« ការអភ័យទោស » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
ការអភ័យទោស
ការទទួលបានសេចក្តីសង្ឃឹម និងការព្យាបាលតាមរយៈព្រះយេស៊ូវគ្រីស្ទ
ការអភ័យទោសគឺជាអំណោយទានរបស់ព្រះមកកាន់យើង ។ តាមរយៈព្រះអង្គសង្គ្រោះរបស់យើង គឺព្រះយេស៊ូវគ្រីស្ទ នោះយើងអាចទទួលបានការអភ័យទោសពេលដែលយើងប្រែចិត្ត ។ នៅពេលខ្លះ វាអាចមានអារម្មណ៍លើសលប់ក្នុងការស្វែងរកការអភ័យទោសពីអ្វីដែលយើងមានវិប្បដិសារី ។ ប៉ុន្តែ នៅពេលយើងលះបង់ចោលនូវអំពើបាបរបស់យើង ហើយទទួលបទពិសោធន៍នៃការផ្លាស់ប្តូរដួងចិត្តតាមរយៈព្រះចេស្តានៃដង្វាយធួនរបស់ព្រះយេស៊ូវគ្រីស្ទ នោះយើងរកឃើញការព្យាបាល ភាពសុខសាន្ត និងអារម្មណ៍នៃសេចក្តីអំណរជាថ្មី ។
នៅក្នុងជីវិតនេះ យើងក៏អាចរៀនអភ័យទោសដល់អស់អ្នកទាំងឡាយដែលអាចនឹងធ្វើឲ្យយើងឈឺចាប់ ឬធ្វើឲ្យយើងអន់ចិត្តផងដែរ ។ ការអភ័យទោសដល់អ្នកដទៃអាចជាការលំបាក ជាពិសេសនៅពេលដែលនរណាម្នាក់បានធ្វើឲ្យយើងឈឺចាប់ខ្លាំង ។ ប៉ុន្តែដោយការធ្វើតាមព្រះបញ្ញត្តិរបស់ព្រះអម្ចាស់ដើម្បីអភ័យទោស និងដោយការពឹងផ្អែកលើព្រះយេស៊ូវគ្រីស្ទ នោះយើងអាចរកឃើញភាពធូរស្រាលពីការឈឺចាប់ ហើយមានសេចក្តីសង្ឃឹមសម្រាប់អនាគត ។ ការអភ័យទោសឲ្យអ្នកដទៃក៏ជួយយើងអភិវឌ្ឍនូវគុណលក្ខណៈដូចជាព្រះគ្រីស្ទផងដែរ ដូច្នេះយើងបានរៀបចំខ្លួនឲ្យកាន់តែប្រសើរឡើងដើម្បីទទួលបានជីវិតដ៏អស់កល្បជានិច្ច និងរស់នៅជាមួយនឹងព្រះវរបិតាសួគ៌របស់យើងម្តងទៀត ។
តើការអភ័យទោសគឺជាអ្វី ?
ការទទួលបានការអភ័យទោសគឺជាការទទួលបានការលើកលែងទោសទាំងស្រុង—ចំពោះអំពើបាប និងកំហុសរបស់យើង—មិនថាធំ ឬតូចក្ដី ។ ការណ៍ទាំងអស់នេះអាចធ្វើទៅបាន ដោយសារដង្វាយធួនរបស់ព្រះយេស៊ូវគ្រីស្ទ ។ ដោយសារទ្រង់បានរងទុក្ខសម្រាប់អំពើបាបរបស់យើង នោះយើងអាចត្រូវបានសម្អាតម្តងទៀត នៅពេលយើងប្រែចិត្តដោយស្មោះ ហើយមានសេចក្តីជំនឿលើសមត្ថភាពរបស់ព្រះអង្គសង្គ្រោះក្នុងការព្យាបាលយើង ។ តាមរយៈសេចក្តីមេត្តាករុណារបស់ព្រះ យើងអាចមានអារម្មណ៍នៃភាពសុខសាន្ត កម្លាំង និងសេចក្តីអំណរពេលដែលយើងលះបង់ចោលអំពើបាបរបស់យើង ។ ព្រះអង្គសង្គ្រោះក៏បានបញ្ជាឲ្យយើងអភ័យទោសដល់អ្នកដទៃដូចដែលទ្រង់អភ័យទោសដល់យើងដែរ ។
ទិដ្ឋភាពទូទៅនៃប្រធានបទ ៖ ការអភ័យទោស
មគ្គទេសក៍សិក្សាដំណឹងល្អដែលជាប់ទាក់ទង ៖ សេចក្តីជំនឿលើព្រះយេស៊ូវគ្រីស្ទ, ការប្រែចិត្ត, ពិធីបុណ្យជ្រមុជទឹក, ការវិនិច្ឆ័យ, សេចក្តីសប្បុរស
ផ្នែកទី ១
ព្រះអម្ចាស់សន្យាប្រទានការអភ័យទោសនៅពេលដែលយើងប្រែចិត្តដោយស្មោះពីអំពើបាបរបស់យើង
ព្រះវរបិតាសួគ៌បានប្រទានឲ្យយើងនូវបទបញ្ញាតិ្តដើម្បីជួយយើងឲ្យដើរនៅលើផ្លូវនៃសេចក្តីសញ្ញា ហើយត្រឡប់ទៅរស់នៅជាមួយនឹងទ្រង់វិញម្តងទៀត ។ តាមរយៈអំណោយទាននៃសិទ្ធិជ្រើសរើស យើងជ្រើសរើសធ្វើតាមគំរូរបស់ព្រះអង្គសង្គ្រោះ និងរក្សាបទបញ្ញាតិ្តដូចដែលទ្រង់បានធ្វើ ។ ជាការពិតណាស់ យើងនឹងមិនល្អឥតខ្ចោះក្នុងការរក្សាបទបញ្ញាតិនោះទេ—យើងនឹងធ្វើកំហុសជាញឹកញាប់ ដោយសារការពុះពារផ្ទាល់ខ្លួនរបស់យើង ភាពទន់ខ្សោយ និងការល្បួងទាំងឡាយ ។ ប៉ុន្តែ នៅពេលយើងអនុវត្តសេចក្តីជំនឿរបស់យើងលើព្រះអង្គសង្គ្រោះ និងពលិកម្មដ៏ធួនរបស់ទ្រង់ នោះយើងអាចយកឈ្នះលើអំពើបាប និងការខ្វះខាតរបស់យើងបាន ។ យើងក៏អាចរកឃើញភាពសុខសាន្តក្នុងចំណេះដឹងដែលព្រះសន្យាថានឹងអភ័យទោសដល់អស់អ្នកដែលប្រែចិត្ត ហើយកាន់តាមព្រះបញ្ញត្តិ ( សូមមើល យ៉ូហានទី១ ១:៩; គោលលទ្ធិ និងសេចក្ដីសញ្ញា ១:៣១–៣២ ) ។
នៅពេលដែលយើងប្រែចិត្ត ហើយទទួលបុណ្យជ្រមុជទឹក និងពិធីបញ្ជាក់ នោះយើងទទួលបានការអភ័យទោសពីអំពើបាបរបស់យើង ហើយត្រូវបានប្រទានឲ្យនូវអំណោយទាននៃព្រះវិញ្ញាណបរិសុទ្ធ ( សូមមើល កិច្ចការ ២:៣៨ ) ។ រាល់ពេលដែលយើងចូលរួមពិធីសាក្រាម៉ង់ នោះយើងចុះសេចក្តីសញ្ញាជាមួយនឹងព្រះអម្ចាស់ ហើយអាចទទួលការអភ័យទោសពីអំពើបាបរបស់យើង តាមរយៈការថ្វាយដល់ព្រះអម្ចាស់នូវចិត្តសង្រេង និងវិញ្ញាណទន់ទាប ( សូមមើល មរ៉ូណៃ ៦:១–៤ ) ។
តាមរយៈដំណើរការនៃការប្រែចិត្ត នោះដួងចិត្តរបស់យើងបានផ្លាស់ប្តូរ ហើយយើងចង់ធ្វើអំពើល្អ និងបម្រើអ្នកដទៃ ( សូមមើល ម៉ូសាយ ៥:២; អាលម៉ា ៣៦:២៤ ) ។ យើងទទួលអារម្មណ៍នៃសេចក្ដីអំណរដោយសារតែសេចក្តីល្អសប្បុរសរបស់ព្រះ និងខិតខំដើម្បីទទួលនូវការផ្ដាច់បាបទាំងឡាយរបស់យើង ( សូមមើល ម៉ូសាយ ៤:១០–១២, ២៦ ) ។ ពេលដែលយើងប្រែចិត្តដោយស្មោះ ចុះ និងរក្សាសេចក្តីសញ្ញារបស់យើង ហើយស៊ូទ្រាំរហូតដល់ទីបញ្ចប់ នោះយើងក្លាយជាបរិសុទ្ធ និងស័ក្តិសមក្នុងការវិលត្រឡប់ទៅកាន់ទីវត្តមានរបស់ព្រះវរបិតាសួគ៌របស់យើងវិញ ( សូមមើល នីហ្វៃទី៣ ២៧:១៩–២២ ) ។
រឿងទាំងឡាយដែលត្រូវពិចារណា
-
ប្រជាជនរបស់ស្តេចបេនយ៉ាមីនបានពោរពេញទៅដោយសេចក្តីអំណរ និងភាពសុខសាន្តនៃសតិសម្បជញ្ញៈនៅពេលដែលពួកគេទទួលបានការអភ័យទោសពីអំពើបាបរបស់ពួកគេ ។ សូមអាន ម៉ូសាយ ៤:១–៣ ហើយពិចារណាពីរបៀបដែលការដាក់សេចក្តីជំនឿរបស់អ្នកនៅលើព្រះយេស៊ូវគ្រីស្ទ និងការពលិកម្មដ៏ធួនរបស់ទ្រង់អាចនាំមកនូវសេចក្តីអំណរ និងភាពសុខសាន្តដល់ជីវិតរបស់អ្នក ។ តើមានវិធីណាខ្លះដែលអ្នកអាចថ្វាយនូវឆន្ទៈរបស់អ្នកទៅកាន់ព្រះឲ្យបានពេញលេញបន្ថែមទៀត ពេលដែលអ្នកលះបង់ចោលអំពើបាបរបស់អ្នក ?
-
នៅពេលដែលអាលម៉ាជាកូនបានប្រែចិត្តជឿទៅលើដំណឹងល្អ នោះលោកលែងមានអារម្មណ៍ឈឺចាប់ដោយអំពើបាបមកពីអតីតរបស់លោកទៀតហើយ ( សូមមើល អាលម៉ា ៣៦:១២–១៤, ១៧–២៤ ) ។ សូមពិចារណាមើល វីដេអូនេះរបស់ប្រធាន រ័សុល អិម ណិលសុន ពន្យល់ពីអ្វីដែលជាការផ្លាស់ប្តូរដ៏ធំនៅក្នុងដួងចិត្ត និងរបៀបដែលយើងអាចពិតជាបានប្រែចិត្តជឿនៅលើដំណឹងល្អរបស់ព្រះយេស៊ូវគ្រីស្ទ ។ តើអ្នកកំពុងខិតខំប្រឹងប្រែងដើម្បីប្រែចិត្តជឿទៅលើព្រះអម្ចាស់ដោយរបៀបណា ? តើការប្រែចិត្តជឿរបស់អ្នកបានប្រទានពរដល់ជីវិតរបស់អ្នក និងជីវិតរបស់មនុស្សនៅជុំវិញអ្នកដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅពេលយើងស្វែងរកការអភ័យទោស យើងស្វែងរកឱកាសដើម្បីរីកចម្រើន—ព្រមទាំងការផ្លាស់ប្តូរ—តាមរយៈព្រះអង្គសង្គ្រោះរបស់យើង ព្រះយេស៊ូវគ្រីស្ទដែរ ។ សូមមើលវីដេអូ time-lapse អំពីដំណើររឿងមួយចំនួននៅក្នុងធម្មជាតិដែលឆ្លងកាត់ការផ្លាស់ប្តូរ ដូចជា ដង្កូវ បំប្លែងទៅជាមេអំបៅ ឬគ្រាប់ពូជបំប្លែងទៅជាផ្កា ។ ពិភាក្សាអំពីរបៀបដែលយើងមានសក្តានុពល ដើម្បីក្លាយជាអ្វីដែលស្រស់ស្អាតតាមរយៈព្រះយេស៊ូវគ្រីស្ទ និងដង្វាយធួនរបស់ទ្រង់ ។
-
ប្រធាន ណិលសុន បានបង្រៀនថា យើងទាំងអស់គ្នាត្រូវប្រែចិត្ត ហើយថា នៅពេលដែលយើងធ្វើដូច្នេះជារៀងរាល់ថ្ងៃ នោះយើងនឹងផ្លាស់ប្រែយើងទៅកំណែថ្មីដ៏ល្អបំផុតនៃខ្លួនយើង ។ សូមពិនិត្យមើលសុន្ទរកថារបស់លោកឡើងវិញ « We Can Do Better and Be Better » ហើយពិភាក្សាអំពីរបៀបដែលអ្នកអាចប្រែចិត្តជារៀងរាល់ថ្ងៃ ដើម្បីទទួលបានទស្សនៈថ្មីអំពីខ្លួនឯង ព្រះ និងពិភពលោក ( សូមមើលផងដែរ សេចក្ដីណែនាំដល់បទគម្ពីរទាំងឡាយ « ប្រែចិត្ត, ការប្រែចិត្ត » បណ្ណាល័យដំណឹងល្អ ) ។
ស្វែងយល់បន្ថែមទៀត
-
អេសាយ ១:១៨; ៥៥:៦–៧; អេសេគាល ១៨:២១–២២; អេណុស ១:៤–៨; ម៉ូសាយ ២៦:៣០; គោលលទ្ធិ និងសេចក្ដីសញ្ញា ៦១:២
-
ឌែល ជី រិនឡាន់ « Repentance: A Joyful Choice » Liahona ខែវិច្ឆិកា ឆ្នាំ២០១៦ ទំព័រ ១២១–១២៤
-
ក្រេហ្គ អេ ខារដុន « The Savior Wants to Forgive » Liahona ខែឧសភា ឆ្នាំ២០១៣ ទំព័រ ១៥–១៧
-
ខាំមៀល អិន ចនសុន « ព្រះយេស៊ូវគ្រីស្ទជាសេចក្ដីសង្គ្រោះ » លីអាហូណា ខែឧសភា ឆ្នាំ២០២៣ ទំព័រ ៨១–៨៣
ផ្នែកទី ២
ព្រះអម្ចាស់បានបញ្ជាយើងឲ្យអភ័យទោសដល់មនុស្សដទៃទៀត
នៅពេលដែលព្រះគ្រីស្ទនៅលើឈើឆ្កាង ទ្រង់បានទូលសុំព្រះបិតាដើម្បីអភ័យទោសដល់ទាហានដែលបានធ្វើខុសឆ្គងលើទ្រង់ ។ ទង្វើនៃសេចក្ដីស្រឡាញ់នេះជាគំរូដ៏ល្អឥតខ្ចោះនៃការអភ័យទោស ហើយរំឭកយើងឲ្យធ្វើការអភ័យទោសដូចជាទ្រង់បានធ្វើដែរ ។
ក្នុងអំឡុងពេលការបម្រើនៅលើផែនដីរបស់ទ្រង់ ព្រះអង្គសង្គ្រោះបានបង្រៀនយើងឲ្យស្រឡាញ់សត្រូវរបស់យើង ហើយ « ត្រូវប្រព្រឹត្តល្អនឹងអ្នកណាដែលស្អប់អ្នករាល់គ្នា ហើយត្រូវអធិស្ឋាន ឲ្យអ្នកណាដែលធ្វើទុក្ខបៀតបៀនដល់អ្នករាល់គ្នាវិញ » ( ម៉ាថាយ ៥:៤៤ ) ។ យើងប្រហែលជាមានអារម្មណ៍ថាវាមិនអាចទៅរួចទេក្នុងការអធិស្ឋានសម្រាប់អ្នកដែលបានធ្វើឲ្យយើងឈឺចាប់យ៉ាងខ្លាំងនោះ ប៉ុន្តែការធ្វើដូច្នេះបង្ហាញដល់ព្រះថាយើងកំពុងដាក់សេចក្តីជំនឿរបស់យើងលើទ្រង់ ។ ប្រធាន អិម រ័សុល បាឡឺដ បានបង្រៀនថា « ការអធិស្ឋានដោយស្មោះសម្រាប់អស់អ្នកដែលយើងអាចចាត់ទុកថាជាសត្រូវរបស់យើង បង្ហាញពីសេចក្តីជំនឿរបស់យើងថា ព្រះអាចផ្លាស់ប្ដូរដួងចិត្តរបស់យើង និងដួងចិត្តរបស់មនុស្សដទៃទៀតបាន » ។
នៅក្នុង គោលលទ្ធិ និងសេចក្តីសញ្ញា ៦៤:៨–១១ យើងរៀនថា ប្រសិនបើយើងជ្រើសរើសមិនអភ័យទោស នោះយើងមានកំហុសធំជាងមនុស្សដែលបានធ្វើខុសលើយើងទៅទៀត ។ ពេលយើងផ្តល់ការអភ័យទោសដល់មនុស្សគ្រប់រូប យើងមិនត្រឹមតែបង្ហាញព្រះថា យើងសុខចិត្តគោរពតាមព្រះបញ្ញត្តិរបស់ទ្រង់ប៉ុណ្ណោះទេ ប៉ុន្តែក៏ថាយើងទុកចិត្តទ្រង់ដើម្បីធ្វើអ្វីដែលល្អបំផុតសម្រាប់បុត្រាបុត្រីរបស់ទ្រង់ផងដែរ ។
រឿងទាំងឡាយដែលត្រូវពិចារណា
-
ដើម្បីគោរពដល់បុណ្យអ៊ីស្ទើរក្នុងឆ្នាំ២០២៣ ប្រធាន ណិលសុន បានអញ្ជើញមនុស្សទូទាំងពិភពលោកឲ្យទទួលបាននូវបទពិសោធន៍អព្ភូតហេតុនៃការអភ័យទោស ។ លោកបានមានប្រសាសន៍ថា « ខ្ញុំសន្យាថា ពេលអ្នកអភ័យទោសនោះព្រះអង្គសង្គ្រោះនឹងសម្រាលអ្នកពីកំហឹង ការអន់ចិត្ត និងការឈឺចាប់ ។ ម្ចាស់នៃមេត្រីភាពនឹងប្រទានឲ្យអ្នកនូវសេចក្តីសុខសាន្ត » ។ តើមានការខឹងសម្បារណាដែលអ្នកកំពុងរក្សាទុក ឬការឈឺចាប់ដែលអ្នកកំពុងមាន ដោយសារតែអ្នកមានការស្ទាក់ស្ទើរក្នុងការអភ័យទោសឲ្យនរណាម្នាក់ដែរឬទេ ? សូមពិចារណាតើមានជំហានអ្វីខ្លះដែលអ្នកអាចធ្វើបានដើម្បីឆ្ពោះទៅរកការអភ័យទោស ហើយជញ្ជឹងគិតពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទនឹងដឹកនាំអ្នក ។
-
ពេលដែលយើងអធិស្ឋានយ៉ាងខ្ជាប់ខ្ជួនសម្រាប់ជំនួយរបស់ទ្រង់ ព្រះអង្គសង្គ្រោះអាចប្រទានដល់យើងនូវកម្លាំងដែលយើងត្រូវការ ដើម្បីអភ័យទោសឲ្យអ្នកដទៃ ទោះបីជាវាហាក់ដូចជាមិនអាចទៅរួចក៏ដោយ ។ ប្រធាន ណិលសុន បានបង្រៀនថា ៖ « ព្រះអង្គសង្គ្រោះនឹងប្រទានដល់បងប្អូននូវលទ្ធភាពដើម្បីអភ័យទោសដល់មនុស្សគ្រប់គ្នាដែលធ្វើខុសចំពោះបងប្អូនក្នុងគ្រប់រូបភាព ។ បន្ទាប់មកទង្វើដ៏ឈឺចាប់របស់ពួកគេពុំអាចបំផ្លាញព្រលឹងរបស់បងប្អូនបានទៀតឡើយ » ។ ពិចារណាពីរបៀបដែលការអភ័យទោសគឺជាអំណោយទានរបស់ព្រះអង្គសង្គ្រោះដល់យើង និងរបៀបដែលទ្រង់ធ្វើឲ្យវាអាចធ្វើទៅបានសម្រាប់អ្នក ដើម្បីធ្វើការអភ័យទោស ទោះបីជាវាមានអារម្មណ៍ថាមិនអាចទៅរួចក៏ដោយ ។ តើការគិតថាការភ័យទោសគឺជាអំណោយទាន នាំមកនូវសេចក្តីសង្ឃឹមដល់អ្នកដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ពេលខ្លះវាតម្រូវឲ្យមានភាពក្លាហានច្រើន ដើម្បីធ្វើការអភ័យទោសដូចគ្នានឹងកាស្វែងរកការអភ័យទោសផងដែរ ។ ពិភាក្សាអំពីឧទាហរណ៍មួយចំនួនរបស់មនុស្សដែលបានធ្វើ់ការអភ័យទោសក្នុងកាលៈទេសៈដ៏លំបាកនានា ។ តើមានពរជ័យអ្វីខ្លះដែលកើតមាននៅពេលយើងអភ័យទោសឲ្យអ្នកដទៃ ? អញ្ជើញមនុស្សគ្រប់គ្នាឲ្យគិតពីនរណាម្នាក់ដែលបានធ្វើឲ្យពួកគេឈឺចាប់ ឬធ្វើឲ្យពួកគេខឹងតាមវិធីណាមួយ ហើយអធិស្ឋានសម្រាប់បុគ្គលនោះទៅតាមពេលវេលារបស់ពួកគេផ្ទាល់ ។ អ្នកក៏អាចស្នើឲ្យពួកគេព្យាយាមបម្រើបុគ្គលនោះប្រសិនបើវាសមស្របសម្រាប់ស្ថានភាពរបស់ពួកគេ ហើយអញ្ជើញពួកគេឲ្យមើលថា តើវាផ្លាស់ប្តូររបៀបដែលពួកគេមានអារម្មណ៍ចំពោះបុគ្គលនោះដែរឬទេ ។
-
នៅពេលដែលយើងស្នើសុំព្រះអង្គសង្គ្រោះដើម្បីពង្រឹងយើង តាមរយៈពលិកម្មដ៏ធួនរបស់ទ្រង់ យើងអាចទទួលបានសន្ទុះខាងវិញ្ញាណដែលយើងត្រូវការដើម្បីអភ័យទោសអ្នកដទៃ ។ បង្ហាញពីអ្វីដែលជាសន្ទុះ—ប្រហែលជាតាមរយៈការបង្ហាញវីដេអូអំពីរថភ្លើងដែលបង្កើនល្បឿន ឬអត្តពលិកដែលកំពុងធ្វើការសម្ដែងដ៏គួរឲ្យចាប់អារម្មណ៍ ។ សូមអានផ្នែកនៃសុន្ទរកថារបស់ប្រធាន ណិលសុន និងពិភាក្សាអំពីរបៀបដែលព្រះអង្គសង្គ្រោះអាចផ្តល់ព្រះចេស្តាដល់យើង ដើម្បីអភ័យទោសដល់អ្នកដែលបានធ្វើឲ្យយើងឈឺចាប់យ៉ាងខ្លាំង ពេលដែលយើងផ្តោតលើសន្ទុះខាងវិញ្ញាណរបស់យើង ។
ស្វែងយល់បន្ថែមទៀត
-
ម៉ាថាយ ១៨:២១–២២; អេភេសូ ៤:៣២; នីហ្វៃទី១ ៧:១៦–២១; ម៉ូសាយ ២៦:៣១; គោលលទ្ធិ និងសេចក្ដីសញ្ញា ៤២:៨៨
-
ជែហ្វ្រី អ័រ ហូឡិន « The Ministry of Reconciliation » Liahona ខែវិច្ឆិកា ឆ្នាំ២០១៨ ទំព័រ ៧៧–៧៩
-
« The Power of Forgiving » Teachings of Presidents of the Church: Joseph Smith ( ឆ្នាំ២០១១ ) ទំព័រ ៣៩១–៣៩៩
-
គ្រីស្ទីន អិម យី « ភួងលម្អជំនួសផេះ ៖ គន្លងព្យាបាលនៃការអភ័យទោស » លីអាហូណា ខែវិច្ឆិកា ឆ្នាំ២០២២ ទំព័រ ៣៦–៣៨
-
« ប្រធាន អុជដូហ្វ ៖ Forgiveness » ( វីដេអូ ) នៅលើគេហទំព័រ ChurchofJesusChrist.org