“Deuteronomio 6:6–25; 7:1–26; 8:1–20: “Hinumdomi ang Ginoo nga Imong Dios” Manwal sa Magtutudlo sa Seminary sa Daang Tugon (2026)
“Deuteronomio 6:6–25; 7:1–26; 8:1–20: “Hinumdomi ang Ginoo nga imong Dios” Manwal sa Magtutudlo sa Seminary sa Daang Tugon
Deuteronomio 6–8; 15, 18; 29–30; 34: Leksiyon 59
Deuteronomio 6:6–25; 7:1–26; 8:1–20
“Hinumdomi ang Ginoo nga Imong Dios”
Human sa mga katuigan nga gigiyahan ug giprotektahan sa Dios diha sa kamingawan, ang mga Israelita hapit na mopuyo sa ilang gisaad nga yuta. Bisan ang pag-abot sa ilang bag-ong pinoy-anan mahimong bag-ong kausaban, ang kaharohay mahimong motental kanila sa pagkalimot sa Dios. Pinaagi ni Moises, ang Ginoo mitudlo sa mga Israelita unsa ka importante ngadto kanila ang paghinumdom unsa ang Iyang gibuhat alang kanila. Kini nga leksiyon gituyo aron sa pagtabang sa mga estudyante nga molambo ang ilang tinguha sa paghinumdom unsa ang gibuhat sa Dios alang kanila.
Pagpangandam sa estudyante: Dapita ang mga estudyante sa paghunahuna og lima ka butang nga ilang gibati nga gibuhat sa Ginoo alang kanila sa miaging semana. Dapita sila sa pagpamalandong kon sa unsang paagi ang pagmatngon sa unsay gibuhat sa Ginoo alang kanila makapanalangin sa ilang kinabuhi.
Posibleng mga Kalihokan sa Pagkat-on
Mahimong sayon ang “pagkalimot sa Ginoo”
Ikonsiderar ang pagsugod sa klase pinaagi sa paghisgot sa pagtental nga makalimot sa Dios kon ang mga butang sa atong mga kinabuhi maayo ra. Usa ka paagi sa pagbuhat niini mao ang pagpakita sa mga litrato sama sa mosunod ug pagsukna sa mga pangutana sa ubos.
-
Asa niini nga mga sitwasyon tingali ang mga tawo mas makahinumdom ug mosalig sa Dios? Ngano man?
-
Ngano nga mahimong mas lisod ang paghinumdom sa Dios ug pagsalig Kaniya kon maayo ra ang atong kinabuhi?
-
Nganong importante man nga hinumdoman ang Dios sa tanan natong mga sirkumstansiya?
Dapita ang mga estudyante sa pagtapos sa mosunod nga mga kapahayag diha sa ilang journal sa pagtuon.
Maghunahuna sa piho mahitungod sa imong relasyon uban sa Langitnong Amahan ug ni Jesukristo, kompletoha ang mosunod nga mga pamahayag:
Kon ang mga butang maayo ra sa akong kinabuhi, ako lagmit nga .
Kon ang mga butang dili maayo sa akong kinabuhi, ako lagmit nga .
Awhaga ang mga estudyante sa pagtinguha sa Espiritu aron sa pagtabang nga mas makasabot sa bili sa paghinumdom sa Langitnong Amahan ug ni Jesukristo ug kon unsay Ilang gibuhat allang kanila.
Hinumdomi ang Ginoo
Ikonsiderar ang pagbasa o pag-summarize sa mosunod nga parapo aron sa pagtabang sa mga estudyante nga makasabot unsa ang nahitabo sa kinabuhi sa mga Israelita diha sa basahon sa Deuteronomio.
Human sa pagpangulo sa mga anak sa Israel sa 40 ka tuig sa kamingawan, ang Ginoo andam na nga modala nila sa Suba sa Jordan ngadto sa gisaad nga yuta. Sukad sa pagbiya sa Ehipto, ang mga Israelita nagsalig sa Ginoo alang sa pagkaon, tubig, ug proteksiyon. Ang mga Israelita karon nahimong gamhanang kasundalohan, ug ang gisaad nga yuta adunay daghang natural nga mga kapanguhaan nga mohimo sa ilang kinabuhi nga mas komportable.
Ikonsiderar ang pagdapit sa mga estudyante sa pagbasa sa mosunod nga mga bersikulo ug sa paghisgot sa mosunod nga mga pangutana sa ubos nga magpares o diha sa gagmay nga mga grupo.
Basaha ang Deuteronomio 4:7–9; 6:10–13; ug 8:7–14, nga mangita sa gibalikbalik nga pasidaan nga gihatag ni Moises sa mga Israelita.
-
Ngano sa imong hunahuna nga si Moises nabalaka bahin niini?
-
Ngano sa imong hunahuna nga ang tambag ni Moises gikinahanglan gihapon sa mga miyembro sa Simbahan sa Manluluwas karon?
Kon gikinahanglan, tabangi ang mga estudyante nga makakita nga si Moises nabalaka nga ang kauswagan mahimong hinungdan sa mga Israelita nga makalimot sa Dios.
Ipakita ang mosunod nga pamahayag alang sa mga estudyante aron tamdan samtang ilang ilhon ang gipabaga nga pagsulat sa mga kamatuoran.
Si Elder Dale G. Renlund sa Korum sa Napulog Duha ka Apostoles mipasabot nganong ang Langitnong Amahan ganahan nga kita mohinumdom Kaniya ug sa Iyang anak.
Ang atong Langitnong Amahan gusto nga kita mahinumdom sa Iyang pagkamaayo ug sa Iyang Hinigugmang Anak, dili alang sa Ilang kaugalingon nga katagbawan apan sa impluwensiya niana nga paghinumdom diri kanato. Pinaagi sa pagkonsiderar sa Ilang pagkamabination, molapad ang atong panglantaw ug panabot. Pinaagi sa pagpamalandong sa Ilang kamanggiluy-on, mas mapaubsanon na kita, mainampoon, ug makanunayon. …
Sa matag higayon nga kita mogamit, makabenepisyo, o gani sa paghunahuna niini nga mga gasa, angay nga hunahunaon nato ang sakripisyo, kamanggihatagon, ug kamanggiloy-on sa mga tighatag. Ang pagtahod sa mga tighatag makahimo og daghan kay sa paghimo natong mapasalamaton. Ang pagpamalandong sa Ilang mga gasa makahimo ug kinahanglang makausab kanato. (“Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41–44)
-
Unsa ang mipatigbabaw kanimo gikan sa pamahayag ni Elder Renlund?
Base sa kon unsay mipatigbabaw kanila, dapita ang mga estudyante sa pagkompleto sa mosunod nga pamahayag sa ilang mga journal sa pagtuon:
Pinaagi sa paghinumdom sa kamaayo sa Langitnong Amahan ug ni Jesukristo, …
Ang mga estudyante mahimong makahunahuna og daghang paagi sa pagkompleto sa pamahayag. Pipila ka mga ehemplo naglakip sa:
… ang atong panglantaw ug pagsabot mapadak-an.
… kita mahimong mas mapainubsanon,mainampoon, ug mapadayonon.
… kita mabag-o (o mausab).
Mahimo nimong ilista ang mga tubag sa mga estudyante diha sa pisara. Seguroha nga ang mga estudyante nakasabot sa kahulogan sa mga panalangin. Usa ka paagi sa pagbuhat niini mao ang pagpangutana unsa kaha sama ang pagdawat niini nga mga panalangin. Pananglitan, unsa kaha ang pagkamainampoon o ang pagkahimong mas mapadayonon?
-
Unsa kaha sa imong hunahuna ang paghinumdom sa Ginoo modala sa mga importante nga mga panalangin?
-
Nakasinati naba ka sa bisan unsang mga kamatuoran nga gipakigbahin ni Elder Renlund?
Ang paghinumdom sa Ginoo makatabang kanato sa pag-atubang sa mga hagit
Aron makaangkon sa gisaad nga yuta, ang mga Israelita nag-atubang sa hagit. Ang Ginoo nagsulti kanila nga sila makapildi sa mas gamhanang mga nasod (Deuteronomio 7:1). Ang pagkasayod nga ang mga nasod mas gamhanan kay sa ilaha tingali nakapanerbiyos sa kadaghan sa mga Israelita.
Aron sa pagtabang sa mga estudyante nga malambigit ang mga kasulatan sa ilang kaugalingong mga kinabuhi, ikonsiderar ang paghangyo sa nila sa paglista diha sa pisara sa mga sitwasyon nga ilang giatubang o atubangon pa, nga sila masayod nga kinahanglan nila ang tabang sa Ginoo.
Basaha ang Deuteronomio 7:17–21; 8:2–4, 15 aron makakita unsa ang gusto sa Ginoo ngadto sa mga Israelita nga mahinumdoman samtang ilang atubangon ang umaabot nga mga hagit.
-
Sa unsang paagi ang paghinumdom kon unsa ang gibuhat sa Ginoo sa nangagi makatabang sa pag-atubang sa mga hagit sa umaabot?
Mahimo nimong dapiton ang mga estudyante sa paglista sa mga sitwasyon kon sila masayod nga ang Ginoo mitabang nila o sa uban sa nangagi. Kon ikaw midapit sa mga estudyante sa pagbuhat sa pagpangandam sa estudyante, kini usa ka maayong oportunidad sa pagpangutana kanila unsa ang nabuhat sa Ginoo alang kanila sa milabayng semana.
Hangyoa ang mga estudyante sa pagpakigbahin nga ang gibuhat sa Ginoo sa nangagi makatabang kanila samtang sila nag-atubang sa karon ug sa umaabot nga mga kalisod.
Unsaon nato sa paghinumdom sa Ginoo
Aron sa pagtabang sa mga estudyante nga mobati sa bili sa paghinumdom sa Langitnong Amahan ug ni Jesukristo ug makakita sa usa ka paagi nga makatabang kanato sa paghinumdom Kanila, ikonsiderar ang pagpasalida sa bidyo nga “O Remember, Remember” (1:28) nga makita sa Librarya sa Ebanghelyo. Mahimo ka nga modapit sa mga estudyante nga mangita kon unsa ang gibuhat ni Presidente Henry B. Eyring sa unang Kapangulohan aron makakita sa kamot sa Ginoo ug ang mga resulta nga misunod.
-
Unsa ang mahimong epekto diha kanimo sa pagkakita sa kamot sa Dios diha sa imong kinabuhi matag adlaw?
Sa pagtapos, ikonsiderar ang pagdapit sa mga estudyante sa pagsulat og usa o duha ka paagi nga mas mahinumdoman nila ang Langitnong Amahan ug si Jesukristo ug magdapit sa Ilang mga panalangin ngadto sa ilang mga kinabuhi.