“Faatomuaga i le Feagaiga Tuai: O Loo Molimau mai le Feagaiga Tuai i se Tama Faalelagi Agaalofa ma Iesu Keriso,” Tusi Lesona a le Faiaoga Seminare o le Feagaiga Tuai (2026)
“Faatomuaga i le Feagaiga Tuai: O Loo Molimau mai le Feagaiga Tuai i se Tama Faalelagi Agaalofa ma Iesu Keriso,” Tusi Lesona a le Faiaoga Seminare o le Feagaiga Tuai
Faafeiloai Atu Mai le Feagaiga Tuai: Lesona 1
Faatomuaga i le Feagaiga Tuai
O loo Molimau mai le Feagaiga Tuai i se Tama Faalelagi Agaalofa ma Iesu Keriso
O le Feagaiga Tuai o loo i ai le tele o aoaoga ma faatusa e uiga i le Alii o Iesu Keriso ma Lana matafaioi o se Faaola o le lalolagi. O tala mai le Feagaiga Tuai e mafai ona fesoasoani i tagata aoga e aoao ai e uiga ia te Ia ma iloa ai pe o faapefea ona aofia ai o Ia i o tatou olaga. O lenei lesona ua faamoemoe e fesoasoani i tagata aoga e faateleina ai lo latou manao e faalatalata atili atu i le Tama Faalelagi ma Iesu Keriso e ala i la latou suesuega o le Feagaiga Tuai.
Sauniuniga a le tagata aoga: Mafaufau e valaaulia tagata aoga e toe faamanatu se tala e sili ona fiafia i ai mai le Feagaiga Tuai ma mafaufau loloto po o le a se mea e ono aoao mai e lena tala e uiga i le Tama Faalelagi po o Iesu Keriso.
Gaoioiga e Mafai ona Fai e Aoao Ai
O la tatou taulaiga
Ina ia amataina le lesona, mafaufau pe mafai faapefea ona e fesoasoani i tagata aoga e vaavaai totoa atili mo le Faaola i le Feagaiga Tuai. O se tasi o auala e faia ai lenei mea o le tuu lea o ni ata o le Faaola faataamilo i le potu a o lei amataina le vasega. A uma ona amata le vasega, e mafai ona e fesili i le vasega pe fia ni ata o le Faaola sa latou maitauina ma talanoaina pe aisea na latou maitauina ai pe lei maitauina ai foi ia ata.
O le isi auala e fai ai lenei mea o le faamalamalama atu lea i tagata aoga o le a latou matamata i se vitio o loo faaali mai ai ni ’au se lua: o le tasi o loo ofuina ni ofu papa’e ma le tasi o ofuina ofu uli. O le a taufaipasi se polo pasiketipolo e ia ‘au e lua. Valaaulia tagata aoga e taumafai e faitau sa’o le numera o pasi e fai e le ’au papa’e.
Faaali le vitio “Su’ega Taulai,” o loo maua i le ChurchofJesusChrist.org, mai le taimi 0:00 i le 0:22. Ona taofi lea o le vitio.
-
E fia ni pasiga sa mafai ona e faitauina?
-
Na e maitaua nisi mea sa tutupu i le vitio? Afai o lea, o le ā?
Ta le vaega o totoe o le vitio (e toe fai faafia ai le toleniga e tasi) ma valaaulia tagata aoga e matamata mo soo se mea atonu latou te lei vaai i ai i le taimi muamua.
-
O le a se mea na e maitauina e te lei vaai i ai i le taimi muamua?
Afai e manaomia, e mafai ona e ta’u atu i ai sa savali atu se tamaitai matua i le isi itu o le fola, o se fitafita ninja o loo ofuina se ofu uliuli na suia se tasi o le au taaalo, o nisi o tama sa fai ni pulou, ma sa pasi e nisi se polo lakapi nai lo se polo pasiketipolo.
-
Aisea na e le vaaia ai nisi o na mea i le taimi muamua na matamata ai?
-
E faapefea ona talitutusa lenei mea ma le mea e ono oo i ai se tasi pe a faitau i tala o le Feagaiga Tuai?
Faatasi ai ma soo se tasi o auala [nei] e lua e amata ai le lesona, ia mautinoa ua manino i tagata aoga e faapea, afai tatou te le faaeteete, atonu tatou te taulai atu i isi mea ma lē amanaiaina mea e aoao mai e le Feagaiga Tuai ia i tatou e uiga i le Tama Faalelagi ma Iesu Keriso.
Faitau le saunoaga lenei a Elder Michael T. Ringwood o le Fitugafulu, ma vaavaai mo mea e mafai ona tatou aoaoina e uiga i le Tama Faalelagi ma Iesu Keriso a o tatou faitau i le Feagaiga Tuai.
O i tatou o le taulaiga o le fuafuaga a le Tama Faalelagi ma le mafuaaga o le misiona a lo tatou Faaola.
O lea mataupu ma lea mataupu [o le Feagaiga Tuai] tatou te maua ai faataitaiga o le ala o loo aofia tonu ai le Tama Faalelagi ma [Iesu Keriso] i o tatou olaga. (“Aua ua Faapea Lava Ona Alofa Mai o le Atua ia i Tatou,” Liahona, Me 2022, 88–89)
-
E tusa ai ma le saunoaga a Elder Ringwood, o le a se mea o faaali mai e le Feagaiga Tuai ia i tatou e uiga i le Tama Faalelagi ma Iesu Keriso?
Atonu e maua mai e tagata aoga ni upumoni e pei o:
O i tatou o le taulaiga o le fuafuaga a le Tama Faalelagi ma le mafuaaga o le misiona a le Faaola.
O loo aofia patino lava le Tama Faalelagi ma Iesu Keriso i o tatou olaga.
Fai atu i le vasega e faasoa mai o latou manatu ma lagona e uiga i nei upumoni ma pe aisea atonu e taua ai ia i latou. Valaaulia tagata aoga e faauma le iloiloga patino lenei e i latou lava. E mafai ona latou faamaumauina a latou tali i se api talaaga mo suesuega.
Mafaufau i so o se aafiaga na e oo i ai mai le Feagaiga Tuai.
-
Na faape’i ou aafiaga i le Feagaiga Tuai?
-
Afai na i ai ni ou aafiaga mai le Feagaiga Tuai, pe na latou fesoasoani ea ia te oe ia lagona le latalata atili atu i le Tama Faalelagi ma Iesu Keriso?
A o e suesueina lenei lesona, saili le fesoasoani e ala i le Agaga Paia ia iloa ai pe faapefea ona latalata atili atu i le Tama Faalelagi ma Iesu Keriso e ala i lau suesuega o le Feagaiga Tuai.
Tama Faalelagi ma Iesu Keriso i le Feagaiga Tuai
Mafaufau e fai i le vasega e faasoa mai mea ua uma ona latou iloa e uiga i le Feagaiga Tuai. Afai e manaomia, e mafai ona e faasoa atu o le Feagaiga Tuai e amata i se tala o le Foafoaga o le lalolagi ma [le tala ia] Atamu ma Eva. O loo faamatala mai ai tala o le toatele o perofeta ma tagata o e sa tele lava ina nonofo i totonu ma faataamilo ia Isaraelu ma faaiu ai pe tusa o le 400 TLM. Ona e faamatala atu lea o mea nei i au lava upu:
A o e suesue i le Feagaiga Tuai, o le a faasino atu i le Alii po o Ieova. E fesoasoani le iloa ai e faapea o Ieova o Iesu Keriso. Na faia e Ieova le finagalo o le Tama Faalelagi i mea uma. A o e aoao e uiga ia Ieova, ua e aoao foi e uiga i le Tama Faalelagi, o le sa taialaina ma faamanaina o Ia.
Faaali atu ni ata i se mamanu lapotopoto o loo faaalia ai tala o le Feagaiga Tuai. (E ono fesoasoani le saunia o oe lava a o lei amataina le vasega e ala i le faamanatuina o tala o loo tuuina atu.) I le ogatotonu o nei ata, tuu i ai se ata o Iesu Keriso. E mafai ona e filifili e faaaoga ata e pei o nei.
I se faiga fesuiai, e mafai ona e faaali atu le ata o Iesu Keriso ma valaaulia le vasega e mafaufau i ni a latou lava tala e faapupula ai Lona aofia ai ma le alofa i le Feagaiga Tuai. E mafai e tagata aoga ona tusi ni ulutala faigofie mo na tala e siomia ai le Faaola.
O loo lisi atu tala o loo i lalo, e amata mai le pito i luga ma galulue faataamilo agai i le itu taumatau.
-
Iosefa i Aikupito (Kenese 37:23–28; 39:1–5). Ina ua uma ona faasoa atu e Iosefa lana miti i lona aiga, sa taupulepule nanā uso o Iosefa e faasaga ia te ia.
-
O Mose o loo vaeluaina le Sami Ulaula (Esoto 14:10, 13–16, 21–22). Sa sosola ese le fanauga a Isaraelu mai Aikupito ina ua o atu le autau a Farao e osofai ma toe faapologa i latou.
-
Gata i luga o le pou (Numera 21:4–9). Ina ua uma ona laveaiina e le Alii ia Isaraelu mai Aikupito ma saunia faavavega le areto mai le lagi, sa faitio Isaraelu i le Atua.
-
Tavita ma Koliata (1 Samuelu 17:43–49). Na luiina e Koliata le fitafita a Filisitia ia Isaraelu e auina atu so latou tagata tau sili ona lelei e tau ma ia. Sa ofo atu Tavita na te faafetaiai o ia.
-
Ogaumu aasa (Tanielu 3:4–6, 12–13, 16–25). Na faatuina e le Tupu o Nepukanesa se tupua auro ma tālo faatasi taitai o lona malo e faapaiaina.
-
Lua o le leona (Tanielu 6:7, 10, 16–23). Sa tofia e Tariu ia Tanielu e avea ma pule i Papelonia. Sa taupulepule isi taitai e faasaga ia te ia ina ia le toe fiafia i ai le tupu.
Mafaufau e tuu tagata aoga i ni paga po o ni vaega toalaiti. E mafai e tagata aoga ona filifili se tala se tasi pe sili atu, faitau fuaiupu e fesootai i ai, ma talanoaina fesili nei.
-
E faapefea ona faaalia e lenei tala le alofa po o le aofia ai o le Tama Faalelagi ma Iesu Keriso?
-
E mafai faapefea e le malamalama ai i le tala i lenei auala ona fesoasoani ia te oe?
E mafai ona e valaaulia tagata aoga e faasoa mai i le vasega ni malamalamaaga na maua mai i a latou talanoaga.
Afai e le o ta’ua mai e tagata aoga, faamalamalama atu o le suesueina o le auala o loo aofia ai le Alii i olaga o tagata taitoatasi i le Feagaiga Tuai e mafai ona fesoasoani ia i tatou e mafaufau loloto ai pe o faapefea ona aofia o Ia i o tatou olaga. Valaaulia tagata aoga e mafaufau loloto pe na faapefea ona faamanuiaina ma fesoasoani le Alii ia i latou. Fai atu i ni nai tagata aoga e faasoa mai o latou manatu ma aafiaga pe afai e le patino tele i latou.
Suesueina o le Feagaiga Tuai
Atonu o se avanoa lelei lea e faamanatu atu ai i tagata aoga a latou sini o le suesueina o tusitusiga paia i aso taitasi. E mafai ona e valaaulia tagata aoga e saili le taitaiga a le Agaga Paia a o latou iloiloina, fetuunai, pe fatuina ni sini mo le suesueina o tusitusiga paia. E mafai ona e fesili i le vasega pe i ai se tasi o i latou e manao e faasoa mai a latou sini i le vasega e fesoasoani ai e faatupuina manatu mo isi.
Mafaufau e valaaulia tagata aoga e talanoaina o se vasega pe tusi a latou tali ia latou api talaaga mo suesuega i fesili nei.
-
O le a se mea ua e aoaoina i le aso e te manatu e mafai ona fesoasoani ia te oe i lau suesuega o le Feagaiga Tuai?
-
Aisea o le a avea ai o se faamanuiaga ia te oe lou mauaina ma iloa le alofa ma le aofia ai o le Tama Faalelagi ma Iesu Keriso i lou olaga?
Ina ia fesoasoani i tagata aoga ia latou suesuega o le Feagaiga Tuai i lenei tausaga, e mafai ona e valaaulia i latou e maka i a latou tusitusiga paia pe tusi foi i a latou api talaaga mo suesuega i taimi uma latou te vaai ai i faamaoniga o le alofa po o le aofia ai o le Atua i olaga o Ana fanau. Mafaufau e faaiu i lau molimau i le ala e mafai ai e le suesueina o le Feagaiga Tuai ona fesoasoani ia i tatou e faalatalata atili atu ai i le Tama Faalelagi ma Iesu Keriso ma maua ai le faatuatua i lo La’ua aofia ai i o tatou olaga.
E ono mafai ona e valaaulia tagata aoga e faasoa ma o latou aiga mea sa latou aoaoina i le aso. E ono mafai ona fesoasoani lenei mea i o latou aiga a o latou suesue i le Feagaiga Tuai.