« សាំយូអែល ទី១ ១៦ ៖ ‹ ព្រះយេហូវ៉ាទ្រង់ទតចំពោះក្នុងចិត្តវិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« សាំយូអែល ទី១ ១៦ ៖ ‹ ព្រះយេហូវ៉ាទ្រង់ទតចំពោះក្នុងចិត្តវិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សាំយូអែល ទី១ ៨–១០; ១៣; ១៥–១៦ ៖ មេរៀនទី ៧៣
សាំយូអែល ទី១ ១៦
« ព្រះយេហូវ៉ាទ្រង់ទតចំពោះក្នុងចិត្តវិញ »
ព្រះអម្ចាស់បានបង្ហាញដល់សាំយូអែលថា ទ្រង់បានជ្រើសរើសដេវីឌឲ្យស្នងរាជ្យពីសូលជាស្ដេចនៃអ៊ីស្រាអែល ។ តាមរយៈបទពិសោធន៍នេះ សាំយូអែលបានដឹងថា ព្រះអម្ចាស់ទតឃើញយើងខុសពីមនុស្សធម្មតាឃើញគ្នាទៅវិញទៅមក ។ មេរៀននេះអាចជួយសិស្សឲ្យមានអារម្មណ៍ថា មានសារៈសំខាន់នៃការមើលឃើញខ្លួនឯង និងអ្នកដទៃដូចព្រះវរបិតាសួគ៌ និងព្រះយេស៊ូវគ្រីស្ទ ។
ការរៀបចំសិស្ស ៖ សូមអញ្ជើញសិស្សឲ្យអាន សាំយូអែល ទី១ ១៦:៧ ។ សូមឲ្យពួកគេរាយនៅក្បែរខគម្ពីរដែលមានភាពខុសគ្នារវាងអ្វីដែលពេលខ្លះអ្នកដទៃឲ្យតម្លៃទៅលើមនុស្ស និងអ្វីដែលព្រះវរបិតាសួគ៌ឲ្យតម្លៃលើយើង ។
សកម្មភាពរៀនសូត្រដែលអាចមាន
តម្លៃដែលបានលាក់
សូមពិចារណាចាប់ផ្តើមបង្រៀន ដោយជួយសិស្សឲ្យដឹងថា យើងមិនអាចដឹងពីតម្លៃនៃរបស់អ្វីមួយ ដោយមើលតែកញ្ចប់ពីខាងក្រៅនោះទេ ។ ដើម្បីធ្វើដូច្នេះ អ្នកអាចបង្ហាញវត្ថុដូចគ្នាចំនួនពីរនៅក្នុងកញ្ចប់ពីរផ្សេងគ្នា ឬអ្នកអាចបង្ហាញវត្ថុដែលមានតម្លៃខុសគ្នានៅក្នុងកញ្ចប់ដូចគ្នាពីរ ។ មុននឹងបង្ហាញខ្លឹមសារ សូមអញ្ជើញសិស្សម្នាក់ឲ្យជ្រើសរើសកញ្ចប់ណាមួយដែលពួកគេចង់បានជាង ។ សូមសួរពួកគេពីមូលហេតុដែលពួកគេជ្រើសរើសកញ្ចប់នោះ ។ បន្ទាប់មក បង្ហាញខ្លឹមសារនៃកញ្ចប់ទាំងពីរ ។
-
តើមានបញ្ហាអ្វីខ្លះដែលអាចកើតឡើងពីការវិនិច្ឆ័យអ្នកដទៃ ឬវិនិច្ឆ័យខ្លួនឯងដោយផ្អែកលើអ្វីដែលយើងអាចមើលឃើញ ?
-
តើព្រះតម្រិះរបស់ព្រះចំពោះយើងខុសពីរបៀបដែលយើងអាចមើលឃើញគ្នាទៅវិញទៅមកយ៉ាងដូចម្ដេច ?
សូមពិចារណាបង្ហាញការជំរុញឲ្យមានការឆ្លុះបញ្ចាំងពីខ្លួនឯងដូចខាងក្រោម ។
ជញ្ជឹងគិត និងបំពេញការជំរុញខាងក្រោមនៅក្នុងសៀវភៅកំណត់ហេតុការសិក្សារបស់អ្នក ៖
-
នៅពេលនរណាម្នាក់បានជួបខ្ញុំជាលើកដំបូង ខ្ញុំគិតថាពួកគេទំនងជាកត់សម្គាល់ ។
-
ខ្ញុំជឿថា ព្រះវរបិតាសួគ៌ទតឃើញលក្ខណៈដូចខាងក្រោមដែលខ្ញុំមាន ដែលមនុស្សជាច្រើនមើលមិនឃើញ ៖ ។
-
ពេលខ្ញុំជួបអ្នកដទៃជាលើកដំបូង ខ្ញុំមានទំនោរនឹងកត់សម្គាល់ ។
-
ប្រសិនបើខ្ញុំអាចមើលឃើញអ្នកដទៃដូចដែលព្រះវរបិតាសួគ៌ទតឃើញ នោះវាអាចជួយខ្ញុំឲ្យ ។
នៅពេលអ្នកសិក្សា សាំយូអែល ទី១ ១៦ នៅថ្ងៃនេះ សូមយាងអញ្ជើញព្រះវិញ្ញាណបរិសុទ្ធប្រកបដោយអធិស្ឋាន ដើម្បីជួយអ្នកឲ្យមានអារម្មណ៍ពីសារៈសំខាន់នៃការមើលឃើញខ្លួនអ្នក និងអ្នកដទៃកាន់តែដូចព្រះអម្ចាស់ទតឃើញ ។
ព្រះអម្ចាស់ចាត់សាំយូអែលឲ្យចាក់ប្រេងតែងតាំងស្ដេចបន្ទាប់
ដើម្បីអនុញ្ញាតឲ្យសិស្សទាំងអស់ចូលរួមយ៉ាងសកម្ម សូមពិចារណាដាក់សិស្សជាគូៗ ។ សូមអញ្ជើញដៃគូឲ្យអានវគ្គបទគម្ពីរពីរខាងក្រោម ហើយពិភាក្សាសំណួរដែលមានបន្ទាប់ ។ មុនពេលសិស្សអាន សូមប្រាកដថាពួកគេដឹងថា ដោយសារការមិនស្តាប់បង្គាប់របស់សូល ព្រះអម្ចាស់បានបដិសេធគាត់ជាស្តេចអ៊ីស្រាអែល ( សូមមើល សាំយូអែល ទី១ ១៣:១៣–១៤; ១៥:២៦–២៨ ) ។
សូមអាន សាំយូអែល ទី១ ១៦:១–៥ ដើម្បីមើលពីមូលហេតុដែលព្រះអម្ចាស់បានចាត់សាំយូអែលទៅបេថ្លេហិម ។
-
ប្រសិនបើព្រះអម្ចាស់បានប្រទានឲ្យអ្នកនូវការទទួលខុសត្រូវរបស់សាំយូអែលក្នុងការចាក់ប្រេងតាំងស្តេចថ្មី តើអ្នកនឹងស្វែងរកគុណសម្បត្តិអ្វីខ្លះនៅក្នុងកូនរបស់អ៊ីសាយ ?
សូមអាន ខទី ៦–១៣ ដោយស្វែងរកសេចក្តីពិតដែលព្រះអម្ចាស់បានបង្រៀន នៅពេលសាំយូអែលព្យាយាមស្វែងរកស្តេចសម្រាប់ពេលអនាគត ។
-
តើអ្នកបានរៀនអ្វីខ្លះពីដំណើររឿងនេះដែលមានសារៈសំខាន់សម្រាប់មនុស្សសព្វថ្ងៃនេះដើម្បីឈ្វេងយល់ ?
នៅពេលដែលដៃគូទាំងឡាយបានបញ្ចប់ការចែកចាយអ្វីដែលពួកគេបានរៀនហើយ សូមអញ្ជើញដៃគូនីមួយៗឲ្យសរសេរសេចក្តីពិតមួយនៅលើក្ដារខៀន រួមជាមួយនឹងលេខខគម្ពីរដែលពួកគេបានរកឃើញសេចក្តីពិតនោះ ។
សិស្សអាចសរសេរសេចក្តីពិតជាច្រើនជាពាក្យពេចន៍របស់ពួកគេផ្ទាល់ ដូចជា ព្រះទតឃើញសក្តានុពលពិតប្រាកដរបស់យើង ដោយទតឃើញពីដួងចិត្តរបស់យើងជាជាងរូបរាងខាងក្រៅរបស់យើង ។
-
តើអ្នកបានរៀនអ្វីខ្លះពីព្រះគម្ពីរ និងថ្នាក់ដឹកនាំសាសនាចក្រអំពីគុណសម្បត្ដិដែលព្រះអម្ចាស់ឲ្យតម្លៃ ?
-
តើអ្នកគិតថាទំនាក់ទំនងរបស់យើងជាមួយអ្នកដទៃនឹងខុសគ្នាយ៉ាងដូចម្ដេច ប្រសិនបើយើងបានមើលឃើញខ្លួនយើង និងគ្នាទៅវិញទៅមកដូចជាព្រះអម្ចាស់ទតឃើញយើង ?
ជួយសិស្សឲ្យយល់ដឹងកាន់តែស៊ីជម្រៅ
ជម្រើសខាងក្រោមនេះគឺជាវិធីសាស្ត្រផ្សេងៗសម្រាប់សិស្សក្នុងការឈ្វេងយល់កាន់តែស៊ីជម្រៅអំពីអ្វីដែលព្រះអម្ចាស់បានបង្រៀននៅក្នុង សាំយូអែល ទី១ ១៦:៧ ។ ជ្រើសរើសវិធីសាស្រ្តដែលអ្នកយល់ថា ល្អបំផុតសម្រាប់សិស្សរបស់អ្នក ។
មុននឹងបង្ហាញជម្រើសនេះ ឬជម្រើសនានានៃជម្រើសរបស់អ្នក សូមពិចារណាជួយសិស្សទាក់ទងនឹងអ្វីដែលពួកគេនឹងសិក្សានៅក្នុងជីវិតពិត ។ អ្នកអាចធ្វើការណ៍នេះបានដោយបង្ហាញពីស្ថានភាពខ្លីៗដែលសិស្សអាចជួយបាន ។ ឧទាហរណ៍ អ្នកអាចសុំឲ្យពួកគេរកមើលអ្វីដែលពួកគេអាចចែកចាយជាមួយនរណាម្នាក់ដែលមានអារម្មណ៍ត្រូវបានគេមើលរំលង ឬវិនិច្ឆ័យខុសពីមនុស្សជុំវិញខ្លួន ។ ឬអ្នកអាចអញ្ជើញសិស្សឲ្យរកមើលអ្វីដែលពួកគេអាចនឹងចែកចាយជាមួយនរណាម្នាក់ដែលមានអារម្មណ៍ថាព្រះអម្ចាស់ពិតជាមិនយល់អំពីពួកគេនោះទេ ។
ជម្រើសទី ១
សូមពិចារណាឲ្យសិស្សសហការគ្នាជាគូៗ ។ សូមឲ្យសិស្សម្នាក់ៗសិក្សាសេចក្ដីថ្លែងការណ៍ផ្សេងៗគ្នា ។ បន្ទាប់មក សិស្សអាចចែកចាយអ្វីដែលពួកគេរៀនជាមួយដៃគូរបស់ពួកគេ ។ អ្នកប្រហែលជាចង់បង្ហាញ ឬផ្តល់ច្បាប់ចម្លងនៃសេចក្តីថ្លែងការណ៍នោះ ។
ប្រធាន ឌៀថើរ អេហ្វ អុជដូហ្វ ដែលពេលនោះជាគណៈប្រធានទីមួយបានមានប្រសាសន៍ ៖
ចំណាប់ព្រះទ័យរបស់ព្រះវរបិតាសួគ៌ទៅលើបងប្អូនមិនផ្អែកទៅលើទ្រព្យសម្បត្តិ ឬសម្រស់ ឬសុខភាព ឬភាពឆ្លាតវៃដែលបងប្អូនមាននោះទេ ។ ទ្រង់ទតមើលបងប្អូន មិនដូចជាពិភពលោកនេះមើលទៅបងប្អូនឡើយ ទ្រង់ទតទៅបងប្អូនក្នុងនាមជាបងប្អូនផ្ទាល់ ។ ទ្រង់ទតមើលចិត្តរបស់បងប្អូន ។ ហើយទ្រង់ស្រឡាញ់បងប្អូន ដោយសារបងប្អូនជាបុត្ររបស់ទ្រង់ ។ ( « Your Wonderful Journey Home » Liahona ខែឧសភា ឆ្នាំ២០១៣ ទំព័រ ១២៨ )
ស៊ីស្ទើរ មីឈែល ឌី ក្រេហ្គ អតីតសមាជិកគណៈប្រធានយុវនារី បានពន្យល់ថា ៖
ព្រះយេស៊ូវគ្រីស្ទទតឃើញយ៉ាងជ្រៅពីតម្លៃរបស់មនុស្ស ។ ទ្រង់ទតព្រះនេត្រទៅបុគ្គលម្នាក់ៗ សេចក្តីត្រូវការរបស់ពួកគេ ហើយទ្រង់ជ្រាបពីសក្តានុពលរបស់ពួកគេ ។ ខណៈដែលអ្នកដទៃមើលឃើញត្រឹមតែជាអ្នកនេសាទមនុស្ស អ្នកមានបាប ឬអ្នកទារពន្ធ ប៉ុន្តែព្រះយេស៊ូវបានទតឃើញពួកគេថាជាសិស្ស ខណៈដែល អ្នកដទៃឃើញបុរសម្នាក់ថាគ្រាន់តែមានអារក្សចូល នោះព្រះយេស៊ូវបានទតមើលហួសពីទុក្ខកង្វល់នៅផ្នែកខាងក្រៅ បានទទួលស្គាល់បុរសនោះ ហើយបានព្យាបាលគាត់ឲ្យជា ។
សូម្បីតែនៅក្នុងជីវិតដ៏មមាញឹករបស់យើង យើងក៏អាចដើរតាមគំរូរបស់ព្រះយេស៊ូវហើយមើលមនុស្សម្នាក់ៗ—ឃើញពីតម្រូវការសេចក្តីជំនឿការតស៊ូ និងសក្តានុពលរបស់ពួកគេ ។ ( « Eyes to See » Liahona ខែវិច្ឆិកា ឆ្នាំ២០២០ ទំព័រ ១៦ )
ជម្រើសទី ២
សិស្សអាចស្វែងរកបញ្ជីនៃវគ្គចំណេះចំណានខាងគោលលទ្ធិនៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) សម្រាប់វគ្គដែលជួយពួកគេឲ្យយល់ពីរបៀបដែលព្រះមានព្រះទ័យចំពោះយើង និងរបៀបដែលទ្រង់ស្គាល់យើងយ៉ាងល្អឥតខ្ចោះ ។ សិស្សអាចធ្វើការជាក្រុមដែលមានគ្នាបួននាក់ ដោយសិស្សម្នាក់ៗស្វែងរកវគ្គបទគម្ពីរដែលអាចអនុវត្តបានពីព្រះគម្ពីរបរមាណីមួយក្នុងចំណោមព្រះគម្ពីរបរមាណីទាំងបួន ។ ( គំរូដែលពួកគេអាចចែកចាយរួមមាន អ័ប្រាហាំ ៣:២២–២៣; យេរេមា ១:៤–៥; ហេព្រើរ ១២:៩; អាលម៉ា ៧:១១–១៣; គោលលទ្ធិ និងសេចក្តីសញ្ញា ១៨:១០–១១ ) ។
ជម្រើសទី ៣
សូមបង្ហាញវីដេអូដែលជួយសិស្សយល់ពីរបៀបដែលព្រះទតឃើញយើង ឬបង្ហាញពីអ្នកណាម្នាក់មើលឃើញអ្នកដទៃដូចទ្រង់ទតឃើញដែរ ។ សូមអញ្ជើញសិស្សឲ្យគិតពិចារណា ហើយត្រៀមខ្លួនដើម្បីចែកចាយស្ថានភាពក្នុងជីវិតពិត នៅពេលពួកគេអាចប្រើអ្វីដែលពួកគេរៀនពីវីដេអូ ។ វីដេអូ ៖ « Our True Identity » ( ៣:៣៩ ) ដែលមានលើគេហទំព័រ ChurchofJesusChrist.org គឺជាគំរូមួយដែលអ្នកអាចប្រើប្រាស់បាន ។
បទពិសោធន៍ផ្ទាល់ខ្លួន
មេរៀនផ្នែកនេះអាចជួយសិស្សឲ្យយល់ពីសារៈសំខាន់នៃការមើលឃើញខ្លួនឯង និងអ្នកដទៃដូចព្រះវរបិតាសួគ៌ និងព្រះយេស៊ូវគ្រីស្ទទតព្រះនេត្រ ។ ការចងចាំ និងការចែកចាយបទពិសោធន៍អាចយាងព្រះវិញ្ញាណបរិសុទ្ធឲ្យថ្លែងទីបន្ទាល់អំពីសេចក្ដីពិតដែលសិស្សកំពុងរៀន ។
វាអាចមានប្រយោជន៍ក្នុងការដាក់បង្ហាញជម្រើសខាងក្រោម ។
ជ្រើសរើសជម្រើសមួយក្នុងចំណោមជម្រើសខាងក្រោមនេះ ហើយកត់ត្រាគំនិតរបស់អ្នកដាក់នៅក្នុងសៀវភៅកំណត់ហេតុការសិក្សារបស់អ្នក ។ សូមប្រាកដថាបានរួមបញ្ចូលនូវអ្វីដែលអ្នកបានរៀនអំពីព្រះនៅថ្ងៃនេះពីបទគម្ពីរ ឬថ្នាក់ដឹកនាំសាសនាចក្រ ។
-
សរសេរអំពីនរណាម្នាក់ដែលហាក់ដូចជាមើលឃើញភាពល្អនៅក្នុងខ្លួនអ្នក ទោះបីជាពួកគេដឹងពីភាពទន់ខ្សោយ និងកំហុសរបស់អ្នកខ្លះក៏ដោយ ។ តើឥទ្ធិពលរបស់ពួកគេមានជះឥទ្ធិពលយ៉ាងណាចំពោះអារម្មណ៍របស់អ្នកចំពោះខ្លួនអ្នក ? តើឥទ្ធិពលរបស់ពួកគេរំឭកអ្នកពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទទតឃើញអ្នកយ៉ាងដូចម្ដេច ?
-
សរសេរអំពីនរណាម្នាក់ដែលអ្នកស្រឡាញ់ និងកោតសរសើរ នៅពេលដែលអ្នកបានស្គាល់ពួកគេកាន់តែច្បាស់ ។ តើអ្នកមើលឃើញពួកគេមានគុណសម្បត្តិអ្វីខ្លះ ដែលអ្នកផ្សេងទៀតប្រហែលជាមិនបានមើលឃើញ ឬដែលអ្នកមិនបានមើលឃើញនៅពេលអ្នកជួបពួកគេជាលើកដំបូង ? តើអ្នកមានអារម្មណ៍ទទួលបានការចាប់អារម្មណ៍ពីព្រះវិញ្ញាណបរិសុទ្ធអំពីរបៀបដែលអ្នកអាចជួយពួកគេមើលឃើញខ្លួនឯងតាមរបៀបដែលអ្នកមើលឃើញពួកគេ ឬរបៀបដែលព្រះវរបិតាសួគ៌ និងព្រះយេស៊ូវគ្រីស្ទទតឃើញពួកគេដែរឬទេ ?
សូមអញ្ជើញអ្នកស្ម័គ្រចិត្តឲ្យចែកចាយផ្នែកខ្លះនៃអ្វីដែលពួកគេបានកត់ត្រាក្នុងសៀវភៅកំណត់ហេតុការសិក្សារបស់ពួកគេ ។