“1 Mga Hari 3: Ang Ginoo Mopanalangin Kanato sa Pagtuman sa Iyang Buhat,” Manwal sa Magtutudlo sa Seminary sa Daang Tugon (2026)
“1 Mga Hari 3: Ang Ginoo Mopanalangin Kanato sa Pagtuman sa Iyang Buhat,” Manwal sa Magtutudlo sa Seminary sa Daang Tugon
2 Samuel 11–12; 1 Mga Hari 3; 6–9; 11: Leksiyon 78
1 Mga Hari 3
Ang Ginoo Mopanalangin Kanato sa Pagtuman sa Iyang Buhat
Nahunahunaan na ba nimo kon sa unsang paagi ang mga panalangin nga imong nadawat gikan sa Langitnong Amahang nakatabang nimo sa pagtuman sa Iyang buhat? Human sa pagkamatay ni David, iyang amahan, si Solomon gitudlo sa Ginoo nga mahimong bag-o nga hari sa Israel. Gusto nga pasidunggan ang Ginoo, si Solomon mapainubsanong nangita og mga panalangin nga makadugang sa iyang abilidad sa pagserbisyo sa Ginoo ug sa mga Israelita sa matarong nga paagi. Kini nga leksiyon makatabang sa mga estudyante nga makasabot nga ang Ginoo mopanalangin kanato og abilidad sa pagtuman sa Iyang buhat.
Pagpangandam sa estudyante: Dapita ang mga estudyante sa pagsulat og usa ka butang nga ilang gipaningkamotan nga buhaton aron makaapil sa buhat sa Langitnong Amahan ug ni Jesukristo. Dapita ang mga estudyante nga mainampoong mangutana sa Langitnong Amahan kon unsa nga mga panalangin ang ilang gikinahanglan aron matabangan Siya nga matuman ang Iyang buhat
Posibleng mga Kalihokan sa Pagkat-on
Mapainubsanong pag-ila sa atong mga kahuyang
Sa pagsugod sa klase, pagdrowing og imahe nga sama sa mosunod diha sa pisara. Mahimong kopyahon sa mga estudyante ang drowing diha sa ilang journal sa pagtuon. Dayon dapita ang mga estudyante sa paghisgot sa mosunod nga mga pangutana:
-
Unsa ang pipila ka paagi ang Manluluwas nagdapit kanato sa pag-apil sa Iyang buhat?
-
Unsa ang pipila ka paagi nga usa ka tin-edyer mobati nga dili takos sa pagserbisyo sa Ginoo?
Ikonsiderar ang pagdapit sa mga estudyante sa paglista, diha sa gintang tali sa mga imahe, og pipila ka paagi ang usa ka tinedyer mahimong mobati nga dili takos. Ang mga estudyante mahimong moila og mga kaguol, sama sa kabalaka, pagkamaulawon, pagbati nga nabug-atan o dili angayan. Dayon dapita ang mga estudyante sa pagpamalandong sa mosunod nga mga pangutana.
Paghunahuna og pipila sa mga pagdapit nga gihatag sa Ginoo kaninyo sa pag-apil sa Iyang buhat.
-
Unsa ang inyong mga kabalaka mahitungod sa inyong mga abilidad sa pagtuman sa Iyang mga pagdapit?
-
Unsa kamasaligon ang inyong gibati sa abilidad sa Ginoo sa pagtabang ninyo sa pagbuntog sa inyong mga kabalaka?
Samtang magtuon kamo karon, dapita ang Espiritu Santo sa pagtabang ninyo nga masabtan kon sa unsang paagi ang Ginoo motabang ninyo nga matuman ang Iyang buhat.
Si Hari Solomon nagtinguha sa paghari sa matarong nga paagi
Ipakigbahin ngadto sa mga estudyante nga dihang si Hari David namatay, ang iyang anak nga lalaki si Solomon maoy gipili sa Ginoo nga molingkod isip hari sa Israel (tan-awa sa 1 Mga Hari 1:11–13). Si Solomon nahigugma sa Ginoo ug nagtinguha nga mahimong usa ka matarong nga hari (tan-awa sa 1 Mga Hari 3:3). Pwede nimong usbon ang label sa stick figure diha sa pisara ngadto sa Solomon ug usbon ang laing bahin sa Mahimong usa ka matarong nga hari.
-
Sa unsang paagi ang matarong nga hari gilaoman nga molihok?
-
Unsa kaha ang gibati ni Solomon sa pagpuli sa iyang amahan isip hari?
Ikonsiderar ang pagpakita sa mosunod nga mga tudling sa kasulatan ug mga pangutana. Mahimo nimong iorganisar ang mga estudyante nga magkapares. Ipabasa sa usa ka kapares ang 1 Mga Hari 3:5–9 ug ang lain sa pagbasa sa 1 Mga Hari 3:10–14, dayon ipakigbahin ang ilang mga tubag sa usag usa.
Basaha ang 1 Mga Hari 3:5–9, nga mangita sa mga panalangin nga gihangyo ni Solomon sa Ginoo.
-
Unsay dalaygon alang nimo mahitungod sa hangyo ni Salomon? Unsa nga Kristohanong mga hiyas ang gipakita ni Solomon?
Basaha ang 1 Mga Hari 3:10–14, nga mangita sa mga panalangin nga gisaad sa Ginoo kang Solomon.
-
Sa unsang paagi ang usa ka “maalamon ug masinabtanong kasingkasing” (bersikulo 12) ug ang “mga bahandi ug dungog” (bersikulo 13) makadugang sa abilidad ni Solomon sa pagserbisyo sa Ginoo sa matarong nga paagi?
-
Unsa ang gikinahanglan sa Ginoo kang Solomon aron mahimong takos niini nga mga panalangin? (bersikulo 14).
I-summarize ang kasinatian ni Solomon uban ang Ginoo isip usa ka pamahayag sa kamatuoran.
Ang mga estudyante mahimong makaila og kamatuoran sama sa: Samtang kita mapainubsanong moila sa atong kahuyang ug tinguhaon ang tabang sa Ginoo sa pagpanalangin sa uban, Iyang dugangan ang atong abilidad sa pagtuman sa Iyang buhat. Tingali makatabang ang pagsulat niini nga kamatuoran diha sa pisara ug dapita ang mga estudyante sa pagmarka sa hugpong sa mga pulong nga nagtudlo niini nga kamatuoran.
Basaha ang mosunod nga pamahayag gikan ni Presidente Thomas S. Monson (1927–2018), nga mangita sa saad nga gihatag sa tanan nga andam nga moapil sa buhat sa Ginoo.
Karon, tingali pipila kaninyo may kinaiya nga maulawon o naghunahuna sa inyong mga kaugalingon nga dili sarang sa pagdawat [sa Ginoo]. Hinumdomi nga kini nga buhat dili lamang inyo ug ako. Buhat kini sa Ginoo, ug kon kita anaa sa buluhaton sa Ginoo, may katungod kita sa panabang sa Ginoo. Hinumdomi nga ang Ginoo mohulma sa bukobuko aron maplastar ang palas-anon nga ibutang niini. (“Sa Pagkat-on, sa Pagbuhat, sa Pagkahimo,” Liahona, Nob. 2008, 62)
-
Sa unsang paagi kaha ang mga pagtulun-an ni Presidente Monson makatabang sa usa ka tawo kinsa nabalaka sa ilang abilidad sa pagserbisyo sa Ginoo?
Mahimo kang magdrowing og tulay tali sa matag kilid sa imahe diha sa pisara ug butangi kini og ngalan nga Ang tabang sa Ginoo. Dapita ang mga estudyante sa pagdrowing og usa ka butang nga susama diha sa ilang mga journal sa pagtuon.
Ang Ginoo modugang sa atong abilidad sa pagserbisyo Kaniya
Mahimo nimong tabangan ang mga estudyante nga mapalawom ang ilang panabot niini nga kamatuoran. Ang usa ka paagi sa paghimo niini mao ang paggamit sa handout nga “Pag-apil sa Buhat sa Ginoo.” Mahimo nimong pikason ang handout ug dapita ang mga estudyante sa pagpili sa seksiyon nga nagtutok sa bahin sa kamatuoran nga gusto nilang makat-onan pa. Ang mga estudyante mahimong magtrabaho nga tagsa-tagsa o tagduha o tinagutlo pa nga mipili sa sama nga seksyon.
Human sa kalihokan sa pagtuon, dapita ang mga estudyante sa pagtubag sa mosunod nga pagdapit.
I-refer ngadto sa drowing diha sa inyong journal sa pagtuon gikan sa sinugdanan sa klase. Isulat sa mainampoong paagi ang usa o duha ka kahuyang nga inyong gibati nga mahimong makapugong kaninyo sa mas maayo nga pagserbisyo sa Langitnong Amahan ug ni Jesukristo. Dapita ang Espiritu Santo sa pagtabang ninyo sa pag-ila sa mga panalangin nga mahimo ninyong tinguhaon gikan sa Ginoo nga makatabang ninyo sa pagbuntog niini nga mga kahuyang.
Ipakita ang pagsabot
Hatagi og oportunidad ang mga estudyante sa pagpakigbahin sa unsay ilang nakat-onan. Kini makadapit sa Espiritu Santo sa pagpamatuod nga ang ilang gipakigbahin tinuod. Ang mosunod nga kalihokan maoy usa ka paagi aron matabangan ang mga estudyante nga mahimo kini.
Hunahunaa ang usa ka higala nga mipakigbahin sa iyang kabalaka mahitungod sa pagdawat og bag-ong calling sa inyong ward o branch. Gikan sa unsay inyong gitun-an karon, unsay pwede ninyong ipakigbahin nga makatabang sa inyong higala?
Mahimo nimong dapiton ang mga boluntaryo sa pagpakigbahin diha sa klase. Ikonsiderar ang pag-awhag sa mga estudyante sa pagdala sa ilang handout sa balay ug ipakigbahin ang ilang nakat-onan sa usa ka sakop sa pamilya o higala. Mahimo kang mopamatuod sa gahom ug kaandam sa Ginoo sa pagpanalangin kanato sa unsay atong gikinahanglan aron magmatinud-anong motrabaho uban Kaniya niining talagsaon nga buhat.