“1 Mga Hari 18: Pagpili nga Mosunod sa Ginoo,” Manwal sa Magtutudlo sa Seminary sa Daang Tugon (2026)
“1 Mga Hari 18: Pagpili nga Mosunod sa Ginoo,” Manwal sa Magtutudlo sa Seminary sa Daang Tugon
1 Mga Hari 12–13; 17–22: Leksiyon 82
1 Mga Hari 18
Pagpili nga Mosunod sa Ginoo
Unsa kamo kamasaligon sa pagsunod sa Dios? Aron sa pagpakita nga ang Dios sa Israel mao ang bugtong tinuod nga Dios, si Elias mihagit sa mga pari ni Baal sa usa ka sangka. Gitubag sa Ginoo ang pag-ampo ni Elias ug midaog sa sangka. Kini nga leksiyon makatabang sa mga estudyante nga mobati og dakong tinguha sa pagsunod sa Ginoo.
Pagpangandam sa estudyante: Dapita ang mga estudyante sa paghunahuna og usa o daghang mga higayon sa ilang kinabuhi dihang nahibaloan nila nga tinuod ang Langitnong Amahan o si Jesukristo, o dihang gibati nila ang Ilang gahom diha sa ilang kinabuhi. O makahunahuna sila kon unsay ilang mahimo aron mahibaloan kon tinuod ba ang Langitnong Amahan ug si Jesukristo ug kon kinahanglan ba silang hingpit nga mosunod Kanila.
Posibleng mga Kalihokan sa Pagkat-on
Makasunod ba kita sa duha ka impluwensiya sa samang higayon?
Gamit ang papilit o pipila ka kapanguhaan, pagbuhat og duha ka linya sa salog sa katugbang nga mga direksiyon sama sa gipakita sa ubos. Hangyoa ang mga estudyante sa pagtindog sa tunga diin ang tumoy sa mga linya hapit na mag-abot ug sa pagbutang sa usa ka tiil sa matag linya.
Hangyoa ang estudyante sa pagtikang og pipila ka lakang, nga nagsulay sa pagtunob sa duha ka linya. Pangutan-a sila unsa kadugay ang ilang gibati aron sila magmalamposon. Kon gikinahanglan, ipasabot nga bisan pinaagi niini mahimong posible nga ang usa ka tawo makalakaw sa duha ka linya sa mubong distansiya, dili sila mahimong magmalamposon sa hangtod, ni makalakaw sila sa linya og tarong.
Dapita ang estudyante sa pagbalik ngadto sa ilang mga lingkoranan.
Alang niini nga leksiyon, ang usa ka linya mahimong magrepresentar sa mga pamaagi sa Ginoo, ug ang lain mahimong magrepresentar sa ubang mga impluwensiya nga wala matukma sa mga pamaagi sa Ginoo.
-
Unsa ang pipila ka pamaagi nga tingali mosulay kita sa pagsunod sa Ginoo ug sa ubang mga impluwensiya sa samang higayon?
Si Elias mihagit sa mga pari ni Baal sa usa ka sangka
I-summarize ang parapo sa ubos, o kon inyong gibati nga angay sa mga estudyante, ipasalida ang“Si Elias ug ang mga Pari ni Baal” (2:16), nga ana sa ChurchofJesusChrist.org, gikan sa time code nga 0:07 hangtod 0:33.
Sa 1 Mga Hari 18, ang gusto ni Elias nga hingpit nga mopasalig ang gingharian sa Israel ngadto sa Ginoo. Mikabat og mga tulo ka tuig sukad si Elias migamit sa iyang gahom sa pagselyo aron makahiagom og hulaw ang yuta (tan-awa sa 1 Mga Hari 17:1). Apan ang Israel mipadayon sa pag-ampo sa mini nga mga dios lakip na ni Baal (tan-awa sa 1 Mga Hari 18:18). Si Elias mihagit sa gatosan ka mini nga mga propeta ni Baal ug sa mga propeta sa kakahoyan sa usa ka sangka didto sa bukid sa Carmelo sa pagsuta kon si Baal o Jehova mao ang tinuod nga Dios (tan-awa sa 1 Mga Hari 18:19). Sa wala pa magsugod ang sangka, si Elias nakigsulti ngadto sa mga tawo.
Basaha ang 1 Mga Hari 18:21, nga mangita sa mga pulong ni Elias ngadto sa katawhan. Ang pulong nga magkiangkiang niini nga kahimtang nagpasabot nga nag-alangan o nagduhaduha.
-
Unsa ang gihangyo ni Elias nga buhaton sa katawhan?
Si Elder D. Todd Christofferson sa Korum sa Napulog Duha ka Apostoles miusab sa pamahayag ni Elias niini nga paagi:
Karon si Elijah moingon:
Bisan ang Dios, ang atong Langitnong Amahan, anaa, o wala Siya, apan kon Siya anaa, simbaha Siya.
Bisan si Jesukristo mao ang Anak sa Dios, ang nabanhaw nga Manunubos sa katawhan, o Siya dili, apan kon Siya mao, sunda Siya. (“Lig-on ug Makanunayon diha sa Hugot nga Pagtuo kang Kristo,” Liahona, Nob. 2018, 30)
-
Unsa ang mipatigbabaw kanimo gikan sa pamahayag ni Elias ug ni Elder Christofferson?
Dapita ang mga estudyante sa pagpakigbahin sa ilang mga hunahuna. Ang pipila ka kamatuoran nga atong makat-onan mao:
Ang Ginoo nagtugot nato sa pagpili kon kita mosunod Kaniya o sa mini nga mga dios ug sa dili matarong nga mga pamaagi sa kalibotan.
Kon kita nasayod nga ang Langitnong Amahan anaa ug si Jesus mao ang Kristo, kinahanglan kitang mopasalig nga mosunod Kanila.
Tubaga ang mosunod nga mga pangutana diha sa inyong journal sa pagtuon:
-
Unsa kalig-on ang akong pagtuo nga ako adunay Amahan sa Langit ug usa ka Manluluwas?
-
Unsa ako kamasaligon sa pagsunod Kanila?
-
Unsa tingali ang makapugong kanako nga hingpit nga mopasalig sa pagsunod Kanila?
Samtang kamo magpadayon sa inyong pagtuon, tinguhaa ang giya sa Espiritu Santo aron sa pagtabang kaninyo nga masayod sa unsang paagi tingali nimo mabuntog ang bisan unsang mga babag nga mopugong kanimo sa hingpit nga pagsunod sa Langitnong Amahan ug ni Jesukristo.
Ang sangka tali ni Baal ug Jehova
Basaha ang 1 Mga Hari 18:23–24, nga mangita sa mga kondisyon sa sangka tali ni Elias ug sa mini nga mga propeta ni Baal.
Ang mga pari ni Baal ang unang misulay, mitawag sa ilang mini nga dios sa mga oras. Basaha ang 1 Mga Hari 18:26–29, nga mangita unsa ang nahitabo.
-
Unsay inyong nakaplagan?
Kon ang imong mga estudyante naglisod sa pagsabot niini nga mga bersikulo, ikonsidera ang pagpasalida sa “Si Elias ug ang mga Pari ni Baal” gikan sa time code nga 0:33 hangtod 1:19.
Alang sa mosunod nga mga kalihokan, ikonsiderar ang paghatag sa mga estudyante og mga lima ka minuto nga tagal aron sa pagbasa sa mga bersikulo ug kompletohon ang mosunod nga mga instruksiyon. Ipasabot nga ang drowing dili kinahanglan nga ihulagway.
Aron makat-on unsay nahitabo sa dihang si Elias mitawag sa Dios, basaha sa 1 Mga Hari 18:30–39. Dayon, pagkuha og piraso sa papel ug bahina kini sa duha. Sa usa ka bahin sa papel, pagdrowing og hulagway kon unsay nahitabo sa dihang si Elias nangandam sa iyang sakripisyo ug mitawag sa Dios.
-
Unsa kahay inyong mahunahuna og bation kon kamo anaa didto?
-
Sa unsang paagi tingali kini makaapektar sa inyong pagpamatuod sa Ginoo ug sa inyong kaandam nga mosunod Kaniya?
Alang sa mosunod nga mga kalihokan, ikonsiderar ang paghatag sa mga estudyante og limita sa oras nga mga lima ka minuto. Kon makatabang ang paghatag og usa ka ehemplo sa usa ka tawo nga nasayod nga tinuod ang Dios o unsay ilang gibuhat aron masayod, ikonsiderar ang pagpasalida sa usa sa mosunod nga mga bidyo, nga anaa sa ChurchofJesusChrist.org.
“Iyang Grasya: Pagpili nga Motuo sa Dios” (4:07)
“Krisis sa Hugot nga Pagtuo: Unsay atong Buhaton kon Wala Kitay Pagbati?” (5:55)
Sa laing katunga sa inyong papel, pagsulat o pagdrowing og hulagway sa usa o daghang panahon sa inyong kinabuhi dihang nasayod kamo nga ang Langitnong Amahan o si Jesukristo tinuod, o sa dihang mibati kamo sa Ilang gahom diha sa inyong kinabuhi. O mahimo ninyong isulat ang mahitungod sa o magdrowing og usa ka hulagway kon unsay inyong buhaton aron masayran kon Sila tinuod ug kon hingpit ba kamong misunod Kanila.
Kon ang mga estudyante mahuman, ikonsiderar ang paghatag og taas nga oras sa mga boluntaryo sa pagpakigbahin kon unsa ilang gidrowing o gisulat kon dili kaayo kini personal. Ang pagdasig sa daghang estudyante nga mopakigbahin makahatag og lahilahi nga panglantaw ug makatabang sa ubang mga estudyante nga makaamgo sa unsang paagi ang ilang nakat-onan nga kamatuoran makaapekto kanila. Tingali makatabang usab ang pagsukna og mga pangutana sama sa usa nga anaa sa ubos.
-
Sa unsang paagi ang pagpamalandong sa inyong kaugalingong mga kasinatian sa pagtan-aw sa gahom sa Langitnong Amahan ug ni Jesukristo makatabang sa inyong kinabuhi sa inyong pasalig sa pagsimba ug pagsunod Kanila?
-
Sa inyong hunahuna ngano kaha nga ang Langitnong Amahan ug si Jesukristo takos nga sundon sa hingpit?
Obserbahi ang mga Kristohanong mga hiyas diha sa mga estudyante ug ipakigbahin unsa ang imong nabantayan. Mahimo nimong tabangan ang mga estudyante nga dasigon sa pagpadayon sa pagpaningkamot nga mapaduol sa Ginoo kon imong itudlo ang mga pamaagi nga makapalambo o makapahimo og maayong mga pagpili. Alang niini nga leksiyon, ikonsiderar ang pagtudlo sa mga paagi nga imong nabantayan nga gipili sa mga estudyante sa pagsunod sa Langitnong Amahan ug ni Jesukristo. Kini tingali maglakip sa pagkomplemento kanila sa pagpili nga motambong sa seminary, magtuon sa pulong sa Ginoo, ug magtinguha sa pagpaduol Kaniya. Kini usab mahimong maglakip sa Kristohanong mga hiyas nga imong nabantayan diha sa mga estudyante. Aron magkat-on pa og dugang niini, tan-awa sa “Tabangi ang mga tigkat-on nga tuyoong maningkamot nga mas mahisama ni Jesukristo” sa Pagpalambo sa mga Kahanas sa Magtutudlo.
Aron sa pagtapos niini nga leksiyon, isulat sa inyong journal sa pagtuon unsay inyong gibati mahitungod sa hingpit nga pagsunod sa Langitnong Amahan ug ni Jesukristo. Tinguhaa ang giya sa Espiritu Santo sa pagtabang ninyo nga mahinumdom ug mapagawas ang inyong mga pagbati. Mahimo ninyong ilakip unsa ang gusto ninyong buhaton o mahinumdoman tungod niini nga leksiyon.
Ipakigbahin ang inyong pagpamatuod sa Langitnong Amahan ug ni Jesukristo ug ang mga panalangin sa hingpit nga pagsunod Kanila.