Na Lalawa ni Bula Rawati Koya

Nai Vunau kei na iVakavuvuli ni Bula Rawati Koya

Na ivakamacala ni bula rawati koya sai koya na noda “rawata, noda yalataki keda, kei na noda sasaga meda vakarautaka na veika ni bula vakayalo kei na bula vakayago me baleti keda kei na matavuvale. Ni ra sa yacova na lewenilotu na bula rawati koya, sa na rawa vakavinaka talega me ra qaravi ka qarauni ira tale eso” (iVoladusidusi 2, 6.1.1). E tolu na ivakavuvuli bibi ka rawa ni vukei keda meda kila vinaka na bulataka na bula rawati keda:

Ai matai, na bula rawati koya sa tiki bibi ni ivakaro ena ituvatuva ni veivakabulai. E a vakatavulica o Peresitedi Spencer W. Kimball: “Sa vakaroti na Lotu kei ira na lewenilotu mai vua na Turaga me ra bula rawati ira ka tu vakataki ira. (Raica na V&V 78:13–14.) Na itavi me baleta na nona tiko vinaka vakaveimaliwai, tiko vinaka e lomana, tiko vinaka vakayalo, vakayago, se ena veika vakailavo ni tamata yadua sa koto, taumada vua, tarava ena nona matavuvale, qai muri ena Lotu kevaka e lewenilotu yalodina” (Nodra iVakavuvuli na Peresitedi ni Lotu: Spencer W. Kimball [2006], 116).

Ai Karua, Na Kalou sa rawata ka na vakarautaka talega na sala me ra bula rawati ira kina na Luvena yalododonu. “Raica sa noqu inaki meu vakarautaka na veika oqo me yaga vei ira na noqu tamata; io au sa lewa na ka kecega” (V&V 104:15

Ai Katolu, a ka kecega, oka kina na kauwai eso vakayago, era veika vakayalo vua na Kalou (raica na V&V 29:34). Ni da yalataka me da bulataka vakalevu cake na kosipeli, eda na rawa ni yaco meda rawati keda vakalevu cake vakayago ka vakayalo. E vakatavulica o Peresitedi Dieter F. Uchtdorf: “Na vunau levu e rua—mo lomana na Kalou kei ira na wekada—sa semati vata kina na veika vakayago kei na veika vakayalo. … Me vakataka ga na yasana ruarua ni dua na silini, e rau sega ni tawase na ka vakayago kei na ka vakayalo” (Dieter F. Uchtdorf, “Vakarautaka ena Sala ni Turaga,” Ensign se Liaona, Nove. 2011, 53).

Eso na ivakavuvuli vakosipeli ka rawa ni vukei keda meda bula rawati keda e wili kina na vakatuburi ni vakabauti Tamada Vakalomalagi kei Jisu Karisito, meda talairawarawa cake, veivutunitaka noda cala, vakayagataka vakadodonu na galala ni digidigi, ka qaravi ira na tani. Me so tale na itukutuku, raica na ivolalailai ni Noqu Yavu ni Bula Rawati Koya.

“Na bula rawati koya e vua ni noda cakacaka ka ivakadei ni veicakacaka kece tale vakawelefea. … ‘Me da cakacakataka na veika eda gadreva. Me da rawata na bula rawati keda ka tu vakataki keda. E sega tale ni dua na ivakavuvuli ena rawati kina na veivakabulai.’”

Thomas S. Monson (cavuta na vosa nei Marion G. Romney) “iVakavuvuli Veituberi ki na Welefea yadudua kei na Matavuvale,” Ensign, Sepi. 1986, 3

Na Tekivutaki Ni Bula Rawati Koya E Veidusimaki kina na iLiuliu Vakamatabete

Na veiiteki kei Saioni era vanua ni yalodei ka na taqomaki ira na curu kina. Na inaki ni iteki me na “itataqomaki, ka …. ivakaruru mai na cava kei na cudru waqawaqa ena kena sa na sovaraki sobu …. mai ki vuravura” (VV 115:6). Ko ira na iteki era vanua ni vakasoqoni vata ka ra rawa ni vakaitavi kina na lewe ni Lotu ka veivakaukauwataki vakai ira, ka duavata, ka ciqoma na cakacaka vakalotu kei na ivakasala vakosipeli (iVolavoladusidusi 1, ivakamacala taumada).

Sa kaya na Turaga vei ira na veiliutaki vakabete, “Au sa solia vei kemudou… kei na kena idola …. me veivuke ena kena cicivaki, na cakacaka ni veiqaravi kei na nodra vakataucokotaki na noqu yalododonu” (VV 124:143). E vakatavulica o Peresitedi Dieter F. Uchtdorf: “Na sala ni Turaga baleta na bula rawati koya ena sala veiraurau e oka kina e vuqa na ituvaki ni bula, me vakataka na vuli, tiko savasava, cakacaka, ilavo ni matavuvale, kei na kaukauwa vakayalo. … Sa kena ibalebale oqo, ena levu na gauna, mo na vakatulewa sara ga vakataki iko. Na matavuvale yadudua, na ivavakoso yadudua, na buturara yadudua e vuravura e duidui” (“Vakarautaka ena Sala ni Turaga,” Ensign se Liaona, Nove. 2011, 55).

Na tekivutaki ni bula rawati koya e iyaya ka rawa ni vakayagataka na peresitedi ni iteki kei na bisopi me vukea na nodrau ilesilesi vakalou me qaravi ira na dravudravua kei ira na vakaleqai.

“E sega tale ni gadrevi e dua na isoqosoqo vou me qaravi kina na nodra gagadre na tamata oqo. Na ka ga e gadrevi me vakacakacakataki na matabete ni Kalou.”

Harold B. Lee, “iVakaro me baleta na Matabete ni Kalou,” Ensign, Janu. 1973, 104

Komiti ni Bula Rawati Koya ni iTeki

Me kilai vinaka ka sotavi na gagadre ni bula rawati koya ena iteki, ena tuva na mataveiliutaki ni iteki e dua na komiti ni bula rawati koya ni iteki me tiki ni matabose ni iteki. Na komiti ni bula rawati koya ni iteki e liutaki mai vua e dua na lewe ni mataveiliutaki ni iteki ka na dau bose e veigauna me railesuva ka lalawa me baleta na gagadre ni bula rawati koya ni iteki. Na komiti ni bula rawati koya ni iteki e sa uqeti me cakacaka vata kei na matabose ni welefea nei bisopi me dikeva ka qarava na vei gagadre oqori.

Ena lewena na komiti e dua na lewe ni matabose e cake ni iteki, dua na lewe ni mataveiliutaki ni iSoqosoqo ni Veivukei ni iteki, o jeameni ni matabose ni welefea ni bisopi, kei ira na kenadau ni bula rawati koya ni iteki. Eso tale e rawa ni ra vakaitavi kina oya na mataveiliutaki ni Cauravou kei na Goneyalewa ena iteki, eso tale na kenadau ni iteki, kei na daukaulotu tudei.

Na iTavi ni Komiti ni Bula-Rawati Koya

Me railesuvi ka lalawataki na gagadre ni tamata yadua kei na matavuvale ena iteki, me na vakananuma na komiti na veika oqo:

Me vakatavulici ira na bisopi kei na matabose ni tabanalevu me baleta na ivakavuvuli ni bula rawati koya ka dau tokoni ira ena nodra itavi.
Bulia e dua na ituvatuva rawarawa me tokona na bisopi ka vakarautaka na ka e gadrevi ena bula rawati koya ena iteki. Raica na “Taro me na Dikeva na Komiti” ena mua ni idusidusi ni veiliutaki.
Me na dau vakayacora e veigauna na lotu ni bula rawati koya ka vakaduria na veilawalawa ni bula rawati koya.
Vakarautaka tikoga na vuli ki vei ira na veiqaravi me vaka e gadrevi.
Dau sikova na bose vakailawalawa ni bula rawati koya e veigauna ka wasea na veivakalesui ni toso ni lewenilotu vei bisopi kei na matabose ni tabanalevu.
Kumuna ka vakaraitaka na ivurevure voleka ka tu ena itikotiko kei koya mai na Lotu. Na ivurevure e rawa ni oka kina na yacadra na tamata era rawa ni veivuke, na parokaramu eso ni matanitu, na madigi eso ni cakacaka, kei na so tale. Na manidia ni Veiqaravi ni Bula Rawati Koya e rawa ni vakarautaka na veituberi ena sala me kumuni ka wasei kina na ivurevure ni itikotiko raraba.

“Sa dau nodra ivakavuvuli cecere na Yalododonu Edaidai, ni matalotu e sega vua na kaukauwa me vakabulai ira na tamata ena gauna oqo ka cakava me ra rawa-ka ka bula marau eke, era na sega ni nuitaki me ra vakabulai ira vakayalo, ka me ra bula vakalou ena bula sa bera mai.”

Peresitedi Joseph F. Smith, Nodra iVakavuvuli na Peresitedi ni Lotu: Joseph F. Smith (2011), 163

Kenadau ni Bula Rawati Koya ni iTeki

Sa rawa ni dua na marama, se turaga, se veiwatini me vakaitavi me kenadau ni bularawati koya ni iteki (se tikina). Ni cakacaka vakavoleka kei ira na lewe ni komiti, ko kenadau ena raibaleta na cakacaka ni bula rawati koya kei na itaviqaravi e loma ni iteki. Na kenadau ena iteki ena dua na ivurevure vei bisopi kei ira na iliuliu ni tabanalevu (iVoladusidusi 2, 6.3.3) ka na rawa ni vukei ira na lewenilotu ena veika vaka na vuli, vulitara, tuva ilavo vakavuvale, kei na iLavo Vure ni Vuli ena vanua e yaco kina (iVoladusidusi 2,, 6.2.5). Na bisopi ena rawa ni kaciva talega na kenadau ni bula rawati koya ni tabanalevu (se tabana) ke gadrevi.

Na nona itavi na kenadau e rawa ni oka kina na veika oqo:

Tuberi ira ka vukei ira na bisopi kei na matabose ni tabanalevu kevaka e kerei.
Cakacaka vata kei na komiti ni bula rawati koya ni iteki me tuva na lotu ka tauyavutaka na ilawalawa eso.
Veituberi vei ira na dauniveivakarautaki ni ilawalawa, ka taura na Vakarautaka na iLawalawa ni Bula Rawati Koya na ivolalailai (kunei ena initaneti ena srs.lds.org/facilitator).
Me na dau vakaraica ka tokona e veigauna na ilawalawa ni bula rawati koya.
Wasea kei ira na lewenilotu na ivurevure ka tu ena itikotiko kei na Lotu.
Vakadeitaka ni sa vakacavari na ripote ena srs.lds.org/report.

“Sa loma ni Kalou me da turaga ka marama galala ka rawa ni yacova na cecere duadua ni ka eda rawa ni rawata, ruarua vakayago ka vakayalo, me da sa galala mai na vakamadua ni tu ga ena bula vakaloloma kei na ivesu ni valavala ca, ka me da rekitaka na rawa ni da dokai keda vakaikeda kei na tu galala, ka me da sa vakavakarau ena veika kecega me da okati kei Koya ena Nona matanitu vakasilesitieli.”

D. Todd Christofferson, “Galala Vakaoti, me ra Kitaka Vakaiira,” Ensign se Liaona Nove. 2014, 19

Me ra Vulica ka Cakava Vakacava na Lewenilotu Me ra Bula Rawati Ira

Ena tekivu vei iratou na matabisopi kei na matabose ni tabanalevu ena nodratou vakasamataki ira ena yalomasumasu o ira era bolei ka rawa ni yaga me ra bula rawati ira vakalevu cake. Ena daumaka, me sureti yadua me mai tiko ena dua na lotu (ke yaco) se me lewena e dua na ilawalawa ni bula rawati koya. Me kuria, vakananuma na nodra sureti na rawa ni vaqaqacotaki ira eso tale ena nodra gauna kei na taledi me ra mai vakaitavi (raica na VV 82:18-19).

Era Sota na Lewenilotu ena iLawalawa ni Bula Rawati Koya

E a vakatavulica na iVakabula “na tikina sa soqoni vata kina e lewe rua se lewe tolu ka kerea e dua na ka ena yacaqu, au na tiko ena kedratou maliwa” (VV 6:32). Na ilawalawa ni bula rawati koya era matabose lalai tuvai ena cakacaka. Era sota vata me vukea na tarai cake ni nodra dui kila kei na vakabauta yadudua na vakaitavi. Na ivakatakila yadudua ena nodra bose vakailawalawa e rawa ni yaco mai na ivurevure duidui. Me ikuri ni ivolavakarau, o ira na vakaitavi era kilaka, tu na ka era sotava, kei na isolisoli ka rawa ni vukei ira eso tale me ra vuli ka tubu.

E dua na ilawalawa ena rawa ni lewena e 8 ki na 12 na tamata ka dau sota me rauta e rua na auwa ena veimacawa me 12 na macawa.

E Cakacaka Vakacava na iLawalawa

E Vakavulici Ruarua na iVunau Kei na Maqosa ni Bula

Ena gauna yadudua ni bose vakailawalawa, era railesuva kina na vakaitavi na ivakavuvuli vakaivunau ni bula rawati koya, oka kina na bibi ni cakacaka vakalotu. Era vulica talega na maqosa vakacakacaka, me vaka na vakatulewa vakailavo yadudua, kunei ni cakacaka vinaka cake, vakavinakataki ni nodra vuli, se tekivutaki ka vakatuburi ni dua na bisinisi lailai.

Era Caka Yalayala na iLawalawa ka Ripotetaka na Nodra Toso

E tekivutaki na bose yadudua ena nodra ripotetaka na tamata yadudua na nodra toso ka a yalataki ki na ilawalawa mai na macawa e liu. Era na qai veitalanoa na vakaitavi me kilai ka ulabaleti na ivakatao.

Nai lawalawa ni bula rawati koya e vakayacora e tolu na ka e tukuna o Peresitedi Gordon B. Hinckley e gadreva na lewenilotu vou kecega “dua nai tokani, itavi, kei na veituberi mai na ‘vosa vinaka ni Kalou’ (Moronai 6:4)” (“Lewenilotu vou kei na Soqosoqo ni Cauravou,” Ensign, Me 1997, 47; raica talega na Moronai 6:3–9).

Era Veiwasei na Vakaitavi Vei Ira na Nodra Lewe ni Matavuvale

E levu na vuli ena vakayacori ena taudaku ni sota vakailawalawa ni ra vakayacora na nodra yalayala na lewena ena nodra vakayagataka nodra maqosa vovou. Era sa uqeti na vakaitavi me ra wasea na veika era vulica vei ira nodra lewe ni matavuvale.

O Ira na Vakaitavi Era Veivaqaqacotaki Ena Nodra “iTokani Cakacaka”

O ira na vakaitavi era sa kerei me ra tokona ka vaqaqacotaka e dua tale na lewe ni ilawalawa ena veimacawa. Na “itokani cakacaka” era veivukei me ra dinata nodra yalayala mai na nodra veitaratara e veigauna ka veivakayaloqaqataki.

“E sega ni dua na leqa ena matavuvale, tabanalevu, se iteki me na sega ni rawa me wali kevaka me da vakaraica na iwali ena sala ni Turaga ena veivakasalataki—ena veivakasalataki dina sara—vei keda vakaikeda.”

M. Russell Ballard, Veivakasalataki kei na Noda Matabose, rev. ed. (2012), 4

Na Dauveiqaravi e Veituberi ena Bose ni iLawalawa Vakamacawa

Na ilawalawa ni bula rawati koya e sega ni liutaki mai na dua na qasenivuli ia e tuberi ga mai na dua na dauveiqaravi. E sega ni veivakaroti o dauveiqaravi ia e muria ga na iyaya ni veivakavulici ka sureti ira kece na lewe ni ilawalawa me ra vakaitavi. O ira na dauveiqaravi era na vakatubura na draki ka rawa ni vakatavulici ira kina na vakaitavi na Yalo Tabu “na veika kece mo [dou] kitaka” (2 Nifai 32:5; raica talega na 2 Nifai 32:3).

Torocake Tikoga

Kevaka e gadrevi, e rawa ni lesi na, kenadau ni iteki, na volodia, se dauveituberi se dausiko vuvale me raimuria se vakatavulici ira na vakaitavi yadudua ena talevoni se tamata yadua. Na komiti ni bula rawati koya ni iteki ena rawa talega ni soqoni ira vata na tauri ivola oti ena bula rawati koya ka me rawa vei ira na vakaitavi me ra tomana na veitokani, wase ka e sotavi, ka railesuva na ivakavuvuli mai na Noqu Yavu ni Bula Rawati Koya.

O cei Me Na Vakaitavi ena iLawalawa

O ira na lewenilotu ena ituvaki oqo e rawa ni ra ciqociqo: o ira ka dau ciqoma na isolisoli ni lolo, o ira ka sega ni cakacaka, se isau lailai, o ira ka se qai suka mai na kaulotu, na curuvou, na luluqa mai na lotu, kei na itubutubu dua.