E ha’amatara te mau ’ōro’a ’e te mau fafaura’a i te mau ha’amaita’ira’a a te Atua nō ’oe

E fa’atoro te mau ’ōro’a ia ’oe ia Iesu Mesia ra. Te hō’ē ’ōro’a ’o te hō’ē ïa ’ohipa mo’a ma te aura’a ’e te tāpa’o ’o tē ha’api’i nō ni’a ia Iesu Mesia. ’Ei hi’ora’a, e ’ere te ’ōro’a mo’a i te faraoa noa ’e te pape. E fa’aha’amana’o te reira ia tātou i te Fa’aora.

E tāpa’o te mau fafaura’a nō te here, te ti’aturi ’e te mau tītaura’a a te Atua. E fa’atae te reira i tō ’oe tā’amura’a ’e te Atua i te hō’ē fāito hōhonu a’e. Tē fa’a’ite nei te ravera’a fafaura’a ē, tē here nei ’oe i te Atua ’e tē parau fafau nei ’oe iāna ra. E nehenehe ’oe e ti’aturi iāna, ’e e nehenehe tāna e ti’aturi ia ’oe. Nā roto i teie fafaura’a hōhonu a’e e matara rahi ai tōna mana ma te tauturu ’ia ’oe ’ia ha’apa’o i tā ’oe mau fafaura’a.

E rave ’oe i te fafaura’a ’e te Atua ’ia bāpetizo-ana’e-hia ’oe ’e ’ia rave ana’e ’oe i te ’ōro’a mo’a. ’Ia bāpetizo-ana’e-hia ’oe, e parau fafau ’oe ’ia rave i ni’a ia ’oe i te i’oa o Iesu Mesia, ’ia tāvini iāna ’e ’ia ha’apa’o i tāna mau fa’auera’a i te roara’a o tō ’oe orara’a. I te ’ōro’a mo’a, e fafau ato’a ’oe ’ia ha’amana’o noa iāna. Teie tā ’oe mau parau fafau. ’A ineine noa ai ’oe i te ha’apa’o i te reira, e parau fafau mai te Atua e hōro’a mai ia ’oe i te Vārua Maita’i ’ei hoa tāmau.

’A fa’ariro i te ’ōro’a mo’a ’ei hōro’a mo’a. ’A fa’a’ite i tā ’oe fafaura’a parau ia Iesu Mesia nā roto i te fa’aineinera’a ia ’oe nō te hō’ē taime mo’a i te ’ōro’a mo’a. ’A feruri e aha tā ’oe e nehenehe e rave nō te fa’ariro i teie ’ōro’a ’ei taime rahi i te pae vārua nō tō ’oe hepetoma.

’A ’imi i te Fa’aora i roto i te mau ’ōro’a. ’Ia māta’ita’i ’aore rā ’ia ’āmui ana’e ’oe i te hō’ē ’ōro’a, ’a ui ia ’oe iho : « E aha te ha’api’ira’a nō ni’a ia Iesu Mesia tā’u e ’apo nei i roto i te reira ? » ’aore rā « Nāhea te reira i te ha’afātata atu ā iā’u iāna ra ? » ’A ha’apa’o maita’i i te mea tā te Vārua e ha’api’i ia ’oe.

’A vaiiho i tā ’oe mau fafaura’a ’ia arata’i i tā ’oe mau ’ohipa. ’Ia rave ana’e ’oe i te hō’ē mā’itira’a, ’a ha’amana’o i tō ’oe tā’amura’a fafaura’a fafaura’a ’e te Atua. ’Ia vai atati’a ’oe i mua iāna. ’A ui ia ’oe iho : ’Ua tū’ati ānei te reira i tā’u mau fafaura’a ? ’Ei hi’ora’a, ’ua here ānei au ’e tē aupuru ra ānei au ia vetahi ’ē, tē tāmāhanahana ra ānei au i te ta’ata tei hina’aro ’ia tāmāhanahanahia, ’e tē ti’a ra ānei au ’ei ’ite nō te Mesia—i te mau vāhi ato’a ’e i te mau taime ato’a ?

E nehenehe ’oe e fa’ari’i i te mana nō te upo’oti’a i ni’a i te fa’ahemara’a, i te hara ’e i te mau tāmatara’a o te orara’a. E ha’amatara te ravera’a ’e te ha’apa’ora’a i te mau fafaura’a i te mana o te Atua nō ’oe. Maoti taua mana ra, e nehenehe ’oe e fa’aruru i te mau mea ato’a ma te ti’aturi. ’O Iesu Mesia tō ’oe pūai !

E nehenehe ’oe ’ia mā ’e ’ia fa’a’orehia te hara. Te hō’ē tuha’a o te parau fafau a te Atua ia ’oe nō te ha’apa’ora’a i tā ’oe fafaura’a nō te bāpetizora’a, ’o te matarara’a ïa tā ’oe mau hara. Te aura’a ra, ’ia tātarahapa ana’e ’oe ’e ’ia tāpe’a i tā ’oe parau fafau i mua i te Atua, e fa’a’ore ’oia i tā ’oe hara ma te tauturu i te ha’amaita’i ia ’oe.

E nehenehe te Vārua e pārahi noa i pīha’i iho ia ’oe. Te tahi atu fafaura’a tei tāhonohia i te bāpetizora’a ’e i te ’ōro’a mo’a, ’o te auhoara’a tāmau ïa o tōna Vārua ’e te aupurura’a a te mau melahi. ’Aita roa atu e tītauhia ia ’oe ’ia fa’aruru i tō ’oe mau fifi ’o ’oe ana’e. E’ita roa te Atua e fa’aru’e i tāna mau tamari’i nō te fafaura’a—e nehenehe ’oe e ti’aturi i te reira.

E nehenehe ’oe e fa’ari’i i te turu o te nūna’a fafauhia a te Atua. E tā’amura’a tō ’oe i te va’ata’ata nō te fafaura’a i roto i te ’Ēkālesia a te Fa’aora. E fa’ateitei ’e e fa’aitoito ’oe te tahi ’e i te tahi. E ’oto ’āmui atu ’oe ’e e ’oa’oa ’āmui ho’i. Tē amo nei ’outou i te mau hōpoi’a a te tahi ’e te tahi. Tē vai nei tō ’oe ’utuāfare, te ’episekōpo, te feiā fa’atere ’e te tahi atu mau melo o te ’Ēkālesia nō te tauturu ia ’oe, ’e e nehenehe ’oe e tauturu ia rātou.