Nā te parau mau ’oe e fa’ati’amā

Tē hina’aro nei te Metua i te ao ra i tāna mau tamāhine e mau tamaiti ’ia tāmau noa i te ha’api’i. E tumu i te pae tino ’e i te pae vārua nō te ’imira’a i te ha’api’i i te mau mea, ’e te herera’a i te reira. E ’ere te ha’api’ira’a nō te noa’a noa te moni. E tuha’a nō tā ’oe fā mure ’ore, ’ia rahi atu ā i te riro mai te Metua i te ao ra te huru.

Te orara’a ma te huru parauti’a, te aura’a ra ’ua here ’oe i te mea ti’a i te mata o te Atua—hau atu i tā ’oe e here i tō ’oe vaira’a fāna’o, i te tu’iro’o ’e i te fa’a’ōhie-noa-ra’a ia ’oe. ’O te ravera’a i te ’ohipa ti’a i te mea noa ho’i e mea ti’a te reira.

E tao’a faufa’a rahi tā ’oe e nehenehe e hōro’a. Tei roto i te ’evanelia a Iesu Mesia te mau pāhonora’a i te mau uira’a o te orara’a. ’O te ’ē’a ho’i e tae atu ai i te hau ’e te ’oa’oa. ’Aita paha ’oe i ’ite i te mau mea ato’a, ’ua nava’i rā tō ’oe ’ite nō te here i tō ’oe ta’ata tupu, nō te fa’a’ite i te mau parau tumu mau ia rātou, ’e nō te ani ia rātou ’ia ha’api’i rahi atu ā.

E ha’api’i noa i te mau mea. ’A hi’o i te mau rāve’a nō te fa’a’ā’ano atu ā i tō ’oe ferurira’a ’e tō ’oe ’aravihi. Tei roto i teie mau rāve’a te ha’api’ira’a hua a te fare ha’api’ira’a, aore rā a te ha’api’ipi’ira’a tōro’a, ’e tae noa atu te ha’api’ira’a tā ’oe e ’apo mai nā roto i te tahi atu rāve’a ’o tā ’oe e ti’aturi. ’A fa’aō ato’a mai i te Fatu i roto i tā ’oe mau tauto’ora’a, ’e e arata’i ’oia ia ’oe.

’A ha’api’i mai i te mau parau mau pae vārua. ’A ha’api’i ai ’oe nō ni’a i teie ao tei roto ’oe, ’a ha’api’i ato’a mai nō ni’a i te Fa’aora, tei hāmani i teie ao. ’A tuatāpapa i tōna ora ’e tāna mau ha’api’ira’a. ’A fa’ariro i te séminaire ’e te institut ’e tā ’oe iho tuatāpapara’a ’evanelia ’ei tuha’a nō tā ’oe tītaura’a ’ite i te roara’a o te orara’a. E nehenehe te reira e fa’aineine ia ’oe nō te tāvini i te hō’ē misiōni ’e nō te fa’a’ite i te ’evanelia i te roara’a o tō ’oe orara’a.

’A ora i te huru parauti’a. ’Eiaha roa atu e ’eiā, e ha’avare, e punu ’e e rāmā—i te fare ha’api’ira’a, i te ’ohipa, i ni’a i te natirara, i te mau vāhi ato’a. ’Ei pipi ha’apa’o maita’i ’oe nō Iesu Mesia i mua i te ta’ata ’e i te vāhi ’ōmo’e.

E fa’arahi te fāito ha’api’ira’a i tō ’oe ’aravihi ’ia tāvini i te Fatu, ’oia ato’a ’ei misiōnare. E hōro’a te reira ia ’oe i te mana nō te ha’amaita’i ia vetahi ’ē, tō ’oe iho ā rā ’utuāfare. Rahi noa atu ’oe i te ha’api’i, rahi noa ato’a atu ’oe i te tauturu i te patura’a i te bāsileia o te Atua ma te fa’auru i tō te ao nei ’ia rave i te maita’i.

E tae mai te hau ’e te fa’aturara’a iāna iho i te huru parauti’a. ’Ia tū’ati ana’e tā ’oe mau parau ’e tā ’oe mau ’ohipa i ni’a i te parau mau, tē fa’a’ite ra ïa ’oe ē, e nehenehe ’oe e ti’aturihia mai e te ta’ata ’e e te Fatu.

’Ia ti’a ’oe nō te mau ha’api’ira’a a Iesu Mesia, e ti’a ato’a mai ’oia i pīha’i iho ia ’oe. ’O Iesu Mesia tō ’oe pūai ! ’Aita paha te tahi pae e tū’ati i te mea tā ’oe e ti’aturi ra, e ’itehia rā tō ’oe itoito ’e tō ’oe ateate. ’Ore noa atu ā te ta’ata e pe’e i tō ’oe hi’ora’a, e rahi mai tō ’oe ’itera’a pāpū ’e tō ’oe ti’aturi ’e tō ’oe fa’aro’o i te Mesia.