“1 Mga Hari 12–13; 17–22: Kinatibuk-ang Pagpasabot,” Manwal sa Magtutudlo sa Seminary sa Daang Tugon (2026)
“1 Mga Hari 12–13; 17–22: Kinatibuk-ang Pagpasabot,” Manwal sa Magtutudlo sa Seminary sa Daang Tugon
1 Mga Hari 12–13; 17–22
1 Mga Hari 12–13; 17–22
Kinatibuk-ang Pagpasabot
Panahon sa kagutom, si propeta Elias mihangyo sa usa ka biyuda sa Sarepta sa paghatag kaniya sa iyang kataposan nga pagkaon. Ang biyuda milihok diha sa hugot nga pagtuo, ug ang Ginoo mipanalangin kaniya nga ang iyang lana ug pagkaon dili mahurot. Gihagit ni Elias ang mga anciano ni Baal sa usa ka sangka aron mapamatud-an nga ang Dios sa Israel mao lamang ang tinuod nga Dios. Ang Ginoo mipadala og kalayo gikan sa langit aron sa pagtubag sa mga pag-ampo ni Elias ug pagdaog sa sangka.
Obserbahi ang Kristohanong mga hiyas sa mga estudyante. Sa atong mga paningkamot sa pagtabang sa mga estudyante nga mahimong mas mahisama ni Jesukristo, ang pagtudlo og Kristohanong mga hiyas nga atong makita diha kanila makatabang nila nga makita ang dakong pag-uswag nga ila nang nahimo. Usa ka pananglitan niini nga kahanas makita sa Leksiyon 82: “1 Mga Hari 18.” Alang sa ubang mga ideya kon unsaon sa pagdawat og inspirasyon aron matabangan ang mga estudyante nga mahimong mas mahisama ni Jesukristo, tan-awa sa “Tabangi ang mga Tigkat-on nga Tuyo nga Maningkamot nga Mahimong Mas sama ni Jesukristo” (Pagtudlo sumala sa Pamaagi sa Manluluwas [2022], 9).
Pangandam sa Pagtudlo
Ang mosunod nga impormasyon naghatag nimo og mga ideya kon unsa ang imong kinahanglang andamon daan alang sa matag leksiyon.
1 Mga Hari 17
Katuyoan sa leksiyon: Aron matabangan ang mga estudyante nga molihok uban ang mas dako nga pagtuo sa Langitnong Amahan ug ni Jesukristo pinaagi sa pagsunod sa mga pulong sa mga propeta.
-
Pag-andam sa estudyante: Dapita ang mga estudyante sa pag-ila og usa ka butang nga gidapit sa Ginoo nga atong buhaton pinaagi sa Iyang propeta ug usa ka saad nga Iyang gihatag kon ato kining buhaton. Dapita ang mga estudyante nga motambong sa klase nga andam sa pagpakigbahin.
-
Sulod nga ipakita: Ang pagtukma nga kalihokan nga nagsugod sa leksiyon
-
Mga Bidyo: “Si Elias ug ang Balo sa Sarepta,” (10:12) gikan sa time code 4:09 hangtod 10:06); “Nianang Gabii Ang Akong Pamilya Adunay Igo” (1:47) o “Amahan ug Anak” (5:42)
1 Mga Hari 18
Katuyoan sa leksiyon: Aron tabangan ang mga estudyante nga mobati og mas dakong tinguha nga mosunod sa Ginoo.
-
Pagpangandam sa estudyante: Dapita ang mga estudyante sa paghunahuna og usa o daghang mga higayon sa ilang kinabuhi dihang nahibaloan nila nga tinuod ang Langitnong Amahan o si Jesukristo, o dihang gibati nila ang Ilang gahom diha sa ilang kinabuhi. O makahunahuna sila kon unsay ilang mahimo aron mahibaloan kon tinuod ba ang Langitnong Amahan ug si Jesukristo ug kon kinahanglan ba silang hingpit nga mosunod Kanila.
-
Mga butang nga andamon: Gamit ang tape o uban pang kapanguhaan, paghimo og duha ka linya sa salog, sama sa mga pana nga padulong sa magkaatbang nga direksyon; usa ka piraso nga papel alang sa matag estudyante.
-
Mga Bidyo: “Si Elias ug ang mga Pari ni Baal” (2:16); “Iyang Grasya: Pagpili sa Pagtuo sa Dios” (4:07) o “Krisis sa Pagtuo: Unsa ang Atong Buhaton Kon Wala Kitay Bation?” (5:55)