4.
Sises Krais pahn sewese iuk
Melkahka kan 147:3
Sises Krais iei kehlepomw. E wia soahng koaros pwe ken kak ahneki popohl nan mour wet oh pil kokolahte. Sang ni ahmw pahn pilada Ih oh Sapwellime rongamwahu o, ke pilipilada en alehdi peren oh popohl soutuk.
Mendahte ma ke kin song en wia pilipil mwahu kan, ekei pak ke pahn kin wiahda sapwung. Ke pahn kin wia mehkot kei me ke pahn kin koaluhkihla mwuhr. Koarusie kin wia. Ansou me met kin wiawi, e mengei ken ahneki pepehm en kaluet de medewe ma ke pahn mwahula ehu rahn. Ahpw mie rohng me mwahu—rohng kaselel, rohng en koapwoaroapwoar! Pwehki Koht Ah poakohng uhk, E kadaredo Sapwellime Iehros, Sises Krais, me pein Ih toutoukihla dipomw kan pwe ken kak koluhla, ale mahk, oh kekeirda.
Mehlel soutuk kan
Sises Krais pahn ketin kakehlailihuk. E pahn seweseiuk wekidala ahmw ineng kan, madamadau kan, oh ahmw mwekid kan. Ansou me ke kin pwunod, masepwehk, de ahneki kahpwal ni mwohmw sohte lipilipil, E pahn kansenamwahuih iuk. E pahn seweseiuk nan soahng koaros nan ahmw mour. Ke kak koapwoaroapwoarki Ih.
Koluhla kaidehn koalokepen dihp; e wia ahl me Sounkomour o kin kapit kitailsang nan dihp. En koluhla wehwehki en wekila—sohpeisang dihp oh sohpeilahng Koht. E wehwehki en keirida oh alehdi mahk. Soangen wekidekla wet sohte kin wiawi pak-ehute; e kin wihwiawi kokohwei.
Luhk akan
Alehda Sises Krais pwehn wia poahsoan en ahmw mour. Rapahki Sapwellime sawas nan soahng koaros me ke kin wia.
Koluhla. Sohpeilahng Kauno ni ahmw ahniki ineng en keirda. Ansou me ke kin wiahda mehkot sapwung, ni mehlel wehkada mwohn Koht oh, ma mie anahnepe, ong ahmw pisop oh ong aramas me ke kakete kamedekelahr. Wia wehn ahmw kak en kapwungala.
Perepereniki kisakis en wiahda mwahusang oh mwahulasang. Mendahte ansou kan me apwal oh kin pwandasang dahme ke kasik, kedeh uhdihsang songosong. Wie doadoahkete oh koapwoaroapwoariki Kauno. E pahn ketin sewese iuk ansou koaros.
Kapai kan me inoudier
Sahm nanleng pahn mahkehng uhk oh kamwahuihukala ni ahmw pahn koluhla. E pahn weliankihdi ahmw pepehm en koluhka ki meleilei oh popohl. E solahr pahn tamataman dipomw kan. Sises Krais me wia kehlepomw, oh sang ni Sapwellime kehl, ahmw ineng en men kapwaiada Sapwellime kosonned kan pahn laudla.
E pahn wekidala ahmw mohngiong oh ahmw mour. Ekis ekis, ke pahn kekeirda oh duwehla Ih.
Peidek oh Pasapeng Kan
Ia mwomwen ai pahn ese me Koht mahk ong ie? Koht kin inouki me E pahn mahkong koaros me kin koluhla. Ansou me ke kin kehn nsenamwahu sang Ngehno, ke kak ese me Sapwellimen Sounkomouro manaman en doarehla wie doadoahk nan ahmw mour.
Ansou da me I anahne sawasepen ai pisop pwe ien koluhla? Ahmw pisop kin kolokol kih kan en prihsduhd oh ahneki kisakis sang palingehn pwe en seweseiuk ken koluhla. Ke kak rapahki sapwellime sawas oh kaweid ansou koaros. Ma ke wiahda dihp laud akan, me duwehte kauwehla kosonned en mwakelekel, tuhwong ahmw pisop. E sohte pahn kadeikuhkada. E wia weliepen Sises Krais oh pahn sewese iuk en ese duwen koluhla ni unsek oh alehdi sapwellimen Sounkomour o manaman en kamwahula oh kakehlail.
Ih songosong en koluhla, ahpw Ih kin kalapw wiewia dihp ohte. Dahme I konehng wia?” Kedehpa uhdi. Sohpeilahng Krais, oh kihong Ih ahmw pwoson. Sapwellime mahk itar. Pwurehng song. Ke sohte kin kelehpwla nan ahmw nanantiong en keirida. Sises Krais kin ieiang uhk ansou koaros.
Kilang Enos 1:6(pepehm en dihp kak kamwakelsang); Mosaia 4:3 (sang kaweid en Ngehn Sarawi, Koht kin kaweidkinuhk me ke alehier mahk); 26:30(Sounkomouro kin mahk ma kitail kin koluhla); Ether 12:27 (mahk en Sounkomouro kak kahrehiong mehkot luet ah kehlaila); Moronai 6:8(koaros me kin koluhla kin ale mahk); 10:32(unsekla rehn Krais); Doctrine and Covenants 1:32 (Kauno kin mahkohng irail akan me kin koluhla); 58:42–43 (koluhla iangahki wehkada oh pwilikihdi dihp).
Peidek kan en kisin likou en mweimwei en pidelong nan Tehnpas sarawi
-
Mie ahmw kadehdepen Sapwellimen Krais Tomwpen Dihp oh Eh ketin wia ahmw Sounkomour oh Soundoar?
-
Mie dihp toutou nan omwi mour me anahne en kopwungpwungla rehn prishduhd kan pwehn wia kisehn omwi koluhla?