« សាំយូអែល ទី១ ១៥ ៖ ការព្យាយាមរក្សាបទបញ្ញត្តិទាំងឡាយរបស់ព្រះ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« សាំយូអែល ទី១ ១៥ ៖ ការព្យាយាមរក្សាបទបញ្ញត្តិទាំងឡាយរបស់ព្រះ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សាំយូអែល ទី១ ៨–១០; ១៣; ១៥–១៦ ៖ មេរៀនទី ៧២
សាំយូអែល ទី១ ១៥
ការព្យាយាមរក្សាបទបញ្ញត្តិទាំងឡាយរបស់ព្រះ
ទោះជាព្រះប្រទានបទបញ្ញត្តិទាំងឡាយដើម្បីណែនាំយើង ហើយនាំមកនូវអំណរក៏ដោយ យើងអាចនឹងត្រូវបានល្បួងឲ្យឆ្លើយតបនឹងបទបញ្ញត្តិទាំងឡាយរបស់ទ្រង់តាមរបៀបដែលសូលបានធ្វើ ។ ព្រះបានប្រទានការណែនាំជាក់លាក់ដល់សូល និងកងទ័ពរបស់គាត់តាមរយៈព្យាការីសាំយូអែល អំពីទំនាស់របស់ពួកគេជាមួយនឹងពួកអាម៉ាលេក ។ សូល និងកងទ័ពរបស់ទ្រង់បានធ្វើតាមបទបញ្ញត្តិរបស់ព្រះមួយចំនួន ប៉ុន្តែមានអារម្មណ៍ថាការមិនគោរពតាមបទបញ្ញត្តិផ្សេងទៀតក៏សមហេតុសមផលដែរ ។ មេរៀននេះអាចជួយសិស្សឲ្យយល់អំពីសារៈសំខាន់នៃការព្យាយាមគោរពតាមបទបញ្ញត្តិទាំងឡាយរបស់ព្រះ ។
ការរៀបចំសិស្ស ៖ សូមអញ្ជើញសិស្សឲ្យគិតអំពីហេតុផលដែលមនុស្សអាចមានសម្រាប់ការជ្រើសរើសមិនគោរពតាមបទបញ្ញត្តិទាំងឡាយរបស់ព្រះ ។ សិស្សអាចកត់ត្រាបញ្ជីរបស់ពួកគេនៅក្នុងកំណត់ចំណាំនៅលើទូរសព្ទរបស់ពួកគេ ឬសរសេរវានៅលើក្រដាសតូចមួយ ។ អញ្ជើញសិស្សឲ្យយកបញ្ជីរបស់ពួកគេមកក្នុងថ្នាក់រៀន ។
សកម្មភាពរៀនសូត្រដែលអាចមាន
កង់ទីន
សូមពិចារណាចាប់ផ្តើមថ្នាក់រៀនដោយធ្វើឲ្យស្ថានភាពមានលក្ខណៈផ្ទុយគ្នា នៅពេលដែលស្ថានភាពត្រឹមត្រូវសម្រាប់ជ្រើសរើសអ្វីដែលយើងចូលចិត្តជាមួយនឹងស្ថានភាពនៅពេលដែលយើងជ្រើសរើសអ្វីមិនចូលចិត្ត ។ អ្នកអាចបង្ហាញអាហារជាច្រើនប្រភេទ ឬរូបភាពនៃអាហារជាច្រើនប្រភេទ ។ សូមអញ្ជើញសិស្សឲ្យស្រមៃមើលថាអាហារទាំងអស់នេះមានសម្រាប់ឲ្យពួកគេបរិភោគ ។
-
តើអាហារណាដែលអ្នកជ្រើសរើសបរិភោគ ? តើអ្នកនឹងជ្រើសរើសមិនបរិភោគអាហារមួយណា ? ហេតុអ្វី ?
សូមអានសេចក្តីថ្លែងការណ៍នេះពីប្រធាន រ័សុល អិម ណិលសុន ដោយរកមើលពីរបៀបដែលវិធីរបស់យើងក្នុងការគោរពតាមបទបញ្ញត្តិទាំងឡាយរបស់ព្រះគួរតែខុសគ្នាពីរបៀបដែលយើងជ្រើសរើសអាហាររបស់យើង ៖
[ មាន ] សេចក្ដីជំនឿដើម្បីកាន់តាមព្រះបញ្ញតិ្ត ទាំងអស់ របស់ព្រះ ដោយដឹងថា វាត្រូវបានប្រទានមកដើម្បីផ្ដល់ពរជ័យដល់បុត្រាបុត្រីរបស់ទ្រង់ ហើយនាំឲ្យពួកគេមានអំណរ ។ [ អ្នក ] នឹងជួបប្រទះមនុស្សដែលនឹងជ្រើសយកបទបញ្ញត្តិណាមួយដែលពួកគេនឹងគោរពតាម ហើយមិនអើពើនឹងបទបញ្ញត្តិទាំងឡាយផ្សេងៗទៀតដែលពួកគេបានជ្រើសរើសដើម្បីបំពាន ។ ខ្ញុំហៅការណ៍នេះថា ការគោរពប្រតិបត្តិដូចជាការហូបអាហារនៅកង់ទីន ។ ការអនុវត្តនៃការរើសមួយទុកមួយនេះនឹងគ្មានបានការទេ ។ វានឹងនាំទៅរកសេចក្ដីវេទនា ។ ដើម្បីរៀបចំខ្លួនទៅជួបនឹងព្រះ បុគ្គលម្នាក់ត្រូវកាន់តាមបទបញ្ញត្តិទាំងឡាយរបស់ទ្រង់ ទាំងអស់ ។ វាត្រូវការសេចក្ដីជំនឿដើម្បីគោរពតាមព្រះបញ្ញត្តិទាំងឡាយ ហើយការកាន់តាមព្រះបញ្ញត្តិទាំងឡាយនឹងពង្រឹងដល់សេចក្ដីជំនឿនោះ ។ ( « Face the Future with Faith » Liahona ខែឧសភា ឆ្នាំ២០១១ ទំព័រ ៣៤ )
សូមអញ្ជើញសិស្សឲ្យសង្ខេបពីអ្វីដែលប្រធាន ណិលសុន បានបង្រៀនអំពីការរក្សាបទបញ្ញត្តិទាំងឡាយរបស់ព្រះទៅជាសេចក្តីថ្លែងការណ៍នៃសេចក្ដីពិត ។ ដោយប្រើពាក្យពេចន៍ផ្ទាល់របស់សិស្ស សូមជួយពួកគេឲ្យស្គាល់សេចក្តីពិតមួយ ដូចជា ការព្យាយាមរក្សានូវបទបញ្ញត្តិទាំងឡាយរបស់ព្រះនាំឲ្យមានអំណរ ឬ ការចាប់យក ហើយជ្រើសរើសបទបញ្ញត្តិណាមួយរបស់ព្រះដើម្បីគោរពតាម នាំទៅរកទុក្ខវេទនា ។
-
ហេតុអ្វីបានជាមនុស្សម្នាក់អាចជ្រើសរើសមិនរក្សាបទបញ្ញត្តិជាក់លាក់មួយចំនួនពីព្រះ ?
សូមជញ្ជឹងគិតពីវិធីសាស្រ្តផ្ទាល់ខ្លួនរបស់អ្នកក្នុងការគោរពតាមបទបញ្ញត្តិទាំងឡាយរបស់ព្រះ ដោយការជញ្ជឹងគិតដោយស្ងៀមស្ងាត់នូវសំណួរខាងក្រោមនេះ ៖
-
តើអ្នកឆ្លើយតបយ៉ាងណា ពេលអ្នកឮបទបញ្ញត្តិ ឬបទដ្ឋានមួយដែលអ្នកប្រហែលជាមិនប្រាកដថាអ្នកចង់គោរពតាម ?
-
តើការព្យាយាមគោរពតាមបទបញ្ញត្តិទាំងឡាយរបស់ព្រះមានសារៈសំខាន់សម្រាប់អ្នកយ៉ាងណា ?
នៅពេលអ្នកសិក្សាថ្ងៃនេះ សូមស្វែងរកជំនួយពីព្រះវិញ្ញាណក្នុងការយល់ពីសារៈសំខាន់នៃការព្យាយាមគោរពតាមបទបញ្ញត្តិទាំងអស់របស់ព្រះ ។
ជម្រើសរបស់ស្តេចសូល
សូមពិចារណាអំពីការសង្ខេប ឬអានកថាខណ្ឌខាងក្រោមនេះ ដើម្បីជួយសិស្សយល់អំពីព្រឹត្តិការណ៍ដែលដឹកនាំទៅកាន់ សាំយូអែល ទី១ ១៥ ។
បន្ទាប់ពីព្រះអម្ចាស់បានមានព្រះបន្ទូលប្រាប់សាំយូអែលដើម្បីអនុញ្ញាតឲ្យពួកសាសន៏អ៊ីស្រាអែលមានស្តេចមួយអង្គ នោះព្រះអម្ចាស់បានបង្គាប់សាំយូអែលឲ្យចាក់ប្រេងតែងតាំងយុវជនម្នាក់ឈ្មោះសូលឲ្យធ្វើជាស្តេច ( សូមមើល សាំយូអែល ទី១ ៨–១០ ) ។ ពេលដែលរងការគំរាមកំហែងពីការវាយប្រហារពីពួកភីលីស្ទីន សូលមិនគោរពព្រះអម្ចាស់ដោយថ្វាយដង្វាយដុតដែលទ្រង់មិនត្រូវបានអនុញ្ញាតឲ្យធ្វើ ( សូមមើល សាំយូអែល ទី១ ១៣:៨–៩ ) ។ បន្ទាប់មក សាំយូអែលបានបង្រៀនសូលពីផលវិបាកនៃការមិនគោរពប្រតិបត្តិរបស់ទ្រង់ ( សូមមើល សាំយូអែល ទី១ ១៣:១០–១៤ ) ។ នៅក្នុង ជំពូកទី ១៥ យើងឃើញគំរូស្រដៀងគ្នានេះ នៅពេលដែលសូលមិនធ្វើតាមការណែនាំរបស់ព្រះអម្ចាស់ឲ្យបានត្រឹមត្រូវ ។
សូមអាន សាំយូអែល ទី១ ១៥:១–៣, ៧–៩ ដែលព្រះអម្ចាស់បានប្រទានដល់សូល និងបទបញ្ញត្តិជាក់លាក់ដល់កងទ័ពរបស់ទ្រង់ ។ នៅពេលអ្នកអាន សូមរកមើលបទបញ្ញត្តិណាមួយរបស់ព្រះអម្ចាស់ ដែលសូល និងកងទ័ពរបស់ទ្រង់បានជ្រើសរើសដើម្បីគោរពតាម ហើយបទបញ្ញត្តិណាមួយដែលពួកគេជ្រើសរើសមិនគោរពតាម ។
អ្នកអាចរំឭកសិស្សថា យើងមិនដឹងពីមូលហេតុទាំងអស់ដែលព្រះបានបញ្ជាសូល និងកងទ័ពរបស់ទ្រង់ឲ្យបំផ្លាញពួកអាម៉ាលេក និងសត្វរបស់ពួកគេទេ ។ ប៉ុន្តែយើងដឹងថាព្រះគឺល្អឥតខ្ចោះ ហើយស្រឡាញ់បុត្រាបុត្រីរបស់ទ្រង់ទាំងអស់ ហើយយើងនៅតែអាចរៀនមេរៀនដ៏មានតម្លៃពីការឆ្លើយតបរបស់សូលចំពោះបទបញ្ញត្តិទាំងឡាយរបស់ព្រះ ។
-
តើសេចក្ដីពិតដែលបានបង្រៀនដោយប្រធាន ណិលសុន បានជួយសូល និងកងទ័ពរបស់ទ្រង់យ៉ាងដូចម្ដេច ?
ឥរិយាបថ និងហេតុផល
សកម្មភាពសិក្សាខាងក្រោមអាចជួយសិស្សឲ្យស្គាល់ឥរិយាបថ និងការដោះសាដែលអាចនាំទៅរកការមិនគោរពប្រតិបត្តិតាមព្រះ ។ សិស្សអាចបំពេញសកម្មភាពជាក្រុម ឬជាបុគ្គល ។
បន្ទាប់ពីច្បាំងជាមួយពួកអាម៉ាលេកហើយ សាំយូអែលបានទូលទៅកាន់សូលអំពីការមិនគោរពប្រតិបត្តិរបស់ទ្រង់ និងកងទ័ពរបស់ទ្រង់ ។
សូមអាន សាំយូអែល ទី១ ១៥:១៣–២៤ ដោយរកមើលឥរិយាបថនិងការដោះសាដែលមានឥទ្ធិពលលើជម្រើសរបស់សូលក្នុងការមិនគោរពប្រតិបត្តិតាមបទបញ្ញត្តិទាំងឡាយរបស់ព្រះ ។
សិស្សអាចសរសេរអ្វីដែលពួកគេរកឃើញនៅលើក្ដារខៀន ។ ពួកគេអាចចង្អុលបង្ហាញថា សូល ៖
-
កុហកអំពីការគោរពប្រតិបត្តិរបស់ទ្រង់ ( ខទី ១៣, ២០ ) ។
-
ព្យាយាមបង្ហាញអំពីភាពត្រឹមត្រូវនៃការគោរពប្រតិបត្តិរបស់ទ្រង់ ( ខទី ១៥, ២១ ) ។
-
បន្ទោសអ្នកដទៃចំពោះទង្វើរបស់ទ្រង់ ( ខទី ១៥, ២១ ) ។
-
ប្រែជាមានមោទនភាព ( ខទី ១៧ ) ។
-
មិនបានកំណត់អាទិភាពអ្វីដែលសំខាន់បំផុតទេ ( ខទី ២២ ) ។
-
ខ្វល់ខ្វាយច្រើនអំពីយោបល់របស់អ្នកដទៃ ជាជាងការគោរពតាមព្រះ ( ខទី ២៤ ) ។
អ្នកអាចអញ្ជើញសិស្សឲ្យប្រៀបធៀបអាកប្បកិរិយា និងហេតុផលរបស់សូល ជាមួយនឹងអាកប្បកិរិយា និងសកម្មភាពរបស់ព្រះអង្គសង្គ្រោះនៅក្នុង ម៉ាថាយ ២៦:៣៦–៣៩ ។ សូមអញ្ជើញសិស្សឲ្យចែកចាយអ្វីដែលពួកគេរៀនអំពីការគោរពប្រតិបត្តិពីគំរូរបស់ព្រះអង្គសង្គ្រោះ ។
បន្ទាប់មក សូមពិចារណាបំបែកសិស្សជាក្រុមៗ ។ សុំឲ្យពួកគេបង្កើតបញ្ជីខាងក្រោម ។
សូមធ្វើបញ្ជីនៃបទបញ្ញត្តិមួយចំនួនដែលមនុស្សសព្វថ្ងៃនេះអាចនឹងជ្រើសរើសមើលរំលង ឬមិនអើពើ ។
សុំឲ្យក្រុមនីមួយៗជ្រើសរើសបទបញ្ញត្តិមួយក្នុងបញ្ជីរបស់ពួកគេ ។ សូមឲ្យពួកគេបង្កើតសាច់រឿងមួយដែលក្មេងវ័យជំទង់អាចនឹងត្រូវបានល្បួងឲ្យមិនគោរពតាមបទបញ្ញត្តិទាំងឡាយ ដោយការទទួលយកអាកប្បកិរិយា ឬហេតុផលមួយចំនួនដែលសិស្សបានរកឃើញពី សាំយូអែល ទី១ ១៥ ឬអ្នកអាចមើល « Honesty: You Better Believe It! » ( ៤:៤៦ ) ពីគេហទំព័រ ChurchofJesusChrist.org ។ សូមបញ្ឈប់វីដេអូនៅនាទីទី ១:២៧ ហើយអញ្ជើញសិស្សឲ្យប្រើស្ថានភាពរបស់យុវនារីជាសាច់រឿង ។ ( អ្នកអាចបង្ហាញសេចក្ដីបញ្ចប់នៃវីដេអូ បន្ទាប់ពីសិស្សឆ្លើយសំណួរខាងក្រោមហើយ ) ។
ដោយប្រើសាច់រឿងរបស់ពួកគេ សូមអញ្ជើញសិស្សឲ្យពិភាក្សាសំណួរខាងក្រោមជាមួយក្រុមរបស់ពួកគេ ។
-
តើអ្នកណាម្នាក់ក្នុងស្ថានភាពនេះអាចត្រូវល្បួងឲ្យប្រើអាកប្បកិរិយា ឬហេតុផលដែលសូលបានប្រើ ?
-
តើការជ្រើសរើសដើម្បីគោរពតាម ឬមិនគោរពបទបញ្ញត្តិទាំងឡាយនេះនៅទីបំផុតអាចនាំទៅរកអំណរ ឬទុក្ខវេទនាដោយរបៀបណា ?
-
តើការបង្រៀនដំណឹងល្អដែលទាក់ទងនឹងអ្វីដែលអាចជួយយើងជ្រើសរើសគោរពតាមព្រះ ប្រសិនបើយើងស្ថិតក្នុងស្ថានភាពនេះ ?
សេចក្តីស្រឡាញ់របស់ព្រះ
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានជួយយើងឲ្យយល់អំពីមូលហេតុដែលព្រះវរបិតាសួគ៌ និងព្រះយេស៊ូវគ្រីស្ទប្រទានក្រឹត្យវិន័យដល់យើង ដែលទ្រង់ទាំងទ្វេរំពឹងថាយើងគោរពតាម ៖
សេចក្តីស្រឡាញ់របស់ព្រះវរបិតានិងព្រះរាជបុត្រាត្រូវបានផ្តល់ដោយសេរី ប៉ុន្តែក៏រួមបញ្ចូលទាំងក្តីសង្ឃឹមនិងការរំពឹងទុកផងដែរ ។ … [ ស ] ម្រង់សម្តីរបស់ប្រធាន ណិលសុន ថា ក្រឹត្យវិន័យរបស់ព្រះត្រូវបានលើកកម្ពស់ទាំងស្រុង តាមរយៈសេចក្ដីស្រឡាញ់ដ៏គ្មានដែនកំណត់របស់ទ្រង់ចំពោះយើង និងព្រះរាជបំណងរបស់ទ្រង់ចង់ឲ្យយើងក្លាយជាអ្វីៗដែលយើងអាចប្រែក្លាយ » ។
ដោយសារទ្រង់ទាំងទ្វេស្រឡាញ់បងប្អូន នោះទ្រង់ទាំងទ្វេមិនសព្វព្រះទ័យទុកឲ្យបងប្អូន « ក្នុងសភាពដែលបងប្អូនមាន » នោះទេ ។ ដោយសារតែទ្រង់ទាំងទ្វេស្រឡាញ់បងប្អូន នោះទ្រង់ទាំងទ្វេសព្វព្រះទ័យឲ្យបងប្អូនមានភាពរីករាយនិងជោគជ័យ ។ ដោយសារទ្រង់ទាំងទ្វេស្រឡាញ់បងប្អូន នោះទ្រង់ទាំងទ្វេមានព្រះទ័យឲ្យបងប្អូនប្រែចិត្ត ដោយសារនោះជាផ្លូវទៅកាន់ភាពរីករាយ ។ ប៉ុន្តែវាជាជម្រើសរបស់បងប្អូន—ទ្រង់ទាំងទ្វេគោរពសិទ្ធិជ្រើសរើសរបស់បងប្អូន ។ បងប្អូនត្រូវតែជ្រើសស្រឡាញ់ទ្រង់ បម្រើទ្រង់ រក្សាបទបញ្ញត្តិទាំងឡាយរបស់ទ្រង់ទាំងទ្វេ ។ បន្ទាប់មក ទ្រង់អាច ប្រទានពរ ក៏ដូចជា ស្រឡាញ់ បងប្អូនកាន់តែបរិបូរឡើង ។ ( « ក្តីស្រឡាញ់នៃព្រះ » លីអាហូណា ខែវិច្ឆិកា ឆ្នាំ២០២១ ទំព័រ ១៨ )
-
តើអ្នកនឹងចែកចាយអ្វីពីសេចក្ដីថ្លែងការណ៍នេះជាមួយនឹងនរណាម្នាក់ដែលមានអារម្មណ៍ថាបទបញ្ញត្តិទាំងឡាយរបស់ព្រះមិនសំខាន់ខ្លាំងនោះ ?
-
តើការរក្សាបទបញ្ញត្តិជាក់លាក់មួយរបស់ព្រះបានជួយអ្នកឲ្យមាន « ភាពរីករាយនិងជោគជ័យ » យ៉ាងដូចម្ដេច ?
ការជ្រើសរើសគោរពតាមបទបញ្ញត្តិទាំងឡាយរបស់ព្រះ
អ្នកអាចនឹងប្រាប់សិស្សថា ការជ្រើសរើសរបស់សូលដើម្បីបដិសេធព្រះឱវាទរបស់ព្រះបាននាំឲ្យព្រះបានណែនាំសាំយូអែលឲ្យស្វែងរកស្ដេចមួយអង្គទៀតដើម្បីជំនួសសូល ( សូមមើល សាំយូអែល ទី១ ១៣:១៤; ១៥:២៨ ) ។
ដើម្បីជួយសិស្សបង្ហាញការយល់ដឹងរបស់ពួកគេអំពីសារៈសំខាន់នៃការគោរពតាមបទបញ្ញត្តិទាំងឡាយរបស់ព្រះ សូមពិចារណាបង្ហាញការណែនាំខាងក្រោម ។
សូមជ្រើសរើសសកម្មភាពមួយក្នុងចំណោមសកម្មភាពខាងក្រោមនេះ ដើម្បីបំពេញនៅក្នុងសៀវភៅកំណត់ហេតុការសិក្សារបស់អ្នក ៖
-
សូមស្រមៃថា អ្នកមានមិត្តភក្តិដែលជាពួកបរិសុទ្ធថ្ងៃចុងក្រោយ ហើយដែលជាអ្នកមានហេតុផលដើម្បីបំពានបទបញ្ញត្តិមួយចំនួន ។ ពួកគេបានដាក់សម្ពាធឲ្យអ្នកធ្វើដូចគ្នា ។ សូមសរសេរអ្វីដែលអ្នកចង់ចងចាំពីមេរៀននេះ ដើម្បីជួយអ្នកធ្វើតាមបទបញ្ញត្តិទាំងឡាយរបស់ព្រះ ។
-
សូមបំពេញចន្លោះ ៖ ខ្ញុំចង់គោរពតាមបទបញ្ញត្តិទាំងឡាយរបស់ព្រះ ពីព្រោះ ។ អ្វីមួយដែលខ្ញុំចង់ចងចាំពីអ្វីដែលខ្ញុំទទួលអារម្មណ៍ ឬបានរៀននៅថ្ងៃនេះគឺ ។
សូមពិចារណាពីការចែកចាយទីបន្ទាល់របស់អ្នកអំពីពរជ័យដែលមកពីការព្យាយាមគោរពតាមបទបញ្ញត្តិទាំងឡាយរបស់ព្រះ ។