Peshkopata

Peshkopi është udhëheqësi kryesor shpirtëror i lagjes. Ai jep shembull duke shërbyer “me shenjtëri zemre” (Mosia 18:12). Ai jep mësim, ngre shpirtërisht dhe frymëzon (shihni te Mateu 20:28). Ai ndjek parimet e udhëheqjes te Doktrina e Besëlidhje 121:34–46.

Një peshkop është një dishepull besnik i Jezu Krishtit. Ai është i vërtetë ndaj besëlidhjeve të tij. Ai është besnik ndaj bashkëshortes dhe familjes së tij. Ai jep një shembull drejtësie për familjen, lagjen dhe komunitetin e tij. (Shihni te 1 Timoteut 3:2–7.) Këshilltarët e tij janë burra me karakter të ngjashëm.

Peshkopi u jep udhëzime dhe këshilla udhëheqësve të tjerë në lagje. Ai i inkurajon ata për përgjegjësitë e tyre.

“Peshkop[ata] është presidencia e … priftëri[së] [Aarone] dhe mban çelësat ose autoritetin e saj” (Doktrina e Besëlidhje 107:15; shihni edhe vargun 20). Peshkopi ka përgjegjësitë vijuese si president i Priftërisë Aarone në lagje. Këshilltarët e tij e ndihmojnë.

• Të ndihmojë prindërit që t’u japin mësim të rinjve e të rejave. T’i ndihmojë të rinjtë e të rejat që të shërbejnë me besnikëri, të bëjnë dhe të mbajnë besëlidhjet e shenjta dhe të përgatiten për të marrë ordinancat e tempullit. T’i ndihmojë të rinjtë që të përgatiten për t’u shuguruar në detyrat e priftërisë dhe për të shërbyer në misione kohëplota. Nëse të rejat dëshirojnë të shërbejnë në misione kohëplota, ndihmojini që të përgatiten. Programi Fëmijët dhe Rinia mund të ndihmojë në këto përpjekje (shihni te ChildrenandYouth.ChurchofJesusChrist.org).

• Të mbikëqyrë kuorumet e Priftërisë Aarone dhe klasat e Të Rejave. Peshkopi është presidenti i kuorumit të priftërinjve (shihni te Doktrina e Besëlidhje 107:87–88). Këshilltari i tij i parë ka përgjegjësi për kuorumin e mësuesve. Këshilltari i tij i dytë ka përgjegjësi për kuorumin e dhjakëve. Për më shumë informacion rreth udhëheqjes së kuorumit të Priftërisë Aarone, shihni te 10.3, 10.4 dhe 10.5.

• Të këshillohet me presidenten e Të Rejave të lagjes. Peshkopi nuk ia delegon këtë detyrë një këshilltari. Ai dhe këshilltarët e tij marrin pjesë rregullisht edhe në mbledhjet, shërbimin dhe aktivitetet e Të Rejave. (Shihni te 11.3.1.)

• Të takohet rregullisht me çdo të ri e të re. Për orientime rreth këtyre mbledhjeve, shihni te 31.3.1.

• Të përkrahë familjet dhe udhëheqëset dhe mësuesit/et e Fillores në përpjekjet e tyre për t’i ndihmuar fëmijët që të bëjnë e të mbajnë besëlidhjet (shihni te kapitulli 12).

Peshkopi është gjykatësi i përbashkët në lagje (shihni te Doktrina e Besëlidhje 107:71–74). Ai përpiqet fort të ndjekë shembullin e Shpëtimtarit si një gjykatës i drejtë (shihni tek 3 Nefi 27:27). Ai ka përgjegjësitë vijuese:

• Të ndihmojë të rinjtë e të rejat që të kualifikohen dhe të jenë të denjë për një rekomandim tempulli.

• Të zhvillojë intervista siç përvijohet te 31.2. Ai mund të autorizojë këshilltarët e tij që të zhvillojnë intervista të caktuara (shihni te 31.2.2). Për orientime, shihni te 31.1.

• Të takohet me anëtarët e lagjes që kërkojnë udhërrëfim shpirtëror, të cilët kanë probleme serioze vetjake ose që kanë kryer mëkate të rënda, duke i ndihmuar që të mbështeten te fuqia shëruese e Jezu Krishtit. Peshkopi mund t’u kërkojë këshilltarëve të tij, presidentit të kuorumit të pleqve, presidentes së Shoqatës së Ndihmës dhe të tjerëve që të takohen me anëtarë të lagjes për disa çështje. Megjithatë, vetëm peshkopi takohet me anëtarët e lagjes lidhur me çështje denjësie, keqtrajtimi dhe miratimi për përdorimin e fondeve të ofertave të agjërimit. Për orientime, shihni te 31.1.

• Nën drejtimin e presidentit të kunjit, të zhvillojë këshillat e anëtarësisë sipas nevojës. Për orientime, shihni te kapitulli 32.

Peshkopi bashkërendon veprën e Perëndisë për shpëtimin dhe ekzaltimin në lagje (shihni te kapitulli 1). Këshilltarët e tij dhe udhëheqës të tjerë të lagjes e ndihmojnë atë.

Peshkopi i ndihmon anëtarët që ta jetojnë ungjillin. Ai i ndihmon që ta forcojnë besimin e tyre tek Ati Qiellor, te Jezu Krishti dhe Shlyerja e Tij (shihni te Doktrina e Besëlidhje 20:29). Ai u mëson atyre të luten dhe t’i studiojnë shkrimet e shenjta. Ai i fton të bëjnë besëlidhje duke marrë ordinancat për shpëtimin dhe ekzaltimin. Ai i inkurajon që të bëjnë besëlidhjet e tyre.

Peshkopi i forcon anëtarët e Kishës. Ai i inkurajon familjet që të marrin pjesë në lutje të rregullta familjare dhe ta mësojnë ungjillin së bashku, përfshirë edhe në mbrëmjet e shtëpisë. Ai i mëson që ta duan njëri‑tjetrin dhe t’i shërbejnë njëri‑tjetrit. Ai jep mësim me anë të fjalëve dhe shembullit se thirrjet e Kishës mund të përmbushen pa i shmangur përgjegjësitë familjare. Ai siguron që aktivitetet e Kishës i përkrahin përpjekjet e prindërve për t’i rritur fëmijët e tyre në drejtësi.

Përveçse të ndihmojë anëtarët që ta jetojnë ungjillin, peshkopi ka përgjegjësi të tjera në bashkërendimin e veprës së Perëndisë për shpëtimin dhe ekzaltimin. Për shembull, ai:

• Ndihmon burrat të shugurohen në detyrat e priftërisë.

• Udhëheq përpjekjet për përkujdesjen ndaj njerëzve nevojtarë në lagje (shihni te 7.1.4.1 dhe 22.2.1).

• Udhëzon presidencat e kuorumit të pleqve dhe të Shoqatës së Ndihmës teksa i udhëheqin përpjekjet për dhënien e shërbesës në lagje (shihni te 21.2.1).

• Bashkërendon punën e presidencave të kuorumit të pleqve dhe të Shoqatës së Ndihmës teksa udhëheqin përpjekjet e lagjes për të shpërndarë ungjillin dhe forcuar anëtarët e rinj dhe anëtarët që po kthehen në aktivitet (shihni te 23.1).

• Bashkërendon përpjekjet e presidencave të kuorumeve të pleqve dhe të Shoqatave të Ndihmës teksa udhëheqin përpjekjet e lagjes për punën në tempull dhe për historinë familjare (shihni te 25.2.5).

• Ndihmon anëtarët të përgatiten për të marrë një rekomandim tempulli dhe ordinanca në tempull (shihni te 27.1).

Peshkopi mbikëqyr dokumentet e lagjes, financat e lagjes dhe shtëpinë e mbledhjeve. Kjo përfshin përgjegjësinë e tij për të dhënë mësim për të dhjetën dhe ligjin e agjërimit dhe për të kryer deklarimin e së dhjetës (shihni te 34.3.1.2; shihni edhe te Doktrina e Besëlidhje 107:68).

Peshkopi mund t’ua caktojë shumicën e punës me dokumentet dhe financat këshilltarëve dhe nëpunësve të tij. Ai mund të caktojë njërin nga këshilltarët e tij që të shërbejë si përfaqësuesi i lagjes për ndërtesën ose mund të thërrasë një anëtar tjetër për ta bërë këtë.

Për informacion rreth dokumenteve, shihni te kapitulli 33. Për informacion rreth financave, përfshirë të dhjetën, shihni te kapitulli 34. Për informacion rreth shtëpive të mbledhjeve, shihni te kapitulli 35.