« អាពាហ៍ពិពាហ៍ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
អាពាហ៍ពិពាហ៍
សក្តានុពលសម្រាប់ស្វាមី និងភរិយាដើម្បីរួបរួមគ្នាសម្រាប់ភាពអស់កល្បជានិច្ច
មនុស្សជាច្រើនទន្ទឹងរង់ចាំអាពាហ៍ពិពាហ៍ដោយសេចក្តីអំណរ និងការរំពឹងទុកយ៉ាងខ្លាំង ។ មានអ្វីមួយដែលស្រស់ស្អាត និងពោរពេញដោយសេចក្តីសង្ឃឹមយ៉ាងពិសេសអំពីអាពាហ៍ពិពាហ៍ ។ អស់អ្នកដែលបានភ្ជាប់ពាក្យដើម្បីរៀបអាពាហ៍ពិពាហ៍មានក្តីរំភើបក្នុងការចាប់ផ្តើមជីវិតថ្មីជាមួយមនុស្សដែលពួកគេស្រឡាញ់ច្រើនជាងអ្នកណាៗទាំងអស់ ។
បន្ទាប់ពីយើងរៀបអាពាហ៍ពិពាហ៍ យើងត្រូវខិតខំដើម្បីរក្សាអាពាហ៍ពិពាហ៍នោះឲ្យមានភាពពេញលេញ និងរឹងមាំ ។ វាត្រូវការការខិតខំ ភាពអត់ធ្មត់ ការបន្ទាបខ្លួន ការអភ័យទោស និងការលះបង់ក្នុងរយៈពេលយូរបន្ទាប់ពីថ្ងៃនៃអាពាហ៍ពិពាហ៍ ដើម្បីកសាងអាពាហ៍ពិពាហ៍ដែលមានសុភមង្គល និងយូរអង្វែង ។ ប៉ុន្តែការខិតខំប្រឹងប្រែងគឺសមនឹងទទួលបានរង្វាន់ ។ តាមរយៈពិធីបរិសុទ្ធដ៏ពិសិដ្ឋ និងសេចក្ដីសញ្ញាដែលបានធ្វើឡើងនៅក្នុងដំណាក់របស់ព្រះអម្ចាស់ ទំនាក់ទំនងអាពាហ៍ពិពាហ៍អាចបន្តរហូតដល់អស់កល្បជានិច្ច ។ អាពាហ៍ពិពាហ៍នៅក្នុងព្រះវិហារបរិសុទ្ធក៏ត្រូវបានហៅថា អាពាហ៍ពិពាហ៍សេឡេស្ទាលផងដែរ ។ ប្រធាន រ័សុល អិម ណិលសុន បានបង្រៀនថា « អាពាហ៍ពិពាហ៍សេឡេស្ទាល នាំមកនូវលទ្ធភាពដ៏មហិមាសម្រាប់សុភមង្គលលើសជាងទំនាក់ទំនងណាៗទាំងអស់ » ។
តើអាពាហ៍ពិពាហ៍គឺជាអ្វី ?
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបង្រៀនថា អាពាហ៍ពិពាហ៍រវាងស្ត្រីម្នាក់ និងបុរសម្នាក់ត្រូវបានតែងតាំងឡើងដោយព្រះ ( សូមមើល គោលលទ្ធិ និងសេចក្ដីសញ្ញា ៤៩:១៥; « ក្រុមគ្រួសារ ៖ ការប្រកាសដល់ពិភពលោក » នៅលើបណ្ណាល័យដំណឹងល្អ ) ។ ស្វាមីភរិយាដែលបានផ្សារភ្ជាប់នៅក្នុងព្រះវិហារបរិសុទ្ធធ្វើសេចក្ដីសញ្ញាជាមួយនឹងព្រះ និងជាមួយគ្នាទៅវិញទៅមក ។ ប្រសិនបើពួកគេស្មោះត្រង់ចំពោះសេចក្តីសញ្ញារបស់ពួកគេ អាពាហ៍ពិពាហ៍របស់ពួកគេអាចបន្តរហូតដល់អស់កល្បជានិច្ច ។
ទិដ្ឋភាពទូទៅនៃប្រធានបទ ៖ អាពាហ៍ពិពាហ៍
មគ្គទេសក៍សិក្សាដំណឹងល្អដែលជាប់ទាក់ទង ៖ សេចក្ដីសញ្ញាដ៏អស់កាលអស់កល្បជានិច្ច គ្រួសារ ពិធីបរិសុទ្ធនៃអំណោយទានពិសិដ្ឋ និងពិធីផ្សារភ្ជាប់
ផ្នែកទី ១
អាពាហ៍ពិពាហ៍គឺជាផ្នែកដ៏សំខាន់ចំពោះផែនការរបស់ព្រះ ។
យើងជាផ្នែកមួយនៃគ្រួសារដ៏អស់កល្បជានិច្ចរបស់ព្រះ ហើយមុនពេលមកផែនដី យើងបានរស់នៅស្ថានសួគ៌ជាមួយនឹងព្រះវរបិតាសួគ៌ និងព្រះមាតាសួគ៌របស់យើង ។ នៅទីនោះ យើងត្រូវបានបង្រៀនអំពីផែនការមួយដែលនឹងអនុញ្ញាតឲ្យយើងរៀន និង រីកចម្រើន ។ ជាផ្នែកមួយនៃផែនការនោះ យើងបានមកផែនដីជាក្រុមគ្រួសារ ក្រុមគ្រួសារទាំងនេះអាចជួយយើងឲ្យរីកចម្រើន និងប្រែកា្លយកាន់តែដូចជាព្រះ ។
ក្រុមគ្រួសារគឺមានសារៈសំខាន់ចំពោះផែនការរបស់ព្រះសម្រាប់បុត្រាបុត្រីរបស់ទ្រង់ ។ ព្យាការី យ៉ូសែប ស្ម៊ីធ បានបង្រៀនថា អាពាហ៍ពិពាហ៍គឺជា « ស្ថាប័ននៃស្ថានសួគ៌ ដែលត្រូវបានប្រារព្ធឡើងជាលើកដំបូងនៅក្នុងសួនច្បារអេដែន ដោយព្រះផ្ទាល់ ដោយអំណាចនៃបព្វជិតភាពដ៏អស់កល្បអស់កាលជានិច្ច » ។ នៅពេលដែលក្រុមគ្រួសាររបស់យើងបានផ្សារភ្ជាប់សម្រាប់ភាពអស់កល្បជានិច្ច តាមរយៈអំណាចបព្វជិតភាពដូចគ្នានៅក្នុងដំណាក់របស់ព្រះអម្ចាស់ យើងធ្វើតាមលំនាំដ៏អស់កល្បជានិច្ចដែលព្រះទ្រង់បានប្រទានមក ដែលត្រូវបានបង្កើតឡើងនៅក្នុងជីវិតមុនជីវិតលើផែនដី ។
ហេតុផលមួយក្នុងចំណោមហេតុផលជាច្រើនដែលព្រះបានបង្កើតអាពាហ៍ពិពាហ៍ គឺដើម្បីយើងអាចរៀនសូត្រពីគ្នា និងថែទាំគ្នាទៅវិញទៅមកឲ្យបានកាន់តែប្រសើរ ។ អាពាហ៍ពិពាហ៍ដែលរឹងមាំនាំឲ្យក្រុមគ្រួសារកាន់តែរឹងមាំ ដែលជួយយើងបំពេញគោលបំណងដ៏អស់កល្បជានិច្ចរបស់យើង ។ ក្រុមគ្រួសារដែលកាន់តែរឹងមាំក៏អាចនាំឲ្យមានសហគមន៍កាន់តែរឹងមាំនៅលើផែនដីផងដែរ ។ អាពាហ៍ពិពាហ៍ដែលបង្កើតឡើងនៅលើគោលការណ៍នៃដំណឹងល្អរបស់ព្រះយេស៊ូវគ្រីស្ទ អាចជួយយើងរីកចម្រើន និងទទួលបានបទពិសោធន៍នៃសេចក្ដីអំណរដ៏មហិមាមួយចំនួននៅក្នុងជីវិតនេះ ។ អាពាហ៍ពិពាហ៍ក៏អាចជួយរៀបចំយើងសម្រាប់ជីវិតដ៏នៅអស់កល្បជានិច្ចជាមួយនឹងព្រះវរបិតាសួគ៌របស់យើង និងព្រះយេស៊ូវគ្រីស្ទផងដែរ ។
រឿងទាំងឡាយដែលត្រូវពិចារណា
-
អែលឌើរ អូលីសេស សូរ៉េស បានមានប្រសាសន៍ ៖« ពុំមាននរណាធំជាង ឬអន់ជាងនៅក្នុងទំនាក់ទំនងអាពាហ៍ពិពាហ៍នោះទេ ហើយក៏ពុំមាន [ ស្វាមី ឬភរិយា ] ដើរមុន ឬដើរក្រោយគ្នានោះដែរ ។ ពួកគេដើរទន្ទឹមគ្នា ស្មើភាពគ្នា ជាបុត្រាបុត្រីដ៏ទេវភាពរបស់ព្រះ ។ ពួកគេប្រែជាមានគំនិត បំណងប្រាថ្នា និងគោលបំណងតែមួយជាមួយនឹងព្រះវរបិតាសួគ៌ និង ព្រះយេស៊ូវគ្រីស្ទ ។… [ គូស្វាមីភរិយាបែបនេះ ] ដើរជាមួយគ្នាដោយការគោរព ការដឹងគុណ និងសេចក្ដីស្រឡាញ់ដោយមិនគិតអំពីខ្លួនឯង តែស្វែងរកសុខុមាលភាពឲ្យគ្នាទៅវិញទៅមកក្នុងដំណើរទៅកាន់ភាពអស់កល្បជានិច្ចរបស់ពួកគេ » ។ សូមគិតអំពី « ដំណើរទៅកាន់ភាពអស់កល្បជានិច្ច » ផ្ទាល់ខ្លួនរបស់អ្នកក្នុងនាមជាផ្នែកមួយនៃផែនការរបស់ព្រះ ។ តើការដើរ « ទន្ទឹមគ្នា ស្មើភាពគ្នា » ជាមួយស្វាមី ឬភរិយាជួយអ្នកនៅលើការធ្វើដំណើរនោះដោយរបៀបណា ? ប្រសិនបើអ្នកបានរៀបការហើយ តើអ្នកអាចធ្វើអ្វីបានខ្លះដើម្បីបង្ហាញការគោរព ការដឹងគុណ និងសេចក្តីស្រឡាញ់កាន់តែខ្លាំង ពេលអ្នកធ្វើដំណើរនេះជាមួយគូស្វាមី ឬភរិយារបស់អ្នក ? អ្នកក៏អាចដាក់ផែនការសម្រាប់អ្វីមួយជាក់លាក់ដែលអ្នកនឹងធ្វើសម្រាប់ស្វាមី ឬភរិយារបស់អ្នកបានផងដែរ ។ សូមកត់ត្រាចំណាប់អារម្មណ៍របស់អ្នក ហើយធ្វើតាមចំណាប់អារម្មណ៍ទាំងនោះ ។
-
អែលឌើរ ឌី ថត គ្រីស្ដូហ្វឺសិន បានមានប្រសាសន៍អំពីអស់អ្នកដែលមិនទាន់រៀបអាពាហ៍ពិពាហ៍ និងមិនទាន់ទទួលបានពរជ័យដែលពាក់ព័ន្ធនឹងអាពាហ៍ពិពាហ៍នាពេលបច្ចុប្បន្ននេះថា ៖
« បងប្អូនមួយចំនួនបានបដិសេធពរជ័យនៃអាពាហ៍ពិពាហ៍ដោយមូលហេតុជាច្រើន រួមទាំងការខ្វះការរំពឹងទុកសក្ដិសម ការស្រឡាញ់ភេទដូចគ្នា ពិការភាពខាងរូបកាយ និងខាងសតិអារម្មណ៍ ឬការខ្លាចនឹងភាពបរាជ័យ ដែលគ្របបាំងសេចក្ដីជំនឿមួយរយៈពេល ។ ឬអ្នកបានរៀបការហើយ ប៉ុន្តែអាពាហ៍ពិពាហ៍នោះត្រូវបានបញ្ចប់ ហើយអ្នកត្រូវទុកឲ្យនៅគ្រប់គ្រងតែម្នាក់ឯង ដែលមនុស្សពីរនាក់រួមគ្នាអាចទ្រាំទ្រទាំងលំបាក ។ បងប្អូនមួយចំនួនបានរៀបការហើយតែពុំអាចមានកូនចៅទោះជាមានបំណង និងការអធិស្ឋានទូលអង្វរដ៏លើសលប់ក្ដី។
« … ដោយទំនុកចិត្ត យើងថ្លែងទីបន្ទាល់ថា ដង្វាយធួននៃព្រះយេស៊ូវគ្រីស្ទបានរំពឹងរង់ចាំជាមុន ហើយនៅទីបំផុតនឹងបង់សងរាល់ការខូចខាត និងការខ្វះខាត និងការបាត់បង់ទាំងអស់ចំពោះអ្នកទាំងឡាយដែលងាកទៅរកទ្រង់ ។ គ្មាននរណាម្នាក់ត្រូវបានតាំងជាមុនដើម្បីទទួលតិចជាងនូវអ្វីៗទាំងអស់ដែលព្រះបិតាមានសម្រាប់បុត្រាបុត្រីរបស់ទ្រង់ឡើយ » ។
តើអ្នករកឃើញអ្វីខ្លះនៅក្នុងប្រសាសន៍របស់អែលឌើរ គ្រីស្ដូហ្វឺសិន ដែលអាចជួយអ្នក ឬនរណាម្នាក់ដែលអ្នកស្គាល់ដែលមិនបានទទួលពរជ័យនៃអាពាហ៍ពិពាហ៍ ឬអ្នកដែលមិនបានដកពិសោធន៍ពរជ័យទាំងនោះក្នុងពេលឥឡូវនេះ ? តើព្រះប្រទានពរដល់ « អ្នកដែលបែរទៅរកទ្រង់ » នៅក្នុងគ្រានៃ « ការខ្វះខាត និងការបាត់បង់ » របស់ពួកគេដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអាន គោលលទ្ធិ និងសេចក្ដីសញ្ញា ១២១:៣៦–៤២ ជាមួយស្វាមី ឬភរិយារបស់អ្នក ឬអ្នកដទៃទៀត ហើយពិភាក្សាអំពីរបៀបដែលវគ្គបទគម្ពីរនេះទាក់ទងនឹងអាពាហ៍ពិពាហ៍ ។ ប្រធាន ហ្គរដុន ប៊ីហ៊ិងគ្លី បានទូន្មាន ៖ « ខ្ញុំពេញចិត្តដែលថា ប្រសិនបើយើងនឹងស្វែងរកគុណធម៌រវាងគ្នានឹងគ្នា ហើយពុំមែនការណ៍អាក្រក់ នោះនឹងមានសុភមង្គលកាន់តែច្រើនឡើងនៅក្នុងគេហដ្ឋានរបស់ប្រជាជនរបស់យើង ។ នឹងមានការលែងលះតិចជាង ការមិនស្មោះត្រង់តិចជាង កំហឹង និងការខឹងសម្បារ និងការឈ្លោះទាស់ទែងគ្នាតិចជាង ។ នឹងមានការអភ័យទោសកាន់តែច្រើន សេចក្តីស្រឡាញ់កាន់តែច្រើន សេចក្ដីសុខសាន្ដកាន់តែច្រើន និងសុភមង្គលកាន់តែច្រើន ។ ការណ៍នេះគឺដូចអ្វីដែលព្រះអម្ចាស់សព្វព្រះទ័យឲ្យមាន » ។ ពិភាក្សាអំពីរបៀបដែលការចងចាំថាអាពាហ៍ពិពាហ៍គឺជាផ្នែកដ៏សំខាន់មួយនៃផែនការនៃសុភមង្គល អាចជួយយើងធ្វើតាមការទូន្មានរបស់ប្រធាន ហ៊ិងគ្លី ។ បន្ទាប់មកអ្នកអាចចែកចាយគំនិតសម្រាប់ការស្វែងរកសុភមង្គលបន្ថែមទៀតនៅក្នុងអាពាហ៍ពិពាហ៍ ។
ស្វែងយល់បន្ថែមទៀត
-
លោកុប្បត្តិ ១:២៧–២៨; ២:១៨, ២១–២៤; កូរិនថូសទី ១ ១១:១១–១២; គោលលទ្ធិ និងសេចក្ដីសញ្ញា ៤២:២២; ៤៩:១៥–១៧
-
« ក្រុមគ្រួសារ ៖ ការប្រកាសដល់ពិភពលោក » នៅលើបណ្ណាល័យដំណឹងល្អ
-
ហ្គរដុន ប៊ី ហ៊ិងគ្លី « Living Worthy of the Girl You Will Someday Marry » Ensign ខែឧសភា ឆ្នាំ១៩៩៨ ទំព័រ ៤៩–៥១
ផ្នែកទី ២
ដោយសារពិធីបរិសុទ្ធ និងសេចក្ដីសញ្ញានៃព្រះវិហារបរិសុទ្ធ អាពាហ៍ពិពាហ៍អាចបន្តរហូតដល់អស់កល្បជានិច្ច
នៅឆ្នាំ ១៨៤៣ ព្យាការី យ៉ូសែប ស្ម៊ីធ ត្រូវបានហៅឲ្យកត់ត្រាវិវរណៈដែលឥឡូវនេះមាននៅក្នុង គោលលទ្ធិ និងសេចក្ដីសញ្ញា ១៣២ ដែលរួមមាននូវគោលលទ្ធិនៃអាពាហ៍ពិពាហ៍ដ៏នៅអស់កល្បជានិច្ច ។ គោលលទ្ធិនេះគឺថាអាពាហ៍ពិពាហ៍ ប្រសិនបើផ្សារភ្ជាប់ដោយសិទ្ធិអំណាចបព្វជិតភាព និងព្រះវិញ្ញាណបរិសុទ្ធនៃការសន្យា គឺមានសុពលភាពទាំងនៅលើផែនដី និងដល់ភាពអស់កល្បជានិច្ច ។ អាពាហ៍ពិពាហ៍ដ៏អស់កល្បជានិច្ចត្រូវបានគេហៅផងដែរថា អាពាហ៍ពិពាហ៍សេឡេស្ទាល ឬ « សេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ » ( គោលលទ្ធិ និងសេចក្ដីសញ្ញា ១៣១:២ ) ។ វាត្រូវបានធ្វើឡើងតាមរយៈពិធីបរិសុទ្ធនៃបព្វជិតភាពដែលហៅថា ការផ្សារភ្ជាប់ក្នុងព្រះវិហារបរិសុទ្ធ ។ ពិធីដ៏ពិសិដ្ឋនេះកើតឡើងនៅក្នុងដំណាក់របស់ព្រះអម្ចាស់ ។
អាពាហ៍ពិពាហ៍ដ៏អស់កល្បជានិច្ចបង្កើតទំនាក់ទំនងសេចក្ដីសញ្ញារវាងស្វាមី និងភរិយា និងព្រះអម្ចាស់ ។ សេចក្ដីសញ្ញានៃអាពាហ៍ពិពាហ៍ដ៏អស់កល្បជានិច្ចគឺចាំបាច់សម្រាប់ភាពតម្កើងឡើង ( សូមមើល គោលលទ្ធិ និងសេចក្ដីសញ្ញា ១៣១:១–៤ ) ។ ប្រសិនបើយើងស្មោះត្រង់ចំពោះសេចក្តីសញ្ញានេះ ទំនាក់ទំនងអាពាហ៍ពិពាហ៍ និងទំនាក់ទំនងគ្រួសាររបស់យើងអាចនៅយូរអង្វែងជារៀងរហូត ។
រឿងទាំងឡាយដែលត្រូវពិចារណា
-
សូមអាន គោលលទ្ធិ និងសេចក្ដីសញ្ញា ១៣២:១៩–២០ ហើយពិចារណាពីអ្វីដែលខគម្ពីរទាំងនេះបង្រៀនអំពីអាពាហ៍ពិពាហ៍នៃសេចក្ដីសញ្ញា ។ ស៊ីស្ទើរ ជូលី ប៊ី ប៊េក បានបង្រៀន ៖ « បុរស និងស្រ្ដីដែលចូលទៅក្នុងភាពជាដៃគូពេញលេញនៃសេចក្ដីសញ្ញានៃអាពាហ៍ពិពាហ៍ក្នុងព្រះវិហារបរិសុទ្ធ ទទួលបានពរជ័យស្មើគ្នាពីសេចក្ដីសញ្ញានោះ ប្រសិនបើពួកគេស្មោះត្រង់ [ សូមមើល គោលលទ្ធិ និង សេចក្ដីសញ្ញា ១៣១:១–២ ] ។ ព្រះអម្ចាស់បានមានព្រះបន្ទូលថា សេចក្តីសញ្ញារបស់ពួកគេនឹងមានសុពលភាពបន្ទាប់ពីជីវិតនេះ ហើយជាមួយគ្នាពួកគេទទួលបានការសន្យានូវព្រះចេស្ដា និងភាពតម្កើងឡើង [ សូមមើល គោលលទ្ធិ និងសេចក្ដីសញ្ញា ១៣១:១៩–២០ ] » ។ តើពរជ័យដែលបានសន្យានៃអាពាហ៍ពិពាហ៍ក្នុងសេចក្ដីសញ្ញា ជួយគូស្វាមីភរិយាដែលរៀបការរួចឲ្យនៅបន្ដស្មោះត្រង់នឹងគ្នាទៅវិញទៅមក នៅពេលមានបញ្ហាលំបាកដោយរបៀបណា ?
-
ព្រះសព្វព្រះទ័យឲ្យយើងមានមិនត្រឹមតែអាពាហ៍ពិពាហ៍បែបណាក៏បាននោះទេ ប៉ុន្តែជាអាពាហ៍ពិពាហ៍ក្នុងសេចក្ដីសញ្ញារហូតដល់អស់កល្បជានិច្ច ។ អែលឌើរ ប្រ៊ូស ស៊ី ហាហ្វិន បានបង្រៀន ៖ « នៅពេលមានបញ្ហាកើតឡើងចំពោះអាពាហ៍ពិពាហ៍ក្នុង សេចក្ដីសញ្ញា ស្វាមី និងភរិយាខិតខំដើម្បីឆ្លងកាត់ការណ៍ទាំងនេះ ។ ពួកគេរៀបអាពាហ៍ពិពាហ៍ដើម្បីផ្តល់ឲ្យ និងរីកចម្រើន ចងភ្ជាប់នឹងគ្នាទៅវិញទៅមកដោយសេចក្ដីសញ្ញា សហគមន៍ និងព្រះ » ។ ប្រធាន ឌៀថើរ អេហ្វ អុជដូហ្វ ខណៈបម្រើក្នុងគណៈប្រធានទីមួយ បានមានប្រសាសន៍ថា « អាពាហ៍ពិពាហ៍ដ៏រុងរឿងកើតឡើងបន្ដិចម្ដងៗ ពីមួយថ្ងៃទៅមួយថ្ងៃពេញមួយជីវិត » ។ សូមមើលរូបភាពភ្ជាប់មកជាមួយដែលជាផ្ទះសង់ឡើងពីឥដ្ឋ ហើយគិតអំពី « ឥដ្ឋ » ដែលនឹងបង្កើតឲ្យមានអាពាហ៍ពិពាហ៍ដ៏រឹងមាំ ។ អ្នកអាចអានសារលិខិតសន្និសីទរបស់ប្រធាន អុជដូហ្វ « ពោលពាក្យសរសើរដល់អ្នកទាំងឡាយដែលការពារ » និងជញ្ជឹងគិតអំពីដំបូន្មានដែលលោកផ្តល់ទៅដល់ស្វាមី និងភរិយាទាំងឡាយ ។ តើ « ឥដ្ឋ » អ្វីខ្លះដែលអ្នកអាចដាក់រៀបក្នុងរយៈពេលប៉ុន្មានសប្តាហ៍ខាងមុខនេះ ដើម្បីពង្រឹងអាពាហ៍ពិពាហ៍របស់អ្នក ឬដើម្បីរៀបចំសម្រាប់អាពាហ៍ពិពាហ៍ដ៏រឹងមាំ ?
សកម្មភាពសម្រាប់ការរៀនសូត្រជាមួយអ្នកដទៃ
-
កិច្ចខិតខំប្រឹងប្រែងរបស់យើងដើម្បីពង្រឹងអាពាហ៍ពិពាហ៍របស់យើងមានឥទ្ធិពលយ៉ាងទូលំទូលាយ ។ អាពាហ៍ពិពាហ៍របស់យើងជះឥទ្ធិពលមិនត្រឹមតែលើយើង និងស្វាមី ឬភរិយារបស់យើងប៉ុណ្ណោះទេ ប៉ុន្តែថែមទាំងលើកូនៗរបស់យើង និងកូនៗរបស់ពួកគេផងដែរ រហូតដល់អស់កល្បជានិច្ច ។ នៅក្នុងសារលិខិតរបស់លោក « ផលដែលបាននៅជាប់ » អែលឌើរ ម៉ាធ្យូ អិល ខាភិនធើរ បានមានប្រសាសន៍អំពីសារៈសំខាន់នៃការថែរក្សា « ផល » នៃអាពាហ៍ពិពាហ៍ក្នុងសេចក្ដីសញ្ញារបស់យើង ហើយប្រៀបធៀបវាទៅនឹងការរក្សាទុកផ្លែឈើនៅក្នុងកែវដោយប្រុងប្រយ័ត្ន ។ លោកបានបង្រៀន « បើយើងធ្វើ ហើយរក្សាសេចក្ដីសញ្ញានឹងព្រះ នោះពរជ័យទាំងឡាយដែលទាក់ទងនឹងសេចក្ដីសញ្ញារបស់យើង អាចមានហួសពីជីវិតនេះ ហើយត្រូវបានផ្សារភ្ជាប់មកលើយើង ឬបានរក្សាទុកជារៀងរហូត ក្លាយជាផលផ្លែដែលបន្ដមានដ៏អស់កល្បជានិច្ច » ។ អ្នកអាចពិចារណាអាន ឬស្តាប់សារលិខិតនេះខណៈពេលកំពុងរីករាយនឹងការញ៉ាំផ្លែឈើត្រាំជាមួយគ្នា ។ និយាយអំពីរបៀបបីបាច់អាពាហ៍ពិពាហ៍ដើម្បីផលិត « ផលដែលនៅជាប់ » ហួសពីជីវិតនេះ និងរហូតដល់អស់កល្បជានិច្ច ។
-
គូស្វាមីភរិយាភាគច្រើនមានការលំបាកពីមួយពេលទៅមួយពេល ហើយពេលខ្លះអាពាហ៍ពិពាហ៍ដ៏អស់កល្បជានិច្ចមើលទៅហាក់ដូចជានៅឆ្ងាយ ។ ប៉ុន្ដែ ប្រធាន ហ៊ិងគ្លី បានទូន្មាន ៖ « ថ្នាំបន្សាបសម្រាប់បញ្ហាក្នុងអាពាហ៍ពិពាហ៍មិនស្ថិតនៅលើការលែងលះគ្នានោះឡើយ ។ វាស្ថិតនៅលើការប្រែចិត្ដ និងការអភ័យទោស នៅលើការបង្ហាញសេចក្តីសប្បុរស និងការព្រួយបារម្ភ ។ វាមាននៅក្នុងការអនុវត្ដនៃច្បាប់មាស » ។ ប្រសិនបើអ្នកកំពុងជួបប្រទះបញ្ហាប្រឈមនៅក្នុងអាពាហ៍ពិពាហ៍របស់អ្នក សូមនិយាយជាមួយគ្នាអំពីរបៀបដែលការចងចាំនូវសេចក្តីសញ្ញារបស់អ្នកអាចជួយឲ្យអ្នកធ្វើការផ្លាស់ប្តូរដែលអ្នកចង់ឃើញ ។ ជ្រើសរើសអ្វីមួយដែលជាការលំបាកនៅក្នុងអាពាហ៍ពិពាហ៍របស់អ្នក ហើយខិតខំរួមគ្នាដើម្បីដោះស្រាយវា ( មគ្គុទេសក៍ Strengthening Marriage របស់សាសនាចក្រ មាននូវគំនិតជាច្រើនដែលអាចជួយបាន ) ។ ស្វែងរកជំនួយពីបុគ្គលដែលអាចទុកចិត្តបាន ( ដូចជាថ្នាក់ដឹកនាំសាសនាចក្រ អ្នកព្យាបាល ឬទីប្រឹក្សាអាពាហ៍ពិពាហ៍ ) ប្រសិនបើចាំបាច់ ។
ស្វែងយល់បន្ថែមទៀត
-
រ័សុល អិម ណិលសុន « Celestial Marriage » Liahona ខែវិច្ឆិកា ឆ្នាំ២០០៨ ទំព័រ ៩២–៩៤
-
ម៉ាកឺស ប៊ី ណាស « The New and Everlasting Covenant » Ensign ខែធ្នូ ឆ្នាំ២០១៥ ទំព័រ ៤០–៤៧