Mwakoro 32
Betero E Kakoaua Kristo
Iesu e titirakiniia Ana reirei bwa Antai Ngaia n aia iango aomata.
Mataio 16:13; Mareko 8:27; Ruka 9:18
A kaeka Ana reirei bwa a taku temangina bwa Iesu bon Ioane te Tia Bwabetito. A taku temangina bwa Ngaia bon te burabeti n te O Tetemanti are e a tia n uti man te mate.
Mataio 16:14; Mareko 8:28; Ruka 9:19
Iesu e titirakiniia Ana reirei bwa antai Ngaia n aia iango. E taku Betero: “Bon te Kristo ngkoe, are Natin te Atua are maiu.”
Mataio 16:15–16; Mareko 8:29; Ruka 9:20
E kabwarabwara Iesu bwa e aki reke ana koaua Betero man wanawanan te aomata. E a tia ni karekea ana koaua man te kaotioti iroun te Atua.
Mataio 16:17
Iesu e berita nakon Betero bwa e na anganna te nakoanibonga ao te kariaiakaki bwa e na kaira Ana Ekaretia. Ngkanne Betero ao ana reirei Iesu a na iai irouia te kariaiakaki bwa a na katea Ana Ekaretia Iesu iaon te aba.
Mataio 16:18–19
Iesu e tuangiia Ana reirei bwa a na aki moa tuangiia aomata bwa te Kristo Ngaia. Te moan, E na riai moa ni kamarakaki, e na kamateaki, ao n uti man te mate n te kateni bong.
Mataio 16:20; Mareko 8:30–31; Ruka 9:21–22