Mwakoro 49
Te Moan Toa
Ni katoa ririki Iutaia a karaoa te baka ibukin te Toa are Te Riao. E buokiia aomata aika Iutaia bwa a na uringnga bwa te Atua e a tia ni kamaiuia aia bakatibu n ana tai Mote.
Te Otinako 12:27; Ruka 22:7
Iesu ao Abotoro ake Tengaun ma Uoman a kainnanoa te tabo are a na amwarake iai ibukin te baka n te Toa are Te Riao. Te Tia Kamaiu e kanakoa Betero ao Ioane bwa a na kakaea te ruu ao n taraia bwa a tauraoi bwaai nako ibukin te baka.
Ruka 22:8
A kunea te ruu ao a katauraoa te baka.
Ruka 22:9–13
Iesu ao ni kabane Abotoro a nako ikekei. A ikotaki n amwarake ibukin te Toa are Te Riao.
Ruka 22:14
Bon te moan tai are Iesu e angania Ana Abotoro te Toa. E anaa te kariki ni Baina, e kakabwaiaa, ao e tabeutaia. E tuangiia Abotoro bwa a na kana te kariki.
Mataio 26:26; Ruka 22:19
E tuangiia Iesu bwa a na iangoa Rabwatana n te tai are a kana iai te kariki. E tuangiia bwa a na uringnga bwa E na mate ibukiia.
Mataio 26:26; Ruka 22:19
Iesu e kabwaroa te wain nako nanon te mwangko. E kakabwaiaa te wain ao e tuangiia Abotoro bwa a na nimma.
Mataio 26:27
E tuangiia Iesu bwa a na iangoa Raraana n te tai are a nimma iai te wain. E tuangiia bwa a na uringnga bwa E na wanako raraana ma ni maraki ibukin aia bure aomata ni kabane.
Mataio 26:28; Ruka 22:20
Iesu e tuangiia naba Abotoro bwa aomata aika buakaka a na tiringnga n te tai ae aki maan. Tengaun ma Temanna mai buakoia Abotoro a rangi n nanokawaki. A tangira te Tia Kamaiu ao aki tangiria bwa E na mate. E ataia Iesu bwa temanna mai buakoia Abotoro e na buokiia aomata aika a buakaka. Arana bon Iuta Itekariota.
Mataio 26:2, 14–16, 21–25