« សេចក្ដីសប្បុរស » ប្រធានបទ និង សំណួរ ( ឆ្នាំ២០២៣ )
មគ្គុទ្ទេសក៍សិក្សាដំណឹងល្អ
សេចក្ដីសប្បុរស
ការមានសេចក្តីស្រឡាញ់ដ៏សុទ្ធសាធនៃព្រះគ្រីស្ទ
យើងទាំងអស់គ្នាមានការតានតឹង ឬអន់ចិត្ដពេលខ្លះ—ក៏ប្រហែលញឹកញាប់ផងដែរ ។ ប្រហែលជាយើងមិនយល់ស្របនឹងអ្នកជិតខាង ឬមិត្តរួមការងារ ។ ឬ ពេលខ្លះយើងអាចនឹងគ្មានការអត់ធ្មត់ជាមួយកូនៗ ឬស្វាមី ឬភរិយារបស់យើង ។ យើងអាចមើលឃើញខ្លួនឯងជាអ្នករិះគន់ និងវិនិច្ឆ័យអ្នកដទៃ ។ ជាការពិតណាស់ គ្មាននរណាម្នាក់ល្អឥតខ្ចោះនោះទេ ហើយពេលខ្លះវាជារឿងធម្មតាទេ ក្នុងការមានអារម្មណ៍បែបនេះ ។ ប៉ុន្តែ តើអ្នកធ្លាប់ឆ្ងល់ទេថា តើអ្នកអាចមានសេចក្តីស្រឡាញ់ និងការអត់ធ្មត់ច្រើនជាងមុនចំពោះមនុស្សជុំវិញអ្នកដោយរបៀបណា ?
ចម្លើយគឺសាមញ្ញ ៖ ដួងចិត្ដរបស់អ្នកអាចត្រូវបានបន្ទន់តាមរយៈសេចក្ដីសប្បុរស ដែលជាអំណោយទានមកពីព្រះ ។ ការអភិវឌ្ឍសេចក្ដីសប្បុរសគឺជាការក្លាយដូចជាព្រះយេស៊ូវគ្រីស្ទ ហើយនោះគឺជាការខិតខំប្រឹងប្រែងពេញមួយជីវិត ។ ប៉ុន្តែ ព្រះវរបិតាសួគ៌ និងព្រះអង្គសង្គ្រោះរបស់អ្នកគឺព្រះយេស៊ូវគ្រីស្ទ នឹងជួយអ្នកនៅពេលដែលអ្នកស្វែងរកដោយស្មោះត្រង់ ដើម្បីក្លាយកាន់តែដូចជាទ្រង់ទាំងទ្វេ ។
តើសេចក្ដីសប្បុរសគឺជាអ្វី ?
សេចក្តីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ ( សូមមើល មរ៉ូណៃ ៧:៤៧ ) ។ វាគឺជាទម្រង់នៃសេចក្តីស្រឡាញ់ដ៏ខ្ពស់ និងខ្លាំងក្លាបំផុត ។ សេចក្តីសប្បុរសជំរុញឲ្យយើងបម្រើព្រះ និងអ្នកដទៃទៀតដោយអស់ពីចិត្ត អស់ពីពលំ អស់ពីគំនិត និងអស់ពីកម្លាំងរបស់យើង ( សូមមើល គោលលទ្ធិ និងសេចក្ដីសញ្ញា ៥៩:៥ ) ។
ទិដ្ឋភាពទូទៅនៃប្រធានបទ ៖ សេចក្ដីសប្បុរស
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ព្រះយេស៊ូវគ្រីស្ទ សេចក្តីជំនឿ សេចក្តីសង្ឃឹម អំណោយទាននៃព្រះវិញ្ញាណ ការបម្រើ
ផ្នែកទី ១
សេចក្ដីសប្បុរសគឺជាសេចក្តីស្រឡាញ់ដ៏សុទ្ធសាធរបស់ព្រះវរបិតាសួគ៌ និងព្រះយេស៊ូវគ្រីស្ទដល់មនុស្សទាំងអស់
ព្រះវរបិតាសួគ៌ និងព្រះយេស៊ូវគ្រីស្ទស្រឡាញ់យើងយ៉ាងឥតខ្ចោះ ។ ព្យាការីមរមនបានបង្រៀនថា « សេចក្តីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ » ( មរ៉ូណៃ ៧:៤៧ ) ។ ក្នុងអំឡុងព្រះជន្មរបស់ទ្រង់ ព្រះយេស៊ូវគ្រីស្ទបានបង្ហាញសេចក្តីស្រឡាញ់ និងការអាណិតអាសូរចំពោះអ្នកស្រេកឃ្លាន អ្នកមានបាប អ្នករងទុក្ខ និងអ្នកឈឺ ។ ទ្រង់បានផ្ដល់ការងារបម្រើដល់អ្នកក្រនិងអ្នកមាន ដល់មិត្តភក្តិនិងមនុស្សប្លែកមុខ ។ ទ្រង់ថែមទាំងអភ័យទោសដល់អស់អ្នកដែលចោទទ្រង់ និងអស់អ្នកដែលឆ្កាងទ្រង់ទៀតផង ( សូមមើល លូកា ២៣:៣៤ ) ។ ព្រះយេស៊ូវគ្រីស្ទគឺជាគំរូដ៏ល្អឥតខ្ចោះនៃសេចក្ដីស្រឡាញ់ដ៏ឥតខ្ចោះ ។
រឿងទាំងឡាយដែលត្រូវពិចារណា
-
សេចក្តីស្រឡាញ់ដ៏ឥតខ្ចោះរបស់ព្រះយេស៊ូវគ្រីស្ទបានជះឥទ្ធិពលដល់សកម្មភាពនីមួយៗរបស់ទ្រង់ ។ សូមពិចារណាគំរូទាំងនេះ ៖ ម៉ាថាយ ២៦:៣៩ លូកា ៧:២២ នីហ្វៃទី១ ១៩:៩ ។ តើវគ្គបទគម្ពីរនីមួយៗបង្ហាញពីសេចក្តីស្រឡាញ់របស់ព្រះគ្រីស្ទចំពោះយើងដោយរបៀបណា ? អ្នកអាចប្រៀបធៀបគំរូនៃសេចក្តីស្រឡាញ់ទាំងនេះរបស់ព្រះអង្គសង្គ្រោះ ជាមួយនឹងការពិពណ៌នារបស់ប៉ុលអំពីសេចក្ដីសប្បុរសនៅក្នុង កូរិនថូស ទី១ ១៣ ។ តើព្រះអង្គសង្គ្រោះបានបង្ហាញសេចក្តីស្រឡាញ់បែបនេះមកកាន់អ្នកដោយរបៀបណា ?
-
ព្យាការី យ៉ូសែប ស្ម៊ីធ បានបង្រៀនថា « សេចក្តីស្រឡាញ់គឺជាលក្ខណៈពិសេសដ៏ចម្បងមួយរបស់ព្រះ » ។ សូមពិចារណាសរសេរនៅក្នុងសៀវភៅកំណត់ហេតុរបស់អ្នកនូវពាក្យ ខ្ញុំដឹងថាព្រះស្រឡាញ់ខ្ញុំដោយសារតែ … ពេញមួយសប្តាហ៍ សូមសរសេរអំពីវិធីដែលអ្នកនឹងបំពេញប្រយោគនេះ ។ អ្នកអាចអាន ឬស្តាប់បទចម្រៀងដូចជា « ក្ដីស្រឡាញ់នៃព្រះ » ឬ « ព្រះវរបិតាស្រឡាញ់ខ្ញុំ » សម្រាប់ជាគំនិត ។
សកម្មភាពសម្រាប់ការរៀនជាមួយគ្នា
-
សូមពិចារណាការបង្រៀននេះដោយ អែលឌើរ ជែហ្វ្រី អ័រ ហូឡិន « បទបញ្ញត្តិ ដ៏ធំបំផុតទីមួយនៃអស់ទាំងភាពអស់កល្បជានិច្ច គឺការស្រឡាញ់ព្រះឲ្យអស់ពីចិត្ត អស់ពីពលំ អស់ពីគំនិត ហើយអស់ពីកម្លាំងរបស់យើង នោះជាបទបញ្ញត្តិដ៏ធំបំផុតទីមួយ ។ ប៉ុន្តែ សេចក្ដីពិត ដ៏ធំបំផុតដំបូងគេនៃអស់ទាំងភាពអស់កល្បជានិច្ចនោះគឺថា ព្រះស្រឡាញ់ យើង អស់ពីព្រះទ័យ ព្រះកាយ ព្រះបញ្ញាញាណ និងព្រះចេស្ដា របស់ទ្រង់ » ។ សូមពិភាក្សាអំពីរបៀបដែលការដឹងពីសេចក្តីស្រឡាញ់ដ៏អស្ចារ្យរបស់ព្រះសម្រាប់អ្នក អាចផ្លាស់ប្តូររបៀបដែលអ្នកមានអារម្មណ៍ គិត និងធ្វើសកម្មភាព។
-
ការមើលវីដេអូ « Charity: An Example of the Believers » ( ៤:៥០ នាទី ) អាចបំផុសគំនិតដល់ការពិភាក្សាអំពីរបៀបដែលសេចក្តីស្រឡាញ់ដូចព្រះគ្រីស្ទផ្លាស់ប្តូរជីវិត ។ តើយុវនារីនៅក្នុងវីដេអូនេះបានបង្ហាញសេចក្តីស្រឡាញ់ដូចព្រះគ្រីស្ទដល់អ្នកលើកទឹកចិត្ដថ្មីដោយរបៀបណា ? តើសេចក្ដីស្រឡាញ់នេះបានជះឥទ្ធិពលដល់នាងយ៉ាងដូចម្ដេច ? តើវាបានជះឥទ្ធិពលដល់យុវនារីផ្សេងទៀតយ៉ាងដូចម្ដេចដែរ ? សូមគិតពីមនុស្សនៅជុំវិញអ្នកដែលអាចត្រូវការទទួលអារម្មណ៍នៃសេចក្តីស្រឡាញ់របស់ព្រះអង្គសង្គ្រោះ ។ សូមនិយាយអំពីវិធីដែលអ្នកអាចចែកចាយសេចក្តីស្រឡាញ់របស់ព្រះគ្រីស្ទជាមួយម្នាក់ ឬពីរនាក់ ។
ស្វែងយល់បន្ថែមទៀត
-
លូកា ១០:៣០–៣៧; យ៉ូហាន ទី១ ៣:១៦–១៨; ៤:៧–១១, ១៨–១៩
-
អាឡាន ធី ភីលីព « ព្រះស្គាល់ ហើយស្រឡាញ់បងប្អូន »លីអាហូណា ខែវិច្ឆិកា ឆ្នាំ២០២៣ ទំព័រ ៤៩–៥២
-
ម៉ៃឃែល ធី រីងវូដ « ដ្បិតព្រះទ្រង់ស្រឡាញ់យើងដល់ម៉្លេះ » លីអាហូណា ខែឧសភា ឆ្នាំ២០២២ ទំព័រ ៨៨–៩០
-
ស៊ូសាន អេច ផតធ័រ « សេចក្តីស្រឡាញ់នៃព្រះ ៖ សេចក្ដីរីករាយបំផុតដល់ព្រលឹង » លីអាហូណា ខែវិច្ឆិកា ឆ្នាំ២០២១ ទំព័រ ៣៣–៣៥
ផ្នែកទី ២
សេចក្ដីសប្បុរសគឺជាគុណធម៌ដ៏មហិមាបំផុតដែលអ្នកដើរតាមព្រះយេស៊ូវគ្រីស្ទអាចទទួលបាន
សេចក្ដីសប្បុរសមិនមែនជាអ្វីដែលយើងធ្វើ ឬអ្វីដែលយើងផ្តល់ឲ្យនោះទេ ។ វាជាស្ថានភាពនៃចិត្តរបស់យើង និងរបៀបដែលយើងរស់នៅ ។ វាគឺជាអ្វីដែលយើងក្លាយទៅជា និងជាអ្វីដែលយើងទទួលអារម្មណ៍ ហើយវានាំយើងឲ្យធ្វើសកម្មភាពដោយសេចក្តីស្រឡាញ់ ( សូមមើល មរ៉ូណៃ ៧:៤៥–៤៧ ) ។
បើគ្មានសេចក្ដីសប្បុរសទេ យើងគ្មានជាអ្វីទាំងអស់ ហើយបើមានវា នោះយើងនឹងមាននូវគ្រប់របស់ទាំងអស់ ( សូមមើល អេធើរ ១២:៣៤; មរ៉ូណៃ ៧:៤៤ ) ។ អ្វីផ្សេងទៀតនឹងត្រូវខូចបង់ ប៉ុន្ដែសេចក្ដីសប្បុរសស្ថិតស្ថេរនៅជានិច្ច និងពុំបាត់បង់ទៅឡើយ ( សូមមើល មរ៉ូណៃ ៧:៤៦–៤៧ ) ។ ដូច្នេះតើយើងទទួលបានអំណោយទាននេះយ៉ាងដូចម្ដេច ? ព្យាការីមរមនបានមានប្រសាសន៍ថា « ចូរអធិស្ឋានដល់ព្រះវរបិតាដោយអស់ពីកម្លាំងចិត្ដ ដើម្បីឲ្យអ្នករាល់គ្នាបានពោរពេញដោយសេចក្ដីស្រឡាញ់នេះ … ដើម្បីកាលណា [ ព្រះយេស៊ូវគ្រីស្ទ ] នឹងលេចមក នោះយើងរាល់គ្នានឹងបានដូចជាទ្រង់ » ( មរ៉ូណៃ ៧:៤៨ ) ។
យើងរៀនអនុវត្តសេចក្ដីសប្បុរសនេះនៅក្នុងទំនាក់ទំនងរបស់យើង—នៅក្នុងក្រុមគ្រួសាររបស់យើង នៅក្នុងសាសនាចក្ររបស់យើង នៅក្នុងសហគមន៍របស់យើង និងជាមួយមនុស្សគ្រប់គ្នាដែលយើងជួប ។ នៅពេលយើងខិតខំទទួលយកអ្នកដទៃក្នុងនាមជាខ្លួនពួកគេ ហើយមើលឃើញពួកគេដូចដែលព្រះវរបិតាសួគ៌ និងព្រះយេស៊ូវគ្រីទតឃើញ នោះយើងអាចចាប់ផ្តើមស្រឡាញ់មនុស្សដូចដែលទ្រង់ទាំងទ្វេធ្វើបានហើយ ។
រឿងទាំងឡាយដែលត្រូវពិចារណា
-
សូមអាន កូរិនថូស ទី១ ១៣:១–៧ ដោយស្រមៃមើលខ្លួនឯងនៅក្នុងខគម្ពីរទាំងនេះ ។ បន្ទាប់មកសូមអាន ខទី ៨ ។ តើ « សេចក្ដីសប្បុរសនឹងពុំបាត់បង់ទៅឡើយ » មានន័យយ៉ាងណាចំពោះអ្នក ? សូមពិចារណាថា តើមានគុណលក្ខណៈណាខ្លះដែលបានរាយនៅក្នុង ខ ៤–៧ ដែលអ្នកអាចធ្វើបាន ដើម្បីជួយអ្នកឲ្យក្លាយជាគំរូល្អនៃសេចក្ដីសប្បុរសឬទេ ។
-
ខណៈដែលសេចក្ដីសប្បុរសគឺជាអំណោយទានមកពីព្រះ ដូចអំណោយទានផ្សេងទៀតដែរ គឺយើងត្រូវទទួលអំណោយទាននេះ ។ តើអ្នកបានរៀនអ្វីខ្លះមកពី មរ៉ូណៃ ៧:៤៨; ៨:២៦ អំពីរបៀបដើម្បីទទួលបានអំណោយទាននៃសេចក្ដីសប្បុរស ?
-
ប្រធាន រ័សុល អិម ណិលសុន បានបង្រៀនអំពីសេចក្ដីពិតសំខាន់ៗទាំងនេះអំពីសេចក្ដីសប្បុរស ៖ « សេចក្ដីសប្បុរសគឺជាថ្នាំបន្សាបដល់ការទាស់ទែងគ្នា ។ សេចក្ដីសប្បុរសគឺជាអំណោយទានខាងវិញ្ញាណ ដែលជួយយើងឲ្យសម្រាតចោលនូវភាពជាមនុស្សខាងសាច់ឈាម ដែលអាត្មានិយម ការពារខ្លួនឯង ឆ្មើងឆ្មៃ និងច្រណែនឈ្នានីស ។ សេចក្ដីសប្បុរសគឺជាចរិតលក្ខណៈដ៏សំខាន់របស់អ្នកដើរតាមដ៏ពិតរបស់ព្រះយេស៊ូវគ្រីស្ទ ។ សេចក្ដីសប្បុរសមានន័យថាអ្នកផ្សះផ្សាគេ » ។ កាលអ្នកជញ្ជឹងគិតពីប្រសាសន៍របស់ប្រធាន ណិលសុន តើព្រះវិញ្ញាណបំផុសគំនិតអ្នកឲ្យធ្វើអ្វី ? សូមពិចារណាដាក់សេចក្ដីថ្លែងការណ៍របស់ប្រធាន ណិលសុននៅកន្លែងណាមួយដែលអ្នកនឹងមើលឃើញជាញឺកញាប់ ដើម្បីទុកជាការរំឭកដល់ការបង្ហាញសេចក្ដីសប្បុរសចំពោះមនុស្សដទៃ ។
សកម្មភាពសម្រាប់ការរៀនសូត្រជាមួយអ្នកដទៃ
-
តើអ្នកកំណត់អត្ដសញ្ញាណអ្នកដើរតាមព្រះយេស៊ូវគ្រីស្ទបានយ៉ាងដូចម្ដេច ? ព្រះអង្គសង្គ្រោះបានបង្រៀនថា « គេនឹងដឹងថាអ្នករាល់គ្នាជាសិស្សរបស់ខ្ញុំ ដោយសារសេចក្ដីនេះឯង គឺដោយអ្នករាល់គ្នាមានសេចក្ដីស្រឡាញ់ដល់គ្នាទៅវិញទៅមក » ( យ៉ូហាន ១៣:៣៥ ) ។ ជាក្រុម សូមគិតអំពីមនុស្សដែលអ្នកស្ងើចសរសើរ ដែលជាគំរូដ៏ពិតនៃសេចក្ដីសប្បុរស ។ តើអ្នកបានមើលឃើញពួកគេបង្ហាញសេចក្តីស្រឡាញ់ដ៏សុទ្ធសាធរបស់ព្រះគ្រីស្ទដោយរបៀបណា ? សូមពិចារណាផ្ញើសារ ឬសរសេរសំបុត្រខ្លីមួយទៅនរណាម្នាក់ក្នុងចំណោមមនុស្សទាំងនេះ ហើយចែកចាយអ្វីដែលអ្នកស្ងើចសរសើរអំពីគាត់ ។
-
សូមនិយាយអំពីជម្រើសសំខាន់ៗមួយចំនួនដែលអ្នកធ្វើជារៀងរាល់ថ្ងៃ ។ បន្ទាប់មកសូមអាន « ស្រឡាញ់ព្រះ និងស្រឡាញ់អ្នកជិតខាងរបស់អ្នក » នៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( [ ឆ្នាំ២០២២ ] ទំព័រ ១០–១៥ ) ។ សូមពិភាក្សាអំពីរបៀបដែលអំណោយទាននៃសេចក្ដីសប្បុរសអាចជាការនាំផ្លូវ កាលអ្នកធ្វើជម្រើសនីមួយៗទាំងនោះ ។
-
សូមពិចារណាការទូន្មាននេះដោយ ប្រធាន ឌៀរថើរ អេហ្វ អុជដុហ្វ « ទោះជាបញ្ហាណាក៏ដោយដែល [ អ្នក ] ឬគ្រួសារអ្នកជួបប្រទះ ទោះជាអ្វីក៏ដោយដែលអ្នកត្រូវធ្វើដើម្បីដោះស្រាយ នោះការចាប់ផ្ដើម និងទីបញ្ចប់នៃដំណោះស្រាយនេះគឺសេចក្ដីសប្បុរស ដែលជាសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទ » ។ សូមធ្វើការជាមួយគ្នាដើម្បីធ្វើបញ្ជីមួយអំពីបញ្ហា ឬការប្រឈមមួយចំនួនដែលបុគ្គល ឬក្រុមគ្រួសារជួបប្រទះសព្វថ្ងៃនេះ ដូចជាការទាស់ទែង ឬការច្រណែនគ្នាជាដើម ។ បន្ទាប់មកអ្នកអាចអាន មរ៉ូណៃ ៧:៤៥ ហើយនិយាយអំពីរបៀបដែលគុណលក្ខណៈនៃសេចក្ដីសប្បុរស ដែលបានរៀបរាប់នៅក្នុងខគម្ពីរនេះអាចជួយដោះស្រាយបញ្ហានៅក្នុងបញ្ជីរបស់អ្នក ។ បន្ទាប់មកអ្នកអាចធ្វើផែនការសាមញ្ញមួយ ដើម្បីអនុវត្តសេចក្ដីសប្បុរសដើម្បីដោះស្រាយបញ្ហាមួយក្នុងចំណោមបញ្ហាទាំងនោះ ។ សូមរួមបញ្ចូលព្រះនៅក្នុងផែនការរបស់អ្នក និងស្វែងរកជំនួយពីមនុស្សដទៃតាមដែលសមស្រប ។
ស្វែងយល់បន្ថែមទៀត
-
រ័សុល អិម ណិលសុន « ត្រូវការអ្នកដែលផ្សះផ្សាគេ » លីអាហូណា ខែឧសភា ឆ្នាំ២០២៣ ទំព័រ ៩៨–១០១
-
អូលីសេស សូរ៉េស « អ្នកដើរតាមម្ចាស់នៃមេត្រីភាព » លីអាហូណា ខែឧសភា ឆ្នាំ២០២៣ ទំព័រ ៨៥–៨៧
-
ជេ អាណែត ដេននីស « នឹមរបស់ទ្រង់ងាយ ហើយបន្ទុករបស់ទ្រង់ក៏ស្រាល » លីអាហូណា ខែវិច្ឆិកា ឆ្នាំ២០២២ ទំព័រ ៨០–៨២
-
ម៉ាវីន ជេ អាស្តុន « The Tongue Can Be a Sharp Sword » Ensign ខែឧសភា ឆ្នាំ១៩៩២ ទំព័រ ១៨–២០
-
« Charity, the Pure Love of Christ » Teachings of Presidents of the Church: Joseph Smith ( ឆ្នាំ២០១១ ) ទំព័រ ៤២៣–៤៣៣