Vakai, Ngaahi Mape ʻo e Tohi Tapú fika 10). Naʻa nau fakaofi atu ki he taú mo hiva fakafetaʻi ki he ʻOtuá. Naʻe tāpuakiʻi leva kinautolu ʻe he ʻOtuá ʻaki ʻEne fakatupu ha puputuʻu ʻi honau ngaahi filí, ʻa ia naʻa nau tafoki ʻo fefakapoongiʻaki pē ʻiate kinautolu. Naʻe tānaki leva ʻe he kakai ʻo Sihosafaté ha ʻū koloa mahuʻinga mei honau ngaahi fili kuo pekiá.

Hili iá te ke lava ʻo fakaafeʻi e kau akó ke nau lau ʻa e 2 Fakamatala Meʻa Hokohoko 20:26–30, ʻo kumi ha toe founga naʻe tāpuekina ai ʻa Siuta ʻi heʻenau faivelengá.

Faivelenga ʻi he fakalau ʻa e taimí

Te ke lava ʻo fakamahinoʻi ange naʻe hoko foki ʻa Sihosafate mo hono kakaí ko ha sīpinga ʻo hono fakahoko ha ngaahi ngāue māʻoniʻoni lahi ʻi he fakalau ʻa e taimí.

Naʻe akoʻi ʻe Palesiteni Tāleni H. ʻOakesi ʻa e meʻá ni, ʻo fakamamafaʻi e mahuʻinga ʻo ʻetau ngāue taʻetūkuá ʻi he fakalau ʻa e taimí:

ʻOku akoʻi kitautolu ki ha fanga kiʻi meʻa iiki mo faingofua ʻi he ongoongolelei ʻo Sīsū Kalaisí. ʻOku fiemaʻu ke fakamanatu mai kiate kitautolu, ko e ngaahi meʻa ngali īkí te nau ʻomi ha ngaahi fuʻu meʻa lalahi hili ha vahaʻa taimi lōloa. …

He ʻikai lava ʻe ha taha ʻo e fanga kiʻi meʻa iiki mo faingofua ko ʻení ʻo hiki hake kitautolu ki ha ngaahi fuʻu meʻa lalahi kae ʻoua ke toutou fakahoko pea hokohoko atu hono fai kinautolú. (“Fanga Kiʻi Meʻa Iiki mo Faingofuá,” Liahona, Mē 2018, 89, 91)

Naʻá ke vakai fēfē ki hono fakatātaaʻi ʻe Sihosafate ʻa e tefitoʻi moʻoni ko ʻení?
ʻOkú ke pehē ko e hā e ʻuhinga ʻoku mahuʻinga ai ʻa e faivelenga ʻi he fakalau ʻa e taimí ke tau hoko ʻo hangē ange ko Sīsū Kalaisí?