Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Nōmipa 21: Hanga ki he Fakamoʻuí ʻi he Tui

“Nōmipa 21: Hanga ki he Fakamoʻuí ʻi he Tui,” Fuakava Motuʻá – Tohi Lēsoni ʻa e Faiako Seminelí (2026)

“Nōmipa 21: Hanga ki he Fakamoʻuí ʻi he Tui,” Fuakava Motuʻá – Tohi Lēsoni ʻa e Faiako Seminelí

Nōmipa 11–14; 20–24; 27: Lēsoni 57

Nōmipa 21

Hanga ki he Fakamoʻuí ʻi he Tui

The Old Testament prophet Moses pointing to a staff with a brass serpent attached to the top. The painting illustrates the event wherein Moses promised the Israelites that they would be saved from the fiery serpents if they looked at the brass serpent.

ʻI he hokohoko atu e fānau ʻa ʻIsilelí ʻi he toafá, naʻa nau lāunga ki he ʻEikí. ʻI hono talí, naʻá Ne ʻomi ha fanga ngata huhu kona ki honau lotolotongá. Naʻá Ne fakahinohino kia Mōsese ke fokotuʻu ha ngata palasa ʻi ha fuʻu pou ko ha fakataipe ʻo e Fakamoʻuí pea talaʻofa ange ko kinautolu pē ʻe sio ki aí ʻe fakamoʻui ia. ʻE lava ke tokoni ʻa e lēsoni ko ʻení ki he kau akó ke nau hanga kia Sīsū Kalaisi ʻi he tui.

Teuteu ʻa e tokotaha akó: Fakaafeʻi e kau akó ke nau lau ʻa e Nōmipa 21:7–9 mo e ʻAlamā 33:18–21, ʻo kumi e meʻa te tau lava ʻo ako mei he talanoa ko ʻení ʻi he Fuakava Motuʻá. Poupouʻi ke nau mateuteu ke vahevahe e meʻa naʻa nau ako ʻi he kalasí.

Ngaahi ʻEkitivitī Ako ʻOku Ala Fakahokó

Ko ha huhu ʻa e ngatá

Fakakaukau ke kamata e kalasí ʻaki hano fakaʻaliʻali ha fakatātā ʻo ha ngata.

ʻOkú ke pehē ʻe fēfē hano huhu koe ʻe ha ngata kona?

Tokoni ke mahino ki he kau akó ʻe lava ʻe hono huhu kita ʻe ha ngata koná ʻo fakatupu ha fufula, fakahangatāmaki, mamahi lahi, mo e puke. ʻI he ngaahi tūkunga fakatuʻutāmakí, ʻe lava pē ke hoko ai ha mate.
Ko e hā ha ngaahi founga kehekehe ʻe lava ke fakafōtunga ʻaki ʻe he kakaí hili hano huhu kinautolu?

ʻE lava ke kau ʻi he ngaahi talí ʻa e: hohaʻá, feinga ke sāuni e ngatá pea tamateʻi ia, tatali ke sio ki he meʻa ʻe hoko ki he sinó mei he huhú, pe fekumi fakavavevave leva ki ha tokoni.

Tohiʻi ʻa e angahalá ʻi he tafaʻaki ʻo e ngatá. Fakaafeʻi e kau akó ke fakafehoanaki e founga ʻe lava ke tatau ai e angahalá mo hono ngaahi nunuʻá mo ha huhu ʻa e ngatá.
Ko e hā ha niʻihi ʻo e ngaahi founga kehekehe ʻe ala fakafōtunga ai e kakaí hili ʻenau faiangahalá?

ʻE lava ke kau ʻi he ngaahi talí ʻa e kumi ʻuhinga ki heʻenau ngaahi tōʻongá, ko e feinga ke tukunoaʻi ʻenau ngaahi ongó, fūfuuʻi ʻenau ngaahi tōʻongá koeʻuhí ko ʻenau ongoʻi maá, tatali ke sio pe ko e hā ha ngaahi nunuʻa lahi ange te nau fehangahangai mo ia, pe hanga ki he ʻEikí ki ha tokoni.

Fakaʻaongaʻi ha kiʻi taimi ke ke fakalaulauloto ai ki he anga haʻo fakafōtunga. ʻOkú ke hanga nai ki he ʻEikí ki ha tokoni? Ko e hā hono ʻuhinga ki hoʻo tali ʻio pe ʻikaí? ʻI hoʻo ako ʻa e lēsoni ko ʻení, fekumi ki he fakahinohino ʻa e Laumālie Māʻoniʻoní ke tokoniʻi koe ke ke hanga ki he Fakamoʻuí ki ha tokoni ʻi hoʻo moʻuí. Te ke lava foki ʻo fekumi ki ha tokoni ʻi ha faʻahinga fehuʻi pē pe hohaʻa ʻokú ke maʻu fekauʻaki mo e hanga ki he Fakamoʻuí.

Ko e fanga ngata velá

Hangē ko ia kuo nau fai tuʻo lahi kimuʻá, naʻe lāunga e fānau ʻIsilelí ki he ʻEikí ʻi heʻenau fononga ʻi he toafá. Lau e ngaahi veesi ko ‘ení pea tali e ngaahi fehuʻi ʻoku ʻoatú. Mahalo ʻe ʻaonga ke ʻilo ʻoku ʻuhinga ʻa e fakavelá ki he “huhu kona”.

Fakakaukau ke fakaʻaliʻali pe hiki e ngaahi veesi mo e ngaahi fehuʻi ko ʻení ʻi he palakipoé. Te ke lava ʻo fakaafeʻi e kau akó ke nau ako fakataha kinautolu ʻi ha fanga kiʻi kulupu iiki, pe fakaafeʻi e kau akó ke nau ako ʻiate kinautolu pē ʻa e ngaahi vēsí, pea vahevahe leva ʻenau ngaahi talí mo ha hoa pe kulupu tokosiʻi ke fakapapauʻi ʻenau ngaahi talí. Kapau ʻe ʻaonga, fakamatalaʻi ange koeʻuhí naʻe ʻikai ngofua ke fononga ʻa e fānau ʻIsilelí ʻi he fonua ko ʻĪtomí, ka naʻe pau ke nau fononga takai ai (vakai, Nōmipa 21:4), naʻe ʻuhinga ia ʻe lōloa mo faingataʻa ange ʻenau fonongá.

Nōmipa 21:4–5. Ko e hā naʻe lea fakafepaki ai e fānau ʻIsilelí ki he ʻEikí mo Mōsesé?

Nōmipa 21:6. ʻI hono talí, ko e hā naʻe fekauʻi mai ʻe he ʻEikí?

Nōmipa 21:7–9. Ko e hā naʻe fakahinohino ʻe he ʻEikí kia Mōsese mo e fānau ʻIsilelí ke nau fai ke fakamoʻui ai kinautolú?

1 Nīfai 17:41; ʻAlamā 33:18–21. Ko e hā naʻe ʻikai sio ai ha niʻihi ʻo e fānau ʻIsilelí?

Fakakaukau ke fakaafeʻi e kau akó ke hiki e ngaahi veesi ʻo e Tohi ʻa Molomoná ko ha ngaahi potufolofola fakafekauʻaki ki he Nōmipa 21:9.

Ko e hā naʻe makehe kiate koe mei he fakamatala ko ʻení?
Ko e hā nai ha founga ʻoku tau faitatau ai he taimi ʻe niʻihi mo e fānau ʻIsilelí?

Ko ha fakataipe maʻá e Fakamoʻuí

Lolotonga e ngāue fakafaifekau ʻa e Fakamoʻuí ʻi he māmaní, naʻá Ne tokoni ke mahino kiate kitautolu ʻa e meʻa naʻe fakataipe ʻe he ngata palasa ʻi he fuʻu poú. Lau ʻa e Sione 3:14–16, ʻo kumi ʻa e talí. (Mahalo te ke fie fakaʻilongaʻi ʻeni ko ha potufolofola fakafekauʻaki ki he Nōmipa 21:7–9.)

Hili hono vahevahe ʻe he kau akó ʻa e meʻa naʻa nau maʻú, fakakaukau ke fakaʻaliʻali ʻa e ongo ʻīmisi ko ʻení.

Ko e hā te tau lava ʻo ako mei he ongo talanoa ko ʻení?

ʻE lava ke vahevahe ʻe he kau akó ha tefitoʻi moʻoni hangē ko ʻení: ʻI heʻetau hanga ki he Fakamoʻuí ʻi he tuí, te Ne fakamoʻui fakalaumālie kitautolu. Fakakaukau ke hiki e tefitoʻi moʻoni ko ʻení ʻi he palakipoé.

Ke mahino lelei ange ʻa e tefitoʻi moʻoni ko ʻení, fakaafeʻi e kau akó ke nau lau e ngaahi fakamatala ko ʻení.

Naʻe akonaki ʻa Palesiteni Lāsolo M. Nalesoni ʻo pehē:

ʻOku ou kōlenga atu ke mou haʻu kiate Ia ke Ne lava ʻo fakamoʻui ʻa kimoutolu! Te Ne fakamoʻui ʻa kimoutolu mei he angahalá ʻi hoʻomou fakatomalá. Te Ne fakamoʻui ʻa kimoutolu mei he loto-mamahí mo e ilifiá. Te Ne fakamoʻui ʻa kimoutolu mei he ngaahi kafo ʻo e māmani ko ʻení. (“Ko Sīsū Kalaisi Maʻu Pē ʻa e Talí,” Liahona, Mē 2023, 127)

Ko e hā ha meʻa naʻá ke saiʻia pe ako mei he fakamatala ko ʻení?
ʻE tatau fēfē nai ʻa e fakamoʻui mei he koná mo hono fakamoʻui ʻe he Fakamoʻuí mei he ngaahi nunuʻa ʻo e angahalá?

Hanga ki he Fakamoʻuí

Fakaafeʻi e kau akó ke nau fakaʻaongaʻi ha miniti ʻe taha ke vakai ki he fakatātā ʻo e Fakamoʻuí ʻi he kolosí pea fakalaulauloto ki he ngaahi founga te tau lava ai ʻo hanga kiate Ia ʻi he tui he ʻahó ni. Fakaafeʻi leva kinautolu ke fai ʻeni ʻi ha fanga kiʻi kulupu iiki.

Hiki ha ngaahi founga ʻe lava ke tau hanga ai ki he Fakamoʻuí ʻi he tui he ʻahó ni.
Aleaʻi e ngaahi ʻuhinga ʻe lava ke tau faingataʻaʻia ai ke fai e ngaahi meʻá ni. (Mahalo te mou aleaʻi ʻa e ʻuhinga ʻe lava ke ʻahiʻahiʻi ai kitautolu, hangē ko e fānau ʻIsilelí, ke tau tui ʻoku fuʻu faingofua pe ʻikai tokoniʻi kitautolu ʻe he ngaahi founga ko ʻeni ke hanga ki he Fakamoʻuí.)
Neongo ha ngaahi faingataʻa, aleaʻi ʻa e ʻuhinga ʻoku mahuʻinga ai ke tau hanga ki he Fakamoʻuí. (ʻE lava ke kau heni hono vahevahe ha ngaahi sīpinga fakafolofola ʻo e ngaahi fakamoʻui ʻa e Fakamoʻuí, ko hoʻo ngaahi ongo pe fakamoʻoni fekauʻaki mo e hanga ki he Fakamoʻuí, pe ngaahi aʻusia kuó ke maʻu ʻi hoʻo hanga ki he Fakamoʻuí ʻi he tui mo e meʻa naʻe hokó.)

Meʻa ʻokú ke tui ki aí

Fekumi ki he tokoni ʻa e Laumālie Māʻoniʻoní ʻi hoʻo hiki ha founga ʻe taha ʻokú ke tui ai ʻoku finangalo ʻa e ʻEikí ke ke hanga kiate Ia, pe hokohoko atu hoʻo hanga kiate Iá, ʻi hoʻo moʻuí. Te ke lava foki ʻo hiki ʻa e ʻuhinga ʻe ala faingataʻa ai ka ʻoku kei mahuʻinga pē ke faí.

Ngaahi Maʻuʻanga Tokoni Kehé

Ko e hā te tau lava ʻo fai ke fekumi ki he fakamoʻui ʻa e Fakamoʻuí?

Naʻe akonaki ʻa Palesiteni Lāsolo M. Nalesoni ʻo pehē:

ʻI he taimi ʻoku hoko mai ai ʻa e ngaahi ʻahiʻahi matuʻaki faingataʻá, ko e taimi ia ke fakalahi ʻetau tui ki he ʻOtuá, ngāue mālohi, mo tokoni ki he niʻihi kehé. Te Ne fakafiemālieʻi leva hotau ngaahi loto kuo kafó. Te Ne foaki mai kiate kitautolu ʻa e melino mo e nonga fakatāutahá. He ʻikai fakaʻauha ʻa e ngaahi meʻaʻofa maʻongoʻonga ko iá, ʻo aʻu ki he maté. (“Jesus Christ—the Master Healer,” Liahona, Nōvema 2005, 87)

Naʻe akoʻi ʻe Sisitā Kilisitina B. Falanikō, Tokoni Ua ʻi he Kau Palesitenisī Lahi mālōlō ʻo e Palaimelí:

ʻIkai ʻoku tau … kiʻi maumau, papā, mo uesia, pea ongoʻi [kotoa pē] he ʻikai pē te tau toe tatau mo hotau tuʻunga kimuʻá? Ka ʻi heʻetau haʻu kia Sīsū Kalaisi ʻi he tui kiate Iá, ʻo fakatomala, pea fakahoko pea mo tauhi e ngaahi fuakavá, ʻe lava ke fakamoʻui hotau loto-mamahí mo e siva e ʻamanakí—ʻo tatau ai pē pe ko e hā hono tupuʻangá. ʻOku fakaafeʻi ʻe he foungá ni ʻa e mālohi faifakamoʻui ʻa e Fakamoʻuí ki heʻetau moʻuí, ka ʻoku ʻikai ke ne toe fakafoki kitautolu ki he tuʻunga naʻa tau ʻi ai kimuʻá ka ʻokú ne ngaohi ke tau lelei ange ʻi he tuʻunga naʻa tau ʻi aí. ʻOku ou ʻilo ʻe lava ʻi he Fakalelei ʻa e Fakamoʻuí, ʻa Sīsū Kalaisi, ʻo fakaleleiʻi kitautolu kotoa, fakakakato, pea fakahoko ʻetau taumuʻá. (“Ko e Mālohi Faifakamoʻui ʻo Sīsū Kalaisí,” Liahona, Nōvema 2020, 60)

Ko e hā ha ngaahi sīpinga ʻe niʻihi ʻo e fanga kiʻi meʻa iiki mo faingofua te tau lava ʻo fai ke tau ofi ange ai ki he Fakamoʻuí?

Naʻe fakakaukau ʻa Palesiteni Tāleni H. ʻOakesi ʻo e Kau Palesitenisī ʻUluakí ki he meʻa naʻe kole ki he fānau ʻIsilelí ke nau fai ke fakamoʻui ai kinautolú mo ne pehē, “Ko ha meʻa siʻi ia ka ko ha ola fakaofo moʻoni!” Naʻá ne vahevahe foki ha fanga kiʻi ngāue iiki mo faingofua te ne ʻomi kitautolu ke tau ofi ange ki hotau Fakamoʻuí:

17:35

Fakakaukau ki he ako folofola kuo akonekina kitautolu ke tau fai ʻi heʻetau moʻui fakaʻahó. Pe fakakaukau ki he ngaahi lotu fakatāutahá mo e tūʻulutui ʻo lotu fakafāmilí, ʻa ia ko ha meʻa angamaheni ki he Kāingalotu faivelengá. Fakakaukau ki ha maʻu ako semineli ʻa e toʻu tupú pe kalasi ʻinisititiuti ʻa e kakai lalahi kei talavoú. Neongo ʻoku ngali iiki mo faingofua ʻa e ngaahi meʻa ko ʻení, ka te nau hoko ko ha tupulaki fakalaumālie mālohi. ʻOku hoko ʻeni koeʻuhí ko e fanga kiʻi meʻa iiki mo faingofua taki taha ko ʻení, ʻoku nau fakaafeʻi e takaua ʻa e Laumālie Māʻoniʻoní, ʻa e Taha Faifakamoʻoni ʻokú Ne fakamaama mo tataki kitautolu ki he moʻoní. …

Ko ha maʻuʻanga tokoni fakalaumālie tupulaki mo langaki moʻui ʻe taha ʻa hono toutou fakahoko ʻo e fakatomalá, neongo e fanga kiʻi maumaufono ngali īkí. ʻE lava ke tokoni ʻetau vakavakaiʻi pē kitautolú ke tau sio ki heʻetau ngaahi tōnounoú mo e founga ke tau toe lelei ange aí. ʻOku totonu ke hoko e fakatomala ko iá kimuʻa ʻi heʻetau maʻu fakauike e sākalamēnití. (“Fanga Kiʻi Meʻa Iiki mo Faingofuá,” Liahona, Mē 2018, 90)

Ngaahi ʻEkitivitī Fakalahi ki he Akó

Ko ha founga ‘e taha ke kamata ‘aki e lēsoní

Fakakaukau ke mamata ʻi ha vitiō ʻo hono fakamoʻui ʻe he Fakamoʻuí ʻa e niʻihi kehé, hangē ko e “ʻOku Manavaʻofa ʻa Sīsū Kalaisi pea Fakamoʻui e Kakaí” mei he taimi 1:43 ki he 6:19.

6:31

Kapau naʻe ʻi heni ʻa e Fakamoʻuí he ʻahó ni, ko hai te ke fie ʻomi kiate Ia ke fakamoʻuí? Ko e hā hono ʻuhingá?
Makehe mei he mahamahakí, ko e hā ha niʻihi ʻo e ngaahi founga kehe ʻe lava ke fakamoʻui ai ʻe he Fakamoʻuí?

ʻOku fakamatalaʻi tuʻo lahi ʻe he folofolá ʻa e taimi naʻe fakamoʻui ai ʻe he Fakamoʻuí ʻa e kakaí mei he ngaahi mahakí, kuí, kiliá, pea mo kinautolu naʻa nau “puke ʻi ha faʻahinga mahaki” pē (3 Nīfai 17:9). Naʻe akoʻi foki ʻe he Fakamoʻuí naʻe fakahaaʻi ʻe Heʻene fakamoʻuí ʻa e meʻa te Ne lava ʻo fai fakalaumālie maʻá e kakaí (vakai, Maʻake 2:2–11). Fakalaulauloto ki he meʻa te ke fie maʻu fakataautaha ki ai e tokoni ʻa e ʻEikí pea ʻokú ke maʻu nai ha tui te Ne lava ʻo fakamoʻui koe.

Ngaahi Fakataipe ʻo e Fakamoʻuí

Kapau ʻe ʻaonga ke nofotaha ʻi ha fakataipe ʻe taha ʻo e Fakamoʻuí ʻi he vahe ko ʻení, hiki ʻa e ngaahi foʻi lea ko e lami, maka, mo e vai ʻi he palakipoé.

Ko e hā ʻoku faitatau ai e ngaahi meʻa ko ʻení? (Naʻe fakaʻaongaʻi kotoa kinautolu ke fakataipe ʻa e Fakamoʻuí.)
Te nau fakataipe fēfē nai ʻa e Fakamoʻuí?

Lolotonga e taʻu ʻe 40 ʻo e nofo ʻa e kakai ʻIsilelí ʻi he toafá, naʻe fakaʻaongaʻi ʻe he ʻEikí ha ngaahi meʻa mo ha ngaahi aʻusia kehekehe ke akoʻi kinautolu fekauʻaki mo Hono mālohi ke fakamoʻui mo tokonaki maʻá e kakai ʻoku tafoki kiate Iá. ʻI ha tūkunga kehekehe ʻe ua, naʻe lāunga ʻa e kakaí kia Mōsese ʻi he taimi naʻe ʻikai ke nau maʻu ai ha vai ʻi he toafá (vakai, ʻEkesōtosi 17:1–4; Nōmipa 20:1–5).

Fakakaukau ke fakaafeʻi ha vaheua ʻe taha ʻo e kalasí ke lau ʻa e ʻEkesōtosi 17:5–6 pea lau ʻe he vaheua ʻe tahá ʻa e Nōmipa 20:7–8, ʻo fakakaukau ki he founga ʻe lava ke fakamanatu ai ʻe he ngaahi meʻa ko ʻeni naʻe hokó ʻa Sīsū Kalaisi kiate kinautolú. Kapau ʻe fie maʻu, fakamanatu ange kuo fakafehoanaki ʻa e Fakamoʻuí ki ha fuʻu maka ʻi ha ngaahi taimi lahi (vakai, Hilamani 5:12; Mōsese 7:53).

Naʻe fakamanatu fēfē atu ʻe he ngaahi meʻa naʻe hoko mei he ngaahi veesi ko ʻení ʻa e Fakamoʻuí? (Kapau ʻokú ke fie maʻu tokoni, fakakaukau ke ako ʻa e Mōsese 7:53 mo e Sione 4:13–14.)

Hangē ko e fakafalala ʻa e kakai ʻIsilelí ki he ʻOtuá ke foaki ha vai ʻi he toafá, ʻoku tau fakafalala foki ki he ʻOtuá ke tokonaki maʻa ʻetau ngaahi fie maʻú. Fakalaulauloto ki he founga ʻoku tokoniʻi ai koe ʻe he ngaahi fakataipe ko ʻení ke ke ʻiloʻi lelei ange ʻa e ʻEikí.