“Xtikib’ankil,” Eb’ li kok’al ut li saaj sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan: Jun tenq’anel hu choq’ reheb’ li na’b’ej yuwa’b’ej ut eb’ laj jolominel (2019)
“Xtikib’ankil”
Xtikib’ankil
Naq neke’k’anjelak sa’ komonil, eb’ li na’b’ej yuwa’b’ej ut eb’ laj jolominel neke’xtenq’aheb’ li kok’al ut li saaj chixnimob’resinkil xjalajik lix ch’ooleb’, chi wank xk’ulub’eb’ jo’ xtzolom li Kristo, ut chi wank jo’ winq ut ixq tiikeb’ xch’ool, rik’in:
-
Li xtzolb’al li evangelio li namusiq’an reheb’ chixchaab’ilob’resinkil rib’.
-
Eb’ li kok’ k’anjel ut li k’anjelak chiru ras riitz’ineb’ li naxwaklesi lix xaqalileb’ ut lix musiq’eb’.
-
Li chaab’ilob’resink-ib’ li naxtikib’ lix k’iijikeb’ sa’ chaab’ilal.
Jo’ na’ajman, naru xjalb’aleb’ li na’leb’ ut k’anjel aj b’eresinel li wankeb’ sa’ li ch’ina hu a’in. Wankeb’ k’iila paay ru roksinkileb’. Wankeb’ junjunq li na’leb’ ut eetalil sa’ internet sa’ ChildrenandYouth.ChurchofJesusChrist.org. Sik’ li k’utb’esinb’il na’leb’ re xnawb’al k’a’ru li chaab’il choq’ re li junjunq kristiaan (chi’ilmanq “Xjalb’al ut xtawb’al li taak’anjelaq”).
Eb’ li tasal tenamit yookeb’ chi k’iik
Eb’ li profeet xyehomeb’ naq eb’ li kok’al ut saaj reheb’ li tasal tenamit yookeb’ chi k’iik a’aneb’ xkomoneb’ li q’axal chaab’ileb’ taqlanb’ileb’ sa’ ruchich’och’ xb’aan li Qaawa’ (chi’ilmanq Russell M. Nelson, “Juventud de Israel,” ch’utam choq’ reheb’ li saaj sa’ chixjunil li ruchich’och’, 3 junio, 2018, 16). Wankeb’ xwankil chixk’eeb’al chi uxmank ninqi k’anjel sa’ li ruchich’och’. Ak b’oqb’ileb’ chi tenq’ank chixchutub’ankil Israel sa’ xka’pak’alil li tz’apleb’ t’ikr. Na’ajman ru jun na’leb’ jwal taqenaq ut sant re xch’olaninkileb’ ut k’anjelak chiruheb’. A’an a’in tixtenq’aheb’ li kok’al ut li saaj:
-
Xnawb’al aniheb’ ut k’a’ru rajb’aleb’ sa’ li junelik q’e kutan.
-
Xnimob’resinkil lix jalajik xch’ooleb’ rik’in li Jesukristo, ut roksinkil lix evangelio sa’ xch’ooleb’ ut xmusiq’ankileb’ chixsik’b’al ru xtaaqenkil a’an.
-
Xtz’aqob’resinkil ru xk’anjeleb’ sa’ li Tijonelil re Aaron.
-
Tz’aqonk sa’ komonil sa’ li k’anjel re li kolb’a-ib’.
-
Xchaab’ilob’resinkileb’ rib’ chi tenq’anb’il xb’aaneb’ lix na’ xyuwa’ ut laj jolominel jo’ na’ajman.
-
Wank chi k’ulub’ej re xik sa’ li santil ochoch ut xk’ulb’al li sahil ch’oolejil li ink’a’ na’oso’ sa’ xb’ehil li sumwank.
Naq eb’ li kok’al ut li saaj neke’xk’ul li k’utb’esinb’il na’leb’ choq’ re xyu’ameb’, neke’xnaweb’ ru kristiaan chi jayalinb’ileb’ rik’in li evangelio, ut neke’xk’anjela xtaql xch’ooleb’ naq yookeb’ chi k’iik, te’elq chi uub’ej sa’ xtz’aqob’resinkileb’ ru li ajom a’in.
Xyalb’aleb’ xq’e chixtaaqenkil li Kolonel
Sa’ xch’ajomil, li Jesus kiraj ru xtzolb’al lix santil wanjik ut k’anjel, jo’ chanchan naq tento tixb’aanu li junjunq ralal xk’ajol li Dios. A’an “yoo chi k’iik rik’in xna’leb’ ut rik’in xteram, sa’ chaab’ilal chiru Dios ut chiruheb’ li winq” (Lukas 2:52). A’an kik’i chi b’isb’il chi us chixjunil, ut naru ajwi’ naq chixjunil li kok’al ut li saaj te’xb’aanu chi jo’kan.
Tenq’aheb’ li kok’al ut li saaj chiroksinkil li Kolonel sa’ chixjunil xcha’al xyu’ameb’—ink’a’ ka’ajwi’ sa’ li hilob’aal kutan. Naq neke’xyal xq’e chik’eeb’al li Jesukristo jo’ xb’eenil sa’ xyu’ameb’, a’an naxyeechi’i naq tixtaqla li Santil Musiq’ej re wank choq’ aj k’ojob’anel xch’ooleb’ ut aj k’amol xb’eheb’.
Chaab’il raj wi li xtaaqenkil li Kolonel natikla sa’ li kab’l. Eb’ laj jolominel sa’ li Iglees naru te’xk’e aajel ruhil tenq’aal reheb’ li komon ut li junkab’al.
Jayalinb’il sa’ li ochoch
Eb’ li na’b’ej yuwa’b’ej neke’xk’uub’ li k’a’ru te’xb’aanu li junkab’al ut li te’aatinaq wi’ re xk’utb’al lix evangelio li Jesukristo ut xtenq’ankil li junjunq kok’al sa’ rajomeb’ ru. A’in nak’ulman naq neke’k’anjelak ut neke’b’atz’un sa’ komonil li junkab’al sa’ xk’utb’al li aajel ruhil seeb’al, sa’ xkawob’resinkil xchaab’ilaleb’, ut sa’ xtenq’ankileb’ chi k’iik.
Xwaklesinkileb’ chi k’iik
-
Tijon re xk’ulb’al aab’eresinkil. Li qaChoxahil Yuwa’ naxnaweb’ ru laa kok’al ut tatxtenq’a chixtzolb’aleb’.
-
Tenq’aheb’ laa kok’al chixsik’b’al ut chixk’eeb’al reetal lix wankil li Santil Musiq’ej.
-
K’ut laa rahom ut usilaatinaheb’ chi kok’ aj xsa’ laa kok’al xb’aan lix yalb’aleb’ xq’e chixb’aanunkil li us ut xb’aaneb’ lix chaab’ilal li Kristo li nakawil rik’ineb’.
-
Sik’eb’ hoonal re texk’anjelaq jo’ junkab’al chiruheb’ lee ras eeriitz’in.
Xkamb’aleb’ xb’e
-
Tenq’aheb’ laa kok’al chirilb’al chan ru naq te’ruuq chixyu’aminkil li evangelio sa’ chixjunil xcha’aleb’ lix yu’ameb’.
-
K’ameb’ xb’e laa kok’al ut waklesi xch’ooleb’ chixk’uub’ankil lix jayalihomeb’ ut lix k’uub’anb’il na’leb’ xjuneseb’ rib’.
-
Tenq’aheb’ chixk’oxlankil chan ru xtuqub’ankileb’ lix ch’a’ajkilaleb’ xjuneseb’ rib’.
-
Yeechi’i laa tenq’ ut waklesi xch’ooleb’ sa’ chixjunil a’in.
Aatinak rik’ineb’ laj jolominel
Aatinan rik’ineb’ laj k’utunel ut laj jolominel re xnawb’al chan ru te’ruuq chixtenq’ankileb’ chi chaab’il laa kok’al. Maaye yalaq k’a’ru ink’a’ te’raj li kok’al naq taaye chirixeb’ chi moko taaye yalaq k’a’ru tixk’eheb’ chi xutaanak.
Tenq’anb’il xb’aan li Iglees
Jayalinb’il sa’ li ochoch (Junkab’al)
Tenq’anb’il xb’aan li Iglees (Eb’ laj jolominel)
Junjunq reheb’ lix k’anjelil li Iglees a’an xk’utb’al lix evangelio li Jesukristo, xk’anjelankileb’ li k’ojob’anb’il k’anjel, ut xtenq’ankileb’ li junkab’al. Eb’ laj jolominel ut laj k’utunel neke’xtenq’aheb’ li na’b’ej yuwa’b’ej rik’in xnawb’aleb’ ru chi us ut xch’olaninkileb’ li kok’al ut li saaj neke’k’anjelak wi’.
Aatinak rik’ineb’ li na’b’ej yuwa’b’ej
-
Aatinan rik’ineb’ li na’b’ej yuwa’b’ej re xnawb’al chan ru taatenq’aheb’ lix kok’al. Wotz lix kawilaleb’ nakawil.
-
Patz’ k’a’ru te’raj naq eb’ lix kok’al te’xk’ul ut te’xtzol sa’ li molam re li Tijonelil re Aaron, sa’ li tzoleb’aal reheb’ li Saaj Ixq, ut sa’eb’ li kok’ k’anjel.
Wi ink’a’ yookeb’ chi wulak sa’ Iglees li na’b’ej yuwa’b’ej:
-
Ch’olob’ chiruheb’ li na’b’ej yuwa’b’ej k’a’ru li k’anjel a’in re xtenq’ankileb’ li kok’al ut li saaj, ut patz’ reheb’ ma te’raj ut chan ru te’raj naq te’tz’aqonq lix kok’aleb’.
-
Patz’ reheb’ li kok’al malaj li saaj k’a’ru li tenq’aal te’raj.
-
Aatinan rik’in li jolomil ch’utam re li teep chirix chan ru xk’eeb’aleb’ chi tz’aqonk li na’b’ej yuwa’b’ej jo’ k’ihal naruhan.
Xtenq’ankileb’ li kok’al ut li saaj
-
Tenq’aheb’ li kok’al ut li saaj chixk’eeb’al reetal lix wankil li Santil Musiq’ej.
-
Patz’ reheb’ k’a’ru te’raj xtzolb’al ut xk’ulb’al sa’ li molam ut sa’ li tzoleb’aal ut sa’eb’ li kok’ k’anjel.
-
Waklesi xch’ooleb’ chi tz’aqonk sa’ xk’uub’ankileb’ ut xb’eresinkileb’ li kok’ k’anjel.
-
Xtenq’ankileb’ aj k’amol re li Tijonelil re Aaron sa’ xtz’aqob’resinkil ru xk’anjeleb’ sa’ li molam.
Xtzolb’al li evangelio
Sa’ li ochoch
Xtzolb’aleb’ li loq’laj hu ut li tijok sa’ junesal ut jo’ junkab’al tixtenq’aheb’ li kok’al ut li saaj chireek’ankil ut chixk’eeb’al reetal lix wankil li Santil Musiq’ej ut chixtzolb’al xraab’al li Kolonel. Usaq raj naq eb’ li komon ut li junkab’al te’roksi Kim, Taaqehin—Choq’ reheb’ li komon ut li junkab’al jo’ ajwi’ li raatineb’ li yo’yookil profeet re xtzolb’al lix evangelio li Jesukristo.
Sa’ li Iglees
Eb’ li kok’al ut li saaj neke’ch’utla sa’ komonil re xtzolb’al lix evangelio li Jesukristo. Eb’ li kok’al neke’xtzol li evangelio rik’in li tzole’k sa’ tzoleb’aal ut rik’in li b’ichank sa’ li hoonal re b’ichank sa’ li Tzoleb’aal reheb’ li Kok’al. Eb’ li saaj neke’xtzol li tzol’leb’ sa’ li tzoleb’aal ut li molam. Eb’ li kok’al ut li saaj b’oqb’ileb’ chixwotzb’al li neke’xtzol sa’ li ochoch ut chixyu’aminkil li evangelio.
Eb’ li kok’ k’anjel ut li k’anjelak chiru li qas qiitz’in
Sa’ li ochoch
Eb’ li kok’ k’anjel ut li k’anjelak chiru li qas qiitz’in neke’xxaqab’ tiikil k’anjel wulaj wulaj, neke’xkawob’resi li junkab’al, neke’xk’ut aajel ruhil seeb’al choq’ re li yu’am, neke’xchaab’ilob’resiheb’ chi wank jo’ li Kristo, ut neke’xtenq’aheb’ li kok’al ut li saaj chi k’iik. Eb’ li kok’ k’anjel ut li k’anjelak chiru li qas qiitz’in jo’ junkab’al naru jayalinb’ilaq rik’in li rajom li junjunq komon malaj li junkab’al ut neke’xk’e li hoonal re xyu’aminkil lix na’leb’ li evangelio sa’ li nak’ulman wulaj wulaj.
Sa’ li Iglees
Eb’ li kok’ k’anjel ut li k’anjelak chiru li qas qiitz’in—jo’ naq eb’ laj k’amol re li Tijonelil re Aaron neke’xk’anjela li k’ojob’anb’il k’anjel re li loq’laj wa’ak—li neke’b’aanuman rajlal neke’xk’eheb’ hoonal re ch’utub’ank-ib’, xtzolb’al ak’ seeb’aleb’, xb’aanunkileb’ li k’anjel ch’a’ajeb’, ut xnawb’aleb’ ru li rech aj komon ut laj jolominel chi jayalinb’il sa’ li evangelio. Tento naq eb’ li k’anjel a’in te’xtenq’aheb’ li kok’al ut li saaj chi k’iik sa’ musiq’ej, sa’ komonil, sa’ tib’elej, ut sa’ k’a’uxleb’aal ut naq te’xtenq’aheb’ li ras riitz’in. JustServe (JustServe.org) a’an jun chaab’il na’ajej re xtawb’al chan ru tenq’ank sa’ li tenamit.
Wankeb’ li kok’ k’anjel choq’ reheb’ li saaj li neke’wan chiru junjunqeb’ li kutan jo’ eb’ li ch’utub’aj-ib’ chirix li hu Choq’ re Xkawilaleb’ li Saaj, eb’ li ch’utub’aj-ib’ choq’ reheb’ li saaj, li xik chi b’eek, ut xkomoneb’ chik li k’anjel. Eb’ li kok’ k’anjel a’in naru te’xtenq’aheb’ li saaj chixnimob’resinkil rajomeb’ xch’ool chixtaaqenkil li Kolonel, chixjalb’al li k’aynaqeb’ chixb’aanukil wulaj wulaj, ut chixtenq’ankileb’ chixk’eeb’al reetal naq xkomoneb’ jun nimla ch’uut reheb’ li saaj li tiikeb’ lix jayalihomeb’.
Li chaab’ilob’resink-ib’ sa’ junesal
Sa’ li ochoch
Eb’ li kok’al ut li saaj neke’xsik’ ru li naru te’xb’aanu re k’iik ut re xtzolb’al xtaaqenkil li Kolonel. Eb’ li na’b’ej yuwa’b’ej naru te’xtenq’aheb’ chixk’eeb’al reetal chan ru naq ak yookeb’ chi k’iik ut k’a’ chik ru tento te’xb’aanu re chaab’ilo’k. Chixjunileb’ li kok’ k’anjel, sa’ iglees, sa’ eskweel, rik’ineb’ li amiiw, sa’ b’atz’unk, sa’ b’onok, sa’ trab’aaj, ut sa’ yalaq chik k’a’ru naru te’xtenq’aheb’ li kok’al ut li saaj chixtaaqenkil li Kolonel.
Sa’ li Iglees
Eb’ laj jolominel neke’xra ut neke’k’anjelak chiru li junjunq kok’al ut saaj ut neke’ok chixnawb’al li rajomeb’ ru ut li nawulak chiruheb’. Rik’in li rahok, eb’ laj jolominel naru te’xtenq’aheb’ ut te’xwaklesi xch’ooleb’ li kok’al ut li saaj sa’ xyalb’aleb’ xq’e chi tenq’ank ut sa’ xk’iijikeb’.
Xjalb’al ut xtawb’al li taak’anjelaq
Jalan jalanq li junjunq komon, junkab’al, ut teep. Li nak’anjelak chi chaab’il choq’ re junaq kristiaan maare ink’a’ nak’anjelak choq’ re jalan chik. B’aanu li taak’anjelaq choq’ re laa junkab’al, laa tzoleb’aal, laa molam, malaj laa teep. Aatinan chirix li osob’tesinb’ilat wi’ jo’ ajwi’ li naxik wi’ laa k’a’uxl, ut sik’ laa k’utb’esinb’il na’leb’ chirix chan ru roksinkil li k’anjel a’in re xtenq’ankileb’ li kok’al ut li saaj chixk’ulb’al lix choxahil wankilaleb’.
Qayehaq, jalan jalanq li te’xb’aanu li junjunq kok’al ut saaj re xchaab’ilob’resinkil rib’; tento naq tz’ilb’il rix choq’ re li junjunq jo’ k’ihal li tenq’aal taaraj ru, ut chan ruheb’, jarub’eb’, k’a’ru xhoonalileb’ lix jayalihom. Eb’ li tzoleb’aal ut li molam neke’jala ajwi’ re xtenq’ankileb’ sa’ rajomeb’ ru. Jo’kan ajwi’, naru xjalb’al chan ruheb’ ut xhoonalileb’ li kok’ k’anjel a’ yaal chan ru li na’ajej wankat wi’.
Chikanaaq chi saqen ru. B’aanu li nak’anjelak.
Rajom li ch’oolej ut li k’ehok eetal
Rajom li ch’oolej
Ak reheb’ li kok’al ut li saaj naq eekasinb’ilaq rajomeb’ xch’ool naq neke’reek’a naq raab’ileb’, naq neke’k’iik, neke’chaab’ilo’k, ut neke’reek’a li Santil Musiq’ej sa’ xyu’ameb’. Naq ch’a’aj chiruheb’ li jalaak ut li k’iik, waklesi xch’ooleb’ chixsik’b’al chan ru te’numtaaq sa’ xb’eeneb’ li ch’a’ajkilal malaj chan ru te’xjaleb’ lix k’uub’anb’il na’leb’. Li komonil sa’ xyaalalil rik’ineb’ li na’b’ej yuwa’b’ej, laj jolominel, ut li rech aj saaj naru tixk’e reheb’ li metz’ew re ink’a’ te’xkanab’ xyalb’aleb’ xq’e.
K’ehok eetal
Naq eb’ li kok’al ut li saaj neke’xik chi uub’ej, usilaatinaheb’ chirix li yookeb’ chixb’aanunkil ut waklesi xch’ooleb’. K’e xhoonaleb’ re xwotzb’al li yookeb’ chixtzolb’al, ut chisaho’q aach’ool chirix lix k’iijikeb’. Jo’kan ajwi’, chixjunileb’ li kok’al ut li saaj naru te’xk’ul li k’a’aq re ru jo’ junaq matq’ab’ malaj medallón re taajultiko’q reheb’ naq xkomoneb’ sa’ jun ch’uut chiru chixjunil li ruchich’och’ reheb’ li yookeb’ chixyalb’aleb’ xq’e chixtaaqenkil li Jesukristo. Naq eb’ li kok’al ut li saaj neke’xtz’aqob’resi ru lix jayalihomeb’ sa’ musiq’ej, sa’ komonil, sa’ tib’elej, ut sa’ k’a’uxleb’aal, naru te’xk’ul xkomon chik li eetalil.