Tusi Lesona a le Faiaoga Seminare o le Feagaiga Tuai

Anotusi
Itulau Autu
Faatomuaga i le Tusi Lesona a le Faiaoga
Lesona o le Feagaiga Tuai
- Faafeiloai Atu Mai le Feagaiga Tuai
- Mose 1; Aperaamo 3
- Kenese 1–2; Mose 2–3; Aperaamo 4–5
- Kenese 3–4; Mose 4–5
- Kenese 5; Mose 6
- Mose 7
- Kenese 6–11; Mose 8
- Kenese 12–17; Aperaamo 1–2
- Kenese 18–23
- Kenese 24–33
- Kenese 37–41
- Kenese 42–50
- Esoto 1–6
- Eseta
- Esoto 7–13
- Esoto 14–18
- Esoto 19–20; 24; 31–34
- Esoto 35–40; Levitiko 1; 4; 16; 19
- Numera 11–14; 20–24; 27
- Teuteronome 6–8; 15; 18; 29–30; 34
- Iosua 1–8; 23–24
- Faamasino 2–4; 6–8; 13–16
- Ruta; 1 Samuelu 1–7
- 1 Samuelu 8–10; 13; 15–16
- 1 Samuelu 17–18; 24–26; 2 Samuelu 5–7
- 2 Samuelu 11–12; 1 Tupu 3; 6–9; 11
- 1 Tupu 12–13; 17–22
- 2 Tupu 2–7
- 2 Tupu 16–25
- 2 Nofoaiga a Tupu 14–20; 26; 30
- Esera 1; 3–7; Neemia 2; 4–6; 8
- Eseta
- Iopu 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Fa’ataoto 1–4; 15–16; 22; 31; Failauga 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Ieremia 1–3; 7; 16–18; 20
- Ieremia 31–33; 36–38; Auega 1; 3
- Esekielu 1–3; 33–34; 36–37; 47
- Tanielu 1–7
- Hosea; Ioelu
- Amosa; Opetaia; Iona
- Mika; Nauma; Sapakuka; Sefanaia
- Hakai 1–2; Sakaria 1–4; 7–14
- Malaki
Lesona o Sauniuniga mo le Olaga
- Atamai i Aoaoga Faavae: Mauaina o Tali i A’u Fesili
- Tomai i Suesuega o Tusitusiga Paia
- Taiala Mo Le Malosi o le Autalavou
- Atinaega o le Ola Tutoatasi o le Tagata Lava Ia
- Soifua Maloloina Faaletino ma Faalelagona
- Sauniuni mo Aoaoga ma Galuega i le Lumanai
- Faamanuiaina i le Aoga
- Sauniuniga Faafaifeautalai
- Sauniuniga mo le Malumalu
- Aoaoga a Taitai o le Ekalesia
Faaopoopoga

Esoto 5–6: Faia Ai o le Finagalo o le Alii, E Tusa lava po o le a le Taunuuga

“Esoto 5–6: Faia Ai o le Finagalo o le Alii, E Tusa lava po o le a le Taunuuga,” Tusi Lesona a le Faiaoga Seminare o le Feagaiga Tuai (2026)

“Esoto 5–6: Faia Ai o le Finagalo o le Alii, E Tusa lava po o le a le Taunuuga,” Tusi Lesona a le Faiaoga Seminare o le Feagaiga Tuai

Esoto 1–6: Lesona 40

Esoto 5–6

Faia Ai o le Finagalo o le Alii, E Tusa lava po o le a le Taunuuga

The Old Testament prophet Moses and his brother Aaron standing in the Court of the Pharaoh of Egypt. Moses and Aaron are petitioning for the release of the Israelites from bondage. A guard is standing by the Pharaoh.

Ina ua uma ona valaauina o ia e le Alii e laveai Isaraelu mai le faatagataotauaina i Aikupito, sa talosaga atu Mose ia Farao e tuu atu i tagata o le Alii e o. Sa musu Farao ae nai lo lena, sa faateleina le mamafa o le avega a tagata Isaraelu. E ui lava i le tali a Farao, ae sa faaauau pea ona mulimuli Mose i le mea na fetalai mai ai le Alii ia te ia e fai. E mafai ona fesoasoani lenei lesona i tagata aoga ia iloa ai o folafolaga a le Alii e mafai ona uunaia ai i latou e fai Lona finagalo, e tusa lava po o le a le taunuuga vave.

Sauniuniga a le tagata aoga: Valaaulia tagata aoga e o mai i le vasega ua saunia e faasoa mai a latou tali i le fesili lenei: Pe o le mulimuli ia Iesu Keriso e faafaigofie ai pe faafaigata ai lou olaga?

Gaoioiga e Ono Mafai Ona Aoao Ai

Mulimuli ai ia Iesu Keriso

Valaaulia tagata aoga e mafaufau pe faapefea ona latou tali atu pe afai e fesili atu se tasi ia i latou i le fesili lenei.

Pe o le mulimuli ai ia Iesu Keriso e faafaigofie ai pe faafaigata ai lou olaga?

Ina ia talanoaina lenei fesili, e mafai ona e tusia Faigofie Atu ma le Faigata Atu o ni ulutala i luga o le laupapa ma lisi mafuaaga a tagata aoga mo a latou tali i lalo o le ulutala talafeagai. Mafaufau e tuu atu i ni nai tagata aoga e faamatala a latou tali.

Ua talosaga atu Mose iā Farao e faasa’oloto tagata Isaraelu

Atonu e te manao e faasino atu faapea i le Esoto 5–7, atonu na mafaufau Mose ma le fanauga a Isaraelu pe o le mulimuli ai i le Faaola e faafaigofie ai pe faafaigata ai le olaga. Ina ia fesoasoani i tagata aoga ia malamalama i le faatatauga o le Esoto 5–7, mafaufau e valaaulia tagata o le vasega e faasoa mai mea latou te manatua e uiga ia Mose ma le fanauga a Isaraelu mai le Lesona 39: “Esoto 2–4.” Afai e manaomia, valaaulia se tagata aoga e faitau le aotelega lenei.

Sa nofopologa le fanauga a Isaraelu i tagata Aikupito mo le tele o augatupulaga. Na faafofoga le Alii i le tagi a Lona nuu ma valaauina Mose e fesoasoani e laveai i latou mai le pologa (tagai Esoto 3:9–10).

Faitau le Esoto 5:1–2, ma vaavaai mo mea na ta’u atu e Mose ma Arona ia Farao mai le Alii.

O le a le tali a Farao?

Mafaufau e tusi i luga o le laupapa le tali a Farao: “O ai le Alii?” Atonu e te fesili atu i tagata aoga pe aisea e taua ai mo i tatou e tali [lenei fesili] mo i tatou lava. O le isi vaega o le lesona o le a faasino i le fesili lenei.

I lona ita, na faafaigata ai e Farao olaga o tagata Isaraelu e ala i le faateleina o a latou galuega i aso taitasi (tagai Esoto 5:6–9, e aofia ai vaefaamatalaga 8a, 15–19). Sa faitio tagata Isaraelu ia Mose ma Arona e uiga i le faateleina o a latou avega (tagai Esoto 5:20–21).

Pe ana faapea o oe o Mose, mata o ā ni ou lagona?

Faitau le Esoto 5:22–23, ma mafaufau pe faapefea ona e aoteleina mea o loo fai atu ai Mose i le Alii.

E ono mafai faapefea ona tatou fesootai ia Mose i le Esoto 5:22–23?

E mafai ona faasoa mai e tagata aoga o latou lagona pe a latou le vaaia ni faamanuiaga vave i le uma ai ona usitai i le Alii. Faamaonia a latou tali ma lagona.

Faaali atu le iloiloga o le tagata lava ia lenei, ma valaaulia tagata aoga e mafaufau loloto ia latou tali.

Faatumu le fuaiupu lenei i se auala e sili ona atagia mai ai ou lagona. Atonu e te filifilia le sili atu ma le tasi o tali.

Pe a ou le vaaia ni faamanuiaga vave pe a uma ona usiusitai i le Tama Faalelagi ma Iesu Keriso, ou te lagona …

Afai e manuia tagata aoga mai uunaiga i lenei iloiloga faaletagata lava ia, e mafai ona e tusia nisi o upu nei i luga o le laupapa mo i latou e filifili mai ai: le fiafia, le mautonu, ita, lototiga, foia, faamoemoe, mautinoa, filemu. E mafai foi ona latou faaopoopo po o a ni mea latou te ono faia i lenei tulaga.

A o faaauau pea ona e aoao i le asō, vaavaai mo upumoni e uiga ia Iesu Keriso lea e mafai ona fesoasoani ia te oe e mulimuli ai ia te Ia e tusa lava pe faigata ma e le vave ona maua faamanuiaga. Ia gauai atu i uunaiga mai le Agaga Paia ia e mafai ona fesoasoani ia te oe i ou tulaga patino.

O folafolaga a le Alii

A o faitau e tagata aoga fuaitau nei, mafaufau e valaaulia i latou e faailoga faamatalaga uma o loo faasino atu ai le Alii ia te Ia lava (o faamatalaga e amata mai i le a’u, o a’u, o le a ou, ma le ua ou). O le faailogaina o mau e mafai ona fesoasoani i tagata aoga e maitau ma manatua ai malamalamaaga taua ma upumoni ua latou aoaoina.

Faitau le Esoto 6:1–8; 7:1–2, 5, vaavaai mo mea na aoao atu e le Alii ia Mose e uiga ia te Ia lava.

O le a se mea ua e aoaoina e uiga i le Alii mai Ana folafolaga ia Mose?

E mafai e tagata aoga ona tusi a latou tali i lalo o le “O ai le Alii?” i luga o le laupapa. O tali a tagata aoga e mafai ona aofia ai le lisi lenei:

O Ia o le Atua Malosi Aoao (6:2–3).

E manatua ma tausia e Ia Ana folafolaga (6:3–5).

Na Ia folafola mai e faasaoloto le fanauga a Isaraelu mai le pologa (6:6; 7:5), tuu atu ia te i latou le laueleele o Kanana (6:4, 8), ma avea ma o latou Atua (6:7)

Faaauau ona faia le finagalo o le Alii

Toe mafaufau i faalogona o Mose i le taimi ua tea. Faitau le Esoto 7:6, ma faailoga mea na faia e Mose ma Arona ina ua uma ona aoao mai le Alii ma faalogo i Ana folafolaga.

Ana faapea o oe o Mose, o le fea o folafolaga mai le Alii na semanu e fesoasoani ia te oe e te toe foi atu ai ia Farao? Aisea?
O le a se upumoni e mafai ona tatou aoao mai i le aafiaga o Mose?

I le faaaogaina o a latou lava upu, e mafai ai e tagata aoga ona faailoa mai se upumoni e talitutusa ma lenei: Pe a tatou talitonu i le Alii ma Ana folafolaga, e mafai ona tatou faatuatuaina ma mulimuli ia te Ia e tusa lava pe tatou te le vaaia le taunuuga vave.

Ina ia fesoasoani i tagata aoga ia malamalama pe faapefea ona faatatau lenei upumoni i tulaga latou te ono feagai, mafaufau e faasoa atu le faamatalaga lenei. E mafai e tagata aoga naunautai ona faitau leotele parakalafa taitasi i le vasega.

Na tuuina mai e Elder D. Todd Christofferson o le Korama a Aposetolo e Toasefululua se fautuaga taua mo i tatou a o tatou faatalitali mo faamanuiaga folafolaina a le Alii:

13:17

E malamalama sese nisi i folafolaga a le Atua faapea o le usiusitai ia te Ia e fua mai ai ni taunuuga patino i se taimi patino. Latou te ono mafaufau, “Afai ou te auauna atu ma le filiga i se misiona tala’i, o le a faamanuiaina au e le Atua i se faaipoipoga fiafia ma ni fanau” po o le “Afai ou te le faia a’u meaaoga i le Sapati, o le a faamanuiaina au e le Atua i ni togi lelei,” po o le “Afai ou te totogia sefuluai, o le a faamanuiaina au e le Atua i le galuega lea sa ou manao ai.” … E le tatau ona tatou mafaufau i le fuafuaga a le Atua o se masini faifaatau o le vanimonimo tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka.

O le a faamamaluina lava e le Atua Ana feagaiga ma folafolaga ia i tatou taitoatasi. Tatou te lē tau popole i lena mea. O le mana togiola o Iesu Keriso … e mautinoa ai e mafai ma o le a faataunuuina e le Atua Ana folafolaga. E taua tele lo tatou faamamaluina ma usiusitai i Ana tulafono, ae e le o faamanuiaga uma e faavae i le usiusitai i le tulafono e mamanuina, fuafuaina, ma faatulagaina e tusa ai ma o tatou faamoemoega. Tatou te faia le mea sili [tatou te mafaia] ae e tatau ona tuu atu ia te Ia le faasoaina o faamanuiaga, i le faaletino ma le faaleagaga. (“O La Tatou Sootaga ma le Atua,” Liahona, Me 2022, 78)

O le a se mea na tulagaese ia te oe mai lenei saunoaga?

Faamanatu i tagata aoga o se tasi o mea na tatou aoaoina e uiga i le Alii e faapea, e manatua ma tausia e Ia Ana folafolaga (tagai Esoto 6:3–5).

Faamalamalama atu faapea, na faataunuuina e le Alii Ana folafolaga ia Mose (tagai Esoto 20:2; Teuteronome 7:6; 14:2; Iosua 24:5–7, 13). Afai e lava lou taimi, e mafai ona e tusia nei mau faasino i luga o le laupapa ma fai atu i tagata aoga e faafetaui le faataunuuga i le folafolaga.

E pei lava ona aoao atili e le Alii ia Mose e uiga ia te Ia lava e ala i le toe ta’uta’uina o Ana folafolaga, e mafai foi ona tatou iloa lelei le Alii e ala i le faailoaina o folafolaga na Ia faia ia i tatou. O le toe faamanatuina o nei folafolaga e mafai ona fesoasoani ia i tatou e usiusitai ai ia te Ia, e tusa lava pe tatou te le maua ni taunuuga vave.

Faailoa mai ni folafolaga se tolu na faia e le Alii ia te oe i tusitusiga paia pe mai i aoaoga lata mai nei e ala mai i Ana auauna filifilia. E te mafai ona maua folafolaga i le:

Fuaitau o aoaoga faavae po o isi mau.
Mo Le Malosi o le Autalavou: O Se Taiala mo le Faia o Filifiliga.
Lauga o le konafesi aoao aupito lata mai.

A mae’a o loo lava se taimi, e mafai ona e valaaulia tagata aoga naunautai e faasoa mai mea na latou aoaoina pe lagonaina a o latou suesueina nisi o folafolaga. Uunaia tagata aoga e faaauau pea ona faatuatuaina le Alii e tusa lava po o le a le taunuuga vave.

Punaoa Faaopoopo

E faapefea ona faamanuiaina vave au pe a ou le vaai i faamanuiaga ou te sailia?

Na faamalamalama mai e Sister Andrea Muñoz Spannaus o le Au Peresitene Aoao o Tamaitai Talavou:

A o e filifili foi e pipiimau i le faatuatua ma faamoemoe mo faamanuiaga o loo e sailia, o le a e iloa ai o loo faatasi pea le Tama Faalelagi ma Iesu Keriso ma oe. I taimi uma. E mafai ona tatou maua le faamoemoe i Ana folafolaga e tusa lava pe o mamao faamanuiaga faapitoa o loo tatou sailia. E mafai ona tatou tumau faamaoni e tusa lava pe a o tatou te faatalitali pea. (“How Can We Continue to Have Faith When Promised Blessings Don’t Seem to Come?” YA Weekly, Apr. 29, 2022, ChurchofJesusChrist.org)

O le a se mea e mafai ona ou faia pe a foliga mai e le oo mai faamanuiaga mai lo’u usiusitai?

Sa faasoa mai e Elder Dale G. Renlund o le Korama a Aposetolo e Toasefululua:

15:10

Afai e le’i mauaina lava se faamanuiaga manaomia mai le Atua—ia—e le manaomia la ona e soona atuatuvale, ma taumate po o a nisi mea e manaomia ona e faia. Ae, faalogo i le fautuaga a Iosefa Samita ia “faia ma le fiafia mea uma ua i ai i [lou] mana; ona … tutulai e faatali, ma le mautinoa atoatoa, e vaai i le … aao [o le Atua] … e faaali mai” [Mataupu Faavae ma Feagaiga 123:17]. O nisi faamanuiaga e faapolopolo mo se taimi o mulimuli mai, e oo lava i fanau sili ona totoa a le Atua. (“Faatumulia i Fa’amanuiaga,” Liahona, Me 2019, 72)

O le a se mea e faia ia avea ai o se soo o Iesu Keriso?

Na faamalamalama mai e Peresitene Jeffrey R. Holland o le Korama a Aposetolo e Toasefululua:

13:6

Ina ia avea ma soo o Iesu Keriso, e tatau i le tagata ona amoina i nisi taimi se avega ma alu i le mea o loo manaomia ai le osigataulaga ma lē ma’alofia ai mafatiaga. O se Kerisiano faamaoni e le mafai ona mulimuli i le Matai i na o mea e lotomalie o ia i ai. Leai. Tatou te mulimuli ia te Ia i mea uma, e aofia ai, pe a tatau ai, i nofoaga e tumu i loimata ma faigata, ia atonu tatou te tutu ai na o i tatou i nisi taimi. (“Sii a’e i luga o le Satauro,” Liahona, Nov. 2022, 78)

Gaoioiga Faaopoopo e Aoao Ai

Se isi amataga

Ina ia fesoasoani i tagata aoga ia iloa fesootaiga i le va o o latou olaga ma le Esoto 5–6, mafaufau e amata le vasega i se fesili e pei o le:

O a nisi o faataitaiga o le faamaliega vave po o ituaiga o mea faatauanau i le taimi e manaomia ai e te mauaina i lou olaga?

E mafai ona e faasoa atu le saunoaga lenei mai ia Peresitene Dieter F. Uchtdorf ao avea ma se tasi o le Au Peresitene Sili:

Ua tatou ola i se lalolagi ua i ai meaai e saunia faavavave, feau tusitusi i telefoni feaveai, ma tifaga e maua i le taimi e manaomia ai, ma tali vave i fesili e sili ona leai se taua po o fesili loloto foi. Tatou te le mananao e faatalitali. O nisi foi e lagonaina le vevela o le toto pe a tuai le minoi o le latou laina i le faleoloa, nai lo isi [laina] lata ane. (“Fa’aauau i le Onosai,” Liahona, Me 2010, 56)

E faapefea ona tutusa lenei auala i le mauaina o mea tatou te mananao i ai, pe ese ai foi mai le mauaina o faamanuiaga mai le Atua?
O a nisi o faataitaiga o faamanuiaga tatou te sailia mai le Atua atonu e le vave ona oo mai?
O a nisi o auala e mafai ona tatou manuia ai e ala i le faatelegese ona tuuina mai o faamanuiaga tatou te sailia mai le Atua?

O le faataitaiga a le Faaola o le faia ai o le finagalo o Lona Tama

E mafai ona aoao tagata aoga mai le faataitaiga a le Faaola o le mulimuli ma le faamaoni ai i le finagalo o le Tama Faalelagi, e tusa lava po o le a le taunuuga. E mafai e tagata aoga ona faitau le 3 Nifae 27:13 ma faailoa mai le mafuaaga na afio mai ai le Faaola i le lalolagi. Valaaulia tagata aoga e mafaufau i faataitaiga faatusipaia o loo faaalia ai na faia e le Faaola le finagalo o le Tama e tusa lava po o a taunuuga le lelei i se taimi puupuu. O nisi o faataitaiga e ono i ai e aofia ai le Mareko 3:1–6; 11:15–18; Luka 22:41–44; Ioane 11:43–53; 1 Nifae 19:9–10.

E mafai ona e fai atu i tagata aoga e faasoa mai mea e tulaga ese ia i latou mai le faataitaiga a le Faaola. E mafai foi ona e talanoaina pe faapefea e le manatuaina o le faataitaiga a le Faaola ona fesoasoani ia i tatou pe a faigata ona tatou mulimuli i le finagalo o le Atua.

O isi faataitaiga o le faia o le finagalo o le Tama Faalelagi

Afai o le a faamanuiaina tagata aoga mai le suesueina o isi faataitaiga o tagata taitoatasi o e, e pei o Mose, sa faaauau pea ona faamaoni i le faia o le finagalo o le Alii e tusa lava pe sa faigata, e mafai ona e tusia igoa nei (po o isi igoa e te mafaufau i ai) i luga o le laupapa: Iosefa o Aikupito, Nifae, Apinati, Iosefa Samita.

E mafai e tagata aoga ona faasoa mai mea ua latou aoaoina mai nei tagata e mafai ona fesoasoani ia i latou pe a faigata ia i latou ona faia le mea tonu.

Tusiga o mekasini a le Ekalesia

Ina ia fesoasoani i tagata aoga ia iloa faataitaiga o tagata taitoatasi o loo faia ma le faamaoni mea ua poloaiina i latou e le Alii e fai e tusa lava po o le a le taunuuga vave, mafaufau e tuu atu ia i latou e faitau se tasi po o tusiga uma nei e lua:

“O La’u Tauivi ma le Atuatuvale i le Ekalesia.” Sa faasoa mai e se tamaitai talavou e 17 tausaga le matua e uiga i lona aafiaga o le faaauau pea ona auai i le lotu e ui lava i lona atuatuvalega.
“Ola ‘e pei’ ua Faataunuuina Folafolaga a le Atua.” Sa faasoa mai e se tagata matua nofofua ni manatu se tolu e mafai ona fesoasoani ia i tatou e agai ai i luma ma le faamaoni pe a lei faataunuuina nisi o folafolaga patino i o tatou olaga.