Վարդապետության սերտում. Մատթեոս 22.36–39

Փորձեք մտապահել «Սիրիր քո Տէր Աստուծուն: … Սիրիր քո ընկերին» հիմնական արտահայտությունը Մատթեոս 22.36-39-ի հղման համար:

Սիրտ նկարեք և ներքևում գրեք 1 և 2 թվերը: 1 թվի մոտ գրեք «Սիրիր քո Տէր Աստուծուն», 2 թվի մոտ՝ «Սիրիր քո ընկերին»: Մատնացույց արեք սրտին և արտասանեք հղումը: Ապա մատնացույց արեք թվին: Ապա նշեք հիմնական արտահայտության թվին համապատասխանող մասը: Կրկնեք դա մի քանի անգամ։

Կարդացեք Մատթեոս 22.36-39-ը և հիշեք այս հատվածների նախորդ ուսումնասիրությունը:

• Ինչպե՞ս կարող ենք ամբողջ սրտով սիրել Աստծուն: Ինչպե՞ս կարող ենք սիրել մեր ընկերին՝ ինչպես մեզ:

• Ձեր կարծիքով, այս երկու պատվիրաններն ինչո՞ւ են տրված հենց այս հերթականությամբ:

Անհրաժեշտության դեպքում վերընթերցեք «Ձեռք բերել հոգևոր գիտելիքներ» բաժնի պարբերություններ 5-12-ը Վարդապետության սերտման հիմնարար փաստաթղթում (2022):Որոշ իրավիճակներում մենք կարող ենք չհասկանալ, թե ինչպես հետևել Աստծո պատվիրաններին և սեր ցուցադրել այն մարդկանց հանդեպ, ովքեր չեն հնազանդվում Աստծո պատվիրաններին:

Յոթանասունից երեց Լին Գ. Ռոբբինսն ուսուցանել է․

Աստծուն գոհացնելու փոխարեն փորձելով գոհացնել մյուսներին` մենք երեսնիվայր շրջում ենք առաջին երկու մեծ պատվիրանները (տես Մատթեոս 22.37–39): Մենք մոռանում ենք՝ որ կողմ ենք նայում: Սակայն, մենք բոլորս էլ արել ենք այդ սխալը՝ մարդկանցից վախենալու պատճառով: …

Սկզբունքային որոշումները պետք է կայացվեն՝ հիշելով առաջին և երկրորդ մեծ պատվիրանների ճիշտ հերթականությունը: …

Փրկիչը՝ մեր մեծ Օրինակը, միշտ նայում էր Իր Հոր կողմը: Նա սիրեց և ծառայեց Իր ընկերներին, բայց ասաց. «Ես մարդկանցից փառք չեմ առնում» ( Հովհաննես 5.41):

( Լին Գ. Ռոբբինս, «Ո՞ր կողմ ես նայում», Ensign կամ Լիահոնա, նոյեմբեր. 2014, 9, 11)

Մտածեք այս հարցերի շուրջ հետևյալ վարժությունը կատարելուց առաջ:

• Դուք երբևէ վախեցե՞լ եք սիրալիր կերպով ուղղել կամ խորհուրդ տալ ընկերոջը՝ նրան չվիրավորելու համար:

• Դուք երբևէ զգացե՞լ եք, որ պետք է ընտրեք ձեր նկատմամբ ուրիշների և Տիրոջ սպասելիքների միջև:

Գրեք սցենար, որտեղ որևէ մեկը դժվարանում է Աստծուն սիրել և հետևել Նրա պատվիրաններին, ինչպես նաև սիրել ուրիշներին: (Նշում. Մի ստեղծեք սցենարներ, որտեղ ուրիշները կարող են ճանաչել որոշակի անձանց կամ հասակակիցներին):

Մտածեք ձեր սցենարում ներկայացված անձի մասին՝ հետևյալ հարցերին պատասխանելիս:

• Ինչ ենթադրություններ կարող են ստիպել մարդուն Աստծուն գոհացնելու փոխարեն ուրիշներին գոհացնել:

• Երկնային Հոր փրկության ծրագիրը կամ այլ ավետարանական ուսմունքների ընկալումն ինչպե՞ս կարող է օգնել ցրել այդ սխալ ենթադրությունները:

• Երկնային Հոր և Հիսուս Քրիստոսի մասին ի՞նչ ճշմարտություններ կարող են օգնել մարդուն վերաբերվել ուրիշներին Նրանց հեռանկարով:

• Մատթեոս 22.36-39-ում ներկայացված ճշմարտություններն ինչպե՞ս կարող են ուղղորդել այդ մարդուն:

Կարդացեք վերջին օրերի մարգարեների հետևյալ հայտարարությունները, որպեսզի հասկանաք, թե որ գաղափարները կարող են օգտակար լինել ձեր սցենարում ներկայացված անձի համար: Նախագահ Ռասսել Մ. Նելսոնն ուսուցանել է.

Երբեմն մենք, որպես Եկեղեցու ղեկավարներ, քննադատվում ենք Աստծո օրենքներից ամուր կառչելու համար, Փրկիչի վարդապետությունը պաշտպանելու և մեր օրերի հասարակական ճնշումներին դիմադրելու համար:

…Բայց արդյո՞ք մենք շատ ավելի անտարբեր չէինք լինի, եթե չասեինք ճշմարտությունը` չուսուցանելով այն, ինչ Աստված է բացահայտել մեզ:

(Ռասսել Մ. Նելսոն, «Աստծո սերը և օրենքները» [Բրիգամ Յանգ Համալսարանի հոգևոր հավաք, սեպտեմբերի 17, 2019 թ.], 3, speeches.byu.edu)

Առաջին Նախագահությունից նախագահ Դալլին Հ․ Օուքսը հայտարարել է.

Մենք պետք է փորձենք պահել երկու մեծ պատվիրանները։ Դա անելու համար մենք պետք է քայլենք օրենքի և սիրո միջև ընկած նուրբ թելի վրայով՝ պահելով պատվիրանները, քայլելով ուխտի ճանապարհով և, միևնույն ժամանակ, սիրելով մեր մերձավորներին։ Այս քայլարշավը մեզանից պահանջում է փնտրել աստվածային ոգեշնչում, թե ինչին պետք է աջակցենք, ինչին ընդդիմանանք, ինչպես սիրենք, հարգալից լսենք և ուսուցանենք այդ ընթացքում:

(Dallin H. Oaks, “Two Great Commandments,” Ensign or Liahona, Nov. 2019, 75)

• Այս հայտարարություններում ուսուցանված ճշմարտությունների իմացությունն ինչպես կարող է օգնել ձեր սցենարում ներկայացված անձին:

• Ձեր սցենարում ներկայացված մարդն ի՞նչ պետք է անի, որպեսզի Երկնային Հայրը նրան օգնի հասկանալ, թե ինչպես գործել:

• Նա ինչպե՞ս պետք է գործի՝ երկու մեծ պատվիրանները պահելու համար: