Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

2 Fakamatala Meʻa Hokohoko 14–16: “Kapau ʻOku Mou Kumi Kiate Ia, Te Ne Tuku Ke Mou ʻIlo Ia”

“2 Fakamatala Meʻa Hokohoko 14–16: ‘Kapau ʻOku Mou Kumi Kiate Ia, Te Ne Tuku Ke Mou ʻIlo Ia,’” Fuakava Motuʻá – Tohi Lēsoni ʻa e Faiako Seminelí (2026)

“2 Fakamatala Meʻa Hokohoko 14–16: ‘Kapau ʻOku Mou Kumi Kiate Ia, Te Ne Tuku Ke Mou ʻIlo Ia,’” Fuakava Motuʻá – Tohi Lēsoni ʻa e Faiako Seminelí

2 Fakamatala Meʻa Hokohoko 14–20; 26; 30: Lēsoni 90

2 Fakamatala Meʻa Hokohoko 14–16

“Kapau ʻOku Mou Kumi Kiate Ia, Te Ne Tuku Ke Mou ʻIlo Ia”

Mahalo ‘oku ‘i ai ha kakai ʻe niʻihi ‘oku nau toki fekumi pē ki he Tamai Hēvaní mo Sīsū Kalaisi ʻi he taimi ʻoku lele lelei ai ʻa e ngaahi meʻá. Mahalo ko ha niʻihi te nau toki tangi pē ki Heʻena tokoní ʻi he taimi faingataʻá. Te tau lava ʻo fekumi ki he ʻEikí lolotonga e ngaahi taimi nongá mo e faingataʻá fakatouʻosi, ʻo hangē ko ʻAsa, ko e tuʻi ʻo Siutá. ʻE lava ke tokoni ʻa e lēsoni ko ʻení ki he kau akó ke nau faʻu ha palani ke fekumi ki he ʻEikí.

Teuteu ʻa e tokotaha akó: Fakaafeʻi e kau akó ke hiki ha lisi ʻo e ngaahi founga te nau lava ai ʻo fekumi ki he ʻEikí ʻi heʻenau moʻuí.

Ngaahi ʻEkitivitī Ako ʻOku Ala Fakahokó

Fekumi ke ʻilo

Fakakaukau ke kamata e lēsoní ʻaki hono fakaafeʻi e kau akó ke fakakaukau ki he founga ʻoku tau fekumi ai ki he ngaahi meʻa ʻoku molé. Te ke lava ʻo lisi pe fakaʻaliʻali ha ngaahi meʻa ʻe niʻihi ʻoku kehekehe honau mahuʻingá, hangē ko ha penivahevahe, ngāue fakaako mahuʻinga mei ʻapi, telefoni toʻotoʻo, meʻaʻofa mei ha taha ʻokú ke ʻofa ai, mo e alā meʻa pehē. Fehuʻi ki he kau akó pe ko e hā ha ngaahi ngāue te nau fai ke kumi ai e meʻa takitaha kapau ʻe mole.

Ko e hā e ʻuhinga ʻoku kehekehe ai hoʻo ngaahi feinga ke maʻu ha meʻá ʻo makatuʻunga ʻi he meʻa ʻokú ke fekumi ki aí?

Fakakaukau ke hiki ʻa e Fekumi ki he ʻEikí ʻi ʻolunga ʻi he palakipoé.
ʻOkú ke pehē ko e ʻuhinga ki he hā ʻa e fekumi ki he ʻEikí?

Kapau ʻoku faingataʻa ke tali ʻe he kau akó, te ke lava ʻo fehuʻi ange pe ʻoku founga fēfē haʻanau feinga ke maheni mo ha taha pea fakatupulaki ha vā fetuʻutaki leleí. Hili iá pea fehuʻi ange pe te nau feinga fēfē ke ʻiloʻi mo fakatupulaki ha vā fetuʻutaki mo e ʻEikí. Te ke lava ʻo fakamatalaʻi ange ko e foʻi lea faka-Hepelū ki he fekumí ʻi he ngaahi veesi te nau ako he ʻaho ní (2 Fakamatala Meʻa Hokohoko 14:4; 15:2, 12; 6:12) ko e darash pea ʻoku ʻuhinga ia ke fekumi, ʻeke, ʻaʻahi, tulifua, talanoa, pe fakaʻaongaʻi kiate kita.

ʻI hoʻo tohinoa akó, tali ai e ongo fehuʻi ko ení:

Ko e hā ha ngaahi meʻa kuó ke fai pe fai ʻe ha niʻihi kehe ʻokú ke ʻilo ke fekumi ai ki he ʻEikí?
Ko e hā e lahi ʻo e ngāue ʻokú ke fai ke fekumi ai ki he ʻEikí?

ʻI hoʻo ako he ʻaho ní, kumi ha ngaahi founga te ke lava ai ʻo fekumi ki he ʻEikí. Hiki ha faʻahinga fakakaukau pē pe ngaahi ongo ʻokú ke maʻu mei he Laumālie Māʻoniʻoní.

Ko ha sīpinga ʻo e fekumi ki he ʻEikí

Fakakaukau ke vahevahe pe fakamatalaʻi fakanounou ʻa e palakalafi ko ʻení.

ʻOku fakamatalaʻi ʻe he ongo tohi Fakamatala Meʻa Hokohokó mo e Ngaahi Tuʻí ʻa e meimei vahaʻataimi tatau. ʻOku tau lau ʻi he 2 Fakamatala Meʻa Hokohoko 14–16 mo e 1 Ngaahi Tuʻi 15, ha fakamatala ki he Tuʻi ko ʻAsá, ko e tuʻi hono tolu ʻo Siutá.

Te ke lava ʻo faʻu ʻa e saati ko ʻení ʻi he palakipoé ke tokoni ki he kau akó ʻi he ʻekitivitī hokó. ʻE lava foki ke faʻu ʻe he kau akó ʻa e sātí ʻi heʻenau tohinoa akó.

Founga naʻe fekumi ai ʻa ʻAsa mo hono kakaí ki he ʻEikí	Founga ne faitāpuekina ai kinautolu ‘e he ʻEikí
Founga naʻe fekumi ai ʻa ʻAsa mo hono kakaí ki he ʻEikí	Founga ne faitāpuekina ai kinautolu ‘e he ʻEikí

Fakakaukau ke vahevahe ʻa e kau akó ki ha kulupu kehekehe ʻe fā. Kole ki he kulupu takitaha ke nau lau ha seti kehekehe ʻo e ngaahi veesi ko ʻení. ʻE lava ke hiki ʻe ha tokotaha ako mei he kulupu takitaha ʻa e meʻa ne nau akó ʻi he palakipoé.

Kapau ʻoku fiemaʻu tokoni ʻa e kau akó ke mahino ʻa e “ngaahi vao tapú” ʻi he 2 Fakamatala Meʻa Hokohoko 14:3, fakamatalaʻi ange ko ha ngaahi potu ia naʻe lotu ai ʻa e kakaí ki he ngaahi ʻotua loí.

Lau ha taha ʻo e ngaahi veesi ko ʻení, ʻo kumi e meʻa naʻe fai ʻe ʻAsa mo hono kakaí pea mo e founga naʻe tāpuakiʻi ai kinautolu ʻe he ʻOtuá:

2 Fakamatala Meʻa Hokohoko 14:3–7. Lolotonga ha taimi ʻo e melino
2 Fakamatala Meʻa Hokohoko 14:9–13. Taimi naʻe ʻohofi ai ʻe he kakai ʻItiopeá
2 Fakamatala Meʻa Hokohoko 15:1–9. Lolotonga ha taimi ʻo e melino
2 Fakamatala Meʻa Hokohoko 15:10–12, 15. Lolotonga ha taimi ʻo e melino

Fai ʻa e fehuʻi ko ʻení ke tokoni ki he kau akó ke nau ʻiloʻi ha foʻi moʻoni mei he meʻa kuo nau akó. ʻI he vahevahe ʻa e kau akó, tānaki ʻenau ngaahi talí ki he saati ʻi he palakipoé.
Ko e hā e meʻa naʻá ke ako mei he ngaahi aʻusia ʻa ʻAsa mo hono kakaí?

ʻI hono fakaʻaongaʻi e lea pē ʻa e kau akó, tokoni ke nau ʻiloʻi ha ngaahi moʻoni hangē ko ʻení:

ʻI heʻeku fekumi ki he ʻEikí ʻaki hoku lotó kotoa, te Ne foaki kiate au ha nonga (2 Fakamatala Meʻa Hokohoko 14:7; 15:15)
Kapau te u fekumi ki he ʻEikí, te u maʻu Ia (2 Fakamatala Meʻa Hokohoko 15:2)

ʻI he vahevahe ʻa e kau akó, fakakaukau ke fai ha ngaahi fehuʻi vakaiʻi ke tokoni ke nau fakakaukau ki he ʻuhinga ʻo ha ngaahi foʻi lea pe kupuʻi lea ʻe niʻihi. Hangē ko ʻení, te ke lava ʻo fehuʻi ange, “ʻOkú ke pehē ʻoku ʻuhinga ki he hā ke maʻu ʻa e ʻEikí?” pe “ʻE fēfē nai hano ʻomi ʻe he ʻEikí ha fiemālie kiate kitautolu?”

Ki he ngaahi akonaki ʻe ala tokoni ʻi he ngaahi fehuʻi ko ʻení pe ngaahi fehuʻi kehé, vakai ki he konga ngaahi Maʻuʻanga Tokoni Kehé.

Ko e fekumi mo e maʻu ʻo e ʻEikí

Tokoni ke fakafehokotaki ʻe he kau akó ʻa e moʻui ʻa ʻAsá mo ʻenau moʻuí. Te ke lava ʻo toe fakahingoa ʻa e saati ʻi he palakipoé ʻaki ʻa e Founga te u lava ai ʻo fekumi ki he ʻEikí ʻi he kōlomu toʻohemá pea Founga ʻe lava ke tāpuekina ai au ʻe he ʻEikí ʻi he kōlomu toʻomataʻú. Fakaafeʻi leva e kau akó ke nau fakahoko ʻa e ngaahi meʻa ko ʻení fakakulupu pe ʻiate kinautolu pē.

Makehe mei he meʻa naʻe fai ʻe ʻAsa mo hono kakaí, tānaki atu ki he kōlomu toʻohema ʻo hoʻo lisí ha ngaahi founga te ke lava ai ʻo fekumi ki he ʻEikí. ʻE lava ke maʻu ʻa e ngaahi founga ko ʻení mei hoʻo aʻusiá, ngaahi sīpinga ʻi he folofolá pe hisitōlia ʻo e Siasí, pe ngaahi lea mei he kau taki ʻo e Siasí.

Ko e hā ha meʻa te ne lava ʻo tohoakiʻi kitautolu mei heʻetau fekumi ki he ʻEikí?
Ko e hā e meʻa ʻokú ne tokoniʻi koe ke ke fekumi ki he ʻEikí neongo e ngaahi fakahohaʻá?

Fakakaukau ke fakaafeʻi kinautolu ke fakaʻilongaʻi ʻa e kupuʻi lea “te ne tuku ke mou ʻilo ia” ʻi he 2 Fakamatala Meʻa Hokohoko 15:2. Ke tokoni ke fakakaukau e kau akó ki ha ngaahi founga te tau lava ai ʻo ʻilo ʻa e ʻEikí, fehuʻi ange ʻeni.
Kuo tāpuekina fēfē koe ʻe he ʻEikí pe ko ha taha ʻokú ke ʻilo ʻi hoʻo fekumi kiate Iá?

Hili e vahevahe ʻa e kau akó, poupouʻi kinautolu ke hiki ʻenau ngaahi fakakaukaú ʻi he kōlomu toʻomataʻu ʻo e sātí. Mahalo te ke fie fakamoʻoni ʻe lava ke hoko e ngaahi tāpuaki naʻe vahevahe ʻe he kau akó ko ha fakamoʻoni kuo nau maʻu Ia.

Ko hono faʻu ha palaní

Tokoni ki he kau akó ke nau ngāueʻi ha meʻa kuo nau ongoʻi pe ako lolotonga e lēsoní. Ke fai iá, poupouʻi kinautolu ke fakakaukau ki he ngaahi ongo ne nau mei maʻu mei he Laumālié ʻi he kotoa ʻo e kalasí. ʻIkai ngata aí, naʻe toe vakaiʻi ʻe he kau akó ʻi he lēsoni 87, ʻenau ngaahi taumuʻa ako folofolá ko ha founga ke nau ofi ange ai ki he ʻEikí. Kapau ʻe ʻaonga, te nau lava ʻo fakafuofuaʻi ʻa e tuʻunga ʻoku ʻi ai ʻenau ngaahi taumuʻá pea fili pe te nau fie fakaʻaongaʻi foki mo ʻenau ngaahi taumuʻa ʻi he palani ko ʻení.

Fili ha meʻa ʻe taha te ke lava ʻo fai ke fekumi ai ki he ʻEikí. Tali ʻa e ngaahi fehuʻi ko ʻení ʻi hoʻo tohinoa akó. Palani ʻa e founga te ke lava ai ʻo fakakau ʻa e ngāue ko ʻení ʻi hoʻo moʻuí.

ʻOkú ke pehē ko e hā e ʻuhinga ʻe ala tokoni ai ʻa e ngāue ko ʻení ke ke ʻilo lahi ange ʻa e ʻEikí ʻi hoʻo moʻuí?
Ko e hā ha ngaahi faingataʻa te ke ala fehangahangai mo ia ʻi hoʻo fakahoko ʻení?
Ko e hā ha ngaahi sitepu pau te ke lava ʻo fai ke fakahoko ai ia neongo e ngaahi faingataʻa ko ʻení?

Fakakaukau ke fakaʻosi e kalasí ʻaki haʻo fakamoʻoni ki he ngaahi tāpuaki ʻo e fekumi ki he ʻEikí.

Ngaahi Maʻuʻanga Tokoni Kehé

2 Fakamatala Meʻa Hokohoko 14:6–7. ʻOku ʻuhinga ki he hā ʻa e maʻu ha fiemālie ʻi he ʻEikí?

Naʻe akonaki ʻa Palesiteni Lāsolo M. Nalesoni ʻo pehē:

18:43

Neongo e ngaahi takihala mo e ngaahi fakahohaʻa ʻoku nau ʻākilotoa kitautolú, ka te ke lava ʻo maʻu ha fiemālie moʻoni—ʻa ia ko ha fakafiemālie mo ha nonga—naʻa mo e lotolotonga ʻo hoʻo ngaahi palopalema fakatuta tahá. (“Ikuʻi ʻa Māmani mo Maʻu ha Fiemālie,” Liahona, Nōvema 2022, 96)

Ko e hā e meʻa ʻoku fiemaʻu ʻi he fekumi ki he ʻEikí?

Naʻe pehē ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

14:47

ʻI hono ʻafioʻi ʻe he Fakamoʻuí ʻa e meʻa kotoa pē ʻoku ʻaonga maʻatautolu ʻi he moʻui ní, ʻokú Ne fakaafeʻi ai kitautolu ke tau fekumi kiate Ia ʻi he fakakaukau kotoa pē pea muimui ʻiate Ia ʻaki hotau lotó kotoa. ʻOku tau maʻu ai e palōmesi ʻa ia te tau lava ke ʻaʻeva ʻi Heʻene māmá pea ʻoku hanga ʻe Heʻene tatakí ʻo taʻofi hono tākiekina ʻe he fakapoʻulí ʻetau moʻuí.

ʻOku fiemaʻu ke fakatatau ʻetau fakakaukaú mo e holí ki Hoʻoná ʻi heʻetau fekumi kiate Ia ʻi he fakakaukau kotoa pē pea muimui kiate Ia ʻaki hotau lotó kotoa. ʻOku ʻuhinga e folofolá ki he fakatatau ko ʻení ko e “tuʻumaʻu ʻi he ʻEikí” [Filipai 4:1]. ʻOku ʻuhinga ʻa e foungá ni ke tau hokohoko atu hono fakafeangai ʻetau moʻuí ke fenāpasi mo e ongoongolelei ʻo Kalaisí pea tukutaha ʻa e tokanga fakaʻahó ki he meʻa kotoa pē ʻoku leleí. Ko e toki taimi pē ia ʻe lava ai ke tau aʻusia ʻa e “melino ʻo e ʻOtuá, ʻa ia ʻoku lahi hake ʻaupito ʻi he faʻa ʻiloá” pea te ne “maluʻi [hotau] laumālié mo [hotau] lotó ʻia Kalaisi Sīsū” [Filipai 4:7]. (“Fekumi kia Kalaisi ʻi he Fakakaukau Kotoa Pē,” Liahona, Nōvema 2020, 82–83)

Ko e hā ha ngaahi tāpuaki ʻoku maʻu mei he fekumi ki he ʻEikí?

Ko ha sīpinga ʻe taha ko e fakamoʻoni ʻa Molonai ʻi he ʻEta 12:41. Naʻe akoʻi foki ʻe ʻEletā Keleki C. Kulisiteniseni ʻo e Kau Fitungofulú ʻa e meʻá ni:

7:9

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Fakakaukau ke hiki ʻa e foʻi lea Tulifua ʻi he palakipoé. ʻEke ki he kau akó ʻa e fehuʻi ko ʻení:

Ko e hā e meʻa ʻoku haʻu ki ho ʻatamaí ʻi hoʻo fakakaukau ki he foʻi lea ko ʻení?

Hili hono ʻoange ha faingamālie ki he kau akó ke nau talí, fakaʻaliʻali e fakamatala ko ʻeni meia ʻEletā Hōsea A. Tekisila ʻo e Kau Fitungofulú.

9:43

Naʻe folofola ʻa e ʻEikí, “[Fekumi] kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē” [Tokāteline mo e Ngaahi Fuakava 6:36]. Ko e fekumi ki he ʻEikí pea mo hono ongoʻi ʻa ʻEne ʻi aí, ko ha [tulifua] fakaʻaho ia ke fai, pea ko ha ngāue mahuʻinga. (“Fekumi ki he ʻEikí,” Liahona, Mē 2015, 96)

ʻE hoko fēfē ʻa e fekumi ki he ʻEikí mo ongoʻi Hono takauá “ko ha tulifua fakaʻaho”?

Hili hono maʻu ʻe he kau akó ha taimi ke alēleá, te ke lava ʻo fakaafeʻi kinautolu ke tali e ngaahi fehuʻi fakakaukau ʻi he kamataʻanga ʻo e lēsoní.

Fakafalala ki hotau ʻEikitaú

Ke tokoni ke fakakaukau e kau akó ki he ʻuhinga ʻo e falala ki he ʻEikí, te ke lava ʻo ako ʻa e talanoa ʻi he 2 Fakamatala Meʻa Hokohoko 13 fekauʻaki mo ʻApisa, ko e tamai ʻa ʻAsá. Fakamatalaʻi ange naʻe vaeua ʻa e kakai ʻIsilelí ki ha puleʻanga ʻe ua: ko e Puleʻanga Fakatokelau ʻo ʻIsilelí mo e Puleʻanga Fakatonga ʻo Siutá. Naʻe hoko ha tau ʻi he vahaʻa ʻo ʻIsilelí, naʻe taki ʻe he Tuʻi ko Selopoamí, pea mo Siuta naʻe taki ʻe he Tuʻi ko ʻApisá.

Fakaafeʻi e kau akó ke nau lau ʻa e 2 Fakamatala Meʻa Hokohoko 13:4, 10–12, ʻo fakaʻilongaʻi ʻa e ngaahi foʻi lea pe kupuʻi lea ʻoku nau fakahaaʻi ʻa e feituʻu naʻe tafoki ki ai ʻa ʻApisa mo hono kakaí. Kapau ʻe tokoni, te ke lava ʻo fakamatalaʻi ange ko e ngaahi feilaulau tutú mo e meʻa namu kakalá, ko hono tuku ʻo e maá ki he palepalé, mo hono tutu ʻo e ngaahi māmá (veesi 11) ko e konga kotoa ia ʻo e ngaahi fatongia ʻo e kau taulaʻeikí ki he moihū ʻi he temipalé.

Tokoni ke ʻiloʻi ʻe he kau akó ha foʻi moʻoni hangē ko e ʻOtuá ʻa hotau ʻEikitaú. Te ke lava ʻo fakaafeʻi e kau akó ke fakafekauʻaki ʻa e veesi 12 ki he Hepelū 2:10: “[ko] e ʻeiki ʻo ʻenau moʻuí.”

ʻOkú ke pehē ʻoku ʻuhinga ki he hā ke maʻu ʻa e ʻOtuá ko hotau ʻEikitaú?
Ko e hā e meʻa ʻokú ke ʻilo fekauʻaki mo e ʻOtuá ʻokú ne ʻai ia ke hoko ko ha ʻEikitau leleí?

Fakaafeʻi leva e kau akó ke lau ʻa e 2 Fakamatala Meʻa Hokohoko 13:13–20, ʻo kumi e meʻa naʻe hoko koeʻuhí ko e fakafalala ʻa ʻApisa mo hono kakaí ki he ʻOtuá ke hoko ko honau ʻEikitaú. Hili ʻenau laú, mahalo te ke fie fakaafeʻi e kau akó ke fakaʻilongaʻi ʻa e kupuʻi lea “ko e meʻa ʻi heʻenau tui ki [he ʻEiki] ko e ʻOtuá” ʻi he veesi 18.

Kuo tokoniʻi fēfē koe ʻe he ʻOtuá ʻi hoʻo fakafalala kiate Iá?

Ko e fili ke ʻoua ʻe falala ki he ʻOtuá

Ke tokoni ke fakaʻehiʻehi e kau akó mei he fehalaaki ʻo e ʻikai falala ki he ʻOtuá, te ke lava ʻo fakaʻosi e talanoa ʻa ʻAsá ʻi he 2 Fakamatala Meʻa Hokohoko 16. Fakamatalaʻi ange naʻe tafoki ʻa ʻAsa meiate Ia kimui ange ʻi heʻene moʻuí.

Fakaafeʻi e kau akó ke nau lau ʻa e 2 Fakamatala Meʻa Hokohoko 16:1–12, ʻo kumi ha sīpinga ʻe ua ʻo e founga naʻe fili ai ʻa ʻAsa ke ʻoua ʻe falala ki he ʻOtuá. Tokoni ke mahino ki he kau akó naʻe ʻave ʻe ʻAsa ʻa e silivá mo e koulá mei he temipalé ke fakatau ʻaki e tokoni ʻa Sīliá ʻi hono ikunaʻi ʻo ʻIsilelí (vakai, 2 Fakamatala Meʻa Hokohoko 16:1–6). Naʻe ʻikai foki ke fekumi ʻa ʻAsa ki he tokoni ʻa e ʻOtuá ʻi heʻene puké (vakai, 2 Fakamatala Meʻa Hokohoko 16:12). Kapau ʻe fiemaʻu, te ke lava ʻo fakamatalaʻi ange naʻe ʻikai hala ʻa ʻAsa ke fekumi ki he tokoni ʻa e kau toketaá, ka naʻe ʻikai foki ke ne fekumi ki he tokoni ʻa e ʻOtuá. (Ki ha fakamatala lahi ange ʻi he foʻi fakakaukau ko ʻení, vakai, Dallin H. Oaks, “Fakamoʻui ʻo e Mahakí,” Liahona, Mē 2010, 47.)

Ko e hā ha ngaahi manavasiʻi naʻe maʻu ʻe ʻAsa naʻe tupu ai ʻa e ʻikai ke ne falala ki he ʻOtuá?
Ko e hā ha ngaahi tūkunga ʻe ala aʻusia ai ʻe he toʻu tupú ha ngaahi manavasiʻi tatau?
Ko e hā ha meʻa ʻokú ke ʻilo fekauʻaki mo e ʻOtuá ʻe lava ʻo tokoni ki ha taha ke falala kiate Ia ʻi ha tūkunga faingataʻa?