“Genesis 19: ‘Ayaw Kamo Paglingi,’” Manwal sa Magtutudlo sa Seminary sa Daang Tugon (2026)
“Genesis 19: ‘Ayaw Kamo Paglingi,’” Manwal sa Magtutudlo sa Seminary sa Daang Tugon
Genesis 18–23: Leksiyon 26
Genesis 19
“Ayaw Kamo Paglingi”
Ang Ginoo sa kanunay nagpakabana mahitungod sa daotang mga impluwensiya sa atong mga kinabuhi. Ang mga sakop sa pamilya ni Lot naimpluwensiyahan sa mga daotan nga nagpalibot kanila sa siyudad sa Sodoma. Kini nga leksiyon makatabang sa mga estudyante nga makalikay sa mga impluwensiya sa daotan diha sa ilang mga kinabuhi aron sila mas hingpit nga makasunod sa Langitnong Amahan ug ni Jesukristo.
Pagpangandam sa estudyante: Dapita ang mga estudyante sa paghunahuna mahitungod sa mga impluwensiya sa ilang kinabuhi o mga tentasyon nga ilang giatubang nga nagpugong kanila sa pagsunod sa Langitnong Amahan ug ni Jesukristo. Dapita sila sa paghunahuna kon nganong kinahanglan nilang tangtangon kini nga mga babag gikan sa ilang mga kinabuhi ug unsaon nila kini pagbuhat.
Posibleng mga Kalihokan sa Pagkat-on
Gamay nga mga pagpili uban sa dakong mga sangputanan
Si Elder Massimo De Feo sa Seventy mipakigbahin sa usa ka importante nga kamatuoran mahitungod sa mamahimong epekto sa atong mga pagpili:
Ang mga desisyon nga atong himoon matag adlaw tingali ingon og gamay, apan kini sa kanunay adunay tinuod nga mga implikasyon ug dako nga mga sangpotanan, alang sa maayo ug daotan. (“Gamay nga mga Pagpili, Dako og mga Sangpotanan,” Liahona, Ago. 2019, 14)
-
Unsa ang pipila ka ehemplo sa gagmay nga mga pagpili nga atong himoon nga mahimong adunay dakong mga sangpotanan?
Kon gikinahanglan, ikonsiderar ang pagpakigbahin sa pipila ka ehemplo, sama sa media nga atong gigamit; ang matang sa mga higala nga atong pilion; o ang mga pagpili nga atong himoon mahitungod sa pagtuon sa mga kasulatan, pagtambong sa simbahan, o pag-ampo. Ang ubang mga ehemplo tingali mas makahuloganon sa imong mga estudyante. Dapita ang mga estudyante nga hisgotan sa unsang paagi kini nga mga pagpili mahimong adunay dakong mga sangpotanan, alang sa maayo o sa daotan.
Dayon ipakigbahin ang mosunod aron matabangan ang mga estudyante nga maandam ang ilang kaugalingon sa espirituhanon alang sa karon nga leksiyon.
Hunahunaa ang mga pagpili nga imong gihimo karon nga magdala kanimo ngadto sa Langitnong Amahan ug ni Jesukristo. Usab hunahunaa mahitungod sa mga pagpili nga tingali magdala nimo palayo gikan Kanila. Samtang magtuon ka karon, hatagi og pagtagad ang espirituhanong mga pag-aghat nga imong madawat mahitungod kon unsaon nga mapaduol sa Langitnong Amahan ug ni Jesukristo.
Si Lot mitukod sa iyang tolda nga nag-atubang sa Sodoma
Ang Daang Tugon naglakip sa asoy sa usa ka tawo nga gihinganlan og Lot, ang pag-umangkon nga lalaki ni Abraham. Si Lot ug ang iyang pamilya nagpuyo sa siyudad sa Sodoma, diin nailhan sa sobrang kadaotan niini (tan-awa sa Genesis 13:13; 18:20; Ezequiel 16:49–50; Judas 1:7–8). Gamay lang kadto nga pagpili nga nagdala ni Lot ug sa iyang pamilya aron mopuyo sa Sodoma.
Dapita ang mga estudyante sa pagpakigbahin unsay ilang nasayran mahitungod sa mga sitwasyon nga nagdala ni Lot aron mopuyo sa Sodoma. Ang mosunod nga pagpasabot mahimong gamiton kon gikinahanglan.
Human si Abraham, si Lot ug ang ilang mga pamilya mibalhin gikan sa Ehipto ngadto sa yuta sa Canaan, wala magkasinabot ang tigbantay sa mga hayop ni Abraham ug sa tigbantay sa mga hayop ni Lot tungod kay dili na paigo nila ang lugar pasibsiban. Aron malikayan ang dugang kagubot, nagbulag ang mga pamilya ni Abraham ug Lot, ug ang matag usa mipili kon asa sila magpuyo.(tan-awa sa Genesis 13:8–9).
Imbis basahon ang mosunod nga mga bersikulo isip usa ka klase, pwedeng buhaton kini sa mga estudyante nga magkapares. Pwede nga basahon sa magkapares ang mga bersikulo ug magdrowing sa usa ka litrato nga nagpakita sa mga lihok ni Lot ug Abraham.
Basaha ang Genesis 13:10–13, 18, nga mangita kon asa ang matag pamilya mihukom nga magpuyo. (Niini nga mga bersikulo ang, Abram nagpasabot nga Abraham. Ang Ginoo sa ulahi miusab sa iyang ngalan ngadto sa Abraham, sama sa narekord sa Genesis 17:5.)
-
Unsa nga mga kalahian ang imong nabantayan sa desisyon tali sa matag pamilya?
-
Unsa nga mga desisyon ang pwedeng mahimo sa usa ka tawo karon nga mahimong sama sa pagtukod ni Lot sa iyang tolda atubang sa Sodoma? Unsa nga tambag ang imong mahatag niini nga mga sitwasyon?
Kon ang mga estudyante maglisod sa paghunahuna sa modernong adlaw nga mga pagdesisyon nga sama sa pagtukod ni Lot og tolda atubang sa Sodoma, pwede kang mopakigbahin og pipila ka ehemplo, dayon hatagi og higayon ang mga estudyante nga mohatag og tambag alang niini nga mga sitwasyon. Ang mga ehemplo maglakip sa paggamit og malaw-ay nga pinulongan, pagpili sa dili maayong sulod sa media, ipakaubos ang sumbanan sa pagsinina o sa pagkaligdong aron mahisakop, o paggahin og oras sa mga higala kinsa nagbaliwala sa mga panudlo sa Manluluwas.
Ang pagkalaglag sa Sodoma ug Gomorra
Si Lot ug ang iyang pamilya wala magpabilin sa ilang tolda nga nag-atubang sa Sodoma. Sa kataposan, sila mibalhin ngadto ug “nagpuyo sa Sodoma”(Genesis 14:12).
Pwede nga i-cross reference sa mga estudyante ang Genesis 14:12 sa Genesis 13:12 diha sa ilang mga kasulatan. Kon ang mga estudyante naghimo og usa ka drowing sa sayong bahin sa leksiyon, pwede usab nimo silang dapiton nga i-update ang ilang drowing nga nagpakita sa bag-ong lokasyon ni Lot.
Ang mga nagpuyo sa Sodoma ug sa duol nga mga siyudad sa Gomorra misalikway sa mga propeta nga gipadala sa Ginoo aron sa pagpasidaan kanila (tan-awa sa Mga Pagtulun-an sa mga Presidente sa Simbahan: Joseph Smith [2007], 242). Sa Iyang kaluoy, ang Ginoo mipadala og mga mensahero ngadto sa Sodoma aron sa pagpasidaan kang Lot ug sa iyang pamilya nga mopahawa sa siyudad sa dili pa kini laglagon (tan-awa sa Genesis 19:12–13). Tungod kay gisalikway sa mga tawo ang mga propeta ug mipadayon sa pagkadaotan sila nalaglag.
Basaha ang Genesis 19:14–19, 24–26, nga mangita kon sa unsang paagi mitubag si Lot ug ang iyang pamilya sa mga instruksyon nga mopahawa dayon sa siyudad.
-
Unsa ang labing mahinungdanon alang kaninyo niini nga mga bersikulo? Ngano man?
-
Unsa ang gitudlo kanimo niini nga mga bersikulo mahitungod sa Ginoo?
Mahimo usab nimong pangutan-on ang mga estudyante unsa ang ilang nakat-onan nga mahimong makatabang sa usa ka tawo kinsa mobati nga morag dili peligro nga moapil sa gamayng buhat sa mga pagkadaotan.
Aron matabangan ang mga estudyante nga makasabot nganong ang asawa ni Lot nahimong usa ka “haligi sa asin” sa (bersikulo 26), mahimong makatabang pod ang pagpasabot nga ang asawa ni Lot pwede nga wala lang molingi apan mahimong mibalik sa Sodoma (tan-awa sa Lucas 17:28–32). Mahimo nimong ipakigbahin ang mosunod nga pamahayag ni Presidente Jeffrey R. Holland.
Mipakigbahin si Presidente Jeffrey R. Holland sa Kurom sa Napulog Duha ka Apostoles sa posible nga mga rason ngano nga ang asawa ni Lot nahimong usa ka “haligi nga asin” sa (bersikulo 26):
Sa klaro, unsa ang sayop sa asawa ni Lot mao nga wala lamang siya milingi; diha sa iyang kasingkasing siya gusto nga mobalik. …
Posible nga ang asawa ni Lot milingi nga may kasuko sa Ginoo tungod sa Iyang sugo ngadto kaniya sa pagbiya. (“Remember Lot’s Wife” [debosyonal sa Brigham Young University, Ene. 13, 2009], 2, speeches.byu.edu)
Ikonsiderar ang pagdapit sa mga estudyante sa paghisgot sa mosunod nga pangutana uban sa usa ka pares o diha sa gagmay nga grupo sa dili pa sila mopakigbahin sa ilang mga tubag diha sa klase.
-
Unsa ang pipila ka mga kamatuoran nga imong nakat-onan gikan sa asoy ni Lot ug sa iyang pamilya nga maggamit sa mga sitwasyon nga imong giatubang sa kinabuhi?
Gamit ang ilang kaugalingon nga mga pulong, mahimong ilhon sa mga estudyante ang mga kamatuoran nga susama sa mosunod:
Pagtugot sa mga impluwensiya sa daotan diri sa atong mga kinabuhi—bisan gamay ra kaayo—makapalayo kanato gikan ni Jesukristo.
Isip mga disipulo ni Jesukristo, kinahanglan kitang mopalayo sa pagkadaotan ug dili molingi.
Aron matabangan ang mga estudyante nga mas makasabot ug mobati sa kamahinungdanon niini nga mga kamatuoran, ikonsiderar ang paghisgot og mga pangutana sama sa mosunod.
-
Unsa ang makatabang nimo nga makaila sa bisan gamay ra kaayo nga mga impluwensiya nga makapalayo nimo gikan sa Langitnong Amahan ug ni Jesukristo?
-
Unsaon sa pagtabang sa Manluluwas kanato nga mobiya sa atong nangagi nga mga sala ug mopadayon uban ang hugot nga pagtuo?
Dapita ang mga estudyante nga ipakigbahin ang ilang mga kasinatian nga konektado sa mga kamatuoran nga imong gihisgotan. Mahimo usab nga mopakigbahin ka sa imong kaugalingon nga mga kasinatian.
Paggamit niini diha sa imong kinabuhi
Aron matabangan ang mga estudyante nga magamit ang mga kamatuoran nga ilang gitun-an, ipakita ang mosunod nga mga instruksiyon ug mga pangutana. Dapita ang mga estudyante sa pagtinguha og inspirasyon gikan sa Dios aron sa pag-ila sa mga kausaban nga Iyang ipabuhat nila.
Hunahunaa kon unsa nga mga aksiyon ang gibati nimo nga nadasig nga buhaton isip resulta sa imong nakat-onan karong adlawa. Diha sa imong journal sa pagtuon, isulat ang usa ka plano kong unsa ang imong buhaton ug kanus-a nimo buhaton. Kon gikinahanglan, ang mosunod nga mga pangutana makatabang nimo sa paghimo og plano:
-
Unsa ang pipila sa morag gagmay nga mga desisyon nga gibuhat nimo sa kasamtangan nga sa kataposan mopalayo kanimo gikan sa Langitnong Amahan ug ni Jesukristo? Unsa nga mga kausaban ang imong buhaton?
-
Unsa ang imong buhaton aron biyaan ang nangagi nga mga sala ug mopadayon uban sa hugot nga pagtuo ni Jesukristo?
Ikonsiderar ang pagpamatuod sa mga kamatuoran nga imong natun-an karon. Dasiga ang mga estudyante sa paglihok sa ilang mga plano.