មេរៀនទី ៩ ឯកសារគ្រូបង្រៀន ៖ ការមានអំណរនៅក្នុងការប្រសូតដ៏ទេវភាពនៃព្រះយេស៊ូវគ្រីស្ទ

« មេរៀនទី ៩ ឯកសារគ្រូបង្រៀន ៖ ការមានអំណរនៅក្នុងការប្រសូតដ៏ទេវភាពនៃព្រះយេស៊ូវគ្រីស្ទ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )

« មេរៀនទី ៩ ឯកសារគ្រូបង្រៀន » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់

មេរៀនទី ៩ ឯកសារគ្រូបង្រៀន

ការមានសេចក្ដីអំណរនៅក្នុងការប្រសូតដ៏ទេវភាពនៃព្រះយេស៊ូវគ្រីស្ទ

ដូចដែលទេវតាបានប្រកាសថា កំណើតរបស់ព្រះយេស៊ូវគ្រីស្ទគឺជាមូលហេតុដើម្បីមាន « សេចក្ដីអំណរយ៉ាងអស្ចារ្យ » ( លូកា ២:១០ ) ។ នៅអំឡុងថ្នាក់នេះ សិស្សនឹងមានឱកាសពន្យល់ពីមូលហេតុដែលពូជពង្សដ៏ពិសេសរបស់ព្រះយេស៊ូវគ្រីស្ទមានសារៈសំខាន់ចំពោះទ្រង់ដើម្បីក្លាយជាព្រះអង្គសង្គ្រោះរបស់យើង ។ សិស្សក៏នឹងត្រូវបានអញ្ជើញឲ្យចែកចាយអារម្មណ៍របស់ពួកគេអំពីសេចក្ដីស្រឡាញ់ដ៏ទេវភាពដែលបង្ហាញដោយការយាងចុះមកនៃព្រះ និងរបៀបដែលសេចក្ដីស្រឡាញ់នោះអាចជះឥទ្ធិពលដល់ជម្រើសដែលពួកគេធ្វើ ។

យោបល់សម្រាប់ការបង្រៀន

ម៉ារីរៀនថាគាត់នឹងធ្វើជាមាតារបស់ព្រះរាជបុត្រានៃព្រះ ។

សូមគូរបន្ទាត់តាងខាងក្រោមនៅលើក្ដារខៀន ហើយអញ្ជើញសិស្សមួយចំនួនឲ្យចែកចាយពីលក្ខណៈពិសេសដែលពួកគេបានទទួលពីឪពុកម្ដាយរបស់ពួកគេ ។

សូមអញ្ជើញសិស្សឲ្យមើល លូកា ១:៣០–៣៥ និងរកមើលពីរបៀបដែលទេវតាកាព្រីយ៉ែលបានពិពណ៌នាពីបុត្រដែលម៉ារានឹងមានគគ៌នោះ ។

ការអភិវឌ្ឍការបង្រៀន និងការរៀនសូត្ររបស់យើង

ចៀសវាងពីការរំពឹងទុក ។ សូមចៀសវាងពីការពិភាក្សាជាមួយសិស្សអំពីប្រធានបទគោលលទ្ធិដែលពួកព្យាការី និងពួកសាវកមិនបានជ្រើសរើសដើម្បីបង្រៀន ឬអំពីអ្វីដែលពួកលោកមិនបានធ្វើសេចក្ដីថ្លែងការណ៍ជាផ្លូវការ ។ ឧទាហរណ៍ ថ្នាក់ដឹកនាំសាសនាចក្រដាស់តឿនទាស់នឹងការប៉ាន់ស្មានអំពីរបៀបដែលព្រះអង្គសង្គ្រោះបានមកចាប់ទុំផ្ទៃ ( សូមមើល The Teachings of Harold B. Leeនិពន្ធដោយ Clyde J. Williams [ ឆ្នាំ១៩៩៦ ] ទំព័រ ១៤ ) ។ ក្នុងកាលៈទេសៈបែបនេះ វាមិនអីទេដោយគ្រាន់តែទទួលស្គាល់ថា យើងពុំដឹង ឬថាព័ត៌មាននោះពុំទាន់ត្រូវបានបើកសម្ដែងនៅឡើយ ។ សូមផ្តោតលើអ្វីដែលយើងដឹង និងអ្វីដែលព្រះវិញ្ញាណបរិសុទ្ធអាចបញ្ជាក់ថាជាសេចក្តីពិតនៅក្នុងចិត្តរបស់សិស្ស ។

សូមគូសបន្ទាត់តាងដូចខាងក្រោមដាក់លើក្ដារខៀន ។

បន្ទាត់តាងអំពីព្រះមាតាបិតារបស់ព្រះយេស៊ូវគ្រីស្ទ

ដើម្បីជួយសិស្សគិតអំពីសារៈសំខាន់នៃព្រះមាតាបិតាដ៏វិសេសរបស់ព្រះយេស៊ូវគ្រីស្ទ សូមពិចារណាសួរសំណួរមួយចំនួនដូចខាងក្រោមនេះ ៖

តើលក្ខណៈពិសេសអ្វីខ្លះដែលព្រះយេស៊ូវគ្រីស្ទបានទទួលមរតកពីម៉ារា ? ទទួលពីព្រះវរបិតាសួគ៌ ?
តើព្រះមាតាបិតាដ៏វិសេសរបស់ព្រះយេស៊ូវគ្រីស្ទទាក់ទងនឹងដង្វាយធួន និងការមានព្រះជន្មរស់ឡើងវិញរបស់ទ្រង់យ៉ាងដូចម្ដេច ? ( ជាផ្នែកមួយនៃការពិភាក្សា អ្នកអាចពិនិត្យមើលជាមួយនឹងសិស្សអំពី យ៉ូហាន ១០:១៧–១៨ និង សេចក្ដីថ្លែងការណ៍ដោយប្រធាន រ័សុល អិម ណិលសុន ក្នុងផ្នែកទី ១ នៃឯកសាររៀបចំ ។ សូមជួយសិស្សឲ្យស្គាល់សេចក្ដីពិតមួយដូចតទៅនេះ ៖ ដោយសារតែព្រះមាតាបិតាដ៏វិសេសរបស់ទ្រង់ ទើបព្រះយេស៊ូវគ្រីស្ទមានព្រះចេស្ដាដើម្បីធួនសម្រាប់អំពើបាបរបស់យើង ព្រមទាំងលះបង់ព្រះជន្មរបស់ទ្រង់ ហើយមានព្រះជន្មរស់ឡើងវិញម្តងទៀត ) ។

ដើម្បីជួយសិស្សឲ្យគិតកាន់តែស៊ីជម្រៅអំពីគោលលទ្ធិនេះ អ្នកអាចអញ្ជើញពួកគេឲ្យកត់ត្រាគំនិត និងចំណាប់អារម្មណ៍របស់ពួកគេអំពីសំណួរទាំងនេះ ៖

តើលក្ខណៈសម្បត្តិទាំងពីរនេះរបស់ព្រះយេស៊ូវគ្រីស្ទអាចបង្រៀនអ្នកអំពីសមត្ថភាពរបស់ទ្រង់ក្នុងការប្រដូចនឹងអ្នកក្នុងជីវិតរមែងស្លាប់យ៉ាងដូចម្ដេច ?
តើឃ្លានៅក្នុងប្រយោគនេះមកពី « ព្រះគ្រីស្ទដ៏មានព្រះជន្មរស់ ៖ ទីបន្ទាល់របស់ពួកសាវក » ( មាននៅលើគេហទំព័រ ChurchofJesusChrist.org ) មានទំនាក់ទំនងនឹងគ្នា និងចំពោះអ្នក ៖ « [ ព្រះយេស៊ូវគ្រីស្ទ ] គឺជាព្រះរាជបុត្រាច្បងបង្អស់នៃព្រះវរបិតា ជាព្រះរាជបុត្រាបង្កើតតែមួយនៅក្នុងសាច់ឈាម ជាព្រះដ៏ប្រោសលោះនៃពិភពលោក » ដោយរបៀបណា ?

នីហ្វៃបានឃើញនៅក្នុងការនិមិត្តអំពីការយាងចុះមកនៃព្រះ ។

សូមពិចារណាបង្ហាញរូបភាពខាងក្រោមអំពីព្រះយេស៊ូវ ជាព្រះបង្កបង្កើតនៃពិភពលោកនេះ ជាទារកដែលគ្មានទីពឹង និងជារូបទោលនៅលើឈើឆ្កាង ។ សូមសួរសិស្សថាតើរូបភាពទាំងនេះបង្រៀនអ្វីខ្លះអំពីការយាងចុះមករបស់ព្រះយេស៊ូវគ្រីស្ទ ? ប្រសិនបើចាំបាច់ សូមអាន និយមន័យនៃពាក្យ ការយាងចុះមកនៃព្រះ ដែលមាននៅផ្នែកទី ២ នៃឯកសាររៀបចំ ។

ព្រះគ្រីស្ទ និងការបង្កបង្កើត ដោយ រ៉ូប៊ឺត ធី បារ៉ែត

ដើម្បីបន្តការពិភាក្សានេះ អ្នកអាចរៀបចំសិស្សជាក្រុមតូចៗ ហើយផ្តល់ឲ្យក្រុមនីមួយៗនូវច្បាប់ចម្លងនៃសំណៅចែកខាងក្រោម ។

ការយាងចុះមកនៃព្រះ

ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់—មេរៀនទី ៩

សូមបែងចែកការអាននៅក្នុងក្រុមរបស់អ្នក ។ នៅពេលអ្នកអាន សូមរកមើលរបៀបដែលព្រះអម្ចាស់បានយាងចុះមកដោយស្ម័គ្រចិត្តពីតំណែងដ៏ខ្ពស់មកស្ថានភាពទន់ទាប ។

អ័ប្រាហាំ ៣:២៤–២៥, ២៧; ភីលីព ២:៧–៨
នីហ្វៃទី ១ ១១:១៤–២២
១ នីហ្វៃ ១១:២៦–២៧, ៣១–៣៣
សេចក្ដីថ្លែងការណ៍ដោយ ប្រធាន ថាត អរ ខាលីស្ទើរ និង អែលឌើរ ឌី ថត គ្រីស្តូហ្វឺសិន នៅក្នុងផ្នែកទី ២ នៃឯកសាររៀបចំ និងសេចក្ដីថ្លែងការណ៍ខាងក្រោមដោយវិនឌី អាល់រីច អតីតសមាជិកនៃក្រុមប្រឹក្សាផ្ដល់យោបល់ទូទៅរបស់សមាគមសង្គ្រោះ ៖

[ ព្រះអង្គសង្គ្រោះ ] បានប្រសូតជាទារកដែលគ្មានទីពឹងនៅក្នុងរូបកាយរមែងស្លាប់ ហើយត្រូវបានចិញ្ចឹមដោយ [ ឪពុកម្តាយ ] មិនល្អឥតខ្ចោះ ។ ទ្រង់ត្រូវរៀនពីរបៀបដើរ និយាយ ធ្វើការ និងចុះសម្រុងជាមួយអ្នកដទៃ ។ ទ្រង់ឃ្លាន និងនឿយហត់ មានអារម្មណ៍ដូចមនុស្ស ហើយអាចមានជំងឺ រងទុក្ខ ចេញឈាម និងសុគត ។ ( « It Isn’t a Sin to Be Weak » Ensign ខែមេសា ឆ្នាំ២០១៥ ទំព័រ ៣៣ )

បន្ទាប់មក សូមពិភាក្សាសំណួរខាងក្រោមរួមគ្នា ៖

តើការអានទាំងនេះបង្រៀនយើងអ្វីខ្លះអំពីការយាងចុះមករបស់ព្រះយេស៊ូវគ្រីស្ទ ?
តើការយាងចុះមករបស់ព្រះយេស៊ូវគ្រីស្ទបង្រៀនយើងអ្វីខ្លះអំពីសេចក្តីស្រឡាញ់់របស់ព្រះអង្គសង្គ្រោះ និងព្រះវរបិតាសួគ៌ចំពោះយើង ? តើសេចក្ដីស្រឡាញ់របស់ទ្រង់ចំពោះអ្នកជះឥទ្ធិពលដល់សេចក្ដីស្រឡាញ់របស់អ្នកចំពោះទ្រង់ទាំងទ្វេដោយរបៀបណា ?

បន្ទាប់ពីមានពេលពិភាក្សាគ្រប់គ្រាន់ហើយ អ្នកអាចដាក់បង្ហាញ ហើយចែកចាយអារម្មណ៍របស់អ្នកអំពីសេចក្ដីថ្លែងការណ៍ដូចតទៅនេះ ៖ ការយាងចុះមកនៃព្រះយេស៊ូវគ្រីស្ទបង្ហាញពីសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទចំពោះយើងម្នាក់ៗ ។

តើយើងអាចរៀនអ្វីខ្លះមកពីព្រះអង្គសង្គ្រោះតាមរយៈគំរូរបស់ទ្រង់នៅក្នុងការយាងចុះមកដើម្បីជួយយើងដែលជាមនុស្សតូចទាប ? ( ប្រសិនបើចាំបាច់ សិស្សអាចរំឭក សេចក្តីថ្លែងការណ៍របស់ប៊ីស្សព រីឆាដ ស៊ី អេដហ្គី នៅក្នុងផ្នែកទី ២ នៃឯកសាររៀបចំ ។ សិស្សក៏អាចពិចារណាមួយនាទីអំពីរបៀបដែលពួកគេអាចធ្វើតាមគំរូរបស់ព្រះអង្គសង្គ្រោះ នៅពេលពួកគេខិតខំផ្ដល់ការងារបម្រើ និងបម្រើបុត្រាបុត្រីគ្រប់រូបរបស់ព្រះវរបិតាសួគ៌ ) ។

សូមរំឭកសិស្សថា នៅក្នុងផ្នែកទី ២ នៃឯកសាររៀបចំ ពួកគេត្រូវបានអញ្ជើញឲ្យ អាន ឬស្ដាប់ទំនុកច្រៀងនៃទំនុកតម្កើង ដែលថ្លែងពីការយាងចុះមករបស់ព្រះអង្គសង្គ្រោះ ។ សិស្សអាចរំឭកទំនុកតម្កើងមួយ រួចហើយចែកចាយជាមួយនឹងសិស្សផ្សេងទៀតនូវពាក្យ និងឃ្លាមកពីទំនុកតម្កើងនោះដែលពួកគេចាប់អារម្មណ៍បំផុត ។ ប្រសិនបើមានពេល អ្នកក៏គួរតែច្រៀងទំនុកតម្កើងទាំងនេះរួមគ្នាមួយ ឬពីរវគ្គ ។

ដើម្បីជួយសិស្សឲ្យអនុវត្តអ្វីដែលពួកគេបានរៀន និងមានអារម្មណ៍អំឡុងថ្នាក់រៀន សូមអញ្ជើញពួកគេឲ្យពិចារណា ហើយកត់ត្រាចម្លើយរបស់ពួកគេចំពោះសំណួរខាងក្រោម ឬសំណួរមួយដែលអ្នកបានជ្រើសរើស ៖

តើអ្នកអាចធ្វើអ្វីខ្លះ ដើម្បីបង្ហាញព្រះអង្គសង្គ្រោះអំពីការដឹងគុណរបស់អ្នកចំពោះព្រះឆន្ទៈរបស់ទ្រង់ដើម្បីយាងចុះមក ដើម្បីទ្រង់អាចប្រោសលោះ និងសង្គ្រោះអ្នក ?

សម្រាប់ពេលក្រោយ

ដើម្បីរំឭកសិស្សឲ្យសិក្សា ឯកសាររៀបចំសម្រាប់មេរៀនលើកក្រោយ សូមពិចារណាផ្ញើសារដូចតទៅនេះ ឬសារមួយរបស់អ្នកផ្ទាល់ ៖ តើព្រះអង្គសង្គ្រោះមានអាទិភាពយ៉ាងណាដែរនៅក្នុងជីវិតរបស់អ្នកសប្ដាហ៍នេះ ? សូមពិចារណាពីរបៀបដែលឯកសាររៀបចំសម្រាប់មេរៀនទី ១០ អាចជួយអ្នកឆ្លើយសំណួរនេះ ។