Eb’ li k’anjel

Chatwanq jo’ aj b’aanuhom tiikilal chiruheb’ laa kok’al. K’ut chiruheb’ chan ru te’k’iiq sa’ chixjunil xcha’aleb’ lix yu’am. Taw chan ru taatenq’aheb’ xtzolb’al li sahil ch’oolejil li nachal rik’in xpaab’ankileb’ sumwank, xtawb’aleb’ ak’ seeb’al, ut xb’aanunkil li k’a’ru ch’a’aj. Tenq’a laa junkab’al chi nach’ok rik’in li qaChoxahil Yuwa’ ut li Jesukristo ut chixyu’aminkil li evangelio rajlal kutan.

K’eheb’ chixnaw laa kok’al naq raarookeb’ aab’aan. Tz’aqon sa’ xyu’ameb’. Rik’in tijok, tz’il rix li rajom ru li junjunq ut k’uub’ li tzolok ut kok’ k’anjel re li evangelio li te’tenq’anq reheb’. Wotz lix nawom aach’ool chi kok’ aj xsa’ rik’ineb’. Aatinan rik’ineb’ laj jolominel chirix chan ru naq naru te’xtenq’aheb’ laa kok’al.

Maakanab’ aatinak rik’ineb’ ut rab’inkileb’ laa kok’al. Tijon chirix chan ru naru taatenq’aheb’. Tenq’aheb’ chixtawb’al ut chixtzolb’al li k’a’ru nawulak chiruheb’. Tikib’ tijok jo’ junkab’al, xtzolb’al li evangelio, k’anjelak chiru lee ras eeriitz’in, ut xb’aanunkil kok’ k’anjel re xtenq’ankileb’ laa kok’al chi k’iik.

Raheb’ ut kawob’resiheb’ li kok’al. Tenq’aheb’ li na’b’ej yuwa’b’ej sa’ xtenq’ankileb’ li kok’al chireek’ankil lix rahom li qaChoxahil Yuwa’ choq’ reheb’, chixtawb’al ru lix evangelio li Jesukristo, chireek’ankil ut chixk’eeb’al reetal lix wankil li Santil Musiq’ej, ut chixkawresinkil rib’eb’ chi ok sa’ loq’laj sumwank ut chixpaab’ankileb’.

K’e chi uxmank naq eb’ li tzoleb’aal ut li hoonal re li b’ichank sa’ li Tzoleb’aal reheb’ li Kok’al te’xtenq’aheb’ li kok’al chireek’ankil li Musiq’ej, chixnimob’resinkil li xpaab’aaleb’, ut chireek’ankil li sahil ch’oolejil re lix evangelio li Jesukristo sa’ xyu’ameb’. Rik’ineb’ li na’leb’ re k’iik li yeeb’ileb’ sa’ Lukas 2:52 jo’ aj k’amol aab’e, k’uub’eb’ li chaab’il ut sahil kok’ k’anjel ut li k’anjelak chiru li qas qiitz’in li te’xnimob’resi xnawom xch’ooleb’, te’xkawob’resi lix junkab’aleb’, ut te’xnimob’resi li junajil ut xk’iijik li junjunq kok’al.

Naweb’ ru li kok’al ut lix junkab’aleb’, ut k’anjelan chiruheb’ a’ yaal li rajomeb’ ru. Jo’ awa’b’ejil re li Tzoleb’aal reheb’ li Kok’al, patz’omaq rik’in tijok chan ru naru teetenq’aheb’ laj k’utunel, aj b’eresinel b’ich, ut aj jolominel reheb’ li kok’ k’anjel chixtenq’ankileb’ li kok’al chixtaaqenkil li Kolonel.

Tenq’aheb’ li na’b’ej yuwa’b’ej ut li obispil sa’ xb’eresinkil ut xmusiq’ankileb’ li saaj ixq re te’xtaw ru aniheb’ jo’ xrab’in li Dios, re te’xkawob’resi rib’ choq’ reheb’ li sumwank re li santil ochoch, ut re te’xtz’aqob’resiheb’ ru lix choxahil ajom. B’eresiheb’ li awa’b’ejil reheb’ li tzoleb’aal naq neke’xjolomiheb’, neke’k’anjelak chiruheb’, ut neke’xtenq’aheb’ li komon wankeb’ sa’ xtzoleb’aaleb’.

Chatwanq chixk’utb’al naq laa’at jun xtzolom li Jesukristo. B’eresiheb’ li awa’b’ejil re tzoleb’aal naq rik’in tijok neke’xk’uub’ ut neke’xtenq’a chixk’utb’aleb’ li tzolok wankeb’ sa’ Ven, sígueme—Mujeres Jóvenes. Waklesi xch’ooleb’ chixjolominkil xk’uub’ankil ut xb’aanunkileb’ li kok’ k’anjel ut li k’anjelak chiru li qas qiitz’in li te’xtenq’aheb’ li saaj ixq chi k’iik sa’ chixjunil xcha’aleb’ lix yu’am. Yeechi’i xkomon chik li tenq’aal reheb’ li saaj ixq li neke’raj ru.

Naweb’ ru li junjunq chi saaj ixq. Aatinan rik’ineb’ li saaj ixq, lix na’ xyuwa’, ut li obispil chirix chan ru naru taatenq’aheb’ li saaj ixq chi k’iik. Tijon re xnawb’al chan ru naru taatenq’aheb’ li awa’b’ejil re tzoleb’aal chi elk chi uub’ej sa’ xb’oqb’aleb’.

Tenq’aheb’ li na’b’ej yuwa’b’ej ut li obispil sa’ xkawresinkileb’ li saaj winq re te’k’ojob’aaq sa’eb’ li opiis re li tijonelil, re te’ok sa’eb’ li sumwank re li santil ochoch, re te’xik sa’ mision, ut choq’ reheb’ lix choxahil k’anjel. Waklesi xch’ooleb’ chixtawb’al ru li rajomeb’ ut aniheb’ jo’ ralal li Dios. B’eresiheb’ li awa’b’ejil re molam naq neke’xjolomiheb’, neke’k’anjelak chiruheb’, ut neke’xtenq’aheb’ li komon wankeb’ sa’ xmolameb’, ut naq neke’xk’anjela li k’ojob’anb’il k’anjel re li loq’laj wa’ak.

Chatwanq chixk’utb’al naq laa’at jun xtzolom li Jesukristo. B’eresiheb’ li awa’b’ejil re li molam naq neke’xk’anjelaheb’ lix laaw, neke’xk’anjela li k’ojob’anb’il k’anjel re li loq’laj wa’ak, ut naq rik’in tijok neke’xk’uub’ ut neke’xtenq’a chixk’utb’aleb’ li tzolok wankeb’ sa’ Ven, sígueme—Hombres Jóvenes. Tenq’aheb’ sa’ xk’uub’ankil ut xb’aanunkileb’ li kok’ k’anjel ut li k’anjelak chiru li qas qiitz’in li te’xtenq’aheb’ li saaj winq chi k’iik sa’ chixjunil xcha’aleb’ lix yu’am. Kanab’eb’ chi jolomink. Yeechi’i xkomon chik li tenq’aal reheb’ li saaj winq li neke’raj ru.

Chatwanq rik’ineb’ li saaj winq. Naweb’ ru ut raheb’ li junjunq reheb’. Aatinan rik’in li obispil, li saaj winq, ut lix na’ xyuwa’ re xnawb’al chan ru naru taatenq’aheb’ naq neke’k’iik ut neke’ok chi wank jo’ li Kolonel. Tijon re xnawb’al chan ru naru taatenq’aheb’ li awa’b’ejil re li molam chixk’anjelankileb’ lix laaw ut chi elk chi uub’ej sa’ xb’oqb’aleb’.

Yal aaq’e chixtenq’ankileb’ li saaj chi chalk rik’in li Kristo rik’in xtzolb’al ut xtaaqenkil lix tzol’leb’ a’an. Tzoleb’ li saaj re te’xtaw ru, te’xwotz, ut te’xyu’ami lix evangelio li Jesukristo.

Chatwanq chixk’utb’al jun eetalil jo’ xtzolom li Jesukristo, ut tenq’aheb’ li saaj chixnimob’resinkil lix paab’aaleb’. Waklesi xch’ooleb’ chixtzolb’aleb’ li loq’laj hu sa’ rochocheb’—sa’ junesal ut jo’ junkab’al. Tenq’aheb’ chixkawresinkil rib’ re xk’utb’al li tzol’leb’ re li evangelio. K’e xb’oqb’aleb’ chixyu’aminkil li yookeb’ chixtzolb’al sa’ xk’iijikeb’ sa’ junesal.

Yal aaq’e chi k’utuk jo’ li Kolonel. Naweb’ ru li junjunq chi saaj. Tijon re xnawb’al chan ru naru taatenq’aheb’ chi k’iik re ok chi wank jo’ li Kolonel. Kawob’resiheb’ li komon sa’ li tzoleb’aal ut eb’ lix na’ xyuwa’ sa’ xyalb’aleb’ xq’e chixtzolb’al ut chixk’utb’al li evangelio sa’ li iglees ut sa’ rochocheb’.

Li obispil a’an li awa’b’ejil re li Tijonelil re Aaron sa’ li teep ut neke’jolomin reheb’ li saaj ixq ut li saaj winq. Eb’ li awa’b’ejil re li Tijonelil re Aaron neke’k’anjelak chi k’eeb’il reheb’ li laaw naq nak’ojob’aak li awa’b’ej re li molam. Eb’ li awa’b’ejil re xtzoleb’aaleb’ li Saaj Ixq neke’k’anjelak rub’el xwankilal li tijonelil naq neke’k’ojob’aak xb’aan jun komon re li obispil.

Eb’ li awa’b’ejil tento te’xyal xq’e chi wank jo’ tz’aqal xtzolom li Jesukristo naq neke’xtenq’a li junjunq komon re lix molameb’ malaj lix tzoleb’aaleb’ chireek’ankil naq raab’il ut chixtawb’al li sahil ch’oolejil re xyu’aminkil li evangelio. Chi b’eresinb’il xb’aan li obispil, eb’ li awa’b’ejil re molam neke’xjolomiheb’ laj k’amol re li Tijonelil re Aaron naq neke’xk’anjelaheb’ li k’ojob’anb’il k’anjel re li loq’laj wa’ak. Xkab’ichaleb’ li awa’b’ejil re molam ut re tzoleb’aal neke’jolomin sa’ xch’utub’ankil Israel sa’ xka’pak’alil li tz’apleb’ t’ikr ut sa’ xch’olaninkileb’ li wankeb’ sa’ rajb’al ru.

Eb’ li awa’b’ejil neke’xtzol xk’anjeleb’ rik’in li Qaawa’ ut rik’ineb’ laj jolominel reheb’. Neke’tijok choq’ reheb’ li komon re li molam malaj li tzoleb’aal ut neke’ok chixnawb’al li rajomeb’ ru. Neke’xtenq’aheb’ sa’ ok choq’ xtzolom li Jesukristo. Neke’xk’uub’ xna’leb’ sa’ komonil chirix k’a’ruheb’ li tzolok, li kok’ k’anjel, ut li k’anjelak chiru li qas qiitz’in li te’rosob’tesiheb’ ut te’xkawob’resiheb’ li saaj ut li tixk’am li junajil sa’ lix molameb’ malaj lix tzoleb’aaleb’.