6.
Poakohng Koht, poakohng mehn impomw
Madiu 22:37–40
Pwehn sewese iuk en pilada pilipil mwahu kan, Koht ketikihda kosonned akan. E wia met pwehki E poakohng uhk. Oh kahrepe keieun kesempwal en kapwaiada Sapwellimen Koht kosonned akan iei pwe ke poakohng Ih. Limpoak me wia poahsoan en sapwellimen Koht kosonned akan.
Mehlel poatoapoat kan
Koht poakohng kumwail. E wia Sememwail. Sapwellime limpoak unsek o kak kahreiong ahmw pil poakohng Ih. Ansou me limpoak ong Samatail Nanleng wia mehkot me keieu kesempwal nan ahmw mour, koasoandi tohto pahn mengeila.
Kosonned riau me keieu laud nan kosonned akan iei en poakohng Koht oh poakohng mehn impwomw kan. Oh ihs me mehn impomw? Koarusie! Soahng koaros kohsang nan pwuhk sarawi kan oh sang rehn soukohp akan ehuong kosonned riau et.
Aramas koaros wia riomw—iangahki, ei, aramas akan me wekisang uhk de kin sapwungkin uhk. Sahm Nanleng mwahuki Sapwellime seri kan en poakpene. Ansou me ke papah Sapwellime seri kan, ke wie papah Ih.
Luhk akan
Kasalehiong Koht me ke poakohng Ih sang ni ahmw kin kapwaiada Sapwellime kosonned akan. Ni karasepe, wauneki rahn Sarawi, me iangahki kaunopada pwe ken kak iang ale kamadipw sarawi, ke kasalehiong Koht me ke men kasarawiong rahn ehu ong Ih. Ni omw kaisihsol oh pwain meiroang kan, ke kasalehiong Koht me Sapwellime doadoahk inenen kesempwal ong uhk sang dipwisou en sampah kan. Ansou me ke kin doadoahngki mwaren Koht oh Krais ni wahu, kaidehn ni mwohmw de ni ehu soangen ahl, ke kasalehda me ke kapingki soahng koaros me Ira wiaiong uhk.
Apwalih koaros ni duwen sapwellimen Koht seri kei. Ni omw wia werek en Sises Krais men, ke kak apwalih aramas koaros, palien lamalam koaros, oh pwihn teikan ki limpoak, wahu—ahpw mehlel irail kan me kin ekei pak lelohng kahpwal en koasoi oh mwekid kamedek kan. Kohla rehn irail me loaloid, kelekelehpw, de sohte sawasperail. Sewese irail en kehn sapwellimen Sahm Nanleng limpoak me pahn kohsang rehmw. Ehukihong irail kapai kan me E ketkihong uhkehr, koh lukehiong irail en idawehn Sises Krais.
Tehk mwahu me ahmw lokaia kin kasalehda ahmw limpoak ong Koht oh mehteikan—sohte lipilipil ma kumwail koasoai wasahkis de nan wehwe. Inda mehkot me pahn kakehlakahda emen —kaidehn mehkot me katohrohr, kamedek, de kasaroh, kamwan pil duwehte. Ahmw lokaia kan kak mie mene. Mweidohng irail en kehlailki mehkot mwahu.
Kasalehiong ahmw peneinei limpoak. Limpoak ong sapwellimen Koht seri kan koaros kin tepida sang nan imwomw. Wia omw pwukoahn wiahda nan imwomw wasa ehu me koaros pahn kehn limpoak en Sounkomour o.
Kapai kan me inoudier
Ahmw ehuong Koht pahn laudla ni omw kin kasalehda omw limpoak sang ni kapwaiada Sapwellime kosonned akan oh kolokol inou kan ong Ih.
Ahmw ehuong mehteikan pahn laudla ni omw pahn kasalehda ahmw limpoak sang ni papah. Ke pahn diarada popohl ansou me ke wiahda sampah en wia wasa ehu me audaudki limpoak.
Peidek oh Pasapeng Kan
Ia mwomwen ai pahn kehn limpoak en Koht? Sapwellimen Sahm limpoak kin mie ansou koaros. Koasoaiong Ih ansou en kapakap. Ehukiong Ih omw pepehm kan oh Rong pepehm kan sang Reh. Wadek Sapwellime mahsen akan nan pwuhk sarawi kan. Medewe soahng kan koaros me E ketin wiaiong uhk. Kohla wasa kan de ni kemwekid kan me Sapwellime Ngehno kin mihmi ie.
Kauno mwahuki ien poakohng koarusie, pil iangahki irail akan me kin suwediong ie? Kauno kasik ken poakohng omw imwintihti kan oh kapakapki irail akan me sohte mwahu ong uhk. Ahpw, e sohte wehwehki ken mihmi nan irair ieu me pahn kauwehla ahmw pepehm, paliweromw, de pil palingenomw. Wiahda irepe mwahu kan pwe ken kak ahneki perehre. Ma mie me tiahksuwedih iuk de kalokei iuk—de ma ke pil ese me soahng wet wiewawiong aramas emen—kosoiong aramas laud me ke koapwoaroapwoariki men.
Ansou da oh Ia mwomwen ai pahn kak esehla irail kan me wia ohl emen de lih emen? Me keieun mwahu ong esehla mehteikan iei sang ni omw pahn wiahkihla koampokepahmw mehlel. Ni ansou me ke pwulopwul, wiahda kempoakepahmw mwahu ong aramas tohto. Nan ekei tiahk, me pwulopwul kan kin esehla ekei aramas sang ni kemwekid mwahu kan en pwihn. Sang ni pein ahmw keirda oh perehrehn palien pepehm oh palingenomw, kaiala kemwekid en emen-emen kan lahu ke ekis laudla—sounpar 16 iei sounpar me mwahu ehu. Koasoieng ahmw pahpa nohno kan oh ahmw kaun akan. Kaiala ehupene me inenen kesempwal akan ong ansou me ke laudla. Kin patehng irail kan me kin sewese iuk en kolokol ahmw inou kan ong Sises Krais.
Dahme Ih pahn kak wia ma ai wasahn kousoan sohte wia wasahn limpoak ehu? Sounkomour o wehwehki ahmw irair en, oh E poakohng uhk. Kanengamah, doulahte oh kolokol sapwellimen Koht kosonned akan, oh wia karasaras mwahu ong ahmw peneinei kan. Ahmw wiewia tikitik kan en limpoak kak wiahda mehkot laud. Ke kak pil wiahda ehupene kan nan ahmw peneinei en ward. Kaunopada ansou wet ken wiahda pein ahmw peneinei me poahsoanda pohn padahk kan en Sises Krais. Sises Krais iei kehlepomw!
Kilang Aiseia 58:3–11 (kahrepen kaisihsol kan; 58:13–14(kapaipen wauneki rahn en Sapad); Malakai 3:8–10 (kapaipen pwain meiroang; Luk 6:27–28 (poakohng ahmw imwin tihti kan); 10:25–37 (ihs me wia mehn mpei?); Sohn 3:16–17 (Koht poakohng kitail, eri E kadaredo Sapwelime Ieroso); 14:15 (kitail kin kapwaiada kosonned kan pwehki kitail poakohng Koht);1 Sohn 4:19(kitail poakohng Koht pwehki E poakohng kitail); Mosaia 2:17 (ansou me kitail kin papah mehteikan, kitail wie papah Koht.
Peidek kan en kisin likou en mweimwei en pidelong nan Tehnpas sarawi
-
Komw kin idawehn padahk kan en Mwomwohdiso en Sises Krais nan ahmw mour oh mwohn aramas ong tohn ahmw peneinei oh mehteikan?
-
Komw kin pwapwain meiroang en eisek-kis-ehu ni unsek?