« 34. Te mau faufa’a ’e te mau hi’opo’ara’a », Buka arata’i : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei (2020).
« 34. Te mau faufa’a ’e te mau hi’opo’ara’a », Buka arata’i rahi.
34.
Te mau faufa’a ’e te mau hi’opo’ara’a
34.0
Parau ’ōmuara’a
E fa’ati’a te mau tuha’a ’ahuru ’e te mau ō i te ’Ēkālesia ’ia rave tāmau i te ’ohipa nō te fa’aorara’a ’e te fa’ateiteira’a a te Fatu (hi’o 1.2). E mea mo’a teie mau faufa’a. Tē fa’ata’a nei te reira i te tusia ’e te fa’aro’o o te mau melo o te ’Ēkālesia (hi’o Mareko 12:41–44).
Teie te tahi o te mau fa’a’ohipara’a o te mau tuha’a ’ahuru ’e te mau ō nō te pāturu i te ’ohipa a te Fatu :
-
Te patura’a ’e te ’atu’atura’a i te mau hiero, te mau fare purera’a ’e te tahi atu mau fare a te ’Ēkālesia.
-
Te turura’a i te mau ’ātivite ’e te mau ’ohipa a te ’Ēkālesia ’e tōna mau ’āmuira’a o te fenua.
-
Te fa’a’itera’a i te ’evanelia nā te ao ato’a nei.
-
Te pāturura’a i te mau fa’anahora’a a te ’Ēkālesia, mai te ha’api’ira’a ’e te ’ā’amu ’utuāfare.
-
Te hōro’ara’a i te mā’a, te vāhi fa’aeara’a ’e te tahi atu ā mau mea e hīna’arohia e te feiā i roto i te hepohepo.
Tei te mau peresideni titi ’e te mau ’episekōpo te fa’ahepora’a mo’a ’ia hi’opo’a i te faufa’a a te ’Ēkālesia (hi’o Te Ha’api’ira’a Tumu ’e te mau Fafaura’a 72:9–10). ’Eiaha teie faufa’a ’ia fa’a’ohipa-noa-hia e te mau melo tei fa’ati’a nō te mau ’ōpuara’a i fa’ati’ahia e te ’Ēkālesia. E ti’a te reira ’ia tāputa-māite-hia ’e ’ia pāruruhia.
34.1
Te fa’aterera’a i te faufa’a a te titi
34.1.1
Peresidenira’a titi
Teie i muri nei te mau hōpoi’a a te peresideni titi nō te ’ a te titi. E hōro’a ’oia i te tahi o teie ’ohipa i tōna nā tauturu ’e i tōna mau pāpa’i parau.
Te peresideni titi :
-
E ha’api’i ’e e fa’auru i te mau melo ’ia ’aufau i te hō’ē tuha’a ’ahuru ti’a ’e ’ia hōro’a ma te pipiri ’ore i te mau ō (hi’o 34.3).
-
E ara ’ia fa’atere-ti’a-hia te faufa’a a te titi ’e ’ia tāputa-maita’i-hia te reira (hi’o 34.5).
-
E hi’opo’a i te tāpura moni i te mau ’āva’e ato’a ’e e ara ē ’ua fa’a’āfaro-oi’oi-hia te mau fifi.
-
E ara ē, ’ua ’apo mai te mau ’episekōpora’a, te feiā fa’atere o te mau pupu tauturu ’e te mau pāpa’i parau i tā rātou hōpoi’a i te pae nō te faufa’a mo’a a te ’Ēkālesia.
-
E fa’aineine ’e e fa’atere i te tāpura faufa’a matahiti a te titi (hi’o 34.6).
-
E ara ē, ’ua pe’e-māite-hia te mau arata’ira’a nō ni’a i te faufa’a i fa’ata’ahia a te titi (hi’o 34.6.2).
-
E fārerei tāmau i te ’episekōpo tāta’itahi nō te ’āparau nō ni’a i te faufa’a a te pāroita.
-
E hi’opo’a ē, tē rave nei te pāroita tāta’itahi i te fa’a’āfarora’a i te tuha’a ’ahuru i te mau matahiti ato’a.
-
’E ara ē, e’ita roa atu te mau ta’o huna nō te tomo i roto i te fa’anahora’a rorouira i te pae faufa’a a te ’Ēkālesia e pūharahia.
-
E ara ē, ’ua fa’anahohia te tōmite hi’opo’ara’a faufa’a o te titi ’e tē tere maita’i ra (hi’o 34.7.1).
-
E vata nō te pāhono i te mau uira’a i te taime nō te hi’opo’ara’a i te mau pu’e parau nō te pae faufa’a a te titi (hi’o 34.7).
-
E hi’o fa’ahou i te mau hi’opo’ara’a o te mau pu’e parau i te pae faufa’a a te titi ’e a te pāroita, ’e e ara ē, ’ua fa’a’āfaro-’oi’oi-hia te mau mea ato’a (hi’o 34.7).
-
E ara ē, ’ua ha’apa’o te titi ’e te mau pāroita i te mau ture ato’a i te pae nō te tute (hi’o 34.8).
34.1.2
Te pāpa’i parau o te titi
E fa’aue te peresideni titi i te pāpa’i parau titi ’aore rā i te hō’ē tauturu pāpa’i parau titi nō tē tauturu ’ia ti’a’au i te mau pu’e parau nō te pae faufa’a a te titi. E pe’e māite te mau pāpā’i parau i te mau arata’ira’a nō te pāruru i te mau faufa’a a te ’Ēkālesia ’e e ara ē, e mea tano maita’i te mau pu’e parau a te ’Ēkālesia.
Teie i muri nei te mau hōpoi’a a te pāpa’i parau :
-
E pāpa’i ’e e hōro’a atu i te tino moni ato’a i fāri’ihia i te hō’ē melo nō te peresidenira’a titi.
-
E hi’o fa’ahou i te huru o te pae faufa’a i te ’āva’e tāta’itahi ’e e ara ē, ’ua fa’a’āfaro-oi’oi-hia te mau fifi.
-
E tauturu i te peresidenira’a titi ’ia fa’aineine i te tāpura faufa’a matahiti a te titi (hi’o 34.6.1 ’e te 34.6.2).
-
E hi’opo’a ē, ’ua hāpono mai te pāroita tāta’itahi i te parau fa’a’ite matahiti nō te fa’ata’ara’a o te tuha’a ’ahuru.
-
E ’āmui atu i roto te mau hi’opo’ara’a i te pae faufa’a e ravehia e te feiā hi’opo’a o te titi ’e e fa’a’āfaro i te mau hape mai te mea tē vai ra (hi’o 34.7).
-
E tauturu i te mau ’episekōpora’a ’ia ha’api’ipi’i i te mau pāpa’i parau nō te pāroita.
E ti’a i te mau pāpa’i parau ’ia mau i te autahu’ara’a a Melehizedeka ’e ’ia ti’a mā nō te roa’a i te hō’ē parau fa’ati’a mana nō te hiero. Nō te tahi atu ā ha’amāramaramara’a nō ni’a i te pi’ira’a o te pāpa’i parau nō te titi, hi’o 33.3.2 ’e te 33.3.3.
34.2
Te fa’aterera’a i te faufa’a moni a te pāroita
34.2.1
Te ’episekōpora’a
Teie i muri nei te mau hōpoi’a a te ’episekōpo nō te pae faufa’a a te pāroita. E nehenehe tāna e hōro’a i te tahi o teie ’ohipa i roto i te rima o tōna nā tauturu ’e te mau pāpa’i parau.
Te ’episekopo :
-
E ha’api’i ’e e fa’auru i te mau melo ’ia ’aufau i te hō’ē tuha’a ’ahuru ti’a ’e ’ia hōro’a ma te pipiri ’ore i te mau ō (hi’o 34.3).
-
E ara ’ia fa’atere-ti’a-hia te faufa’a a te titi ’e ’ia tāputa-maita’i-hia te reira (hi’o 34.5)
-
E hi’opo’a i te tāpura moni i te mau ’āva’e ato’a ’e e ara ē ’ua fa’a’āfaro-oi’oi-hia te mau fifi.
-
E ara ē, ’ua ’apo mai te feiā fa’atere o te mau pupu tauturu ’e te mau pāpa’i parau i tā rātou hōpoi’a i te pae nō te faufa’a mo’a a te ’Ēkālesia.
-
E fa’aineine ’e e fa’atere i te tāpura faufa’a matahiti a te pāroita (hi’o 34.6).
-
E ara ē, ’ua pe’e-māite-hia te mau arata’ira’a nō ni’a i te faufa’a i fa’ata’ahia a te pāroita (hi’o 34.6.2).
-
E fa’atupu i te matahiti tāta’itahi, te fa’a’āfarora’a i te tuha’a ’ahuru ’e te mau melo o te pāroita.
-
’E ara ē, e’ita roa atu te mau ta’o huna nō te tomo i roto i te fa’anahora’a rorouira i te pae faufa’a a te ’Ēkālesia e pūharahia.
-
E vata nō te pāhono i te mau uira’a i taime o te mau hi’opo’ara’a i te faufa’a a te pāroita ’e e ara ē, ’ua fa’a’āfaro-’oi’oi-hia te mau fifi ato’a (hi’o 34.7).
34.2.2
Te pāpa’i parau pāroita
E fa’aue te ’episekōpo i te pāpa’i parau pāroita, ’aita ana’e, i te hō’ē tauturu pāpa’i parau pāroita, nō te tauturu ’ia ti’a’au i te mau pu’e parau nō te pae faufa’a a te pāroita. E pe’e māite te mau pāpā’i parau i te mau arata’ira’a nō te pāruru i te mau faufa’a a te ’Ēkālesia ’e e ara ē, e mea tano maita’i te mau pu’e parau a te ’Ēkālesia.
Teie i muri nei te mau hōpoi’a a te pāpa’i parau :
-
E pāpa’i ’e e hōro’a atu i te tino moni ato’a i fāri’ihia i te hō’ē melo nō te ’episekōpora’a.
-
E hi’o fa’ahou i te huru o te pae faufa’a i te ’āva’e tāta’itahi ’e e ara ē, ’ua fa’a’āfaro-oi’oi-hia te mau fifi.
-
E tauturu i te ’episekōpora’a ’ia fa’aineine i te tāpura faufa’a matahiti a te pāroita (hi’o 34.6.1 ’e 34.6.2).
-
E ara ē, e roa’a i te mau melo ’ia fāri’i i tā rātou parau ha’apāpūra’a nō te moni i hōro’ahia ’e ’a tauturu atu mai te mea e hina’arohia.
-
E tauturu i te ’episekōpo ’ia fa’aineine nō te fa’a’āfarora’a i te tuha’a ’ahuru.
-
E ’āmui i roto te mau hi’opo’ara’a pae faufa’a e ravehia e te feiā hi’opo’a o te titi ’e e fa’a’āfaro i te mau hape mai te mea tē vai ra (hi’o 34.7).
E ti’a i te mau pāpa’i parau ’ia mau i te autahu’ara’a a Melehizedeka ’e ’ia ti’a mā nō te roa’a i te hō’ē parau fa’ati’a mana nō te hiero. Nō te tahi atu ā ha’amāramaramara’a nō ni’a i te pi’ira’a o te mau pāpa’i parau o te pāroita, hi’o 33.4.2 ’e te 33.4.3.
34.3
Te moni hōro’a
E ha’api’i te feiā fa’atere o te ’Ēkālesia i te mau melo i te mau parau tumu nō te tuha’a ’ahuru ’e te tahi atu mau ō, ’e e fa’aitoito i te mau melo ’ia ora i teie mau parau tumu. E nehenehe ato’a te mau ta’ata e ’ere i te melo nō te ’Ēkālesia e hōro’a mai i te moni. Terā rā, ’o te mau melo ana’e nō te ’Ēkālesia te ’aufau i te tuha’a ’ahuru.
E fa’aitoitohia te mau melo ’ia rave i tā rātou hōro’ara’a i te moni nā roto i te rāve’a rorouira, mai te mea e nehenehe (hi’o donations.ChurchofJesusChrist.org). E nehenehe ato’a te mau melo e hōro’a i tā rātou moni hōro’a ’e te parau fa’a’ite nō te tuha’a ’ahuru ’e te tahi atu mau ō, i te ’episekōpo ’aore rā i te hō’ē o tōna nā tauturu (hi’o 34.5.2).
34.3.1
Tuha’a ’ahuru
Te tuha’a ’ahuru ’o te hōro’a ïa nō te ’ahurura’a nō te moni tāna e noa’a, i te ’Ēkālesia a te Atua (hi’o Te Ha’api’ira’a Tumu ’e te mau Fafaura’a 119:3–4 ; e tai’o-ato’a-hia te ’āpī i roto i te moni e roa’a). E ti’a i te mau melo ato’a e noa’a tā rātou moni ’ia ’aufau i te tuha’a ’ahuru.
’Ua ora na te nūna’a o te fafaura’a a te Fatu i te ture nō te tuha’a ’ahuru, mai te tau tahito mai ā (hi’o Genese 14:18–20 ; Levitiko 27:30–32). ’Ua parau te Fatu : « Te tuha’a ’ahuru a tō’u mau ta’ata […] e riro teie ’ei ture tumu ia rātou ē a muri noa atu » (Te Ha’api’ira’a Tumu ’e te mau Fafaura’a 119:3–4).
E mea mo’a te tuha’a ’ahuru i te Fatu, ’e tē fa’atura nei te mau melo iāna nā roto i te ’aufaura’a i te tuha’a ’ahuru. E fa’a’itera’a te reira i te fa’aro’o i te Atua ’e i te tāna mau parau fafau. E fāri’i te feiā e ’aufau i te tuha’a ’ahuru i teie parau fafau a te Fatu : « E tāmatara’a te reira iā’u nei, tē parau mai ra Iehova Sabaota ra ; i te ’orera’a vau i te ’īritira’a i te mau ha’amāramarama o te ra’i ra, ’a nīni’i atu ai i te tao’a rahi roa ’ei maita’i nō ’outou » (Malaki 3:10).
34.3.1.1
Te fa’a’ohipara’a i te moni tuha’a ’ahuru
E fa’a’ohipa-noa-hia te mau ō o te tuha’a ’ahuru nō te mau ’ōpuara’a a te Fatu, mai tei fa’auehia mai e te ’āpo’ora’a nō te tuha’a ’ahuru (hi’o Te Ha’api’ira’a Tumu ’e te mau Fafaura’a 120). ’Ua fa’ata’ahia mai te tahi o teie mau ’ōpuara’a i roto te 34.0.
34.3.1.2
Te fa’a’āfarora’a i te tuha’a ’ahuru
E fa’atupu te ’episekōpo i te fa’a’āfarora’a i te tuha’a ’ahuru i te hope’a matahiti tāta’itahi. I roto i te huru tupura’a mea varavara roa, ’ia ma’iri te ’episekōpo, e nehenehe te peresideni titi e fa’ati’a i te hō’ē o nā tauturu o te ’episekōpo, ’ia arata’i i te fa’a’āfarora’a i te tuha’a ’ahuru.
E tītau-manihini-hia te mau melo ato’a ’ia haere i te fa’a’āfarora’a i te tuha’a ’ahuru :
-
Nō te ara ē, ’ua ’āfaro maita’i te mau pu’e parau o tā rātou moni hōro’a.
-
Nō te fa’a’ite i te ’episekōpo i tō rātou ti’ara’a ’ei ta’ata ’aufau i te tuha’a ’ahuru.
Mai te mea e nehenehe, e haere te mau melo ato’a o te hō’ē ’utuāfare, tae noa atu te mau tamari’i, i te fa’a’āfarora’a i te tuha’a ’ahuru.
I te taime nō te fa’a’āfarora’a i te tuha’a ’ahuru, e fa’a’ite te ’episekōpo i te māuruuru i te mau melo nō tō rātou ha’apa’o-maita’i-ra’a. E ha’api’i ato’a ’oia ia rātou te parau tumu nō te tuha’a ’ahuru, e fa’aitoito i te mau melo ’ia hōro’a pipiri ’ore i te ō ha’apaera’a mā’a, ’e e ’āparau nō ni’a i te tahi atu mau tumu parau faufa’a.
E hōro’ahia te mau arata’ira’a nō te fa’a’āfarora’a i te tuha’a ’ahuru e te pū fa’atere o te ’Ēkālesia ’aore rā te piha tōro’a a te ārea tei fa’ata’ahia.
34.3.2
Te mau ō ha’apaera’a mā’a
E fa’aitoito te feiā fa’atere o te ’Ēkālesia i te mau melo ’ia ora i te ture nō te ha’apaera’a mā’a. Tei roto i te reira te hōro’ara’a pipiri ’ore i te ō nō te ha’apaera’a mā’a (hi’o 22.2.2).
I roto i te tahi mau pāroita, e nehenehe te ’episekōpo e fa’ati’a i te feiā e mau nei i te Autahu’ara’a a Aarona, ’ia haere e ’ohi mai i te mau ō nō te ha’apaera’a mā’a. Ma te ravera’a i teie fa’aotira’a, e hi’o māite te ’episekōpo i te rahira’a o te feiā e mau nei i te Autahu’ara’a a Aarona e vai ra, ’ia pāruruhia rātou ’e te ha’amaita’ira’a nō te mau melo ’āhiri a’ita ra, e’ita ïa rātou e hōro’a.
E haere ’āpitipiti te mau taea’e o te autahu’ara’a nō te ’ohi i te mau ō ha’apaera’a mā’a. E hōro’a ’oi’oi atu rātou i te mau ō o te ha’apaera’a mā’a i te hō’ē melo o te ’episekōpora’a.
’Eiaha te mau melo e hōro’a i te tahi atu mau ō, mai te tuha’a ’ahuru ’aore rā, te tahi atu mau ō, i te feiā e ’ohi nei i te mau ō ha’apaera’a mā’a.
’Ua hōro’ahia te mau arata’ira’a nō te fa’a’ohipara’a i te mau ō o te ha’apaera’a mā’a i roto te 22.5.2.
34.3.3
Te ’āfata moni misiōnare
E fa’a’ohipahia nā mua roa te moni e hōro’ahia nō te ’āfata a te misiōnare pāroita, nō te pāhono i te mau fa’aaura’a ’aufaura’a a te mau misiōnare rave tāmau o te pāroita (hi’o 24.3.4). E nehenehe te tino moni hau e fa’a’ohipahia nō te pāhono i te fa’aaura’a ’aufaura’a a te tahi atu mau misiōnare o te titi ’aore rā o te ’āpo’ora’a fa’aaura’a. ’Eiaha ’ia hāpono-’āfaro-hia i te mau misiōnare tāta’itahi te moni misiōnare pāroita. ’Eiaha teie moni ’ia fa’a’ohipahia nō te mau ’ātivite a te mau misiōnare o te pāroita ’aore rā o te titi.
E fa’a’ohipahia te moni i hōro’ahia i te ’āfata moni rahi nā te mau misiōnare e te ’Ēkālesia i roto i tāna mau tauto’ora’a misiōnare rahi.
E ti’a i te mau peresideni titi ’e te mau ’episekōpo e hāpono i te tino moni hau misiōnare nō te mau hina’aro tano o te titi ’e o te pāroita, i te ’āfata moni rahi a te mau misiōnare i te pū fa’atere o te ’Ēkālesia ’aore rā i te piha tōro’a rētioni.
Nō te tahi atu ā ha’amāramaramara’a nō ni’a i te ’āfata moni nā te misiōnare ’e te ’aufaura’a i te tāvinira’a misiōnare, hi’o 24.6.
34.3.4
Te tahi atu mau moni hōro’a
E nehenehe te mau melo e aufau i te tahi atu ā mau tuha’a i ha’amanahia. Mai te mea e fa’a’ohipa te ta’ata hōro’a i te ’api parau nō te tuha’a ’ahuru ’e nō te tahi atu mau ō, e pāpa’i rātou i te i’oa o te tuha’a i roto i te vāhi o te parau « Te tahi atu ».
’Eiaha te mau titi ’e te mau pāroita e tu’u i te mau tuha’a i roto i te vāhi « Te tahi atu » nō te ani, nō te ha’aputu, ’aore rā nō te ha’amau’a i te moni nō te mau ’ōpuara’a tei ’ore i ha’amanahia e te peresidenira’a o te ārea. Nō te fāri’i i te hō’ē tāpura nō te mau tuha’a tei ha’amanahia, e fārerei atu te mau melo i te pāpa’i parau o te pāroita.
34.3.5
Philanthropies (Te mau ’ohipa hereta’ata)
Te herera’a i te ta’ata a Te ’Ēkālesia a Iesu Mesia i te Feiā Mo’a i te mau Mahana Hōpe’a nei, e tuha’a fa’atere te reira nō te piha tōro’a a te ’Episekōpora’a Peresideni. Nā teie tuha’a fa’atere e fa’aau ’e e fa’a’ōhie i te mau moni a te feiā hōro’a nō te herera’a i te ta’ata a te ’Ēkālesia ’e i tāna mau ’ohipa aroha ’e ’ātivite nō te feiā e au mai, ta’a ’ē atu i te tuha’a ’ahuru ’e i te tahi atu mau ō. E roa’a te tauturu nō te hōro’ara’a atu i te moni nā roto i te fārereira’a atu i te piha tōro’a nō te herera’a i te ta’ata :
Philanthropies (Te mau ’ohipa hereta’ata)
1450 North University Avenue
Provo, UT 84604-6080
Niuniu : 1-801-356-5300 ’e ’aore rā 1-800-525-8074
Rata uira : philanthropies@ChurchofJesusChrist.org
34.3.6
Te mau ō tao’a, nō te tuha’a ’ahuru ato’a
Tē fa’ataiā nei iho ā te ’Ēkālesia ’ia aufauhia te tuha’a ’ahuru ’e nō te tahi atu mau ō, i te mau tao’a e’ita i te moni. E mea au a’e nō te mau melo ’ia fāna’o rātou iho i te mau fatura’a, ’e i muri iho ’a ’aufau moni ai i te tuha’a ’ahuru ’e te tahi atu mau ō. Terā rā, e fāri’ihia te mau ō nō te mau tao’a e’ita i te moni, i roto i te tahi huru tupura’a. E ravera’a mātauhia, teie huru hōro’ara’a i te mau ō i roto i te tahi mau tuha’a fenua o te ao nei.
E fāri’i te ’Ēkālesia (1) te mau tuha’a i roto i te taiete, te mau parau moni e ’āpīhia ’aore rā te tahi atu mau fatura’a e ho’o-’oi’oi-hia (2) te tahi mau fatura’a fenua e ho’o-’oi’oi-hia. Mai te mea e hina’aro te mau melo e hōro’a i teie mau ’ohipa ’aore rā i te tahi atu mau tao’a, e fārerei atu te peresideni titi i te pū fa’atere a te ’Ēkālesia ’aore rā i te piha tōro’a rētioni nō te parau fa’ati’a, hou te ’episekōpo e fāri’i ai i te reira mau tao’a.
Nā te pū fa’atere o te ’Ēkālesia ’aore rā te piha tōro’a rētioni e hōro’a i te parau pe’era’a a te mau melo, tei ’aufau i te mau ō i te mau tao’a e’ita i te moni.
34.3.7
E’ita te mau hōro’ara’a ō e fa’aho’ihia
I te taime e hōro’ahia ai te tuha’a ’ahuru ’e te tahi atu mau ō i te ’Ēkālesia, nā te Fatu te reira. ’Ua ha’amo’ahia te reira nāna. Teie mau hōro’ara’a ato’a e mau rau’ai ’ā’au tae. ’Ua hōro’ahia te reira ma te ’ore e mā’iti i te tumu, ma te ’ore e tāpe’a i te mana, ma te ’ore e fatu noa atu, ’aore rā ma te ’ore e tīa’i i te hō’ē noa atu fa’aho’ira’a maori rā te mau ha’amaita’ira’a a te Fatu.
E fa’aara te mau peresideni titi ’e te mau ’episekōpo i te feiā ’aufau i te tuha’a ’ahuru ’e i te tahi atu mau ō ē, e’ita roa teie mau moni hōro’a e fa’aho’ihia. E’ita ato’a e fa’aho’ihia te moni i ’aufau-hou-hia nā te misiōnare.
34.4
Te nātura ’ōmo’e o te tuha’a ’ahuru ’e o te tahi atu mau ō
E mea ’ōmo’e te tino moni o te tuha’a ’ahuru ’e o te tahi atu mau ō i ’aufauhia e te hō’ē melo. Te ’episekōpo ana’e ’e te feiā tei ha’amanahia ’ia rave ’aore rā ’ia hi’o i teie mau moni hōro’a, e tomo atu i roto i teie mau ha’amāramaramara’a. ’Eiaha roa atu te mau peresidenira’a titi, te mau ’episekōpora’a ’e te mau pāpa’i parau e ’āparau ma te tano ’ore, i te ti’ara’a nō te tuha’a ’ahuru o te hō’ē melo. ’Eiaha ato’a rātou e tāu’aparau i te tā’āto’ara’a o te tuha’a ’ahuru ’aore rā o te tahi atu mau ō i fāri’ihia.
34.5
Te fa’aterera’a i te faufa’a a te ’Ēkālesia
E ara te peresideni titi ’e te ’episekōpo ē, ’ia fa’aterehia ma te ti’a te mau faufa’a ato’a a te ’Ēkālesia. E hōpoi’a mo’a teie nō tō rātou mau pi’ira’a. ’Ua vauvauhia te mau parau tumu rahi i roto i te mau tuha’a i muri nei. E fa’aitoitohia te mau ’episekōpora’a ’e te mau pāpa’i parau ’ia māta’ita’i i te video « Faufa’a mo’a, hōpoi’a mo’a (Sacred Funds, Sacred Responsibilities) » hō’ē a’e taime i te matahiti.
34.5.1
Te parau tumu o te taetaea’e
Tē tītau nei te parau tumu o te taetaea’e e piti ta’ata—hō’ē melo nō te ’episekōpora’a ’e hō’ē pāpa’i parau, ’aore rā e piti melo nō te ’episekōpora’a—nō te rave itoito i te ne’irorora’a ’e i te tātarara’a i te faufa’a a te ’Ēkālesia. E mea faufa’a roa teie parau tumu nō te ha’apāpūra’a ne’iroro i te mau faufa’a mo’a ’e nō te pārurura’a i te feiā fa’atere o te ’Ēkālesia.
E ti’a i te feiā fa’atere e pāruru ’e ’eiaha roa atu e fa’a’ite i tā rātou tā’o tomora’a (hi’o 33.9.1.1).
34.5.2
Te fāri’ira’a i te tuha’a ’ahuru ’e te tahi atu mau ō
’Ua hōro’a te Fatu i te mau ’episekōpo te ti’aturira’a mo’a nō te fāri’i ’e nō te tai’o i te mau tuha’a ’ahuru ’e te tahi atu mau ō a te feiā mo’a (hi’o Te Ha’api’ira’a Tumu ’e te mau Fafaura’a 42:30–33 ; 119). ’O te ’episekōpo ana’e ’e tōna nā tauturu te nehenehe e fāri’i i te tuha’a ’ahuru ’e te tahi atu mau ō. ’Eiaha roa atu tā rātou mau vahine, te tahi atu mau melo o tō rātou ’utuāfare, te mau pāpa’i parau ’e te tahi atu melo o te pāroita e fāri’i i teie mau ō. Te tāhapera’a, ’ia tono-ana’e-hia ïa te feiā e mau nei i te autahu’ara’a a Aarona nō te ’ohi mai i te mau ō ha’apaera’a mā’a (hi’o 34.3.2).
E ti’a i te mau parau moni ’ia tu’uhia i te i’oa o Te ’Ēkālesia a Iesu Mesia i te Feiā Mo’a i te mau Mahana Hōpe’a nei. E ti’a te moni i fāri’ihia e te ’episekōpora’a ’ia ne’irorohia ’e ’ia ’āfa’i-’oi’oi-hia i te fare moni e ti’a ai. ’Eiaha roa atu te feiā fa’atere o te ’Ēkālesia ’e te mau melo e vaiiho i te mau ō ma te tīa’i-’ore-hia.
34.5.3
Te hi’opo’ara’a ’e te ne’irorora’a i te tuha’a ’ahuru ’e i te tahi atu mau ō
E ti’a ’ia hi’opo’ahia ’e ’ia ne’irorohia te mau moni hōro’a i te sābati ’a fāri’ihia ai te reira. Nā te hō’ē melo nō te ’episekōpora’a ’e te pāpa’i parau, ’aore rā nā e piti melo nō te ’episekōpora’a e ’īriti ’āmui i te vehi rata tāta’itahi. E hi’opo’a rāua ē, te tino moni i tu’uhia i roto ’ua tuea ïa i te tino moni i pāpa’ihia i ni’a i te ’api parau nō te tuha’a ’ahuru ’e nō te tahi atu mau ō. E ne’iroro māite rāua i te ō tāta’itahi. Mai te mea ’aita te moni hōro’a i tuea i te moni i pāpa’ihia, e niuniu-’oi’oi-hia te ta’ata hōro’a nō te fa’a’āfaro i te reira.
34.5.4
Te hōpoira’a i te tuha’a ’ahuru ’e te tahi atu mau ō i te fare moni
E ti’a ’ia fa’aineinehia te parau ha’apāpūra’a a te fare moni i muri a’e i te pāpūra’a ē, te tino moni i ne’irorohia ’ua tu’ati ïa i te moni i fāri’ihia.
I te vāhi e matara ai e 24 hora i ni’a i te 24 hora te fare moni nō te tu’u atu te pūtē, nā te melo nō te ’episekōpora’a ’e hō’ē taea’e nō te autahu’ara’a a Melehizedeka e haere e tu’u atu i te pūtē nō te mau ō i te fare moni, i te mahana iho ā ’a ’īritihia ai te vēhi rata moni ’e ’a hi’opo’ahia ai te moni.
I te vāhi ’aita e matara te fare moni e 24 hora i ni’a i te 24 hora nō te tu’u atu te pūtē ’e ’ua tāpiri i te sābati, e mā’iti te ’episekōpo i te hō’ē taea’e nō te autahu’ara’a a Melehizedeka nō te ’āfa’i i te pūtē i te fare moni i te mahana iho e matara ai. Tei matarohia, e melo teie ta’ata nō te ’episekōpora’a. E ta’ata ha’apa’o ’oia i teie tino moni. E ti’a iāna :
-
E ara ē, ’ua vaiiho-pāruru-māite-hia te pūtē moni, e tae roa atu i te taime e ’āfa’ihia atu ai te reira i te fare moni.
-
E ani i te hō’ē parau ha’apāpūra’a a te fare moni e fa’a’ite ra i te tai’o mahana ’e te tino moni i ’āfa’ihia ai te pūtē moni.
Fa’ahou ā, e ti’a i te melo nō te ’episekōpora’a ’e te pāpa’i parau, ’aore rā e piti melo nō te ’episekōpora’a e pe’e i te ravera’a i muri nei i te sābati nō muri iho, hou ’a ha’amata ai i te tai’o i te mau ō nō te reira mahana :
-
E fa’atu’ati rāua i te parau ha’apāpūra’a a te fare moni i te parau fa’a’ite o te hepetoma nā mua atu, nō te hi’opo’a ē ’ua tano te tino moni i ’āfa’ihia i te fare moni.
-
E tu’urima i te parau ha’apāpūra’a a te fare moni ’e e tu’u atu i te reira ’e te mau ha’amāramaramara’a nō te mau ō o te hepetoma i ma’iri.
34.5.5
Te pārurura’a i te faufa’a a te ’Ēkālesia
Nō te mau melo ti’a’au i te moni a te ’Ēkālesia, ’eiaha roa rātou e vaiiho i te moni i te fare purera’a ē ao noa a’e, ’aore rā ’eiaha e vaiiho-tīa’i-’ore-noa-hia i te hō’ē noa a’e taime, i roto ānei i te mau rurura’a ’aore rā te mau ’ātivite.
34.5.6
Te mau parau ha’apāpūra’a nō te hōro’ara’a ō
E roa’a nō te mau melo ato’a te mau parau ha’apāpūra’a a te ta’ata hōro’a ō, i ni’a donations.ChurchofJesusChrist.org. E fa’aitoito te feiā fa’atere i te mau melo ’ia hi’o tāmau i tā rātou mau parau ha’apāpūra’a a te ta’ata hōro’a ō. I te vāhi e fa’ati’ahia, e roa’a ato’a te mau parau ha’apāpūra’a nō te mau ’aufaura’a tute i te donations.ChurchofJesusChrist.org, nō roto mai i te ’āmuira’a o te fenua iho ’aore rā i te piha tōro’a rētioni.
34.5.7
Te fa’aterera’a i te mau ’aufaura’a a te titi ’e a te pāroita
E fa’aterehia te mau faufa’a ato’a a te titi i roto i te rāve’a rorouira i te pae faufa’a a te ’Ēkālesia. Nā te peresideni titi e fa’atere i te faufa’a a te titi. E nehenehe tōna nā tauturu ’e te mau pāpa’i parau e tauturu iāna. Tei matarohia, ’eiaha te tauturu e peresideni nei i te tōmite hi’opo’ara’a a te titi e fa’aō atu i roto i te ha’apa’ora’a i te mau pu’e parau i te pae faufa’a a te titi.
E fa’aterehia te mau faufa’a ato’a a te pāroita i roto i te rāve’a rorouira i te pae faufa’a a te ’Ēkālesia. Nā te ’episekōpo e fa’atere i te faufa’a a te pāroita. E nehenehe tōna nā tauturu ’e te mau pāpa’i parau e tauturu iāna.
Tei matarohia, e ravehia te mau ’aufaura’a moni nā roto i te rurira’a tāireuira [transfert electronique] ’aore rā te parau moni. I roto i te tahi mau fenua, e fāri’i te mau ’āmuira’a ’ia fa’a’ohipahia te mau tāreta fare moni.
E’ita roa te mau ha’amāu’ara’a a te titi ’e a te pāroita e ravehia ’aore rā e ’aufauhia mai te mea ’aita e parau fa’ati’a nā te ti’a peresideni.
E ti’a nā e piti ta’ata fa’atere i ha’amanahia e fa’ati’a i te ’aufaura’a tāta’itahi. E ti’a i te hō’ē ’ei melo nō te peresidenira’a titi ’aore rā nō te ’episekōpora. Noa atu ē, ’ua ha’amanahia nā tauturu nō te fa’ati’a i te mau ’aufaura’a, e ti’a i te peresideni titi ’aore rā i te ’episekōpo e hi’opo’a i te ’aufaura’a tāta’itahi. ’Eiaha te feiā fa’atere e fa’ati’a i te hō’ē ’aufaura’a nā rātou iho.
E tītauhia te parau fa’ati’a pāpa’i a te peresideni titi hou te ’episekōpo e fa’a’ohipa ai i te mau ō ha’apaera’a mā’a ’aore rā e fa’ati’a i te fa’auera’a a te ’episekōpo nōna iho ’aore rā nō tōna ’utuāfare. E tītauhia te parau fa’ati’a pāpa’i a te hō’ē melo o te peresidenira’a ārea hou te ’episekōpo e fa’a’ohipa ai i te mau ō ha’apaera’a mā’a ’aore rā e fa’ati’a i te fa’auera’a a te ’episekōpo nō te peresideni titi ’aore rā nō tōna ’utuāfare. Hi’o 22.5.1.2 nō te mau arata’ira’a.
Te melo e tītau ra i te fa’aho’ira’a moni e hōro’a atu ’oia i te hō’ē parau hōho’a ’aore rā i tāireuirahia o te mau parau pe’era’a ’aore rā o te mau parau ’aufaura’a ato’a. E pāpa’i ato’a ’oia i te tumu, te moni tā’āto’a ’e te tai’o mahana.
Mai te mea ’ua ’aufauhia te ha’amau’ara’a, e fa’atae atu te melo i te parau nō te ani i te aufaura’a, ma te pāpa’i i te tumu, te moni tā’āto’a ’e te tai’o mahana. ’Ia oti te mau ha’amāu’ara’a i te ’aufauhia, e hōro’a te melo (1) i te mau parau pe’era’a ’aore rā i te mau parau ’aufaura’a nō te tino moni i ha’amau’ahia ’e (2) e fa’aho’i i te moni tei ’ore i ha’amau’ahia. E ti’a i te moni i fa’aho’ihia ’ia ’āfa’ihia i te fare moni.
’Eiaha roa atu te feiā fa’atere ’e te mau pāpa’i parau i ha’amanahia e fa’ati’a i te mau ’aufaura’a ma te ’ore e hi’opo’a māite i te mau ha’amāu’ara’a ’e te mau parau pe’era’a ’aore rā i te mau parau ’aufaura’a.
’Eiaha te mau titi ’e te mau pāroita e ’īriti i te hō’ē ’āfata vaira’a moni nā rātou iho i te fare moni ’aore rā e tāpe’a i te hō’ē ’āfata moni.
34.5.7.1
Te mau ’aufaura’a tāireuira
Mai te mea e fa’a’ohipa te titi ’aore rā te pāroita i te mau ’aufaura’a tāireuira, tē fa’aitoitohia nei te mau melo ’ia pāpa’i mai i tā rātou iho nūmera ’āfata moni i roto i te tuha’a ’Āfata fa’aho’ira’a i te ha’amau’ara’a i raro a’e Paramētera o te mau ō nā ni’a i te natirara i te donations.ChurchofJesusChrist.org. ’Eiaha roa atu te pāroita ’aore rā te titi e tāpe’a i te parau nene’i ’aore rā tāireuira nō te mau parau vaira’a moni o te fare moni a te hō’ē melo.
34.5.7.2
Te mau parau moni
Mai te mea e fa’a’ohipa te titi ’aore rā te pāroita i te mau parau moni, e’ita te parau moni e tu’urimahia, maori rā ’ia oti i te fa’a’ī-hope-hia te mau tuha’a ato’a. E tāpe’ahia te mau buka parau moni ’e te mau parau moni ’aita i fa’a’ohipahia i roto i te hō’ē ’āfata i pōnaohia. ’Eiaha te reira ’ia vaiiho-noa-hia ma te tīa’i-’ore-hia i te taime ’aita te reira i pōnaohia. Mai te mea te mo’e ra te tahi mau parau moni ’aita i fa’a’īhia, e fa’aara ’oi’oi te peresideni titi ’aore rā te ’episekōpo i te nūmera o te reira mau parau moni, i te pū fa’atere a te ’Ēkālesia ’aore rā i te piha tōro’a rētioni.
34.5.7.3
Te mau tāreta ’aufaura’a
Mai te mea e fa’a’ohipa te titi ’aore rā te pāroita i te mau tāreta ’aufaura’a nō te mau ha’amāu’ara’a a te ’āmuira’a o te fenua, e nehenehe te reira e fa’a’ohipahia nō te ’aufau i te vāhi ho’ora’a ’aore rā nō te tātara i te moni. Te mau ’aufaura’a ’e te mau tātarara’a moni nā roto i te tāreta, e fa’auta-uira-hia i te reira iho ā taime, i roto i te fa’anahora’a i te pae faufa’a a te ’Ēkālesia. ’Ia ne’iroro-oi’oi-hia te mau fa’a’ohipara’a ato’a o te tāreta. Mai te mea ’aita teie mau fa’a’ohipara’a e ne’irorohia, e riro te tāreta i te tāpūhia.
E ti’a i te mau ’aufaura’a-tāreta ato’a ’ia fa’aho’ihia i te tai’o aore, hō’ē a’e taime i te matahiti.
34.5.8
Te moni i roto i te ’āfata
E hōro’a te piha tōro’a rētioni i te mau arata’ira’a pāpū maita’i nō te mau ’āmuira’a ’aita e tomo nō te hō’ē nūmera ’āfata moni i hōro’ahia e te ’Ēkālesia.
34.5.9
Ha’apa’o i te mau pu’e parau nō te pae faufa’a
’Ia ha’apa’o maita’i te titi ’e te pāroita tāta’itahi ē, e mea pāpū ’e e mea ti’a te mau pu’e parau nō te pae faufa’a. E tauturu teie mau pu’e parau i te mau peresideni titi ’e i te mau ’episekōpo ’ia ti’a’au ’e ’ia pāruru i te moni mo’a a te ’Ēkālesia. E hina’aro-ato’a-hia te mau ne’irorora’a pāpū nō te :
-
Fa’aineinera’a i te tāpura faufa’a.
-
Ti’a’aura’a i te tāpura moni i tuhahia
-
Hōro’ara’a i te ha’amāramaramara’a i te mau melo nō ni’a i tā rātou mau moni hōro’a.
-
Pāhonora’a i te mau hi’opo’ara’a.
Nō te ha’amāramaramara’a hau atu nō ni’a i te fa’a’ohipara’a ’e te ha’aputura’a i te mau pu’e parau ’e te mau parau fa’a’ite, e ti’a i te mau pāpa’i parau e hi’o i te mau ’arata’ira’a i te pū fa’atere o te ’Ēkālesia ’aore rā i te piha tōro’a rētioni. E tāpe’ahia te mau pu’e parau nō te pae faufa’a e toru a’e matahiti, ta’a ’ē noa atu te matahiti e horo nei. E nehenehete te mau ture o te fenua e tītau i te hō’ē tau ha’aputura’a maoro a’e.
34.6
Te tāpura faufa’a ’e te mau ha’amāu’ara’a
Nā te tāpura faufa’a i tuhahia e fa’afāna’o i te faufa’a moni a te ’Ēkālesia nō te ’aufau i te mau ’ātivite ’e i te mau fa’anahonahora’a a te titi ’e a te pāroita. E fa’a’ore teie fa’anahora’a i te tītaura’a nō te fāri’i i te mau moni hōro’a a te mau melo. Maoti te ha’apa’o maita’i o te mau melo i te ’aufaura’a i te tuha’a ’ahuru e noa’a ai te tāpura faufa’a i tuhahia.
Mai te mea e tītauhia, e fa’aiti ’e e fa’a’ōhie te feiā fa’atere i te mau ’ātivite ’ia ’ore te mau ha’amāu’ara’a ’ia hau i te moni i tuhahia. ’Ia ’ōhie ’e te māmā ’e te moni ’ore roa ato’a te rahira’a o te mau ’ātivite e ti’a ai.
34.6.1
Te tāpura faufa’a a te titi ’e a te pāroita
E fa’aineine ’e e fa’atere te titi tāta’itahi ’e te pāroita tāta’itahi i te hō’ē tāpura faufa’a matahiti. E fa’atere te peresideni titi i te tāpura faufa’a a te titi ’e e fa’atere te ’episekōpo i te tāpura faufa’a a te pāroita. E nehenehe rāua e fa’aue i te hō’ē tauturu nō te hi’opo’a i te tāpura faufa’a i raro a’e i tā rāua arata’ira’a. E nehenehe ato’a rāua e tono i te hō’ē pāpa’i parau nō te tauturu i te fa’aineine ’e i te hi’opo’a i te tāpura faufa’a.
E ha’amata te mau peresidenira’a titi ’e te mau ’episekōpora’a i te fa’aineine i te mau tāpura faufa’a, nā mua roa i te ’ōmuara’a matahiti tāta’itahi. Teie i raro nei te mau arata’ira’a i tāpurahia :
-
Hi’opo’a i te mau tino moni i ha’amāu’ahia i te matahiti i ma’iri nō te hi’o ē, ’ua tāpurahia te mau ha’amāu’ara’a i mātarohia.
-
Ani i te mau fa’anahora’a ’ia tātara hu’ahu’a mai i tō rātou mau hina’aro i roto i te tāpura faufa’a.
-
E ha’aputu i te tāpura faufa’a ma te fa’a’ohipa i te mau ravera’a o te tāpura faufa’a i ha’amanahia. E ti’a i te tāpura faufa’a ’ia ha’apāpū ē, ’aita te mau ha’amāu’ara’a i ’ōpuahia i hau atu i te tāpura faufa’a i ’ōpuahia.
E ti’a ’ia fa’a’ohipahia te mau mauiha’a o te tāpūra faufa’a i roto i te fa’anahora’a rorouira i te pae faufa’a a te ’Ēkālesia, i te vāhi e roa’a te reira.
34.6.2
Tāpura faufa’a i tuhahia
34.6.2.1
Te tātuha’ara’a i te tāpura faufa’a
E tāhuha’ahia te moni o te tāpura faufa’a i te toru ’āva’e ato’a, mai te au i te taera’a mai te mau melo i roto i te mau tuha’a i muri nei :
-
Te purera’a ’ōro’a
-
Te Feiā ’Āpī Tamāroa
-
Te Feiā ’Āpī Tamāhine
-
Te mau tamari’i o te Paraimere e 7–10 matahiti
-
Te feiā ’āpī pa’ari
E mea faufa’a ’ia fa’a’ite i te taera’a mai o te ta’ata ma te ’āfaro ’e i te tai’o mahana ti’a (hi’o 33.5.1.1).
Hou te tātuha’ara’a o te toru ’āva’e tāta’itahi, e fāri’i te peresideni titi i te mau ha’amāramaramara’a o te fāito moni e ’ōperehia. I muri iho, e fa’ata’a ’oia i te tuha’a moni e hōro’a nā te mau pāroita. E ’ohipa ’oia ’e te mau ’episekōpo ma te tāhō’ē ’e te turu nō te ara ē, ’ua ’āfaro maita’i ’e ’ua tano maita’i te ’ōperera’a moni nā te titi ’e nā te mau pāroita. Mai te mea e tupu mai te tahi mau tauira’a mana’o-’ore-hia ’e e fa’a’itehia te tumu mau nō te tauira’a o te tātuha’ara’a i te faufa’a mātāmua, e ara te peresideni titi ē ’ua ravehia te mau fa’atanora’a ’aifāito.
E hi’o te ’episekōpo i te hōro’ara’a o te tāpura faufa’a i tuhahia i roto i te pāroita. E ha’apāpū ’oia ’ia tuha-maita’i-hia te moni ’e e mea tano ho’i nō te mau pupu i roto i te pāroita.
E ara te feiā fa’atere o te autahu’ara’a ē, ’ua ’aifāito te mau tātuha’ara’a o te tāpura faufa’a ’e te mau ’ātivite nā te feiā ’āpī tamāroa ’e nā te feiā ’āpī tamāhine, ’e ’ua nava’i te ’ōperera’a faufa’a nā te mau tamari’i o te Paraimere.
34.6.2.2
Fa’a’ohipara’a tano i te tāpura faufa’a
E ha’apāpū te mau peresideni titi ’e te mau ’episekōpo ē ’ua ha’amāu’ahia te moni o te tāpura faufa’a i tuhahia ma te pa’ari. ’Ia fa’a’ohipahia te moni nō te ha’amaita’i i te ta’ata ’e nō te fa’ahaere i mua i te mau ’ōpuara’a o te ’evanelia. E ha’apāpū ato’a te feiā fa’atere ē, e ō te mau ha’amāu’ara’a ato’a i i roto i te fāito moni i tuhahia.
E fa’a’ohipahia te tāpura faufa’a a te titi ’e a te pāroita nō te ’aufau i te mau ’ātivite ato’a, te mau fa’anahora’a ato’a, te mau buka ato’a ’e te tahi atu mau tauiha’a ri’i ato’a. Tei mātarohia, e’ita te mau melo e ’aufau i te fa’aōra’a i roto i te mau ’ātivite. E’ita ato’a rātou e hōro’a i te mau mātēria, te mau tauiha’a, te moni tārahu ’e te moni fa’aōra’a, ’aore rā, te moni nō te utara’a ātea. E nehenehe te mau melo e hōpoi mai te mā’a, mai te mea e ’ere te reira i te mea teimaha (hi’o 20.6.1).
Te mau melo e hina’aro e hōro’a i te tahi atu tino moni i te ’Ēkālesia, e’ita rātou e nehenehe e fa’ata’a i te reira ’ei moni tāpura faufa’a a te titi ’aore rā a te pāroita. Maoti i te reira, e fa’aitoito te feiā fa’atere ia rātou ’ia hōro’a i te reira ’ei ō nō te ha’apaera’a mā’a, nā te mau misiōnare, nō te tauturu ’ia maita’i te ta’ata, ’aore rā te tahi atu mau tuha’a ō i fa’ati’ahia.
Te mau ha’amau’ara’a nō te mau patura’a fare, te ’atu’atura’a, te mau niuniu paraparau, te uira, te mau rorouira ’e te mau tere o te feiā fa’atere o te autahu’ara’a, e ’aufauhia nā roto i te ’āfata faufa’a rahi a te ’Ēkālesia, mai te au i te mau arata’ira’a i ha’amanahia.
34.6.2.3
Te moni hau o te tāpura faufa’a
’Eiaha te moni hau o te tāpura faufa’a i tātūha’ahia ’ia ha’amāu’ahia. ’Ia fa’aho’ihia te moni hau a te pāroita i te titi. E fa’aho’ihia te moni hau a te titi i te ’Ēkālesia.
Te tahi fa’anahora’a ta’a ’ē, e nehenehe te mau titi ’e te mau pāroita e tāpe’a i te moni toe mai te mea e hina’arohia nō te tahi mau ’ātivite ta’a ’ē atu i tei ’ōpuahia nō te matahiti i muri mai, mai te hō’ē ’āmuira’a feiā ’āpī. Terā rā, e’ita te tuha’a rahi o te tāpura faufa’a i tātūha’ahia a te titi ’aore rā a te pāroita ’ia tāpe’ahia nō te hō’ē matahiti e tae atu i te matahiti i muri mai.
34.6.3
’Aufaura’a i te mau ’ātivite ta’a ē ’e te mau tauiha’a
34.6.3.1
Te mau ’ātivite titi ’e titi rau
E fa’aitoitohia te feiā fa’atere i te fenua iho ’ia fa’atupu i te mau ’ātivite titi ’e titi rau ’o tē hōro’a i te mau rāve’a nō te fa’ahotu i te tāhō’ē ’e te auhoara’a, i rotopū iho ā rā i te feiā ’āpī ’e i te feiā ’āpī pa’ari ’ōtahi. E ha’apāpū te feiā fa’atere ē, e tāpura rātou i te tino moni tano nō te turu i te tahi mau ’ātivite titi ’e titi rau.
Te ’aufaura’a i te rahira’a o te mau ’ātivite titi rau, nō roto mai ïa i te tāpura faufa’a a te mau titi i fa’aō mai. Te ’aufaura’a i te mau ’ātivite a te ārea, nō roto mai ïa i te tāpura fa’ufa’a a te piha tōro’a rētioni ’aore rā a te pū fa’atere o te ’Ēkālesia, ’ia fāri’i-ana’e-hia.
34.6.3.2
Te mau ’ātivite ’e te mau tauiha’a ta’a ’ē
Nō te mau ha’amāramaramara’a nō ni’a i te mau ’ātivite ’e te mau tauiha’a ta’a ’ē, hi’o pene 20.
34.7
Te mau hi’opo’ara’a
34.7.1
Tōmite hi’opo’a o te titi
E fa’ata’a te peresideni titi i te hō’ē tōmite hi’opo’ara’a nō te titi. E ara teie tōmite ē, tē fa’aterehia nei te faufa’a a te titi ’e a te pāroita mai te au i te fa’aturera’a a te ’Ēkālesia. Tei roto i teie tōmite te hō’ē o nā tauturu o te peresideni titi ’ei peresideni ’e e piti atu melo o te titi, ’o tei māramarama ’aore rā ’o te nehenehe e ha’api’ipi’ihia nō ni’a i te mau ’ohipa i te pae faufa’a. ’Ia mau teie mau taea’e ’aore rā mau tuahine i te hō’ē parau fa’ati’a mana nō te hiero.
Tei mātarohia, ’eiaha te tauturu e tāvini nei ’ei peresideni nō te tōmite ’ia fa’ati’a noa i te mau ’aufaura’a, ’aore rā ’ia ō atu i roto i te ha’apa’ora’a i te mau pu’e parau i te pae faufa’a a te titi.
’Eiaha te mau melo o te tōmite ’ia riro ’ei feiā hi’opo’a nō te titi. ’Eiaha ato’a rātou e ha’apa’o i te mau pu’e parau i te pae faufa’a a te titi ’aore rā a te pāroita.
34.7.2
Te feiā hi’opo’a o te titi
E pi’i te peresideni titi ’aore rā tōna tauturu tei riro ’ei peresideni nō te tōmite hi’opo’a o te titi, e piti ta’ata hi’opo’a nō te titi. E ti’a i teie mau taea’e ’e mau tuahine ’ia mau i te hō’ē parau fa’ati’a mana nō te hiero. Mai te mea e nehenehe, ’ia ’aravihi rāua i te pae nō te ’ohipa nūmerara’a ’e te hi’opo’ara’a. ’Ia fāri’ihia rātou e te peresidenira’a titi ’e e te ’āpo’ora’a teitei. Terā rā, ’aita rātou e pāturuhia. Nā te peresideni titi e fa’aoti e fa’ata’ahia ānei rātou.
E nehenehe ato’a te mau melo ’āpo’ora’a teitei e tāvini ’ei feiā hi’opo’a nō te titi. E’ita rā te pāpa’i parau titi ’e te mau tauturu pāpa’i parau titi e pi’ihia ’ei feiā hi’opo’a. E nehenehe ato’a te feiā e tāvini ’ei feiā hi’opo’a e mau i te tahi atu pi’ira’a.
34.7.3
Te hi’opo’ara’a i te pae faufa’a
E hi’opo’a te feiā hi’opo’a o te titi i te mau pu’e parau i te pae faufa’a a te titi, a te mau pāroita ’e a te mau pū ’ā’amu ’utuāfare, e piti taime i te matahiti. E hi’opo’a ato’a rātou i te mau pu’e parau i te pae faufa’a o te mau vāhi fa’a’oa’oara’a, hō’ē taime i te matahiti. E mau taime te reira nō te fa’aitoito, nō te pāturu ’e nō te ha’api’ipi’i maita’i i te feiā tei pi’ihia nō te fa’atere i te faufa’a a te ’Ēkālesia a te Fatu.
E ara te feiā hi’opo’a ē :
-
’Ua ne’irorohia ma te ti’a te mau tuha’a ’ahuru ’e te tahi atu mau hōro’ara’a ō.
-
’Ua fa’a’ohipa-ti’a-hia te faufa’a a te ’Ēkālesia, ’ua tai’ohia ’e ’ua pāruruhia.
-
’Ua fa’a’ī-mā’ite-hia ’e ’ua tano maita’i te mau pu’e parau i te pae faufa’a.
’Ia vata te ti’a peresideni o te ’āmuira’a nā reira ato’a te pāpa’i parau tei fa’ata’ahia nō te ’ohipa faufa’a, nō te pāhono i te mau uira’a i te taime nō te hi’opo’ara’a.
E hi’opo’a fa’ahou te peresideni titi ’e te tōmite hi’opo’ara’a o te titi i te mau hi’opo’ara’a ato’a. I muri a’e i tā rātou hi’opo’ara’a, e tu’urima te peresideni o te tōmite hi’opo’a nō te titi ’e te peresideni titi i te mau hi’opo’ara’a. E nehenehe te mau hi’opo’ara’a e tu’urimahia ’e e hāponohia ’ia oti te mau vāhi huru ’ē ato’a i te fa’a’āfarohia. E ha’apāpū te peresideni titi ’e te tomite hi’opo’a o te titi ē, e fa’a’āfaro-vave-hia te mau vāhi huru ’ē ato’a.
34.7.4
Te mau hi’opo’a a te ārea ’e te mau tauturu hi’opo’a a te ārea
E pe’e te peresidenira’a o te ārea i te mau arata’ira’a i roto te Arata’i nō te Fa’anahora’a Hi’opo’ara’a Ārea ’ia pi’i-ana’e-hia te ta’ata hi’opo’a nō te ārea ’aore rā te tauturu hi’opo’a nō te ārea.
34.7.5
Te mo’era’a, te ’eiāra’a, te tāvirira’a ’aore rā te rave-huna-ra’a i te moni a te ’Ēkālesia
E fa’aara-’oi’oi-hia te peresideni titi ’aore rā te peresideni nō te tōmite hi’opo’ara’a a te titi mai te mea :
-
’Ua mo’e ’aore rā ’ua ’eiāhia te moni a te ’Ēkālesia.
-
’Ua tāviri ’aore rā ’ua rave huna te hō’ē ta’ata fa’atere i te moni a te ’Ēkālesia.
E fa’a’ite te peresideni titi ’aore rā te peresideni o te tōmite hi’opo’ara’a i te Tuha’a Fa’atere nō te ’Ohipa Hi’opo’ara’a a te ’Ēkālesia. E fa’a’ite ’oia i te ta’ata hi’opo’a rahi a te ārea mai te mea tei rāpae te ’āmuira’a i te fenua Marite ’e i te fenua Canada.
E hāpono te Tuha’a fa’atere nō te ’ohipa hi’opo’ara’a a te ’Ēkālesia (’aore rā te ta’ata hi’opo’a rahi o te ārea) i te hō’ē parau mo’era’a e fa’a’ī i te peresideni titi ra, ’aore rā i te peresideni o te tōmite hi’opo’a. I raro a’e i te fa’aterera’a a te Tuha’a Fa’atere nō te ’Ohipa Hi’opo’ara’a a te ’Ēkālesia (’aore rā te ta’ata hi’opo’a rahi a te ārea), e ara te peresideni titi ’aore rā te peresideni o te tōmite hi’opo’a ē, ’ia hi’opo’a-ti’a-hia te reira ’ohipa. E ara ato’a oia ē, ’ua fa’a’ī-ti’a-hia ’e ’ua hāponohia te ’api parau nō te mo’era’a.
’Ia oti te hi’opo’ara’a i te ravehia, mai te mea e fa’aoti te Tuha’a Fa’atere nō te ’Ohipa Hi’opo’ara’a a te ’Ēkālesia ē, ’ua tāviri te hō’ē ta’ata fa’atere ’aore rā te hō’ē rave ’ohipa a te Ēkālesia i te moni ’aore rā i te fatura’a a te ’Ēkālesia, e ti’a ’ia ravehia te hō’ē fa’aotira’a nō te ti’ara’a melo. Tei roto te mau arata’ira’a i te 32.6.3.3.
Mai te mea e ’itehia te hō’ē tāvirira’a moni rahi, e fa’aara te peresideni titi ’aore rā te peresideni o te tōmite hi’opo’a i te peresidenira’a ārea.
34.7.6
Te pāpa’i parau titi ’aore rā te tauturu pāpa’i parau titi tei fa’auehia e ha’apa’o i te ’ohipa faufa’a
E nehenehe te tōmite hi’opo’ara’a a te titi e fa’ata’a i te pāpa’i parau ’aore rā i te tauturu pāpa’i parau o te titi tei fa’ata’ahia nō te pae faufa’a, e ha’api’ipi’i i te feiā fa’atere pāroita nō ni’a i te fa’aturera’a i te pae faufa’a e ti’a ai. E ha’api’ipi’i ato’a ’oia ia rātou nō te mau ravera’a e tū’ati i te mau tāhapera’a i fa’a’itehia e te mau hi’opo’ara’a.
34.7.7
Nō te tahi atu ā ha’amāramaramara’a
Nō te mau ha’amāramaramara’a hau atu nō ni’a i te mau tōmite hi’opo’ara’a, te feiā hi’opo’a ’e te terera’a o te mau hi’opo’ara’a, hi’o te Pū Tauturu (Help Center) i te ChurchofJesusChrist.org. E nehenehe te mau tōmite hi’opo’ara’a a te titi e fa’atae i tā rātou mau uira’a i te tauturu nō te hi’opo’ara’a a te ārea.
34.8
Te mau tute
Te mau ha’amāramaramara’a i roto i teie tuha’a nō ni’a ïa i te mau tute, nō te fenua Marite ’e Canada ana’e rā. Mai te mea e hina’aro te feiā fa’atere o te autahu’ara’a nō te fenua Marite ’e Canada i te tahi atu ā ha’amāramaramara’a, ’ia niuniu atu rātou i Te Piha Fa’aterera’a Tute a te ’Ēkālesia :
Tax Administration [Te piha fa’aterera’a tute]
50 East North Temple Street, Room 2276
Salt Lake City, UT 84150‑022
Niuniu : 1-801-240-4405 ’aore rā 1-800-453-3860, tīroara’a 2-4405
Nō te feiā fa’atere o te autahu’ara’a i rāpae’au i te fenua Marite ’e i Canada, e niuniu atu rātou i te piha tōro’a rētioni, nō te pāhono i te mau uira’a nō ni’a i te mau tute.
34.8.1
Ti’ara’a tute ’ore
Tei mātarohia, ’aita te ’Ēkālesia e fa’a’aufauhia nei i te tute i ni’a i te mau mau mea e ho’ohia atu, te mau fatura’a, te moni e roa’a ’e te tahi atu, nō te mea e fa’anahora’a nō te ha’apa’ora’a fa’aro’o. E ti’a ’ia fa’a’ohipahia te mau fare ’e te tahi atu mau fatura’a te ’Ēkālesia nō te mau tumu ha’amorira’a, te ha’api’ira’a fa’aro’o ’e te tahi atu mau ’ohipara’a a te ’Ēkālesia. E ara te feiā fa’atere o te titi ’e o te pāroita ē, ’eiaha te mau fare a te ’Ēkālesia e fa’a’ohipahia nō te ’ohipa poritita, te tapiho’ora’a ’aore rā te tupuha’ara’a, mai tei fa’a’itehia i roto i te mau hi’ora’a rau i roto te 35.5.2. Mai te peu e ravehia te reira, e ’ōfati ra ïa tātou i te mau ture nō te ti’ara’a tute ’ore i ni’a i te mau mea e fatuhia e te ’Ēkālesia.
E mea faufa’a roa ’ia pe’e te feiā fa’atere nō te titi ’e te pāroita i teie mau arata’ira’a nō te fa’aherehere i te ti’ara’a tute ’ore o te ’Ēkālesia. Mai te mea e ’ōfati te hō’ē titi i teie ti’ara’a tute ’ore o te ’Ēkālesia, e nehenehe te tahi atu mau ’āmuira’a o te ’Ēkālesia e fa’autu’a-ato’a-hia.
34.8.2
Tute ho’oho’ora’a
E mea ta’a ’ē te mau ture tute ho’oho’ora’a i ni’a i te ’Ēkālesia i terā fenua ’e terā fenua, terā tuha’a fenua ’e terā tuha’a fenua. E niuniu te feiā fa’atere i Te Piha Fa’aterera’a Tute a te ’Ēkālesia ’aore rā i te piha tōro’a rētioni nō te hi’o ē, e ’aufau ānei te ’Ēkalesia ’aore rā ’aita i taua mau tute ra.
34.8.3
Tute fenua
Nā te Tuha’a a te ’Ēkālesia nō te ’ohipa tute e ha’apa’o i te mau fatura’a fenua ato’a ’e nāna e ’aufau i te mau tute ato’a i ni’a i te mau tute fenua. ’Aita tā te feiā fa’atere o te fenua iho e ’ohipa i reira.