1 Samuel 15

• Unsa nga mga pagkaon ang imong kaonon? Unsa ang imong pilion nga dili kaonon? Ngano man?

Basaha kini nga pahayag gikan ni Presidente Russell M. Nelson, nga pangitaon kon sa unsang paagi lahi ang atong pamaagi sa pagsunod sa mga sugo sa Dios gikan sa pagpili og pagkaon:

14:33

[Pagbaton og] hugot nga pagtuo sa pagsunod sa tanang mga sugo sa Dios, kay nakahibalo nga kini gihatag aron sa pagpanalangin sa Iyang mga anak ug paghatag kanila sa hingpit nga kalipay. Makasugat [kamo] og mga tawo nga pilion lang ang mga sugo nga ilang tumanon ug mobaliwala sa uban nga ilang gipiling supakon. Gitawag ko kini og pangkarinderya nga pagkamasulundon. Kini nga kinaiya sa pagpili-pili dili magsilbi. Mopadulong kini ngadto sa kauyamot. Aron andam nga mosugat sa Dios, kita motuman sa tanan Niyang mga sugo. Nagkinahanglan og hugot nga pagtuo ang pagtuman niini, ug ang pagtuman sa Iyang mga sugo makapalig-on niana nga pagtuo. (“Atubanga ang Umaabut uban sa Hugot nga Pagtuo,” Liahona, Mayo 2011, 34)

• Ngano kaha nga pilion sa usa ka tawo nga dili tumanon ang piho nga sugo gikan sa Dios?

Pamalandonga ang imong pamaagi sa pagsunod sa mga sugo sa Dios pinaagi sa hilom nga pagpamalandong sa mosunod nga mga pangutana:

• Unsaon nimo pagtubag kon makadungog ka og sugo o sumbanan nga dili ka segurado kon gusto ba nimong tumanon?

• Unsa ka importante para nimo ang pagpaningkamot nga tumanon ang tanang sugo sa Dios?

Samtang magtuon ka karon, tinguhaa ang tabang sa Espiritu aron masabtan ang kaimportante sa pagpaningkamot sa pagtuman sa tanang sugo sa Dios.

Human gisultihan sa Ginoo si Samuel nga tugotan ang mga Israelinhon sa pagbaton og hari, gisugo sa Ginoo si Samuel nga dihogan ang batan-on nga ginganlan og Saul aron mahimong hari (tan-awa sa 1 Samuel 8–10). Dihang gihulga nga atakehon sa mga Filistehanon, misupak si Saul sa Ginoo pinaagi sa paghalad og sakripisyo nga dili siya awtorisado sa paghimo (tan-aw ang 1 Samuel 13:8–9). Gitudloan dayon ni Samuel si Saul sa mga sangpotanan sa iyang pagkamasinupakon (tan-awa sa 1 Samuel 13:10–14). Sa Kapitulo 15, makita nato ang susama nga sundanan dihang dili bug-os nga gisunod ni Saul ang mga instruksiyon sa Ginoo.

Basaha ang 1 Samuel 15:1–3, 7–9, dihang gihatagan sa Ginoo si Saul ug ang iyang kasundalohan og piho nga mga sugo. Samtang magbasa ka, pangitaa kon hain sa mga sugo sa Ginoo nga gipili ni Saul ug sa iyang kasundalohan nga sundon ug kon hain ang ilang gipili nga dili sundon.

• Sa unsang paagi ang kamatuoran nga gitudlo ni Presidente Nelson nakatabang ni Saul ug sa iyang kasundalohan?

Human sa gubat batok sa mga Amalekanhon, si Samuel nakig-istorya kang Saul bahin sa pagkamasinupakon niya ug sa iyang kasundalohan.

Basaha ang 1 Samuel 15:13–24, nga pangitaon ang mga kinaiya ug mga pasumangil nga nakaimpluwensiya sa pagpili ni Saul nga supakon ang sugo sa Dios.

Paghimo og listahan sa pipila ka sugo nga gipili tingali sa mga tawo karon nga dili panumbalingon o balewalaon.

Hangyoa ang kada grupo nga mopili og usa sa mga sugo nga naa sa ilang listahan. Pahimoa sila og senaryo diin ang usa ka tin-edyer mahimong matental sa pagsupak sa sugo pinaagi sa pagsundog sa pipila ka kinaiya ug mga katarongan nga nailhan sa mga estudyante diha sa 1 Samuel 15. O pwede ninyong tan-awon ang “Pagkamatinud-anon: Mas Motuo Ka Niini!” (4:46), gikan sa ChurchofJesusChrist.org. Ihunong ang bidyo sa time code 1:27 ug dapita ang mga estudyante nga gamiton ang sitwasyon sa batan-ong babaye isip ang senaryo. (Pwede nimong ipakita ang kataposan sa bidyo human matubag sa mga estudyante ang mga pangutana sa ubos.)

4:47

Gamit ang ilang mga senaryo, dapita ang mga estudyante nga hisgotan ang mga pangutana sa ubos uban ang ilang grupo.

• Sa unsang paagi ang usa ka tawo niini nga sitwasyon matental nga gamiton ang mga kinaiya o mga katarongan nga gigamit ni Saul?

• Sa unsang paagi ang pagpili nga sundon o supakon kini nga sugo sa kadugayan mosangpot sa kalipay o kaalaot?

• Unsa ang may kalabotan nga mga pagtulun-an sa ebanghelyo ang makatabang nato sa pagpili nga sundon ang Dios ko anaa kita niini nga sitwasyon?

Si Elder D. Todd Christofferson sa Korum sa Napulog Duha ka Apostoles mitabang nato nga masabtan kon nganong gihatagan kita og mga balaod sa Langitnong Amahan ug ni Jesukristo nga gilaoman Nila nga atong sundon:

13:11

Ang gugma sa Amahan ug sa Anak gawasnon nga gihatag apan gilakipan usab og mga paglaom ug mga gilaoman. … [Nga] magkutlo ni Presidente Nelson, “Ang mga balaod sa Dios hingpit nga nadasig sa Iyang walay kinutobang gugma kanato ug sa Iyang tinguha alang kanato nga mahimong maayo kutob sa mahimo.”

Tungod kay Sila nahigugma kaninyo, Sila dili gusto nga mobiya kaninyo “sa ingon nga kamo lang.” Tungod kay Sila nahigugma kaninyo, Sila gusto nga kamo makabaton og hingpit nga kalipay ug kalamposan. Tungod kay Sila nahigugma kaninyo, Sila gusto nga kamo maghinulsol tungod kay kana mao ang dalan ngadto sa kalipay. Apan inyo ang pagpili—Sila motahod sa inyong kabubot-on. Kinahanglan gayod kamo mopili sa paghigugma Kanila, sa pagserbisyo Kanila, sa pagtuman sa Ilang mga sugo. Dayon Sila makapanalangin kaninyo og mas buhong ingon man mohigugma kaninyo. (“Ang Gugma sa Dios,” Liahona, Nob. 2021, 18)

• Unsay imong ipakigbahin gikan niini nga pahayag ngadto sa usa ka tawo nga mibati nga dili ra kaayo importante ang mga sugo sa Dios?

• Sa unsang paagi ang pagtuman sa usa ka piho nga sugo sa Dios makatabang nimo sa pagbaton og “hingpit nga kalipay ug kalamposan”?

Pagpili og usa sa mosunod nga mga kalihokan nga kompletohon diha sa imong journal sa pagtuon:

1. Hunahunaa nga naa kay mga higala nga Mga Santos sa Ulahing mga Adlaw ug kinsa nangatarongan sa pagsupak sa piho nga mga sugo. Gipugos ka nila sa pagbuhat sa ingon. Isulat kon unsay gusto nimong hinumdoman gikan niini nga leksiyon nga motabang nimo sa pagsunod sa mga sugo sa Dios.

2. Kompletoha ang mga blangko: Gusto nakong sundon ang mga sugo sa Dios tungod kay . Usa ka butang nga gusto nakong hinumdoman gikan sa unsay akong gibati o nakat-onan karon mao ang .